ਐਸ ਐਸ ਪੀ ਅਲਕਾ ਮੀਨਾ ਨੇ ਅੱਜ ਜ਼ਿਲ੍ਹਾ ਪੁਲਿਸ ਵੱਲੋਂ ਸਹਿਕਾਰੀ ਖੰਡ ਮਿੱਲ ਦੇ ਸਹਿਯੋਗ ਨਾਲ ਕਰਵਾਏ ਗਏ 31ਵੇਂ ਕੌਮੀ ਸੜ੍ਹਕ ਸੁਰੱਖਿਆ ਸਪਤਾਹ ਸਮਾਗਮ ਦੀ ਸ਼ੁਰੂਆਤ ਕਰਦਿਆਂ ਆਖਿਆ ਕਿ ਸੜ੍ਹਕ ਹਾਦਸੇ ਦੇ ਪੀੜਤਾਂ ਦੀ ਮੱਦਦ ਕਰਨਾ ਅਜੋਕੇ ਸਮੇਂ ’ਚ ਸਭ ਤੋਂ ਵੱਡਾ ਪਰਉਪਕਾਰ ਹੈ।ਉਨ੍ਹਾਂ ਅੱਗੇ ਕਿਹਾ ਕਿ ਹਰੇਕ ਨਾਗਰਿਕ ਨੂੰ ਸੜ੍ਹਕ ਸੁਰੱਖਿਆ ਨਿਯਮਾਂ ਦੀ ਪਾਲਣਾ ਕਰਨੀ ਚਾਹੀਦੀ ਹੈ ਅਤੇ ਜੇਕਰ ਕਿਸੇ ਨਾਲ ਅਣਸੁਖਾਵੀਂ ਘਟਨਾ ਵਾਪਰਦੀ ਹੈ ਤਾਂ ਸਬੰਧਤ ਵਿਅਕਤੀ ਦੀ ਸਹਾਇਤਾ ਕਰਨ ਨੂੰ ਯਕੀਨੀ ਬਣਾਇਆ ਜਾਵੇ ਤਾਂ ਜੋ ਵੱਡਮੁੱਲੀਆਂ ਜਾਨਾਂ ਬਚਾਈਆਂ ਜਾ ਸਕਣ। ਉਨ੍ਹਾਂ ਕਿਹਾ ਕਿ ਇਸ ਤੋਂ ਵੀ ਅੱਗੇ ਸਾਨੂੰ ਸੜ੍ਹਕ ’ਤੇ ਵਾਹਨ ਚਲਾਉਂਦੇ ਹੋਏ ਆਪਣੇ ਨਾਲ-ਨਾਲ ਦੂਸਰੇ ਵਾਹਨ ਚਾਲਕਾਂ ਦੀ ਸੁਰੱਖਿਆ ਦਾ ਖਿਆਲ ਰੱਖਣ ਲਈ ਸੜ੍ਹਕ ਸੁਰੱਖਿਆ ਨਿਯਮਾਂ ਦੀ ਪਾਲਣਾ ਕਰਨੀ ਚਾਹੀਦੀ ਹੈ।ਐਸ ਐਸ ਪੀ ਅਨੁਸਾਰ ਸੜ੍ਹਕ ਸੁਰੱਖਿਆ ਸਪਤਾਹ ਮਨਾਉਣ ਦਾ ਅਮਲੀ ਰੂਪ ’ਚ ਸਮੁੱਚੇ ਸਮਾਜ ਨੂੰ ਲਾਭ ਤਾਂ ਹੀ ਹੋ ਸਕਦਾ ਹੈ ਜੇਕਰ ਅਸੀਂ ਸੜ੍ਹਕ ਸੁਰੱਖਿਆ ਨੂੰ ਲੈ ਕੇ ਬਣੇ ਨਿਯਮਾਂ ਦੀ ਪਾਲਣਾ ਕਰੀਏ, ਬੱਚਿਆਂ ਨੂੰ ਵਾਹਨ ਚਲਾਉਣ ਦੀ ਇਜ਼ਾਜ਼ਤ ਨਾ ਦੇਈਏ ਅਤੇ ਸੜ੍ਹਕ ’ਤੇ ਚਲਦੇ ਆਪਣੇ ਵਾਹਨ ਤੋਂ ਛੋਟੇ ਵਾਹਨਾਂ ਜਿਵੇਂ ਦੋਪਹੀਆ ਵਾਹਨ ਆਦਿ ਦੀ ਸੁਰੱਖਿਆ ਦਾ ਖਿਆਲ ਰੱਖੀਏ।ਉਨ੍ਹਾਂ ਇਸ ਮੌਕੇ ਖੰਡ ਮਿੱਲ ’ਚ ਗੰਨਾ ਲੈ ਕੇ ਆਉਂਦੇ ਟਰਾਲੀ ਚਾਲਕਾਂ ਨੂੰ ਸੜ੍ਹਕ ’ਤੇ ਚੱਲਣ ਲੱਗਿਆਂ ਪੂਰੀ ਸਾਵਧਾਨੀ ਵਰਤਣ, ਟਰਾਲੀਆਂ ਦੇ ਪਿੱਛੇ ਰਿਫ਼ਲੈਕਟਰ/ਲਾਈਟਾਂ ਲਾਉਣ ਅਤੇ ਹਨ੍ਹੇਰੇ-ਸਵੇਰੇ ਚੱਲਣ ਦੀ ਬਜਾਏ ਦਿਨ ਸਮੇਂ ਹੀ ਗੰਨਾ ਲੈ ਕੇ ਆਉਣ ਲਈ ਆਖਿਆ।ਐਸ ਪੀ (ਐਚ) ਬਲਵਿੰਦਰ ਸਿੰਘ ਭੀਖੀ ਨੇ ਨਿੱਤ ਦਿਨ ਹੁੰਦੇ ਸੜ੍ਹਕੀ ਹਾਦਸਿਆਂ ’ਚ ਜਾਂਦੀਆਂ ਅਜਾਈਂ ਜਾਨਾਂ ’ਤੇ ਚਿੰਤਾ ਪ੍ਰਗਟ ਕਰਦਿਆਂ ਕਿਹਾ ਕਿ ਕੋਈ ਵੀ ਹਾਦਸਾ ਤੇਜ਼ ਰਫ਼ਤਾਰ ਜਾਂ ਨਸ਼ਾ ਕਰਕੇ ਗੱਡੀ ਚਲਾਉਣ ਜਾਂ ਮੋਬਾਇਲ ਦੀ ਵਰਤੋਂ ਕਰਨ ਜਾਂ ਫ਼ਿਰ ਸੜ੍ਹਕੀ ਨਿਯਮਾਂ ਪ੍ਰਤੀ ਅਣਗਹਿਲੀ ਕਾਰਨ ਵਾਪਰਦਾ ਹੈ।
ਸਾਨੂੰ ਅਣਮੁੱਲੇ ਮਾਨਵੀ ਜੀਵਨ ਪ੍ਰਤੀ ਸੁਚੇਤ ਹੋਣਾ ਚਾਹੀਦਾ ਹੈ ਕਿਉਂ ਜੋ ਹਾਦਸਿਆਂ ’ਚ ਮਨੁੱਖੀ ਜਾਨਾਂ ਗੁਆਉਣ ਬਾਅਦ ਪਿੱਛੇ ਪਰਿਵਾਰਾਂ ’ਤੇ ਦੁੱਖਾਂ ਦੇ ਪਹਾੜ ਟੁੱਟ ਜਾਂਦੇ ਹਨ। ਜ਼ਿਲ੍ਹਾ ਪੁਲਿਸ ਦੇ ਸਾਂਝ ਕੇਂਦਰ ਦੇ ਟ੍ਰੈਫ਼ਿਕ ਐਜੂਕੇਸ਼ਨ ਸੈੱਲ ਦੇ ਏ ਐਸ ਆਈ ਹੁਸਨ ਲਾਲ ਵੱਲੋਂ ਇਸ ਮੌਕੇ ਸੜ੍ਹਕੀ ਨਿਯਮਾਂ ਦੀ ਪਾਲਣਾ ਪ੍ਰਤੀ ਜਾਣਕਾਰੀ ਦਿੱਤੀ ਗਈ।ਬਾਅਦ ਵਿੱਚ ਮਿੱਲ ਵਿੱਚ ਖੜ੍ਹੀਆਂ ਟਰਾਲੀਆਂ ਦੇ ਪਿੱਛੇ ਰਿਫ਼ਲੈਕਟਰ ਲਾਏ ਗਏ ਅਤੇ ਉਸ ਤੋਂ ਬਾਅਦ ਮੇਨ ਸੜ੍ਹਕ ’ਤੇ ਦੋਪਹੀਆ ਵਾਹਨ ਚਾਲਕਾਂ ਨੂੰ ਪ੍ਰੇਰਿਤ ਕਰਨ ਲਈ ਸੰਕੇਤਕ ਤੌਰ ’ਤੇ ਹੈਲਮੈਟ ਵੰਡੇ ਗਏ। ਇਸ ਤੋਂ ਇਲਾਵਾ ਟ੍ਰੈਫ਼ਿਕ ਨਿਯਮਾਂ ਦੀ ਪਾਲਣਾ ਨਾ ਕਰਨ ਵਾਲੇ ਵਾਹਨ ਚਾਲਕਾਂ ਮਸਲਨ ਸੀਟ ਬੈਲਟ/ਹੈਲਮੇਟ ਦੀ ਵਰਤੋਂ ਨਾ ਕਰਨ ਵਾਲਿਆਂ ਨੂੰ ਗੁਲਾਬ ਦੇ ਫੁੱਲ ਭੇਟ ਕਰਕੇ ਭਵਿੱਖ ’ਚ ਟ੍ਰੈਫ਼ਿਕ ਨਿਯਮਾਂ ਦੀ ਵਰਤੋਂ ਲਾਜ਼ਮੀ ਕਰਨ ਲਈ ਪ੍ਰੇਰਿਆ ਗਿਆ। ਇਸ ਮੌਕੇ ਪ੍ਰਕਾਸ਼ ਮਾਡਲ ਸਕੂਲ ਦੇ ਵਿਦਿਆਰਥੀਆਂ ਨੇ ਪੁਲਿਸ ਨਾਲ ਵਾਲੰਟੀਅਰਜ਼ ਵਜੋਂ ਸੇਵਾ ਨਿਭਾਈ। ਇਸ ਮੌਕੇ ਮਿੱਲ ਦੇ ਜੀ ਐਮ ਕੰਵਲਜੀਤ ਸਿੰਘ ਅਤੇ ਮੁੱਖ ਗੰਨਾ ਵਿਕਾਸ ਅਫ਼ਸਰ ਜੀ ਸੀ ਯਾਦਵ ਵੱਲੋਂ ਐਸ ਐਸ ਪੀ ਸ੍ਰੀਮਤੀ ਅਲਕਾ ਮੀਨਾ ਦਾ ਮਿੱਲ ’ਚ ਪੁੱਜਣ ’ਤੇ ਸਵਾਗਤ ਕੀਤਾ ਗਿਆ। ਹੋਰਨਾਂ ਤੋਂ ਇਲਾਵਾ ਡੀ ਐਸ ਪੀ (ਟ੍ਰੈਫ਼ਿਕ ਤੇ ਸਪੈਸ਼ਲ ਬ੍ਰਾਂਚ) ਦੀਪਿਕਾ ਸਿੰਘ, ਡੀ ਐਸ ਪੀ ਨਵਾਂਸ਼ਹਿਰ ਹਰਨੀਲ ਸਿੰਘ, ਥਾਣਾ ਸਿਟੀ ਇੰਚਾਰਜ ਇੰਸਪੈਕਟਰ ਕੁਲਜੀਤ ਸਿੰਘ, ਟ੍ਰੈਫ਼ਿਕ ਇੰਚਾਰਜ ਐਸ ਆਈ ਰਤਨ ਸਿੰਘ ਤੇ ਮਿੱਲ ਪ੍ਰਬੰਧਕਾਂ ’ਚੋਂ ਜੀ.ਸੀ.ਸ਼ੁਕਲਾ (ਮੁੱਖ ਰਸਾਇਣਕਾਰ), ਸ਼ੁਸ਼ੀਲ ਕੁਮਾਰ ਗੁਪਤਾ (ਮੁੱਖ ਇੰਜੀਨੀਅਰ), ਗੌਰਵ ਕੁਮਾਰ (ਮੱੁਖ ਲੇਖਾ ਅਫਸਰ), ਸ਼ਾਮ ਸੁੰਦਰ (ਆਫਿਸ ਸੁਪਰਡੈਂਟ), ਬਹਾਦਰ ਸਿੰਘ ਕੌਲਗੜ (ਸੂਬਾ ਪ੍ਰਧਾਨ ਮੁਲਾਜ਼ਮ ਯੂਨੀਅਨ) ਤੇ ਕੁਲਵਿੰਦਰ ਸਿੰਘ (ਪ੍ਰਧਾਨ ਮੁਲਾਜਮ ਯੂਨੀਅਨ) ਤੋਂ ਇਲਾਵਾ ਸ਼ਹਿਰ ਦੇ ਪਤਵੰਤੇ ਤੇ ਕਿਸਾਨ ਮੌਜੂਦ ਸਨ।