ਫੁੱਲਾਂ ਦੀ ਕਾਸ਼ਤ ਕਣਕ-ਝੋਨੇ ਦੀ ਫਸਲ ਦੇ ਮੁਕਾਬਲੇ ਲਾਹੇਵੰਦ ਫਸਲ ਹੈ ਜਿਸ ਰਾਹੀਂ ਕਿਸਾਨ ਚੋਖਾ ਮੁਨਾਫਾ ਕਮਾ ਸਕਦੇ ਹਨ। ਫੁੱਲਾਂ ਦੀ ਕਾਸ਼ਤ ਕਿਸਾਨਾਂ ਦੀ ਜ਼ਿੰਦਗੀ ਵਿੱਚ ਖੇੜਾ ਤੇ ਬਹਾਰ ਲਿਆ ਸਕਣ ਦੇ ਪੂਰਨ ਯੋਗ ਹੈ। ਪੰਜਾਬ ਸਰਕਾਰ ਵੱਲੋਂ ਫੁੱਲਾਂ ਦੀ ਕਾਸ਼ਤ ਨੂੰ ਉਤਸ਼ਾਹਤ ਕਰਨ ਲਈ ਯਤਨ ਕੀਤੇ ਜਾ ਰਹੇ ਹਨ ਅਤੇ ਸਰਕਾਰ ਵੱਲੋਂ ਪਾਲੀਹਾਊਸ ਉੱਪਰ 50 ਫੀਸਦੀ ਸਬਸਿਡੀ ਦਿੱਤੀ ਜਾ ਰਹੀ ਹੈ ਤਾਂ ਜੋ ਕਿਸਾਨ ਵੱਖ-ਵੱਖ ਫੁੱਲਾਂ ਦੀ ਕਾਸ਼ਤ ਸਫਲਤਾ ਨਾਲ ਕਰ ਸਕਣ।ਬਟਾਲਾ ਨੇੜਲੇ ਪਿੰਡ ਪੁਰਾਣਾ ਪਿੰਡ ਦੇ ਅਗਾਂਹਵਧੂ ਕਿਸਾਨ ਸੁਖਬੀਰ ਸਿੰਘ ਸੰਧੂ ਨੇ ਨਵੀਂ ਪਹਿਲ ਕਰਦਿਆਂ ਫੁੱਲਾਂ ਦੀ ਕਾਸ਼ਤ ਸ਼ੁਰੂ ਕੀਤੀ ਹੈ। ਕਿਸਾਨ ਸੁਖਬੀਰ ਸਿੰਘ ਨੇ 7 ਕਨਾਲ ਰਕਬੇ ਵਿੱਚ ਪਾਲੀਹਾਊਸ ਬਣਾ ਕੇ ਉਸ ਵਿੱਚ ਜ਼ੇਬਰਾ ਫੁੱਲ ਦੀ ਕਾਸ਼ਤ ਕੀਤੀ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਕਿਸਾਨ ਸੁਖਬੀਰ ਸਿੰਘ ਨੇ ਦੱਸਿਆ ਕਿ ਉਸਨੇ ਆਪਣੇ ਪਾਲੀਹਾਊਸ ਵਿੱਚ ਜ਼ੇਬਰਾ ਫੁੱਲ ਦੇ ਕਰੀਬ 18 ਹਜ਼ਾਰ ਬੂਟੇ ਬੈਂਗਲੌਰ ਤੋਂ ਮੰਗਵਾ ਕੇ ਲਗਾਏ ਹਨ। ਉਸਨੇ ਦੱਸਿਆ ਕਿ ਉਸ ਨੂੰ ਇੱਕ ਬੂਟਾ 35 ਰੁਪਏ ਵਿੱਚ ਪਿਆ ਹੈ। ਕਿਸਾਨ ਸੁਖਬੀਰ ਸਿੰਘ ਨੇ ਦੱਸਿਆ ਕਿ ਉਸਨੇ 7 ਕਨਾਲ ਵਿੱਚ ਪਾਲੀਹਾਊਸ ਬਣਾਇਆ ਹੈ ਜਿਸ ਵਿੱਚ ਸਿੰਚਾਈ ਲਈ ਡਰਿੱਪ ਸਿਸਟਮ ਵੀ ਲਗਾਇਆ ਗਿਆ ਹੈ। ਉਸਨੇ ਦੱਸਿਆ ਕਿ ਇਸ ਸਾਰੇ ਪ੍ਰੋਜੈਕਟ ਉੱਪਰ ਕੁੱਲ ਲਾਗਤ 50 ਲੱਖ ਰੁਪਏ ਦੇ ਕਰੀਬ ਆਈ ਹੈ।ਜ਼ਬਰਾ ਫੁੱਲ ਦੀ ਕਾਸ਼ਤ ਬਾਰੇ ਜਾਣਕਾਰੀ ਦਿੰਦਿਆਂ ਕਿਸਾਨ ਸੁਖਬੀਰ ਸਿੰਘ ਨੇ ਦੱਸਿਆ ਕਿ ਇੱਕ ਬੂਟੇ ਨੂੰ 30 ਤੋਂ 40 ਦੇ ਕਰੀਬ ਫੁੱਲ ਲੱਗਦੇ ਹਨ ਅਤੇ ਇੱਕ ਬੂਟਾ ਤਿੰਨ ਸਾਲ ਦੇ ਕਰੀਬ ਫੁੱਲ ਦਿੰਦਾ ਹੈ। ਉਸਨੇ ਕਿਹਾ ਕਿ ਸਜ਼ਾਵਟੀ ਫੁੱਲ ਹੋਣ ਕਾਰਨ ਬਜ਼ਾਰ ਵਿੱਚ ਇਸਦਾ ਭਾਅ ਚੰਗਾ ਮਿਲ ਜਾਂਦਾ ਹੈ। ਸੁਖਬੀਰ ਸਿੰਘ ਨੇ ਦੱਸਿਆ ਕਿ ਉਸਨੇ ਕੁਝ ਮਹੀਨੇ ਪਹਿਲਾਂ ਹੀ ਫੁੱਲਾਂ ਦੀ ਕਾਸ਼ਤ ਸ਼ੁਰੂ ਕੀਤੀ ਹੈ ਅਤੇ ਹੁਣ ਉਸਦੇ ਬੂਟਿਆਂ ਨੂੰ ਫੁੱਲ ਖਿੜ੍ਹਨੇ ਸ਼ੁਰੂ ਹੋ ਗਏ ਹਨ। ਕਿਸਾਨ ਸੁਖਬੀਰ ਨੇ ਕਿਹਾ ਕਿ ਬਾਗਬਾਨੀ ਵਿਭਾਗ ਵੱਲੋਂ ਇਸ ਸਾਰੇ ਪ੍ਰੋਜੈਕਟ ਸਬੰਧੀ ਤਕਨੀਕੀ ਜਾਣਕਾਰੀ ਅਤੇ ਸਹਾਇਤਾ ਮਿਲ ਰਹੀ ਹੈ।ਕਿਸਾਨ ਸੁਖਬੀਰ ਸਿੰਘ ਜੋ ਕਿ 18 ਏਕੜ ਜ਼ਮੀਨ ਦਾ ਕਾਸ਼ਤਕਾਰ ਹੈ ਕਣਕ-ਝੋਨੇ ਦੇ ਨਾਲ ਸਬਜ਼ੀਆਂ ਵੀ ਬੀਜ਼ਦਾ ਹੈ। ਉਸਨੇ 8 ਕਿਲੇ ਵਿੱਚ ਕਮਾਦ ਬੀਜਿਆ ਹੋਇਆ ਹੈ। ਸੁਖਬੀਰ ਸਿੰਘ ਨੇ ਆਪਣੇ ਘਰ ਲਈ ਹਰ ਤਰਾਂ ਦੀਆਂ ਮੌਸਮੀ ਸਬਜ਼ੀਆਂ ਬੀਜ਼ੀਆਂ ਹੋਈਆਂ ਹਨ। ਇਸ ਤੋਂ ਇਲਾਵਾ ਕਿੰਨੂ, ਸੰਤਰੇ, ਅੰਬ, ਨਿੰਬੂ, ਅਮਰੂਦ, ਕੇਲਾ, ਜਾਮੂਨ ਦੇ ਫਲਦਾਰ ਬੂਟੇ ਵੀ ਲਗਾਏ ਹੋਏ ਹਨ ਜੋ ਕਿ ਭਰਪੂਰ ਫਲ ਦਿੰਦੇ ਹਨ। ਕਿਸਾਨ ਸੁਖਬੀਰ ਸਿੰਘ ਨੇ ਆਪਣੇ ਘਰ ਗੋਬਰ ਗੈਸ ਪਲਾਂਟ ਅਤੇ ਸੋਲਰ ਵਾਟਰ ਹੀਟਰ ਪਲਾਂਟ ਵੀ ਲਗਾਇਆ ਹੋਇਆ ਹੈ।ਕਿਸਾਨ ਸੁਖਬੀਰ ਸਿੰਘ ਦਾ ਕਹਿਣਾ ਹੈ ਕਿ ਉਸਨੇ ਸ਼ੁਰੂ ਤੋਂ ਹੀ ਰਿਵਾਇਤ ਤੋਂ ਹੱਟ ਕੇ ਖੇਤੀ ਕੀਤੀ ਹੈ ਜਿਸ ਦਾ ਉਸਨੂੰ ਲਾਭ ਵੀ ਹੋਇਆ ਹੈ। ਉਸਨੇ ਕਿਹਾ ਕਿ ਫੁੱਲਾਂ ਦੀ ਕਾਸ਼ਤ ਨੂੰ ਲੈ ਕੇ ਉਹ ਬਹੁਤ ਉਤਸ਼ਾਹਤ ਹੈ ਅਤੇ ਉਸਨੂੰ ਉਮੀਦ ਹੈ ਕਿ ਫੁੱਲਾਂ ਦੀ ਖੇਤੀ ਉਸਦੀ ਜ਼ਿੰਦਗੀ ਵਿੱਚ ਹੋਰ ਬਹਾਰ ਤੇ ਮਹਿਕਾਂ ਭਰ ਦੇਵੇਗੀ।