ਪੰਜਾਬ ਦੇ ਮਾਲ ਤੇ ਲੋਕ ਸੰਪਰਕ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਨੇ ਕਿਹਾ ਹੈ ਕਿ ਪੰਜਾਬ ਕਾਂਗਰਸ ਉਨ੍ਹਾਂ ਨੂੰ ਝੂਠੇ ਤੇ ਮਨਘੜਤ ਦੋਸ਼ਾਂ ਰਾਹੀਂ ਬਦਨਾਮ ਕਰਨ ਦੀ ਸਾਜ਼ਿਸ਼ ਰਚ ਰਹੀ ਹੈ। ਇਥੇ ਜਾਰੀ ਬਿਆਨ 'ਚ ਉਨ੍ਹਾਂ ਕਿਹਾ ਕਿ ਸਭ ਜਾਣਦੇ ਹਨ ਕਿ ਜਗਦੀਸ਼ ਭੋਲਾ ਇੱਕ ਮੰਨਿਆ ਅਪਰਾਧੀ ਹੈ ਜਿਸ ਨੂੰ ਪੰਜਾਬ ਪੁਲਿਸ ਨੇ ਅੱਠ ਮਹੀਨੇ ਦੀ ਲੰਮੀ ਤੇ ਸਖ਼ਤ ਭਾਲ ਤੋਂ ਬਾਅਦ ਦਿੱਲੀ ਨੇੜੇ ਮੁਰਥਲ ਤੋਂ ਕਾਬੂ ਕੀਤਾ। ਜੇ ਪੰਜਾਬ ਪੁਲਿਸ ਨੂੰ ਸਿਆਸੀ ਸਰਪ੍ਰਸਤੀ ਹੁੰਦੀ ਤਾਂ ਪੁਲਿਸ ਉਸ ਨੂੰ ਕਿਉਂ ਫੜਦੀ?''ਮਜੀਠੀਆ ਨੇ ਕਿਹਾ ਕਿ ਇਹ ਵੀ ਸਭ ਦੇ ਸਾਹਮਣੇ ਹੈ ਕਿ ਭੋਲਾ ਕਈ ਮਹੀਨੇ ਤੋਂ ਫ਼ਰਾਰ ਸੀ ਅਤੇ ਉਸ ਵਿਰੁਧ ਪੁਖ਼ਤਾ ਸਬੂਤ ਮੌਜੂਦ ਹਨ। ਅਜਿਹਾ ਵਿਅਕਤੀ, ਜੋ ਮੰਨਿਆ ਅਪਰਾਧੀ ਹੈ ਅਤੇ ਜਿਸ ਨੂੰ ਸੰਭਾਵੀ ਤੌਰ 'ਤੇ ਉਮਰ ਕੈਦ ਦੀ ਸਜ਼ਾ ਹੋ ਸਕਦੀ ਹੈ, ਉਹ ਹੁਣ ਅਜਿਹੇ ਸੰਗੀਨ ਦੋਸ਼ ਲਾ ਰਿਹਾ ਹੈ। ਇਹ ਸਭ ਉਸ ਦੀ ਸੋਚੀ ਸਮਝੀ ਚਾਲ ਹੈ ਕਿਉਂ ਜੋ ਉਸ ਕੋਲ ਅਜਿਹੇ ਦੋਸ਼ ਲਾਉਣ ਦਾ ਪਹਿਲਾਂ ਬਹੁਤ ਸਮਾਂ ਸੀ ਪਰ ਉਸ ਨੇ ਅਜਿਹਾ ਕੁੱਝ ਨਹੀਂ ਕੀਤਾ।ਮਜੀਠੀਆ ਨੇ ਕਿਹਾ ਕਿ ਇੰਜ ਜਾਪਦਾ ਹੈ ਕਿ ਅਜਿਹੇ ਅਪਰਾਧੀਆਂ ਦਾ ਸਹਾਰਾ ਲੈ ਕੇ ਪੰਜਾਬ ਕਾਂਗਰਸ ਉਨ੍ਹਾਂ ਦੇ ਅਕਸ ਨੂੰ ਢਾਹ ਲਾਉਣ ਦੀ ਸਾਜ਼ਿਸ਼ ਰਚ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਭੋਲੇ ਜਿਹੇ ਸੰਗੀਨ ਅਪਰਾਧੀ ਬਾਰੇ ਭਲੀਭਾਂਤ ਜਾਣਨ ਦੇ ਬਾਵਜੂਦ ਭੋਲੇ ਦੇ ਨਾਲ-ਨਾਲ ਹੁਣ ਪੰਜਾਬ ਕਾਂਗਰਸ ਵੀ ਉਨ੍ਹਾਂ ਨੂੰ ਝੂਠੇ ਦੋਸ਼ਾਂ ਰਾਹੀਂ ਬਦਨਾਮ ਕਰਨ ਦੇ ਰਾਹ ਤੁਰ ਪਈ ਹੈ ਹਾਲਾਂਕਿ ਕਾਂਗਰਸ ਨੂੰ ਪਤਾ ਹੈ ਕਿ ਕਦੇ ਵੀ ਕਿਸੇ ਡਰੱਗ ਮਾਮਲੇ ਸਬੰਧੀ ਪੁਲਿਸ ਜਾਂਚ ਵਿੱਚ ਮੇਰਾ ਨਾਮ ਸਾਹਮਣੇ ਨਹੀਂ ਆਇਆ। ਉਨ੍ਹਾਂ ਕਿਹਾ ਕਿ ਸਗੋਂ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਬਾਜਵਾ ਦਾ ਨਾਮ ਡਰੱਗ, ਦੇਸ਼ ਵਿਰੋਧੀ ਗਤੀਵਿਧੀਆਂ ਅਤੇ ਜ਼ਮੀਨ ਘੁਟਾਲਿਆਂ ਆਦਿ ਵਿੱਚ ਸਾਹਮਣੇ ਆਇਆ ਹੈ।
ਉਨ੍ਹਾਂ ਕਿਹਾ ਕਿ ਸੌੜੇ ਰਾਜਨੀਤੀ ਮੰਤਵਾਂ ਲਈ ਕਾਂਗਰਸ ਨੂੰ ਸੰਗੀਨ ਅਪਰਾਧੀਆਂ ਦਾ ਸਹਾਰਾ ਲੈਣਾ ਨਹੀਂ ਸੋਭਦਾ। ਜੇ ਕਾਂਗਰਸ ਦਾ ਗ੍ਰਾਫ਼ ਹੇਠਾਂ ਡਿੱਗਾ ਹੈ ਅਤੇ ਉਸ ਵਿੱਚ ਧੜੇਬਾਜ਼ੀ ਪੈਦਾ ਹੋਈ ਹੈ ਤਾਂ ਉਸ ਨੂੰ ਕਿਸੇ ਹੋਰ ਦੇ ਚਰਿੱਤਰ ਨੂੰ ਝੂਠੇ ਦੋਸ਼ ਲਾ ਕੇ ਦਾਗ਼ਦਾਰ ਕਰਨ ਦਾ ਕੋਈ ਹੱਕ ਨਹੀਂ।ਮਜੀਠੀਆ ਨੇ ਕਿਹਾ, ''ਸਗੋਂ ਪੰਜਾਬ ਦੇ ਉਪ ਮੁੱਖ ਮੰਤਰੀ ਸ. ਸੁਖਬੀਰ ਸਿੰਘ ਬਾਦਲ ਦੀ ਅਗਵਾਈ ਹੇਠ ਸ਼੍ਰੋਮਣੀ ਅਕਾਲੀ ਦਲ-ਭਾਜਪਾ ਗਠਜੋੜ ਦੀ ਸਰਕਾਰ ਵੱਲੋਂ ਨਸ਼ੇ ਵਿਰੁਧ ਵਿੱਢੀ ਮੁਹਿੰਮ ਤਹਿਤ ਹੀ ਭੋਲੇ ਨੂੰ ਕਾਬੂ ਕੀਤਾ ਜਾ ਸਕਿਆ ਹੈ। ਨਸ਼ੇ ਨੂੰ ਨਾਬਰਦਾਸ਼ਤ ਕਰਨ ਦੀ ਸੂਬਾ ਸਰਕਾਰ ਦੀ ਇਸ ਨੀਤੀ ਤਹਿਤ ਸੂਬੇ 'ਚ 15,000 ਗ੍ਰਿਫ਼ਤਾਰੀਆਂ ਕਰ ਕੇ ਨਸ਼ਾ ਤਸਕਰੀ ਨੂੰ ਪੂਰੀ ਤਰ੍ਹਾਂ ਰੋਕਿਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਇਸ ਮੁਹਿੰਮ ਤਹਿਤ ਕਿਸੇ ਵੀ ਵੱਡੇ ਤੋਂ ਵੱਡੇ ਸ਼ਖ਼ਸ, ਜੋ ਦੋਸ਼ੀ ਪਾਇਆ ਗਿਆ ਹੋਵੇ, ਨੂੰ ਬਖ਼ਸ਼ਿਆ ਨਹੀਂ ਗਿਆ ਅਤੇ ਇਸੇ ਕਰ ਕੇ ਬੌਖਲਾਈ ਕਾਂਗਰਸ ਸੰਗੀਨ ਅਪਰਾਧੀਆਂ ਵੱਲੋਂ ਲਾਏ ਜਾ ਰਹੇ ਅਜਿਹੇ ਝੂਠੇ ਦੋਸ਼ਾਂ ਦਾ ਸਹਾਰਾ ਲੈ ਰਹੀ ਹੈ।ਉਨ੍ਹਾਂ ਕਿਹਾ ਕਿ ਅੱਜ ਇੱਕ ਤਸਕਰ ਹੀ ਜਾਂਚ ਕਰਨ ਵਾਲ ਬਣ ਰਿਹਾ ਹੈ। ਕਲ ਨੂੰ ਭੋਲੇ ਜਿਹਾ ਸੰਗੀਨ ਅਪਰਾਧੀ ਨ ਨਸ਼ਾ ਤਸਕਰੀ ਲਈ ਗਾਂਧੀ ਪਰਵਾਰ ਨੂੰ ਜ਼ਿੰਮੇਵਾਰ ਠਹਿਰਾ ਸਕਦਾ ਹੈ। ਇਸ ਲਈ ਇਹ ਪਤਾ ਲਾਇਆ ਜਾਣਾ ਜ਼ਰੂਰੀ ਹੈ ਕਿ ਇਹ ਸਾਜ਼ਿਸ਼ ਕੌਣ ਘੜ ਰਿਹਾ ਹੈ ਅਤੇ ਇਸ ਪਿੱਛੇ ਕਿਸ ਦਾ ਹੱਥ ਹੈ।