ਸਥਾਨਕ ਮੇਜਰ ਹਰਮਿੰਦਰ ਪਾਲ ਸਿੰਘ ਸੁਰੀਯਾ ਚੱਕਰ ਵਿਜੇਤਾ ਸਰਕਾਰੀ ਕਾਲਜ਼ ਵਿਖੇ ਬਤੌਰ ਵਾਟਰਮੈਨ-ਕਮ-ਮਾਲੀ ਕੰਮ ਕਰਦੀ ਪ੍ਰਭਾ ਰਾਣੀ ਨਾਲ ਕਾਲਜ ਦੀ ਸੁਪਰਡੰਟ ਵੱਲੋਂ ਧੱਕਾ ਕੀਤਾ ਜਾ ਰਿਹਾ ਸੀ। ਉਸ ਕੋਲੋਂ ਜ਼ਬਰੀ ਸਫਾਈ ਸੇਵਕਾ ਦਾ ਕੰਮ ਲਿਆ ਜਾਂਦਾ ਸੀ । ਜੋ ਕਿ ਇਕ ਕਰਮਚਾਰੀ ਨਾਲ ਨਾ-ਇਨਸਾਫੀ ਹੈ। ਇਹ ਜਾਣਕਾਰੀ ਪੰਜਾਬ ਰਾਜ ਸਫਾਈ ਕਮਰਚਾਰੀ ਕਮਿਸ਼ਨ ਦੇ ਚੇਅਰਮੈਨ ਸ੍ਰੀ ਗੇਜਾ ਰਾਮ ਵਾਲਮਿਕੀ ਨੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਅਤੇ ਕਾਲਜ ਦੇ ਅਧਿਕਾਰੀਆਂ ਦੀ ਮੀਟਿੰਗ ਕਰਨ ਉਪਰੰਤ ਦਿੱਤੀ ।ਸ੍ਰੀ ਗੇਜਾ ਰਾਮ ਵਾਲਮਿਕੀ ਨੇ ਦੱਸਿਆ ਕਿ ਪ੍ਰਭਾ ਰਾਣੀ ਨੇ ਉਨ੍ਹਾਂ ਦੇ ਧਿਆਨ ਵਿੱਚ ਲਿਆਂਦਾ ਕਿ ਉਹ ਪੜ੍ਹੀ ਲਿਖੀ ਔਰਤ ਹੈ ਪਰ ਮਜ਼ਬੂਰੀ ਵਸ ਮੇਜਰ ਹਰਮਿੰਦਰ ਪਾਲ ਸਿੰਘ ਸੁਰੀਯਾ ਚੱਕਰ ਵਿਜੇਤਾ ਸਰਕਾਰੀ ਕਾਲਜ਼ ਵਿਖੇ ਬਤੌਰ ਵਾਟਰ ਮੈਨ-ਕਮ- ਮਾਲੀ ਕੰਮ ਕਰਦੀ ਹੈ। ਪਰ ਕਾਲਜ ਦੀ ਸੁਪਰਡੰਟ ਵੱਲੋਂ ਉਸ ਤੋਂ ਜ਼ਬਰੀ ਸਫਾਈ ਸੇਵਕਾ ਦਾ ਕੰਮ ਵੀ ਲਿਆ ਜਾਂਦਾ ਹੈ। ਉਸ ਨੇ ਕਾਲਜ ਦੇ ਧਿਆਨ ਵਿੱਚ ਲਿਆਂਦਾ ਕਿ ਉਸ ਦੀ ਪੜ੍ਹਾਈ ਅਨੁਸਾਰ ਉਸ ਨੂੰ ਐਲ.ਏ ਦੀ ਅਸਾਮੀ ਤੇ ਤਰੱਕੀ ਦਿੱਤੀ ਜਾਵੇ। ਪਰ ਕਾਲਜ ਦੀ ਸੁਪਰਡੰਟ ਨੇ ਉਸ ਨੂੰ ਜਾਤੀ ਸੂਚਕ ਸ਼ਬਦਾਂ ਦੀ ਵਰਤੋਂ ਕਰਦੇ ਹੋਏ ਕਿਹਾ ਕਿ ਤੁਸੀ ਤਾਂ ਸਾਫ- ਸਫਾਈ ਯੋਗ ਹੈ ਤਰੱਕੀ ਨਾ ਭਾਲ । ਇਸ ਤੋਂ ਇਲਾਵਾ ਲਾਕਡਾਊਨ ਦੇ ਦੌਰਾਨ ਵੀ ਪ੍ਰਭਾ ਰਾਣੀ ਤੋਂ ਸਾਫ-ਸਫਾਈ ਦਾ ਕੰਮ ਲਿਆ ਜਾਂਦਾ ਰਿਹਾ ।ਸ੍ਰੀ ਗੇਜਾ ਰਾਮ ਵਾਲਮਿਕੀ ਨੇ ਦੱਸਿਆ ਕਿ ਸਫਾਈ ਕਰਮਚਾਰੀ ਕਮਿਸ਼ਨ ਨੇ ਸਰਕਾਰੀ ਕਾਲਜ ਵਿਖੇ ਪ੍ਰਭਾ ਰਾਣੀ ਨਾਲ ਹੋ ਰਹੇ ਧੱਕੇ ਨੂੰ ਗੰਭੀਰਤਾ ਨਾਲ ਲਿਆ ਅਤੇ ਕੀਤਾ ਜਾ ਰਿਹਾ ਧੱਕਾ ਰੋਕਣ ਲਈ ਕਾਲਜ ਨੂੰ ਪੱਤਰ ਲਿਖਿਆ ਜਿਸ ਤੇ ਕਾਲਜ ਵੱਲੋਂ ਕੋਈ ਕਾਰਵਾਈ ਨਹੀਂ ਕੀਤੀ ਗਈ । ਇਸ ਉਪਰੰਤ ਦੋ ਵਾਰ ਯਾਦਪੱਤਰ ਭੇਜੇ ਗਏ ਇਨ੍ਹਾਂ ਪੱਤਰਾਂ ਨੂੰ ਵੀ ਕਾਲਜ ਨੇ ਅੱਖੋਂ ਪਰੋਖੇ ਕਰ ਦਿੱਤਾ । ਜਿਸ ਦਾ ਕਮਿਸ਼ਨ ਨੇ ਗੰਭੀਰ ਨੋਟਿਸ ਲੈਕੇ ਜ਼ਿਲ੍ਹਾ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦੀ ਮੌਜ਼ੂਦਗੀ ਵਿੱਚ ਸਰਕਾਰੀ ਕਾਲਜ ਫੇਜ਼-6 ਵਿਖੇ ਕਾਲਜ ਦੇ ਅਧਿਕਾਰੀਆਂ ਦੀ ਮੀਟਿੰਗ ਸੱਦੀ । ਮੀਟਿੰਗ ਵਿੱਚ ਦੋਵੇਂ ਧਿਰਾਂ ਨੂੰ ਸੁਣਿਆ ਜਿਥੇ ਧੱਕਾ ਕਰਨ ਵਾਲੀ ਸੁਪਰਡੰਟ ਨੇ ਆਪਣੀ ਗਲ਼ਤੀ ਮੰਨ ਲਈ ਅਤੇ ਮੁਆਫੀ ਦੇਣ ਲਈ ਬੇਨਤੀ ਕੀਤੀ । ਐਸ.ਡੀ.ਐਮ ਮੁਹਾਲੀ ਨੇ ਵੀ ਮੀਟਿੰਗ ਵਿੱਚ ਕਿਹਾ ਕਿ ਸੁਪਰਡੰਟ ਦੇ ਘਰ ਪਿਛਲੇ ਮਹੀਨੇ ਇਕ ਦੁਖਦਾਈ ਘਟਨਾ ਵਾਪਰੀ ਹੈ ਇਸ ਲਈ ਹਮਦਰਦੀ ਰੱਖਦੇ ਹੋਏ ਇਕ ਵਾਰ ਮੁਆਫੀ ਦੇ ਦਿੱਤੀ ਜਾਵੇ । ਇਸ ਤਰ੍ਹਾਂ ਸਾਰੇ ਪਹਿਲੂਆਂ ਨੂੰ ਵਿਚਾਰਦੇ ਹੋਏ ਸੁਪਰਡੰਟ ਨੂੰ ਮੁਆਫੀ ਦਿੱਤੀ ਗਈ । ਮੀਟਿੰਗ ਵਿੱਚ ਹੀ ਸਰਕਾਰੀ ਕਾਲਜ ਦੇ ਅਧਿਕਾਰੀਆਂ ਵੱਲੋਂ ਪ੍ਰਭਾ ਰਾਣੀ ਦਾ ਕੇਸ ਤੁਰੰਤ ਵਿਚਾਰ ਕੇ ਉਸ ਨੂੰ ਤਰੱਕੀ ਦੇਣ ਦਾ ਭਰੋਸਾ ਦਿੱਤਾ ਗਿਆ ।