ਲੱਗਪੱਗ ਡੇਢ ਸਾਲ ਤੋਂ ਚੱਲ ਰਹੇ ਓਵਰਬ੍ਰਿਜ਼ ਦੇ ਕੰਮ ਵਿੱਚ ਹੋ ਰਹੀ ਦੇਰੀ ਅਤੇ ਇਸ ਸਬੰਧੀ ਲੋਕਾਂ ਨੂੰ ਆਉਣ ਵਾਲੀਆਂ ਮੁਸ਼ਕਿਲਾ ਨੂੰ ਲੈ ਕੇ ਅੱਜ ਰਣਜੀਤ ਸਿੰਘ ਗਿੱਲ ਮੀਤ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ ਅਤੇ ਮੁੱਖ ਸੇਵਾਦਾਰ ਹਲਕਾ ਖਰੜ ਨੇ ਕਿਹਾ ਕਿ ਆਉਣ ਜਾਣ ਵਾਲੇ ਰਾਹਗੀਰਾ ਨੂੰ ਟ੍ਰੈਫਿਕ ਜਾਮ ਅਤੇ ਬਹੁਤ ਹੀ ਖਸਤਾ ਹਾਲਤ ਵਾਲੀ ਰੋਡ ਤੋ ਲੰਘਣਾ ਪੈ ਰਿਹਾ ਹੈ। ਸ. ਗਿੱਲ ਨੇ ਆਪਣੇ ਪ੍ਰੈਸ ਨੋਟ ਵਿੱਚ ਕਿਹਾ ਕਿ ਜਿਹੜੀ ਵੀ ਕੰਪਨੀ ਓਵਰਬ੍ਰਿਜ਼ ਬਣਾਉਦੀ ਹੈ, ਉਸਦਾ ਇਹ ਫਰਜ਼ ਹੁੰਦਾ ਹੈ ਕਿ ਉਹ ਸਰਵਿਸ ਰੋਡ ਨੂੰ ਹਰ ਹਾਲਤ ਵਿੱਚ ਚਾਲੂ ਰੱਖੇ, ਪਰ ਓਵਰਬ੍ਰਿਜ਼ ਬਣਾਉਣ ਵਾਲੀ ਕੰਪਨੀ ਇਸ ਗੱਲ ਦੀ ਪ੍ਰਵਾਹ ਕੀਤੇ ਬਿਨ੍ਹਾਂ ਹੀ ਆਪਣਾ ਕੰਮ ਕਰ ਰਹੀ ਹੈ।ਰਾਣਾ ਗਿੱਲ ਨੇ ਕਿਹਾ ਅੱਜ ਕੱਲ ਹੋ ਰਹੀ ਬਾਰਿਸ਼ ਕਾਰਨ ਰੋਡ ਤੇ ਚੀਕੜੀ ਜਮ੍ਹਾਂ ਹੋ ਗਈ ਹੈ ਜਿਸ ਕਾਰਨ ਕੋਈ ਵੀ ਅਣਸੁਖਾਵੀ ਘਟਨਾ ਵਾਪਰਨ ਦਾ ਖਤਰਾ ਹੈ। ਉਨ੍ਹਾਂ ਕਿਹਾ ਕਿ ਰੋਡ ਦੀ ਹਾਲਤ ਬਹੁਤ ਹੀ ਜਿਆਦਾ ਖਰਾਬ ਹੈ ਅਤੇ ਬਹੁਤ ਸਾਰੇ ਟੋਏ ਪਏ ਹੋਏ ਹਨ। ਜਿਸ ਕਾਰਨ ਵਹੀਕਲਾਂ ਦਾ ਨੁਕਸਾਨ ਹੋਣ ਦੇ ਨਾਲ ਨਾਲ ਲੋਕਾਂ ਨੂੰ ਹੁਣ ਇੱਥੋ ਲੰਘਣ ਤੋ ਵੀ ਡਰ ਲੱਗਣ ਲੱਗ ਪਿਆ ਹੈ।ਉਨ੍ਹਾਂ ਕਿਹਾ ਕਿ ਨਾ ਤਾ ਪ੍ਰਸ਼ਾਸ਼ਨ ਦਾ ਇਸ ਵੱਲ ਕੋਈ ਧਿਆਨ ਹੈ ਅਤੇ ਨਾ ਹੀ ਓਵਰਬ੍ਰਿਜ਼ ਬਣਾਉਣ ਵਾਲੀ ਕੰਪਨੀ ਇਸ ਸਬੰਧੀ ਕੁਝ ਕਰ ਰਹੀ ਹੈ। ਮੇਰੀ ਪ੍ਰਸ਼ਾਸ਼ਨ ਨੂੰ ਅਪੀਲ ਹੈ ਕਿ ਉਹ ਆ ਕੇ ਦੇਖਣ ਕਿ ਖਰੜ ਦੇ ਨਿਵਾਸੀ ਨਰਕ ਤੋ ਵੀ ਭੈੜੀ ਜਿੰਦਗੀ ਜਿਊਣ ਲਈ ਮਜਬੂਰ ਹਨ ਅਤੇ ਇਸ ਦਾ ਜਲਦੀ ਤੋਂ ਜਲਦੀ ਕੋਈ ਹੱਲ ਕੱਢਿਆ ਜਾਵੇ।