5 Dariya News

5 Dariya News

ਸ੍ਰ੍ਰੀ ਮੁਕਤਸਰ ਸਾਹਿਬ , 09 Oct 2019

ਜ਼ਿਲਾ ਪੁਲਿਸ ਵੱਲੋਂ ਸ੍ਰੀ ਮੁਕਤਸਰ ਸਾਹਿਬ, ਮਲੋਟ ਅਤੇ ਗਿੱਦੜਬਾਹਾ ਵਿਚ ਕੁੱਲ 37 ਦੋਪਹੀਆਂ ਵਾਹਨਾਂ ਤੇ ਪੁਲਿਸ ਜਵਾਨ ਤਾਇਨਾਤ ਕੀਤੇ ਗਏ ਹਨ ਜੋ ਕਿ ਆਪਣੇ ਇਲਾਕੇ ਦੇ ਚੱਪੇ ਚੱਪੇ ਤੇ ਨਜ਼ਰ ਰੱਖਣਗੇ ਅਤੇ ਸ਼ਹਿਰ ਵਿਚ ਕੋਈ ਵੀ ਘਟਨਾ ਵਾਪਰਨ ਦੇ 5 ਮਿੰਟ ਵਿਚ ਇਹ ਟੁਕੜੀ ਮੌਕੇ ਤੇ ਪੁੱਜੇਗੀ। ਇਹ ਜਾਣਕਾਰੀ ਜ਼ਿਲੇ ਦੇ ਐਸ.ਐਸ.ਪੀ. ਸ: ਰਾਜ ਬਚਨ ਸਿੰਘ ਸੰਧੂ ਨੇ ਇੱਥੇ ਪੀਸੀਆਰ ਮੋਟਰਸਾਈਕਲਾਂ ਨੂੰ ਇਸ ਡਿਊਟੀ ਲਈ ਰਵਾਨਾ ਕਰਨ ਮੌਕੇ ਦਿੱਤੀ।ਐਸ.ਐਸ.ਪੀ. ਸ: ਰਾਜਬਚਨ ਸਿੰਘ ਨੇ ਦੱਸਿਆ ਕਿ ਪੀਸੀਆਰ ਦੇ 10 ਮੋਟਰਸਾਈਕਲ ਸ੍ਰੀ ਮੁਕਤਸਰ ਸਾਹਿਬ ਵਿਖੇ, 10 ਮਲੋਟ ਵਿਖੇ ਅਤੇ 5 ਗਿੱਦੜਬਾਹਾ ਵਿਖੇ ਅਤੇ ਮਹਿਲਾ ਪੁਲਿਸ ਵੋਮੇਨ ਆਰਮਡ ਸਪੈਸ਼ਲ ਪ੍ਰੋਟਕਸ਼ਨ ਸੁਕੈਅਡ, ਦੀਆਂ 5 5 ਟੀਮਾਂ ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਅਤੇ 2 ਟੀਮਾਂ ਗਿੱਦੜਬਾਹਾ ਵਿਖੇ ਤਾਇਨਾਤ ਕੀਤੀਆਂ ਗਈਆਂ ਹਨ। ਪੀਸੀਆਰ ਟੀਮਾਂ 24 ਘੰਟੇ ਗਸਤ ਕਰਨਗੀਆਂ ਜਦਕਿ ਮਹਿਲਾ ਟੁਕੜੀਆਂ ਦੀ ਤਾਇਨਾਤੀ ਕੇਵਲ ਦਿਨ ਵੇਲੇ ਹੋਵੇਗੀ। ਉਨਾਂ ਨੇ ਕਿਹਾ ਕਿ ਇਹ ਪੀਸੀਆਰ ਟੀਮਾਂ ਸ਼ਹਿਰ ਵਿਚ ਕਿਸੇ ਵੀ ਘਟਨਾ ਅਥਵਾ ਅਪਰਾਧ ਵਾਲੀ ਥਾਂ ਤੇ 5 ਮਿੰਟ ਵਿਚ ਪੁੱਜਣਗੀਆਂ। ਜਿੱਥੇ ਇਹ ਮੌਕੇ ਤੇ ਜਾ ਕੇ ਸਥਿਤੀ ਨੂੰ ਸੰਭਾਲਣਗੀਆਂ ਅਤੇ ਇਹ ਵੀ ਯਕੀਨੀ ਬਣਾਉਣਗੀਆਂ ਕਿ ਨੇੜਲੇ ਥਾਣੇ ਦੀ ਪੁਲਿਸ ਪੁੱਜਣ ਤੱਕ ਸਬੂਤਾਂ ਨਾਲ ਛੇੜਛਾੜ ਨਾ ਹੋਵੇ। ਜਦ ਨੇੜਲੇ ਥਾਣੇ ਦੀ ਪੁਲਿਸ ਪਾਰਟੀ ਪੁੱਜ ਜਾਵੇਗੀ ਤਾਂ ਇਹ ਉਕਤ ਪੁਲਿਸ ਦਲ ਨੂੰ ਮੌਕਾ ਸੰਭਾਲ ਕੇ ਆਪਣੀ ਡਿਊਟੀ ਤੇ ਆ ਜਾਣਗੀਆਂ। ਜਦ ਕਿ ਮਹਿਲਾ ਟੁਕੜੀਆਂ ਦੀ ਤਾਇਨਾਤੀ ਖਾਸ ਉਨਾਂ ਥਾਂਵਾਂ ਤੇ ਕੀਤੀ ਗਈ ਹੈ ਜਿੱਥੇ ਔਰਤਾਂ ਜਾਂ ਲੜਕੀਆਂ ਦੀ ਆਵਾਜਾਈ ਜਿਆਦਾ ਹੈ। ਉਨਾਂ ਨੇ ਕਿਹਾ ਕਿ ਔਰਤਾਂ ਕਿਸੇ ਵੀ ਮੁਸਕਿਲ ਸਮੇਂ ਸ਼ਕਤੀ ਮੋਬਾਇਲ ਐਪ ਰਾਹੀਂ ਵੀ ਪੁਲਿਸ ਮਦਦ ਪ੍ਰਾਪਤ ਕਰ ਸਕਦੀਆਂ ਹਨ।ਐਸ.ਐਸ.ਪੀ. ਸ: ਰਾਜਬਚਨ ਸਿੰਘ ਸੰਧੂ ਨੇ ਦੱਸਿਆ ਕਿ ਇੰਨਾਂ ਪੀਸੀਆਰ ਟੁਕੜੀਆਂ ਨੂੰ ਪੁਲਿਸ ਕੰਟਰੋਲ ਰੂਮ ਨਾਲ ਜੋੜਿਆ ਗਿਆ ਹੈ ਅਤੇ ਪੁਲਿਸ ਕੰਟਰੋਲ ਰੂਮ ਵਿਖ ਇੰਨਾਂ ਦੀ ਲਾਈਵ ਲੋਕੇਸ਼ਨ ਪਤਾ ਚਲਦੀ ਰਹੇਗੀ। ਜਦੋਂ ਵੀ ਪੁਲਿਸ ਕੰਟਰੋਲ ਰੂਮ ਨੂੰ ਕੋਈ ਇਤਲਾਹ ਮਿਲੇਗੀ ਤਾਂ ਕੰਟਰੋਲ ਰੂਮ ਤੋਂ ਘਟਨਾ ਸਥਾਨ ਦੇ ਨੇੜੇ  ਦੀ ਪੀਸੀਆਰ ਟੀਮ ਨੂੰ ਸੂਚਿਤ ਕਰਕੇ ਮੌਕੇ ਤੇ ਭੇਜਿਆ ਜਾਵੇਗਾ। ਉਨਾਂ ਨੇ ਕਿਹਾ ਕਿ ਪੁਲਿਸ ਦਾ ਉਦੇਸ਼ ਲੋਕਾਂ ਨੂੰ ਸੁਰੱਖਿਅਤ ਮਹੌਲ ਦੇਣਾ ਹੈ। ਉਨਾਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਪੁਲਿਸ ਨੂੰ ਸੱਚੀ ਇਤਲਾਹ ਦਿੱਤੀ ਜਾਵੇੇ। ਉਨਾਂ ਨੇ ਦੱਸਿਆ ਕਿ ਪੁਲਿਸ ਦਾ ਨਵਾਂ ਕੰਟਰੋਲ ਰੂਮ ਦਾ ਨੰਬਰ 112 ਹੈ ਅਤੇ ਕਿਸੇ ਵੀ ਅਪਾਤ ਸਥਿਤੀ ਵਿਚ ਪੁਲਿਸ ਮਦਦ ਲਈ ਲੋਕ 112 ਤੇ ਕਾਲ ਕਰ ਸਕਦੇ ਹਨ।ਇਸ ਮੌਕੇ ਐਸ.ਪੀ.ਐਚ. ਸ: ਗੁਰਮੇਲ ਸਿੰਘ ਧਾਲੀਵਾਲ, ਐਸ.ਪੀ. ਕੁਲਵੰਤ ਰਾਏ, ਡੀਐਸਪੀ ਗੁਰਤੇਜ ਸਿੰਘ ਅਤੇ ਹਿਨਾ ਗੁਪਤਾ ਆਦਿ ਵੀ ਹਾਜਰ ਸਨ।