ਸ਼ਹੀਦ ਭਗਤ ਸਿੰਘ ਨਗਰ ਜ਼ਿਲ੍ਹਾ ਆਈ-ਟ੍ਰੈਕ (ਇੰਟੈਗਰੇਟਿਡ ਟਰੈਕਿੰਗ, ਰੈਫਰਲ, ਇਲੈਕਟਰੋਨਿਕ ਡਿਸੀਜ਼ਨ ਸਪੋਰਟ ਅਤੇ ਕੇਅਰ ਕੋਆਰਡੀਨੇਸ਼ਨ) ਪ੍ਰੋਜੈਕਟ ਅਪਨਾਉਣ ਵਾਲਾ ਦੇਸ਼ ਅਤੇ ਪੰਜਾਬ ਦਾ ਪਹਿਲਾ ਜ਼ਿਲ੍ਹਾ ਬਣ ਗਿਆ ਹੈ।ਮਿਸ਼ਨ ਡਾਇਰੈਕਟਰ ਨੈਸ਼ਨਲ ਹੈਲਥ ਮਿਸ਼ਨ ਪੰਜਾਬ ਸ੍ਰੀ ਕੁਮਾਰ ਰਾਹੁਲ ਆਈ ਏ ਐਸ ਨੇ ਆਲ ਇੰਡੀਆ ਇੰਸਟੀਚਿਊਟ ਆਫ਼ ਮੈਡੀਕਲ ਸਾਇੰਸਜ਼ ਦੇ ਪ੍ਰੋਫ਼ੈਸਰ ਅਤੇ ਐਂਡੋਕ੍ਰਾਇਓਨੋਲੋਜੀ ਵਿਭਾਗ ਦੇ ਮੁਖੀ ਡਾ. ਨਿਖਿਲ ਟੰਡਨ ਨਾਲ ਸਾਂਝੇ ਤੌਰ ’ਤੇ ਆਈ-ਟ੍ਰੈਕ ਨੂੰ ਜ਼ਿਲ੍ਹਾ ਹਸਪਤਾਲ ਨਵਾਂਸ਼ਹਿਰ ਵਿਖੇ ਜਾਰੀ ਕਰਦਿਆਂ ਦੱਸਿਆ ਕਿ ਆਈ-ਟ੍ਰੈਕ ਪ੍ਰੋਜੈਕਟ ਪੁਰਾਣੀਆਂ ਬਿਮਾਰੀਆਂ ਜਿਵੇਂ ਖੂਨ ਦਾ ਦਬਾਅ ਵਧਣਾ, ਸ਼ੂਗਰ ਆਦਿ ਦਾ ਆਈ ਟੀ ਬੇਸਡ ਸਿਸਟਮ ’ਤੇ ਆਧਾਰਿਤ ਮਾਹਿਰਾਨਾ ਇਲਾਜ ਮੁਹੱਈਆ ਕਰਵਾਏਗਾ। ਉਨ੍ਹਾਂ ਦੱਸਿਆ ਕਿ ਡੈਲ ਟੈਕਨਾਲੋਜੀ ਵੱਲੋਂ ਵਿਕਸਿਤ ਇਸ ਸਾਫ਼ਟਵੇਅਰ ਨੂੰ ਤਿਆਰ ਕਰਨ ’ਚ ਏਮਜ਼ ਨੇ ਸਾਲਾਂ ਬੱਧੀ ਮੇਹਨਤ ਕੀਤੀ ਹੈ ਜਿਸ ਤਹਿਤ ਇਨ੍ਹਾਂ ਬਿਮਾਰੀਆਂ ਦਾ ਇਲੈਕਟ੍ਰਾਨਿਕ ਰਿਕਾਰਡ ਕਾਇਮ ਕਰਨ ’ਚ ਤੇ ਉਸ ਨੂੰ ਅੱਗੇ ਮਾਹਿਰਾਂ ਵੱਲੋਂ ਤਿਆਰ ਸਾਫ਼ਟਵੇਅਰ ਦੇ ਆਧਾਰ ’ਤੇ ਬੇਹਤਰ ਇਲਾਜ ਦੇਣ ’ਚ ਮੱਦਦ ਮਿਲੇਗੀ। ਉਨ੍ਹਾਂ ਦੱਸਿਆ ਕਿ ਆਈ-ਟ੍ਰੈਕ ਮਰੀਜ਼ਾਂ ਦੀ ਸੰਭਾਲ ਲਈ ਵਧੀਆ ਸਿਸਟਮ ਹੈ ਜੋ ਕਿ ਡਾਕਟਰਾਂ ਨੂੰ ਇਲਾਜ ਰਣਨੀਤੀ ਬਣਾਉਣ ’ਚ ਮੱਦਦ ਕਰੇਗਾ। ਭਾਰਤ ਸਰਕਾਰ ਦੇ ਇਸ ਪੋਰਟਲ (ਕਲੀਨਿਕਲ ਸਪੋਰਟ ਡਿਸੀਜ਼ਨ ਸਿਸਟਮ) ’ਤੇ ਇੱਥੇ ਜੋ ਵੀ ਕੀਤਾ ਜਾਵੇਗਾ ਉਹ ਪੂਰੇ ਦੇਸ਼ ’ਚ ਅਨੁਸਰਣ ਹੋਵੇਗਾ।ਡਾ. ਨਿਖਿਲ ਟੰਡਨ ਨੇ ਇਸ ਮੌਕੇ ਇਸ ਆਈ ਟੀ ਆਧਾਰਿਤ ਮੰਚ ਦੀ ਪੇਸ਼ਕਾਰੀ ਦਿੰਦਿਆਂ ਦੱਸਿਆ ਕਿ ਪੰਜ ਬਿਮਾਰੀਆਂ ਜਿਨ੍ਹਾਂ ’ਚੋਂ ਦੋ ਖੂਨ ਦਾ ਦਬਾਅ ਅਤੇ ਸ਼ੂਗਰ ਅਤੇ ਤਿੰਨ ਕੈਂਸਰ (ਮੂੰਹ, ਬੱਚੇਦਾਨੀ ਅਤੇ ਛਾਤੀ ਦਾ) ਦਾ ਡਾਟਾ ਇਲੈਕਟ੍ਰਾਨਿਕ ਹੈਲਥ ਰਿਕਾਰਡ ਦੇ ਰੂਪ ’ਚ ਹੋਵੇਗਾ। ਉਨ੍ਹਾਂ ਦੱਸਿਆ ਕਿ ਏਮਜ਼ ਵੱਲੋਂ ਪਹਿਲੇ ਪੜਾਅ ’ਚ ਬਲੱਡ ਪ੍ਰੈਸ਼ਰ ਅਤੇ ਸ਼ੂਗਰ ਦੇ ਮਰੀਜ਼ਾਂ ਦਾ ਡਾਟਾ ਇਕੱਠਾਂ ਕਰਕੇ ਪਹਿਲਾਂ ਸਰਕਾਰ ਦੀ ਇਲੈਕਟ੍ਰਾਨਿਕ ਰਿਕਾਰਡ ਬਣਾਉਣ ’ਚ ਸਹਾਇਤਾ ਕੀਤੀ ਗਈ। ਉਸ ਤੋਂ ਬਾਅਦ ਇਸ ਡਾਟੇ ਨੂੰ ਵਧੀਕ ਰੂਪ ’ਚ ਕਲੀਨਿਕਲ ਡਿਸੀਜ਼ਨ ਸਪੋਰਟ ਸਿਸਟਮ ਦਾ ਰੂਪ ਦੇ ਕੇ ਆਉਣ ਵਾਲੇ ਮਰੀਜ਼ ਦੀ ਬਿਮਾਰੀ ਬਲੱਡ ਪ੍ਰੈਸ਼ਰ ਜਾਂ ਸ਼ੂਗਰ, ਕੀ ਦਵਾਈਆਂ ਚੱਲ ਰਹੀਆਂ ਹਨ, ਉਸ ਦੀਆਂ ਕੀ ਰਿਪੋਰਟਾਂ ਹਨ, ਉਸ ਨੂੰ ਧਿਆਨ ’ਚ ਰੱਖਦੇ ਹੋਏ, ਇਲਾਜ ’ਚ ਕੀ ਤਬਦੀਲੀ ਕਰਨ ਦੀ ਲੋੜ ਹੈ ਬਾਰੇ ਸੁਝਾਅ ਦੇਣ ਲਈ ਇਹ ਆਈ ਟ੍ਰੈਕ ਸਿਸਟਮ ਲਿਆਂਦਾ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਮਿਸਾਲ ਦੇ ਤੌਰ ’ਤੇ ਪੀ ਐਚ ਸੀ ’ਚ ਆਉਣ ਵਾਲੇ ਮਰੀਜ਼ ਦਾ ਪੂਰਾ ਡੈਟਾ ਇੱਕ ਥਾਂ ਇਕੱਠਾ ਕਰਕੇ ਤੇ ਉਸ ਦਾ ਨਿਚੋੜ ਕੱਢ ਕੇ ਇਹ ਸਿਸਟਮ ਸਲਾਹ ਦਿੰਦਾ ਹੈ ਕਿ ਇਹੀ ਦਵਾਈ ਚੱਲਣੀ ਚਾਹੀਦੀ ਹੈ ਜਾਂ ਬਦਲਣ ਦੀ ਲੋੜ ਹੈ।
ਉਨ੍ਹਾਂ ਦੱਸਿਆ ਕਿ ਇਹ ਡਾਕਟਰ ’ਤੇ ਨਿਰਭਰ ਕਰਦਾ ਹੈ ਕਿ ਸਿਸਟਮ ਵੱਲੋਂ ਦਿੱਤੀ ਸਲਾਹ ਮੰਨਣੀ ਹੈ ਜਾਂ ਨਹੀਂ। ਉਨ੍ਹਾਂ ਦੱਸਿਆ ਕਿ ਇਹ ਸਿਸਟਮ ਮਰੀਜ਼ ਦੀ ਬਿਮਾਰੀ ਅਤੇ ਜਾਣਕਾਰੀ ਦੇ ਆਧਾਰ ’ਤੇ ਇਹ ਵੀ ਦੱਸਦਾ ਹੈ ਕਿ ਪੀ ਐਚ ਸੀ ਤੋਂ ਸੀ ਐਚ ਸੀ ਰੈਫ਼ਰ ਕਰਨ ਦੀ ਲੋੜ ਹੈ ਜਾਂ ਮਾਹਿਰਾ ਡਾਕਟਰ ਦੀ ਲੋੜ ਹੈ। ਜੇਕਰ ਰੈਫ਼ਰ ਕੀਤਾ ਜਾਵੇਗਾ ਤਾਂ ਉਹੀ ਸਲਾਹ ਅੱਗੇ ਚਲੀ ਜਾਂਦੀ ਹੈ। ਉਨ੍ਹਾਂ ਦੱਸਿਆ ਕਿ ਸ਼ੁਰੂ ’ਚ ਮੇਹਨਤ ਕਰਨੀ ਪੈਂਦੀ ਹੈ ਤੇ ਡਾਟਾ ਭਰਨਾ ਪੈਂਦਾ ਹੈ, ਫ਼ਿਰ ਅੱਗੋਂ ਇਹੀ ਡਾਟਾ ਚਲੱਦਾ ਰਹੇਗਾ। ਉਨ੍ਹਾਂ ਦੱਸਿਆ ਕਿ ਆਈ ਟ੍ਰੈਕ ਨਾਲ ਇਲਾਜ ’ਚ ਨਿਪੁੰਨਤਾ ਆਵੇਗੀ, ਸਿਸਟਮ ’ਚ ਪ੍ਰਮਾਣਿਕਤਾ ਆਵੇਗੀ। ਕਲੀਨਿਕਲ ਡਿਸੀਜ਼ਨ ਸਪੋਰਟ ਸਿਸਟਮ ਪ੍ਰਮਾਣਿਕ ਹੋਣ ਕਾਰਨ ਸਾਰਾ ਕੁੱਝ ਨਿਚੋੜ ਤੋਂ ਸਾਹਮਣੇ ਆਉਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਨਾਲ ਡਾਕਟਰ ਨੂੰ ਆਪਣੀ ਸਮਝ ਅਨੁਸਾਰ ਦਵਾਈ ਦੇਣ ਤੋਂ ਪਹਿਲਾਂ ਆਈ ਟੀ ਆਧਾਰਿਤ ਸਲਾਹ ਵੀ ਆ ਜਾਵੇਗੀ ਕਿ ਮਰੀਜ਼ ਨੂੰ ਦਵਾਈ ਜਾਰੀ ਰੱਖਣੀ ਹੈ ਜਾਂ ਤਬਦੀਲ ਕਰਨੀ ਹੈ ਜਾਂ ਘਟਾਉਣੀ ਹੈ ਜਾਂ ਵਧਾਉਣੀ ਹੈ।ਉਨ੍ਹਾਂ ਦਾ ਕਹਿਣਾ ਸੀ ਕਿ ਪੂਰੇ ਦੇਸ਼ ’ਚ ਪੰਜਾਬ ਨੂੰ ਇਸ ਪ੍ਰਾਜੈਕਟ ਲਈ ਚੁਣੇ ਜਾਣ ਦਾ ਕਾਰਨ ਰਾਜ ’ਚ ਹਾਈਪਰਟੈਨਸ਼ਨ ਅਤੇ ਡਾਇਬਟੀਜ਼ ਦਾ ਵਧੇਰੇ ਪਸਾਰ ਹੋਣਾ ਹੈ। ਇਹੀ ਦੋਵੇਂ ਰੋਗ ਅੱਗੇ ਜਾ ਕੇ ਦਿਲ ਦੀਆਂ ਬਿਮਾਰੀਆਂ, ਕਿਡਨੀਆਂ ਦੇ ਰੋਗਾਂ ਅਤੇ ਦਿਮਾਗੀ ਬਿਮਾਰੀਆਂ ਜਿਵੇਂ ਅਧਰੰਗ ਆਦਿ ਦਾ ਕਾਰਨ ਬਣਦੇ ਹਨ। ਉਨ੍ਹਾਂ ਦੱਸਿਆ ਕਿ ਇਸ ਆਈ-ਟ੍ਰੈਕ ਸਿਸਟਮ ਦੀ ਸਫ਼ਲਤਾ ਸਮੁੱਚੇ ਦੇਸ਼ ’ਚ ਇਸ ਦਾ ਆਧਾਰ ਬਣੇਗੀ।ਡਾ. ਜੀ ਬੀ ਸਿੰਘ ਸਟੇਟ ਪ੍ਰੋਗਰਾਮ ਅਫ਼ਸਰ ਨੈਸ਼ਨਲ ਪ੍ਰੋਗਰਾਮ ਫ਼ਾਰ ਪ੍ਰੀਵੈਨਸ਼ਨ ਐਂਡ ਕੰਟਰੋਲ ਆਫ਼ ਕੈਂਸਰ, ਡਾਇਬਟੀਜ਼, ਕਾਰਡੀਓ ਵਸਕੁਲਰ ਡਿਜੀਜ਼ ਤੇ ਸਟ੍ਰੋਕ ਪੰਜਾਬ ਨੇ ਦੱਸਿਆ ਕਿ ਜ਼ਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ ਵਿੱਚ ਐਨ.ਪੀ.ਸੀ.ਡੀ.ਸੀ.ਐਸ. ਪ੍ਰੋਗਰਾਮ ਅਧੀਨ ਦੋ ਬਲਾਕਾਂ ਵਿੱਚ ਪਾਇਲਟ ਪ੍ਰੋਜੈਕਟ ਸ਼ੁਰੂ ਕੀਤਾ ਗਿਆ ਸੀ, ਜਿਸ ਤਹਿਤ ਮੁਕੰਦਪੁਰ ਤੇ ਸੁੱਜੋਂ ਸਿਹਤ ਬਲਾਕਾਂ ’ਚੋਂ ਬਲੱਡ ਪ੍ਰੈਸ਼ਰ ਤੇ ਸ਼ੂਗਰ ਦੇ ਰੋਗਾਂ ਤੋਂ ਪੀੜਤ 30 ਸਾਲ ਤੋਂ ਉਪੱਰ ਦੇ ਮਰੀਜ਼ਾਂ ਦਾ ਡਾਟਾ ਇਕੱਠਾ ਕੀਤਾ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਆਈ-ਟ੍ਰੈਕ ਸਿਸਟਮ ਇਨ੍ਹਾਂ ਮਰੀਜ਼ਾਂ ਦੇ ਇਲਾਜ ਲਈ ਲਾਭਕਾਰੀ ਹੋਵੇਗਾ।ਆਈ-ਟ੍ਰੈਕ ਪ੍ਰਾਜੈਕਟ ਜਾਰੀ ਕਰਨ ਮੌਕੇ ਇਸ ਨੂੰ ਅਮਲੀ ਰੂਪ ਦੇਣ ਵਾਲਿਆਂ ’ਚ ਪ੍ਰੋ. ਨਿਖਿਲ ਟੰਡਨ ਤੋਂ ਇਲਾਵਾ ਡਾ. ਸ਼ਿਵਾਨੀ ਪਟੇਲ ਐਸੋਸੀਏਟ ਪ੍ਰੋਫ਼ੈਸਰ ਐਮੋਰੀ ਯੂਨੀਵਰਸਿਟੀ, ਯੂ ਐਸ ਏ, ਡਾ. ਸੈਲੇਸ਼ ਮੋਹਨ ਪ੍ਰੋਫੈਸਰ ਏਮਜ਼ (ਕਲੀਨੀਕਲ ਸਪੋਰਟ ਡਿਸੀਜ਼ਨ ਸਿਸਟਮ), ਡਾ. ਅਮਨ ਸਿੰਘ ਟਾਟਾ ਟਰੱਸਟ ਦਿੱਲੀ, ਰਾਮਦਾਸ (ਡੈਲ ਟੈਕਨੋਲੋਜੀਜ਼), ਡਾ. ਦੇਵ ਜਿੰਦਲ ਏਮਜ਼ (ਕਲੀਨੀਕਲ ਸਪੋਰਟ ਡਿਸੀਜ਼ਨ ਸਿਸਟਮ) ਅਤੇ ਡਾ. ਹੰਸ ਪਿ੍ਰਆ ਏਮਜ਼ ਤੋਂ ਇਲਾਵਾ ਸਿਵਲ ਸਰਜਨ ਡਾ. ਰਾਜਿੰਦਰ ਪ੍ਰਸ਼ਾਦ ਭਾਟੀਆ, ਜ਼ਿਲ੍ਹਾ ਪਰਿਵਾਰ ਭਲਾਈ ਅਫ਼ਸਰ ਡਾ. ਸੁਖਵਿੰਦਰ ਹੀਰਾ, ਜ਼ਿਲ੍ਹਾ ਟੀਕਾਕਰਣ ਅਫ਼ਸਰ ਡਾ. ਦਵਿੰਦਰ ਢਾਂਡਾ, ਐਸ ਐਮ ਓ ਡਾ. ਹਰਵਿੰਦਰ ਸਿੰਘ ਤੇ ਮੈਡੀਕਲ ਅਫ਼ਸਰ ਡਾ. ਗੁਰਪਾਲ ਕਟਾਰੀਆ ਤੇ ਹੋਰ ਡਾਕਟਰ ਮੌਜੂਦ ਸਨ।ਉਕਤ ਟੀਮ ਵੱਲੋਂ ਬਾਅਦ ਵਿੱਚ ਜ਼ਿਲ੍ਹਾ ਹਸਪਤਾਲ ਨਵਾਂਸ਼ਹਿਰ, ਸੀ ਐਚ ਸੀ ਮੁਕੰਦਪੁਰ, ਪੀ ਐਚ ਸੀ ਖਾਨਖਾਨਾ, ਪੀ ਐਚ ਸੀ ਕਮਾਮਨ ਅਤੇ ਪੀ ਐਚ ਸੀ ਔੜ ਦਾ ਦੌਰਾ ਵੀ ਕੀਤਾ ਗਿਆ।