ਸ਼ਹਿਰ ਵਿਚ 32 ਆਟੋਮੈਟਿਕ ਨੰਬਰ ਪਲੇਟ ਡਿਟੈਕਸ਼ਨ ਐਂਡ ਰਿਕਾਰਡਿੰਗ (ਏ ਐਨ ਪੀ ਆਰ) ਕੈਮਰੇ ਲਗਾਉਣ ਨਾਲ ਸੀਨੀਅਰ ਪੁਲਿਸ ਕਪਤਾਨ ਸਤਿੰਦਰ ਸਿੰਘ ਨੇ ਅੱਜ ਇਥੇ ਸੁਰੱਖਿਅਤ ਮੁਹਾਲੀ ਪ੍ਰੋਜੈਕਟ ਦੀ ਸ਼ੁਰੂਆਤ ਕੀਤੀ।ਇਹ ਕੈਮਰੇ 16 ਥਾਵਾਂ 'ਤੇ ਲਗਾਏ ਗਏ ਹਨ ਜੋ ਕਿ ਫੇਜ਼ 1 ਅਤੇ ਮਟੌਰ ਪੁਲਿਸ ਸਟੇਸ਼ਨਾਂ ਦੇ ਅਧੀਨ ਆਉਂਦੇ 18 ਕਿਲੋਮੀਟਰ ਦੇ ਹਿੱਸੇ ਨੂੰ ਕਵਰ ਕਰਦੇ ਹਨ। ਇਹ ਇਕ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਅਧਾਰਤ ਵੀਡੀਓ ਨਿਗਰਾਨੀ ਪ੍ਰਣਾਲੀ ਹੈ ਅਤੇ ਇਸ ਵਲੋਂ ਸ਼ਹਿਰ ਨੂੰ ਸੁਰੱਖਿਅਤ ਬਣਾਉਣ ਵਿਚ ਅਹਿਮ ਭੂਮਿਕਾ ਨਿਭਾਉਣ ਦੀ ਉਮੀਦ ਹੈ।
ਐਸਐਸਪੀ ਨੇ ਦੱਸਿਆ ਕਿ ਖਰੜ ਅਤੇ ਜ਼ੀਰਕਪੁਰ ਸਬ ਡਵੀਜਨਾਂ ਵਿਚ ਲਗਭਗ 2 ਕਰੋੜ ਰੁਪਏ ਤੋਂ ਵੱਧ ਦੀ ਲਾਗਤ ਨਾਲ ਲਗਭਗ 200 ਕੈਮਰੇ ਲਗਾਉਣ ਦਾ ਕੰਮ ਪ੍ਰਗਤੀ ਅਧੀਨ ਹੈ। ਉਹਨਾਂ ਅੱਗੇ ਕਿਹਾ ਕਿ ਕੈਮਰੇ ਲਗਾਉਣ ਦੀ ਪ੍ਰਕਿਰਿਆ 15 ਜਨਵਰੀ, 2021 ਤੱਕ ਮੁਕੰਮਲ ਹੋ ਜਾਵੇਗੀ।ਮੀਡੀਆ ਦੇ ਇੱਕ ਸਵਾਲ ਦੇ ਜਵਾਬ ਵਿੱਚ, ਐਸਐਸਪੀ ਨੇ ਦੱਸਿਆ ਕਿ ਸੂਬਾ ਦੇ ਪੁਲਿਸ ਵਿਭਾਗ ਨੇ ਨਿਰੰਤਰ ਨਿਗਰਾਨੀ ਨੂੰ ਯਕੀਨੀ ਬਣਾਉਣ ਲਈ ਕੈਮਰਿਆਂ ਦੀ ਸੰਭਾਲ/ ਤਬਦੀਲੀ ਲਈ ਲੋੜੀਂਦੇ ਫੰਡ ਮੁਹੱਈਆ ਕਰਵਾਏ ਹਨ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਬਹੁਤ ਜਲਦ ਸੂਬਾ ਸਰਕਾਰ ਵੱਲੋਂ ਪੂਰੇ ਸ਼ਹਿਰ ਵਿਚ ‘ਥਰਡ ਆਈ’ ਰਾਹੀਂ ਸੁਰੱਖਿਆ ਹਿੱਤ 10 ਕਰੋੜ ਦੇ ਨਿਗਰਾਨੀ ਪ੍ਰਾਜੈਕਟ ਦੀ ਸ਼ੁਰੂਆਤ ਕੀਤੀ ਜਾਵੇਗੀ।ਇਸ ਉਪਰੰਤ ਮੌਕੇ 'ਤੇ ਹਾਜ਼ਰ ਪ੍ਰਮੁੱਖ ਸ਼ਖਸੀਅਤਾਂ ਨਾਲ ਗੱਲਬਾਤ ਕਰਦਿਆਂ ਐਸਐਸਪੀ ਸਤਿੰਦਰ ਸਿੰਘ ਨੇ ਉਨ੍ਹਾਂ ਨੂੰ ਇਸ ਸ਼ਹਿਰ ਨੂੰ ਸੁਰੱਖਿਅਤ ਬਣਾਉਣ ਵਿਚ ਪੁਲਿਸ ਦੀ ਸਹਾਇਤਾ ਕਰਨ ਦਾ ਸੱਦਾ ਦਿੱਤਾ ਅਤੇ ਉਨ੍ਹਾਂ ਨੂੰ ਆਪਣੇ ਆਲੇ-ਦੁਆਲੇ ਕਿਸੇ ਸ਼ੱਕੀ ਗਤੀਵਿਧੀ ਦੀ ਰਿਪੋਰਟ ਦੇਣ ਵਾਸਤੇ ਅੱਗੇ ਆਉਣ ਲਈ ਕਿਹਾ।ਇਸ ਮੌਕੇ ਐਸਪੀ ਸਿਟੀ ਸ੍ਰੀ ਹਰਵਿੰਦਰ ਸਿੰਘ ਵਿਰਕ, ਡੀਐਸਪੀ ਸਿਟੀ 1 ਸ੍ਰੀ ਗੁਰਸ਼ੇਰ ਸਿੰਘ ਸੰਧੂ ਅਤੇ ਸ਼ਹਿਰ ਦੀਆਂ ਪ੍ਰਮੁੱਖ ਸ਼ਖਸੀਅਤਾਂ ਸਮੇਤ ਸਾਬਕਾ ਕੌਂਸਲਰ ਕੇ.ਐਸ. ਬੇਦੀ, ਅਮਰੀਕ ਐਸ. ਸੋਮਲ, ਬੀ.ਬੀ. ਮੈਣੀ ਅਤੇ ਸੁਰਿੰਦਰ ਰਾਜਪੂਤ ਹਾਜ਼ਰ ਸਨ।
ਜਿਹਨਾਂ ਸਥਾਨਾਂ 'ਤੇ ਕੈਮਰੇ ਲਗਾਏ ਗਏ ਹਨ ਉਹਨਾਂ ਵਿਚ ਨਿਊ ਬੱਸ ਸਟੈਂਡ, ਸਪਾਈਸ ਚੌਕ, ਪੀਟੀਐਲ ਲਾਈਟਸ, ਫੇਜ਼ 5-3 ਲਾਈਟਸ x 2, ਫੇਜ਼ 3- 7 ਲਾਈਟਸ, ਫੇਜ਼ 7 ਲਾਈਟਸ, ਫੇਜ਼ 1 ਲਾਈਟਸ, ਫ੍ਰੈਂਕੋ ਹੋਟਲ ਲਾਈਟਸ, ਫੇਜ਼ 2 ਲਾਈਟਸ, ਸੀਬੀਐਲ ਲਾਈਟਸ, ਮੁਹਾਲੀ ਟਾਵਰ ਲਾਈਟਸ, ਗੋਦਰੇਜ ਚੌਕ, ਆਈਵੀ ਹਸਪਤਾਲ ਲਾਈਟਸ, ਸੈਕਟਰ 70-71 ਲਾਈਟਸ ਅਤੇ ਗੁਰਦੁਆਰਾ ਸਿੰਘ ਸ਼ਹੀਦਾਂ ਸ਼ਾਮਲ ਹਨ।
ਸੁਰੱਖਿਅਤ ਮੁਹਾਲੀ ਪ੍ਰੋਜੈਕਟ ਅਧੀਨ ਕੈਮਰੇ ਲਗਾਉਣ ਦੀਆਂ ਕੁਝ ਵਿਲੱਖਣ ਤਕਨੀਕੀ ਵਿਸ਼ੇਸ਼ਤਾਵਾਂ ਇਸ ਪ੍ਰਕਾਰ ਹਨ:
ਪ੍ਰਾਈਵੇਟ ਹਾਈ ਸਪੀਡ ਆਪਟੀਕਲ ਫਾਈਬਰ ਨੈਟਵਰਕ- ਇਸ ਪ੍ਰੋਜੈਕਟ ਦੇ ਪੂਰੇ ਹਿੱਸੇ ਲਈ ਇੱਕ ਪ੍ਰਾਈਵੇਟ ਗੀਗਾਬਿੱਟ ਸਪੀਡ ਆਪਟੀਕਲ ਫਾਈਬਰ ਨੈਟਵਰਕ ਸਥਾਪਤ ਕੀਤਾ ਗਿਆ ਹੈ ਜੋ ਕਿ 18 ਕਿਲੋਮੀਟਰ ਦੇ ਹਿੱਸੇ ਨੂੰ ਕਵਰ ਕਰਦਾ ਹੈ। ਇਕ ਨਿਜੀ ਨੈਟਵਰਕ ਦੂਜੇ ਉਪਭੋਗਤਾਵਾਂ ਵਲੋਂ ਸੁਰੱਖਿਅਤ ਅਤੇ ਨਿਰਵਿਘਨ ਹੋਣ ਦੇ ਯੋਗ ਬਣਾਉਂਦਾ ਹੈ ਜਦੋਂ ਇੰਟਰਨੈਟ ਸੇਵਾਵਾਂ ਪ੍ਰਦਾਤਾ ਦਾ ਨੈਟਵਰਕ ਜਾਂ ਸਾਂਝੇ ਬੈਂਡਵਿਡਥ ਦੀ ਵਰਤੋਂ ਕਰਦੇ ਹਨ। ਇਹ ਨੈਟਵਰਕ ਬਹੁਤ ਵਿਲੱਖਣ ਹੈ ਇਸ ਲਈ ਉੱਚ ਪੱਧਰ 'ਤੇ ਡੇਟਾ ਸੁੱਰਖਿਆ ਸੰਭਵ ਹੈ। ਹੈਕਰਾਂ ਨੂੰ ਰੋਕਣ ਲਈ ਨਵੀਂ ਤਕਨਾਲੋਜੀ ਨਾਲ ਸੁਰੱਖਿਆ ਦੇ ਹੋਰ ਉੱਤਮ ਉਪਾਅ ਵਰਤੇ ਗਏ ਹਨ।
ਰੀਅਲ ਟਾਈਮ ਆਟੋਮੈਟਿਕ ਨੰਬਰ ਪਲੇਟ ਡਿਟੈਕਸ਼ਨ ਐਂਡ ਰਿਕਾਰਡਿੰਗ - ਕੈਮਰੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਨਾਲ ਲੈਸ ਹਨ ਅਤੇ ਇਸ ਲਈ ਉਹ ਆਪਣੇ ਆਪ ਨੰਬਰ ਪਲੇਟਾਂ ਦੀ ਜਾਂਚ ਕਰ ਸਕਦੇ ਹਨ, ਨੰਬਰ ਪਲੇਟਾਂ ਦੇ ਅੰਕਾਂ ਦੀ ਪਛਾਣ ਕਰ ਸਕਦੇ ਹਨ ਅਤੇ ਉਹਨਾਂ ਨੂੰ ਸਥਾਨ ਅਤੇ ਸਮੇਂ ਦੀ ਜਾਣਕਾਰੀ ਨਾਲ ਰਿਕਾਰਡ ਕਰ ਸਕਦੇ ਹਨ।
ਹਰ ਕੈਮਰੇ ਦੀ ਰੀਅਲ ਟਾਈਮ ਨਿਗਰਾਨੀ- ਹਰ ਕੈਮਰਾ ਕੇਂਦਰੀ ਕੰਟਰੋਲ ਸਟੇਸ਼ਨ 'ਤੇ ਰੀਅਲ ਟਾਈਮ ਲਾਈਵ ਪ੍ਰਸਾਰਣ ਪ੍ਰਦਾਨ ਕਰਦਾ ਹੈ। ਇਸ ਨਾਲ ਇਹ ਵੀ ਜਾਣਨ ਵਿਚ ਮਦਦ ਮਿਲੇਗੀ ਕਿ ਕਦੋਂ ਕੈਮਰਾ ਖਰਾਬ ਹੋ ਗਿਆ ਹੈ ਅਤੇ ਕਦੋਂ ਕਿਸੇ ਕੈਮਰੇ ਨੂੰ ਰਿਪੇਅਰ ਦੀ ਜ਼ਰੂਰਤ ਹੈ ਜਿਸ ਨਾਲ ਇਸ ਸਿਸਟਮ ਦਾ ਬਿਹਤਰ ਪ੍ਰਬੰਧਨ ਸੰਭਵ ਹੈ।
ਆਟੋਮੈਟਿਕ ਰਿਸਟੋਰੇਸ਼ਨ ਮੈਨੇਜਮੈਂਟ - ਇਹ ਪ੍ਰਣਾਲੀ ਬਿਜਲੀ ਜਾਂ ਨੈਟਵਰਕ ਵਿਚ ਖਰਾਬੀ ਆਉਣ ਸਮੇਂ ਕੈਮਰਿਆਂ ਨੂੰ ਫੁਟੇਜ ਅਤੇ ਜਾਣਕਾਰੀ ਨੂੰ ਬਰਕਰਾਰ ਰੱਖਣ ਦੇ ਯੋਗ ਬਣਾਉਂਦੀ ਹੈ।
ਐਡਵਾਂਸਡ ਐਨਾਲਿਟਿਕਸ- ਇਹ ਪ੍ਰਣਾਲੀ ਆਪਣੇ ਨੈਟਵਰਕ ਦੇ ਹਰੇਕ ਕੈਮਰੇ ਨੂੰ ਖੁਦ ਜੀਓ-ਲੋਕੇਟ ਕਰ ਸਕਦੀ ਹੈ ਅਤੇ ਵੱਖ-ਵੱਖ ਥਾਵਾਂ 'ਤੇ ਕੈਮਰਿਆਂ ਵਲੋਂ ਕੀਤੇ ਇੰਟਰਸੇਪ ਦੇ ਅਧਾਰ 'ਤੇ ਸ਼ੱਕੀ ਵਾਹਨਾਂ ਦਾ ਪਤਾ ਲਗਾ ਸਕਦੀ ਹੈ। ਜੇਕਰ ਵਾਹਨ ਦੀ ਨੰਬਰ ਪਲੇਟ ਦੀ ਜਾਣਕਾਰੀ ਸਿਸਟਮ ਨੂੰ ਦਿੱਤੀ ਤਾਂ ਉਹ ਖੁਦ ਵਾਹਨ ਦੇ ਰਸਤੇ ਦਾ ਪਤਾ ਲਗਾ ਸਕਦੇ ਹਨ। ਇਹ ਪ੍ਰੋਜੈਕਟ ਐਗਿਸ ਇੰਜੀਨੀਅਰਿੰਗ, ਐਸ.ਏ.ਐਸ.ਨਗਰ ਦੁਆਰਾ ਵਿਕਸਤ ਅਤੇ ਚਲਾਇਆ ਗਿਆ ਹੈ।