ਸਿਹਤ ਤੇ ਪਰਿਵਾਰ ਭਲਾਈ ਵਿਭਾਗ ਦੇ ਜਿਲ੍ਹਾ ਟੀ.ਬੀ. ਵਿੰਗ ਨੇ ਅੱਜ ਤੋਂ 'ਟੀ.ਬੀ. ਮੁਕਤ ਭਾਰਤ ਮੁਹਿੰਮ' ਤਹਿਤ ਟੀ.ਬੀ. ਦੇ ਸ਼ੱਕੀ ਮਰੀਜ ਲੱਭਣ ਲਈ ਮੁਹਿੰਮ ਦਾ ਦੂਜਾ ਪੜਾਅ ਸ਼ੁਰੂ ਕਰ ਦਿੱਤਾ ਹੈ। ਪਹਿਲਾ ਪੜਾਅ 3 ਸਤੰਬਰ ਤੋਂ 14 ਸਤੰਬਰ ਤੱਕ ਲਗਾਤਾਰ 12 ਦਿਨ ਚਲਾਇਆ ਗਿਆ ਸੀ। ਸਿਵਲ ਸਰਜਨ ਮੋਗਾ ਡਾ. ਹਰਿੰਦਰ ਪਾਲ ਸਿੰਘ, ਜ਼ਿਲ੍ਹਾ ਟੀ.ਬੀ. ਅਫਸਰ ਡਾ ਇੰਦਰਵੀਰ ਸਿੰਘ ਗਿੱਲ, ਜਿਲ੍ਹਾ ਟੀਕਾਕਰਨ ਅਫਸਰ ਡਾ ਹਰਿੰਦਰ ਸ਼ਰਮਾ, ਜਿਲ੍ਹਾ ਸਿਹਤ ਅਫਸਰ ਡਾ ਅਰਵਿੰਦਰ ਪਾਲ ਸਿੰਘ ਗਿੱਲ, ਡਾ ਗਗਨਦੀਪ ਸਿੰਘ ਐਸ ਐਮ ਓ ਬੱਧਨੀ ਤੇ ਡਾ. ਜਸਜੀਤ ਕੌਰ ਗਿੱਲ ਨੇ ਟੀਮਾਂ ਨੂੰ ਜਿਲ੍ਹਾ ਟੀ.ਬੀ. ਸੈਂਟਰ ਮੋਗਾ ਤੋਂ ਤੋਰ ਕੇ ਮੁਹਿੰਮ ਦੇ ਦੂਜੇ ਪੜਾਅ ਦੀ ਸ਼ੁਰੂਆਤ ਕਰ ਦਿੱਤੀ ਹੈ, ਜੋ 4 ਫਰਵਰੀ ਤੋਂ 15 ਫਰਵਰੀ ਤੱਕ ਚੱਲੇਗਾ।ਸਿਹਤ ਵਿਭਾਗ ਦੇ ਬੁਲਾਰੇ ਤੇ ਬਲਾਕ ਐਜੂਕੇਟਰ ਰਛਪਾਲ ਸਿੰਘ ਸੋਸਣ ਵੱਲੋਂ ਦੱਸਿਆ ਗਿਆ ਕਿ ਜਿਲ੍ਹੇ ਦੇ ਪਿੰਡਾਂ ਦੇ ਕੀਤੇ ਗਏ ਸਰਵੇਖਣ ਤੋਂ ਬਾਅਦ ਜਿਲ੍ਹੇ ਦੇ 50 ਪਿੰਡਾਂ ਦੀ ਨਿਸ਼ਾਨਦੇਹੀ ਕੀਤੀ ਗਈ ਹੈ, ਜਿਨ੍ਹਾਂ ਕੋਲ ਪਹੁੰਚ ਕਰਨ ਲਈ ਇਹ ਮੁਹਿੰਮ ਚਲਾਈ ਗਈ ਹੈ। ਡਾ ਇੰਦਰਵੀਰ ਗਿੱਲ ਨੇ ਦੱਸਿਆ ਕਿ ਸੀ ਐਚ ਓ, ਏ ਐਨ ਐਮ ਤੇ ਆਸ਼ਾ ਤੇ ਆਧਾਰਿਤ 60 ਟੀਮਾਂ ਦਾ ਗਠਨ ਕੀਤਾ ਗਿਆ ਹੈ, ਜੋ 50 ਪਿੰਡਾਂ ਦੇ ਘਰਾਂ 'ਚ ਜਾਣਗੇ ਅਤੇ ਲੋਕਾਂ ਤੋਂ ਟੀ.ਬੀ. ਦੇ ਲੱਛਣਾਂ ਸਬੰਧੀ ਸਵਾਲ ਪੁੱਛਣਗੇ। ਸਵਾਲਾਂ ਦੇ ਜਵਾਬਾਂ ਦੌਰਾਨ ਸ਼ੱਕੀ ਪਾਏ ਜਾਣ ਤੇ ਸਬੰਧਤ ਵਿਅਕਤੀ ਦੀ ਬਲਗਮ ਦੇ ਦੋ ਸੈਂਪਲ ਲਏ ਜਾਣਗੇ। ਸੈਂਪਲ ਦਾ ਟੈਸਟ ਕਰਨ ਤੋਂ ਬਾਅਦ ਰਿਪੋਰਟ ਆਉਣ 'ਤੇ ਇਲਾਜ ਸ਼ੁਰੂ ਕੀਤਾ ਜਾਵੇਗਾ। ਉਹਨਾਂ ਆਮ ਜਨਤਾ ਨੂੰ ਅਪੀਲ ਕੀਤੀ ਕਿ ਸਿਹਤ ਵਿਭਾਗ ਦੀਆਂ ਟੀਮਾਂ ਨਾਲ ਸਹਿਯੋਗ ਕੀਤਾ ਜਾਵੇ।ਉਹਨਾਂ ਕਿਹਾ ਕਿ ਮਰੀਜਾਂ ਨੂੰ ਟੀ.ਬੀ. ਦੀ ਦਵਾਈ ਬਿਲਕੁਲ ਮੁਫ਼ਤ ਤੇ ਨਿਗਰਾਨੀ ਹੇਠ ਖੁਆਈ ਜਾਂਦੀ ਹੈ ਜਦਕਿ ਖੁਰਾਕ ਖਾਣ ਲਈ ਟੀ.ਬੀ. ਦੇ ਮਰੀਜਾਂ ਨੂੰ ਹਰੇਕ ਮਹੀਨੇ 500 ਰੁਪਏ ਦੀ ਸਹਾਇਤਾ ਵਿਭਾਗ ਵੱਲੋਂ ਦਿੱਤੀ ਜਾਂਦੀ ਹੈ। ਉਹਨਾਂ ਕਿਹਾ ਕਿ ਦੋ ਹਫਤੇ ਤੋਂ ਲਗਾਤਾਰ ਖੰਘ, ਬੁਖਾਰ, ਰਾਤ ਨੂੰ ਪਸੀਨਾ ਆਉਣਾ, ਭੁੱਖ ਨਾ ਲੱਗਣਾ, ਲਗਾਤਾਰ ਵਜ਼ਨ ਘਟਣਾ ਆਦਿ ਲੱਛਣ ਦਿਖਾਈ ਦੇਣ ਤਾਂ ਤੁਰੰਤ ਬਲਗਮ ਟੈਸਟ ਨੇੜਲੇ ਸਿਹਤ ਕੇਂਦਰ ਤੋਂ ਕਰਵਾਉਣਾ ਚਾਹੀਦਾ ਹੈ।ਇਸ ਮੌਕੇ ਕ੍ਰਿਸ਼ਨਾ ਸ਼ਰਮਾ ਜਿਲ੍ਹਾ ਮਾਸ ਮੀਡੀਆ ਅਫਸਰ, ਅੰਮ੍ਰਿਤ ਸ਼ਰਮਾ ਬੀਸੀਸੀ ਕੋਆਰਡੀਨੇਟਰ, ਕਮਲਜੀਤ ਸਿੰਘ,ਵਿਪਨ ਕੁਮਾਰ, ਸੁੰਦਰ ਲਾਲ ਸਾਰੇ ਐਸ ਟੀ ਐਸ,ਜਸਵੀਰ ਸਿੰਘ ਐਸ ਟੀ ਐਲ ਐਸ, ਸ਼ੇਰਾ ਸੰਧੂ ਟੀ ਬੀ ਐਚ ਆਈ ਕੋਰਡੀਨੇਟਰ,ਅਮਨ ਅਤੇ ਅਰੁਣ ਦੋਂਨੋਂ ਐਲ ਟੀ ਹਾਜ਼ਰ ਸਨ।