ਪੰਜਾਬ ਸਰਕਾਰ ਵਲੋਂ ਸ਼ੁਰੂ ਕੀਤੀ ਗਈ ਸਮਾਰਟ ਵਿਲੇਜ਼ ਮੁਹਿੰਮ ਪਿੰਡਾਂ ਦੇ ਸਰਪੱਖੀ ਵਿਕਾਸ ਲਈ ਬਹੁਤ ਸਹਾਈ ਸਿੱਧ ਹੋਵੇਗੀ। ਇਸ ਮੁਹਿੰਮ ਤਹਿਤ ਜ਼ਿਲੇ ਦੇ 37 ਪਿੰਡਾਂ ਵਿੱਚ 2618 ਵੱਖ-ਵੱਖ ਕਿਸਮ ਦੇ ਵਿਕਾਸ ਕਾਰਜਾਂ 'ਤੇ 161.28 ਕਰੋੜ ਰੁਪਏ ਖ਼ਰਚ ਕੀਤਾ ਜਾਵੇਗਾ। ਇਹ ਜਾਣਕਾਰੀ ਕੈਬਨਿਟ ਮੰਤਰੀ ਗੁਰਪ੍ਰੀਤ ਸਿੰਘ ਕਾਂਗੜ ਨੇ ਮੁੱਖ ਮੰਤਰੀ ਪੰਜਾਬ, ਕੈਪਟਨ ਅਮਰਿੰਦਰ ਸਿੰਘ ਦੀ ਯੋਗ ਅਗਵਾਈ ਅਤੇ ਕਾਂਗਰਸੀ ਆਗੂ ਸ਼੍ਰੀ ਰਾਹੁਲ ਗਾਂਧੀ ਦੀ ਮੌਜੂਦਗੀ ਵਿੱਚ ਸੂਬਾ ਪੱਧਰ 'ਤੇ ਸਮਾਰਟ ਵਿਲੇਜ਼ ਕੰਪੇਨ ਫੇਜ਼-2 ਦੀ ਵਰਚੂਅਲ ਸ਼ੁਰੂਆਤ ਸਬੰਧ ਵਿੱਚ ਜ਼ਿਲੇ ਦੇ ਪਿੰਡ ਢਪਾਲੀ ਖ਼ੁਰਦ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿੱਚ ਹੋਈ ਵਰਚੂਅਲ ਮੀਟਿੰਗ ਉਪਰੰਤ ਦਿੱਤੀ।ਇਸ ਦੌਰਾਨ ਸ. ਕਾਂਗੜ ਨੇ ਅੱਗੇ ਦੱਸਿਆ ਕਿ ਸਮਾਰਟ ਵਿਲੇਜ਼ ਕੰਪੇਨ ਫੇਜ਼-2 ਤਹਿਤ ਇਸ ਪ੍ਰੋਜੈਕਟ ਵਿਚ ਆਰ.ਡੀ.ਐਫ਼ ਸਕੀਮ ਦੇ 54.86 ਕਰੋੜ, 14ਵੇਂ ਵਿੱਤ ਕਮਿਸ਼ਨ ਦੇ 52.46 ਕਰੋੜ, 15ਵੇਂ ਵਿੱਤ ਕਮਿਸ਼ਨ ਦੇ 35.21ਕਰੋੜ ਤੇ ਮਗਨਰੇਗਾ ਦੇ 15.84 ਕਰੋੜ ਰੁਪਏ ਦੇ ਫ਼ੰਡ ਸ਼ਾਮਲ ਕੀਤੇ ਗਏ ਹਨ। ਸਮਾਰਟ ਵਿਲੇਜ਼ ਕੰਪੇਨ ਫੇਜ਼-2 ਅਧੀਨ ਹੁਣ ਤੱਕ ਜ਼ਿਲੇ ਵਿੱਚ 742 ਕੰਮ ਸ਼ੁਰੂ ਹੋ ਚੁੱਕੇ ਹਨ। ਜਿਨਾਂ ਉਪਰ 19.74 ਕਰੋੜ ਰੁਪਏ ਖ਼ਰਚ ਕੀਤੇ ਜਾ ਚੁੱਕੇ ਹਨ।ਸ. ਕਾਂਗੜ ਨੇ ਹੋਰ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਸ ਤੋਂ ਪਹਿਲਾਂ ਸਮਾਰਟ ਵਿਲੇਜ਼ ਕੰਪੇਨ ਫੇਜ਼-1 ਤਹਿਤ ਇਸ ਪ੍ਰੋਜੈਕਟ ਅਧੀਨ 57.50 ਕਰੋੜ ਰੁਪਏ ਖ਼ਰਚ ਕਰਕੇ ਜ਼ਿਲੇ ਵਿੱਚ 1488 ਵੱਖ-ਵੱਖ ਵਿਕਾਸ ਕਾਰਜ ਕਰਵਾਏ ਜਾਣੇ ਸਨ। ਇਸ ਪ੍ਰੋਜੈਕਟਰ ਤਹਿਤ ਆਰ.ਡੀ.ਐਫ਼ ਸਕੀਮ ਦੇ 14.14 ਕਰੋੜ, 14ਵੇਂ ਵਿੱਤ ਕਮਿਸ਼ਨ ਦੇ 22.87 ਕਰੋੜ ਤੇ ਮਗਨਰੇਗਾ ਦੇ 20.36 ਕਰੋੜ ਰੁਪਏ ਦੇ ਫੰਡ ਸ਼ਾਮਲ ਕੀਤੇ ਗਏ ਸਨ। ਸਮਾਰਟ ਵਿਲੇਜ਼ ਕੰਪੇਨ ਫੇਜ਼-1 ਅਧੀਨ ਹੁਣ ਤੱਕ ਜ਼ਿਲੇ ਵਿੱਚ 46.00 ਕਰੋੜ ਰੁਪਏ ਖ਼ਰਚ ਕਰਕੇ 1140 ਵੱਖ-ਵੱਖ ਵਿਕਾਸ ਕਾਰਜ ਮੁਕੰਮਲ ਕੀਤੇ ਜਾ ਚੁੱਕੇ ਹਨ ਤੇ 348 ਕੰਮ ਪ੍ਰਗਤੀ ਅਧੀਨ ਹਨ। ਮਾਲ ਮੰਤਰੀ ਸ. ਕਾਂਗੜ ਨੇ ਵਰਚੂਅਲ ਮੀਟਿੰਗ ਉਪਰੰਤ ਜ਼ਿਲੇ ਅਧੀਨ ਪੈਂਦੇ ਵੱਖ-ਵੱਖ ਪਿੰਡਾਂ ਜਿਵੇਂ ਕਿ ਢਪਾਲੀ ਖੁਰਦ, ਰਾਈਆ, ਸਿਧਾਣਾ, ਸੇਲਬਰਾਹ, ਦਿਆਲਪੁਰਾ ਮਿਰਜਾ, ਸਿਰੀਏਵਾਲਾ, ਦਿਆਲਪੁਰਾ ਭਾਈਕਾ ਅਤੇ ਸਲਾਬਤਪੁਰਾ ਵਿਖੇ ਪਹੁੰਚ ਕੇ 266.95 ਕਰੋੜ ਰੁਪਏ ਦੀ ਲਾਗਤ ਨਾਲ ਸ਼ੁਰੂ ਹੋਣ ਵਾਲੇ ਵੱਖ-ਵੱਖ ਵਿਕਾਸ ਕਾਰਜਾਂ ਦੀ ਸ਼ੁਰੂਆਤ ਕਰਵਾਈ। ਇਸ ਮੌਕੇ ਬੀ.ਡੀ.ਪੀ.ਓ. ਸ਼੍ਰੀ ਧਰਮਪਾਲ ਤੋਂ ਇਲਾਵਾ ਵੱਖ-ਵੱਖ ਪਿੰਡਾਂ ਦੇ ਪੰਚ ਸਰਪੰਚ ਤੇ ਹੋਰ ਸ਼ਖਸ਼ੀਅਤਾਂ ਹਾਜ਼ਰ ਸਨ।