ਥਾਣਾ ਬਲੌਗੀ ਅਧੀਨ ਪੈਂਦੇ ਇਲਾਕੇ ਅੰਬੇਦਕਰ ਕਲੋਨੀ ਵਿੱਚ ਸਾਧੂ ਦੀ ਝੁੱਗੀ ਨਜ਼ਦੀਕ ਸੰਨੀ ਪਾਸਵਾਨ ਪੁੱਤਰ ਮੁਕਰਧੰਨ ਪਾਸਵਾਨ ਵਾਸੀ ਅੰਬੇਦਕਰ ਕਲੋਨੀ ਦੇ ਹੋਏ ਕਤਲ ਦੀ ਗੁੱਥੀ ਪੁਲੀਸ ਨੇ ਸੁਲਝਾ ਲਈ ਹੈ। ਉਪ ਕਪਤਾਨ ਪੁਲਿਸ ਖਰੜ ਸ੍ਰੀ ਦੀਪ ਕਮਲ ਨੇ ਦੱਸਿਆ ਕਿ ਸੰਨੀ ਪਾਸਵਾਨ ਦੀ ਲਾਸ਼ 28 ਮਈ 2019 ਦੀ ਰਾਤ ਨੂੰ ਬਰਾਮਦ ਹੋਈ ਸੀ। ਇਸ ਉਤੇ ਪੁਲੀਸ ਨੇ ਥਾਣਾ ਬਲੌਂਗੀ ਵਿੱਚ ਆਈ.ਪੀ.ਸੀ. ਦੀ ਧਾਰਾ ਮੁਕੱਦਮਾ 302 ਤੇ 34 ਤਹਿਤ ਕੇਸ ਦਰਜ ਕੀਤਾ ਸੀ। ਉਨਾਂ ਦੱਸਿਆ ਕਿ ਐਸ.ਐਚ.ਓ. ਥਾਣਾ ਬਲੌਂਗੀ ਯੋਗੇਸ਼ ਕੁਮਾਰ ਦੀ ਟੀਮ ਨੂੰ ਜਾਂਚ ਦੌਰਾਨ ਪਤਾ ਚੱਲਿਆ ਕਿ ਇਹ ਕਤਲ ਸੰਨੀ ਦੇ ਦੋਸਤਾਂ ਦਲੀਪ ਕੁਮਾਰ, ਅਮਿਤ ਤਿਵਾੜੀ, ਚੰਦਨ ਪਾਸਵਾਨ, ਅਵਿਸ਼ੇਕ ਅਤੇ ਦੀਪਕ ਪਾਸਵਾਨ ਉਰਫ ਮਾਸ ਨੇ ਕੀਤਾ ਹੈ। ਡੀ.ਐਸ.ਪੀ. ਨੇ ਅੱਗੇ ਦੱਸਿਆ ਕਿ ਪੁਲੀਸ ਨੇ 31 ਮਈ ਨੂੰ ਮੁਲਜ਼ਮ ਚੰਦਨ ਪਾਸਵਾਨ ਵਾਸੀ ਮਕਾਨ ਨੰਬਰ 256 ਅੰਬੇਦਕਰ ਕਲੋਨੀ ਬਲੌਂਗੀ ਨੂੰ ਆਦਰਸ਼ ਨਗਰ ਬਲੌਂਗੀ ਦੇ ਪਿਛਲੇ ਪਾਸਿਓਂ ਟੀ.ਡੀ.ਆਈ. ਦੇ ਬਣੇ ਸਟੋਰਾਂ ਕੋਲੋ ਗਿ੍ਰਫਤਾਰ ਕੀਤਾ।
ਇਸ ਦੌਰਾਨ 2 ਜੂਨ ਨੂੰ ਦਲੀਪ ਯਾਦਵ ਵਾਸੀ ਮਕਾਨ ਨੰਬਰ 4 ਅੰਬੇਦਕਰ ਕਲੋਨੀ ਨੂੰ ਫੇਜ਼-5 ਦੇ ਪਾਰਕ ਨੇੜੇ ਸਵਰਾਜ ਫੈਕਟਰੀ ਮੁਹਾਲੀ ਤੋ ਗਿ੍ਰਫਤਾਰ ਕੀਤਾ ਗਿਆ ਅਤੇ ਬਾਕੀ ਦੇ ਤਿੰਨ ਮੁਲਜ਼ਮਾਂ ਦੀਪਕ ਪਾਸਵਾਨ ਉਰਫ ਮਾਸ ਵਾਸੀ ਅੰਬੇਦਕਰ ਕਲੋਨੀ ਬਲੌਂਗੀ, ਅਮਿਤ ਤਿਵਾੜੀ ਵਾਸੀ ਮਕਾਨ ਨੰਬਰ 86 ਆਜ਼ਾਦ ਨਗਰ ਬਲੌਂਗੀ ਅਤੇ ਅਵਿਸ਼ੇਕ ਪਾਸਵਾਨ ਵਾਸੀ ਅੰਬੇਦਕਰ ਕਲੋਨੀ ਨੂੰ 5 ਜੂਨ ਨੂੰ ਮਿਨਰਵਾ ਅਕੈਡਮੀ ਮੋੜ ਲਾਗੇ ਪਿੰਡ ਦਾਊਂ ਲਿੰਕ ਰੋਡ ਕੋਲ ਅੰਬਾਂ ਦੇ ਬਾਗ ਵਿੱਚੋਂ ਨਿਕਲਦਿਆਂ ਗਿ੍ਰਫਤਾਰ ਕੀਤਾ ਗਿਆ। ਪੁਲੀਸ ਨੇ ਕਤਲ ਦੀ ਵਾਰਦਾਤ ਵਿੱਚ ਵਰਤੇ ਗਏ ਮੋਟਰ ਸਾਈਕਲ (ਪੀ ਬੀ 65ਏ ਟੀ 0576) ਜੋ ਮੁਲਜ਼ਮ ਚੰਦਨ ਪਾਸਵਾਨ ਦਾ ਹੈ, ਨੂੰ ਵੀ ਬਰਾਮਦ ਕਰ ਲਿਆ ਹੈ। ਕਤਲ ਵਿੱਚ ਵਰਤੀਆਂ ਕਿਰਚਾਂ ਵੀ ਬਰਾਮਦ ਕਰ ਲਈਆਂ ਗਈਆਂ। ਮੁਲਜ਼ਮਾਂ ਨੇ ਪੁੱਛ-ਪੜਤਾਲ ਦੌਰਾਨ ਮੰਨਿਆ ਕਿ ਉਨਾਂ ਪਰਿਵਾਰਕ ਰੰਜ਼ਸ਼ ਕਾਰਨ ਸੰਨੀ ਪਾਸਵਾਨ ਦਾ ਕਤਲ ਕੀਤਾ ਹੈ। ਮੁਲਜ਼ਮਾਂ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਜਾ ਰਿਹਾ ਹੈ।