ਇਕ ਵਿਸ਼ੇਸ਼ ਪਹਿਲ ਕਰਦਿਆਂ ਬਿਸਕੁਟ ਬਣਾਉਣ ਵਾਲੀ ਪ੍ਰਸਿੱਧ ਕੰਪਨੀ ਪਾਰਲੇ ਜੀ ਬਿਸਕੁਟ ਮੁੰਬਈ ਵਲੋਂ 50,000 ਬਿਸਕੁਟਾਂ ਦੇ ਪੈਕਟ ਐਸ.ਐਸ.ਪੀ.ਜਲੰਧਰ ਸ੍ਰੀ ਨਵਜੋਤ ਸਿੰਘ ਮਾਹਲ ਨੂੰ ਕੋਵਿਡ-19 ਤੋਂ ਬਚਾਅ ਲਈ ਕਰਫ਼ਿਊ ਡਿਊਟੀ 'ਤੇ ਤਾਇਨਾਤ ਪੁਲਿਸ ਕਰਮੀਆਂ ਵਿੱਚ ਵੰਡਣ ਲਈ ਸੌਂਪੇ ਗਏ। ਸ੍ਰੀ ਅਮਰਿੰਦਰ ਸਿੰਘ ਧੀਮਾਨ ਆਫ਼ ਧੀਮਾਨ ਫੂਡਸ (ਪ੍ਰਾਈਵੇਟ) ਲਿਮਟਿਡ ਨਕੋਦਰ ਵਲੋਂ 50000 ਤੋਂ ਵੱਧ ਪਾਰਲੇ ਜੀ ਬਿਸਕੁਟਾਂ ਦੇ ਪੈਕਟ ਪਾਰਲੇ ਜੀ (ਪ੍ਰਾਈਵੇਟ) ਲਿਮਟਿਡ ਮੁੰਬਾਈ ਦੀ ਤਰਫ਼ੋਂ ਐਸ.ਐਸ.ਪੀ.ਨੂੰ ਭੇਟ ਕੀਤੇ ਗਏ। ਉਨਾਂ ਕਿਹਾ ਕਿ ਵਿਸ਼ਵ ਮਹਾਂਮਾਰੀ ਦੌਰਾਨ ਉਨਾਂ ਵਲੋਂ ਸਮੁੱਚੇ ਭਾਰਤ ਵਿੱਚ ਤਿੰਨ ਕਰੋੜ ਤੋਂ ਵੱਧ ਬਿਸਕੁਟਾਂ ਦੇ ਪੈਕਟ ਵੰਡਣ ਦੀ ਕੜੀ ਵਜੋਂ ਇਹ ਪੈਕੇਟ ਦਿੱਤੇ ਜਾ ਰਹੇ ਹਨ। ਸ੍ਰੀ ਧੀਮਾਨ ਨੇ ਦੱਸਿਆ ਕਿ ਇਸ ਔਖੀ ਘੜੀ ਵਿੱਚ ਅਪਣੀ ਜਿੰਮੇਵਾਰੀ ਨੂੰ ਸਮਝਦਿਆਂ ਪਾਰਲੇ ਜੀ ਬਿਸਕੁਟ ਵਲੋਂ ਬਿਸਕੁਟ ਵੰਡਣ ਦਾ ਫ਼ੈਸਲਾ ਲਿਆ ਗਿਆ ਹੈ।ਨੇਕ ਸ਼ੁਰੂਆਤ ਲਈ ਧੰਨਵਾਦ ਕਰਦਿਆਂ ਐਸ.ਐਸ.ਪੀ.ਨੇ ਕਿਹਾ ਕਿ ਪਾਰਲੇ ਜੀ ਬਿਸਕੁਟ ਤਰਫੋਂ ਇਹ ਮਨੁੱਖਤਾ ਦੀ ਸੇਵਾ ਵਿੱਚ ਅਹਿਮ ਯੋਗਦਾਨ ਹੈ। ਉਨਾਂ ਕਿਹਾ ਕਿ 1000 ਦੇ ਕਰੀਬ ਪੁਲਿਸ ਕਰਮੀ 24*7 ਕੋਰੋਨਾ ਵਾਇਰਸ ਦਾ ਪ੍ਰਭਾਵਸ਼ਾਲੀ ਢੰਗ ਨਾਲ ਟਾਕਰਾ ਕਰਨ ਲਈ ਡਿਊਟੀ 'ਤੇ ਤਾਇਨਾਤ ਹਨ। ਉਨਾਂ ਕਿਹਾ ਕਿ ਇਸ ਨਾਲ ਡਿਊਟੀ 'ਤੇ ਤਾਇਨਾਤ ਸੁਰੱਖਿਆ ਬਲਾਂ ਦਾ ਮਨੋਬਲ ਹੋਰ ਉਚਾ ਹੋਵੇਗਾ। ਐਸ.ਐਸ.ਪੀ. ਸ੍ਰੀ ਮਾਹਲ ਨੇ ਕਿਹਾ ਕਿ ਪੁਲਿਸ ਕਰਮੀਆਂ ਵਿੱਚ ਬਿਸਕੁਟ ਨੂੰ ਵੰਡਣ ਤੋਂ ਇਲਾਵਾ ਲੋੜਵੰਦ ਲੋਕਾਂ ਵਿੱਚ ਵੀ ਵੰਡੇ ਜਾਣਗੇ ਕਿਉਂਕਿ ਪੁਲਿਸ ਸਮਾਜ ਦੇ ਕਮਜ਼ੋਰ ਵਰਗਾਂ ਦੀ ਸਹਾਇਤਾ ਲਈ ਵੀ ਪੂਰੀ ਤਰਾਂ ਸੰਜੀਦਾ ਹੈ। ਉਨਾਂ ਕਿਹਾ ਕਿ ਤਨਾਅ ਗ੍ਰਸਤ ਇਸ ਡਿਊਟੀ ਦੌਰਾਨ ਪੁਲਿਸ ਕਰਮੀਆਂ ਨੂੰ ਪੌਸ਼ਟਿਕ ਭੋਜਨ ਮੁਹੱਈਆ ਕਰਵਾਉਣ ਨੂੰ ਯਕੀਨੀ ਬਣਾਉਂਦਿਆਂ ਉਨਾ ਨੂੰ ਪਹਿਲਾਂ ਹੀ ਚਿਕਨ ਮੁਹੱਈਆ ਕਰਵਾਇਆ ਜਾ ਰਿਹਾ ਹੈ। ਉਨਾਂ ਕਿਹਾ ਕਿ ਇਸੇ ਤਰਾਂ ਪੁਲਿਸ ਕਰਮੀਆਂ ਨੂੰ ਫ਼ਲ ਆਦਿ ਵੀ ਮੁਹੱਈਆ ਕਰਵਾਏ ਜਾ ਰਹੇ ਹਨ ਤਾਂ ਕਿ ਡਿਊਟੀ ਦੌਰਾਨ ਉਹ ਪੂਰੀ ਤਰਾਂ ਤੰਦਰੁਸਤ ਰਹਿ ਸਕਣ। ਇਸ ਮੌਕੇ ਸੁਪਰਡੰਟ ਆਫ਼ ਪੁਲਿਸ ਆਰ.ਪੀ.ਐਸ.ਸੰਧੂ, ਡੀ.ਐਸ.ਪੀ.ਕੁਲਵਿੰਦਰਸਿੰਘ ਅਤੇ ਜਸਪ੍ਰੀਤ ਸਿੰਘ ਵੀ ਹਾਜ਼ਰ ਸਨ।