ਕੋਰੋਨਾ ਮਾਹਮਾਰੀ ਦੇ ਦੌਰਾਨ ਸੁਰੱਖਿਆ ਬਲਾਂ ਨੂੰ ਚੁਸਤ ਦਰੁਸਤ ਰੱਖਣ ਅਤੇ ਕੋਵਿਡ ਤੋਂ ਬਚਾਉਣ ਲਈ ਉਨ੍ਹਾਂ ਦੀ ਇਮਯੂਨਿਟੀ ਨੂੰ ਹੋਰ ਵਧਾਉਣ ਲਈ ਅੱਜ ਜਿਲ੍ਹਾ ਪੁਲੀਸ ਲਾਈਨ ਵਿਖੇ ਓਪਨ ਜਿੰਮ ਪੁਲਿਸ ਅਧਿਕਾਰੀਆਂ, ਕਰਮਚਾਰੀਆਂ ਅਤੇ ਨਵੇਂ ਭਰਤੀ ਹੋਣ ਵਾਲੇ ਨੌਜਵਾਨਾਂ ਨੂੰ ਸਮਰਪਿਤ ਕੀਤਾ ਗਿਆ। ਇਸ ਮੌਕੇ ਐਸ ਐਸ ਪੀ ਅਮਨੀਤ ਕੌਂਡਲ ਨੇ ਕਿਹਾ ਕਿ ਸਿਹਤ ਵਧੀਆ ਰੱਖਣ ਲਈ ਖੇਡ ਦੇ ਮੈਦਾਨ ਦੇ ਨਾਲ-ਨਾਲ ਓਪਨ ਜਿੰਮ ਦਾ ਕੋਈ ਮੁਕਾਬਲਾ ਨਹੀ ਹੈ।ਐਸ ਐਸ ਪੀ ਨੇ ਕਿਹਾ ਕਿ ਕੋਰੋਨਾ ਕਰਕੇ ਇੰਡੋਰ ਜਿਮ ਚ ਕਸਰਤ ਕਰਨੀ ਸਹੀ ਨਹੀਂ ਹੈ। ਇਨਡੋਰ ਜਿੰਮ ਵਿੱਚ ਨਾ ਕੇਵਲ ਸਮਾਜਿਕ ਦੂਰੀ ਨਹੀਂ ਰੱਖੀ ਜਾ ਸਕਦੀ ਅਤੇ ਪਸੀਨਾ ਜਾਂ ਸਾਹ ਕਰਕੇ ਬੀਮਾਰੀ ਫੈਲਣ ਦਾ ਖਦਸ਼ਾ ਜਿਆਦਾ ਹੁੰਦਾ ਹੈ। ਇਸ ਕਰਕੇ ਖੁੱਲੇ ਮੈਦਾਨ ਜਾਂ ਪਾਰਕ ਚ ਬਣੇ ਹੋਏ ਓਪਨ ਜਿੰਮ ਅੱਜ ਦੇ ਸਮੇਂ ਦੀ ਲੋੜ ਹਨ। ਉਨ੍ਹਾਂ ਕਿਹਾ ਕਿ ਡੀ ਜੀ ਪੀ ਪੰਜਾਬ ਨੇ ਸਾਰੇ ਜਿਲਿਆਂ ਨੂੰ ਇਹ ਹਦਾਇਤਾਂ ਜਾਰੀ ਕੀਤੀਆਂ ਹਨ ਕਿ ਉਹ ਪੁਲਿਸ ਕਰਮੀਆਂ ਲਈ ਇੱਕ ਵਿਸ਼ੇਸ਼ ਓਪਨ ਜਿੰਮ ਦਾ ਨਿਰਮਾਣ ਕਰਨ। ਐਸ ਐਸ ਪੀ ਨੇ ਕਿਹਾ ਕਿ ਫਤਹਿਗੜ੍ਹ ਸਾਹਿਬ ਜਿਲ੍ਹੇ ਵਿੱਚ ਪੁਲਿਸ ਲਾਇਨ ਵਰਗਾ ਮਾਹੌਲ ਕਿਤੇ ਨਹੀ। ਖੁੱਲੇ ਮੈਦਾਨ ਦੇ ਨਾਲ ਨਾਲ ਵੱਡੀ ਗਿਣਤੀ ਵਿੱਚ ਦਰੱਖਤ ਲੱਗੇ ਹੋਏ ਹਨ ਅਤੇ ਇਹ ਸ਼ਹਿਰ ਤੋਂ ਦੂਰ ਹਨ।
ਸ਼੍ਰੀਮਤੀ ਕੌਂਡਲ ਨੇ ਕਿਹਾ ਕਿ ਜਲਦੀ ਹੀ ਜਿਲ੍ਹੇ ਦੇ ਹੋਰ ਕਸਬਿਆਂ ਵਿੱਚ ਪੁਲਿਸ ਵੱਲੋਂ ਅਜਿਹੇ ਜਿੰਮ ਪੁਲਿਸ ਕਰਮੀਆਂ ਅਤੇ ਹੋਰ ਕਸਰਤ ਕਰਨ ਵਾਲੇ ਲੋਕਾਂ ਲਈ ਬਣਵਾਏ ਜਾਣਗੇ।ਡੀ ਐਸ ਪੀ ਹੈਡਕੁਆਟਰ ਹਰਦੀਪ ਸਿੰਘ ਬੰਡੂਗਰ ਨੇ ਜਿੰਮ ਬਾਰੇ ਦੱਸਿਆ ਕਿ ਲਗਭਗ ਸਾਢੇ ਤਿੰਨ ਲੱਖ ਰੁਪਏ ਦੀ ਲਾਗਤ ਨਾਲ ਬਣੇ ਇਸ ਜਿੰਮ ਦੇ ਨਾਲ ਕੁਝ ਟਾਇਲਟ ਵੀ ਬਣਾਏ ਜਾਣਗੇ। ਉਨ੍ਹਾਂ ਦੱਸਿਆ ਕਿ ਇਸ ਜਿੰਮ ਦੀ ਖਾਸੀਅਤ ਇੰਨਡੋਰ ਜਿੰਮਾਂ ਤੋਂ ਕੁਸ਼ ਇਸ ਤਰ੍ਹਾਂ ਵੱਖਰੀ ਹੈ ਕਿ ਇਸ ਜਿੰਮ ਦੇ ਉਪਕਰਣਾਂ ਨਾਲ ਕਸਰਤ ਕਰਨ ਸਮੇਂ ਕਿਸੇ ਵੀ ਤਰ੍ਹਾਂ ਦੇ ਵਾਧੂ ਭਾਰ(ਵੇਟ) ਦੀ ਲੋੜ ਨਹੀ ਪੈਂਦੀ। ਇਹ ਉਪਕਰਣ ਕਸਰਤ ਕਰਨ ਵਾਲੇ ਵਿਅਕਤੀ ਦੇ ਕੱਦ ਅਤੇ ਉਸਦੇ ਵਜਨ ਅਨੁਸਾਰ ਸ਼ਰੀਰ ਦੇ ਵੱਖ ਵੱਖ ਅੰਗਾਂ ਤੋ ਜੋਰ ਪਾਉਂਦੇ ਹਨ ਤਾਂ ਕਿ ਉਸ ਵਿਅਕਤੀ ਦੀ ਮਾਸਪੇਸ਼ੀਆਂ ਜਾ ਮਸਲਜ ਨੂੰ ਮਜਬੂਤੀ ਮਿਲ ਸਕੇ ਪਰ ਕੋਈ ਨੁਕਸਾਨ ਨਾ ਹੋਵੇ। ਨੋ ਉਪਕਰਣਾ ਬਾਰੇ ਡੀ ਐਸ ਪੀ ਬੰਡੂਗਰ ਨੇ ਦੱਸਿਆ ਕਿ ਉਨ੍ਹਾਂ ਵਿੱਚ ਲੈਗ ਪ੍ਰੈਸ, ਪਾਵਰ ਪੁਸ਼, ਮਿੰਨੀ ਸਕਾਈ, ਹੈਲਥ ਵਾਕਰ, ਟ੍ਰਿਪਲ ਟ੍ਰਸਟਰ, ਰਾਅਰ, ਸਾਈਕਲ, ਡਬਲ ਸਕਾਈ ਸਟੈਪਰ, ਸਿੱਟ ਅੱਪ ਬੈਂਡ ਸ਼ਾਮਿਲ ਹਨ। ਇਸ ਮੌਕੇ ਐਸ ਪੀ ਹਰਪਾਲ ਸਿੰਘ, ਅਮਰਜੀਤ ਸਿੰਘ ਮਟਵਾਨੀ, ਡੀ ਐਸ ਪੀ ਹਰਦੀਪ ਸਿੰਘ ਬਡੂੰਗਰ, ਡੀ ਐਸ ਪੀ ਸੁਖਮਿੰਦਰ ਸਿੰਘ ਚੌਹਾਨ, ਡੀ ਐਸ ਪੀ ਪ੍ਰਿਥਵੀ ਸਿੰਘ ਚਾਹਲ, ਡੀ ਐਸ ਪੀ ਮਨਜੋਤ ਕੌਰ,ਡੀ ਐਸ ਪੀ ਸੁਖਵਿੰਦਰ ਸਿੰਘ, ਡੀ ਐਸ ਪੀ ਰਘਬੀਰ ਸਿੰਘ, ਡੀ ਐਸ ਪੀ ਮਨਜੀਤ ਸਿੰਘ, ਡੀ ਐਸ ਪੀ ਹੰਸ ਰਾਜ, ਐਸ ਐਚ ਓ ਰਜਨੀਸ਼ ਸੂਦ, ਮਨਪ੍ਰੀਤ ਸਿੰਘ ਬਸੀ, ਹਰਮਿੰਦਰ ਸਿੰਘ ਖੇੜੀ ਨੌਧ ਸਿੰਘ ਸਮੇਤ ਪੁਲਿਸ ਵਿਭਾਗ ਦੇ ਹੋਰ ਅਧਿਕਾਰੀ ਵੀ ਮੌਜੂਦ ਸਨ।