ਗੁਰਦਾਸਪੁਰ ਸ਼ਹਿਰ ਦੀ ਵਸਨੀਕ ਡਾ. ਕਿਰਨ ਕੁਮਾਰੀ ਨੇ ਸਰੀਰਕ ਅਸਮਰੱਥਾ ਨੂੰ ਮਾਤ ਦਿੰਦਿਆਂ ਗੁਰਦਾਸਪੁਰ ਜਿਲੇ ਦਾ ਨਾਂਅ ਪੂਰੇ ਦੇਸ਼ ਵਿਚ ਰੋਸ਼ਨ ਕੀਤਾ ਹੈ। ਜ਼ਿਲੇ ਦੀ ਇਹ ਹੋਣਹਾਰ ਧੀ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਸਮਾਜ ਵਿਗਿਆਨ ਵਿਭਾਗ ਵਿਖੇ ਸਹਾਇਕ ਪ੍ਰੋਫੈਸਰ ਵਜੋਂ ਸੇਵਾਵਾਂ ਨਿਭਾ ਰਹੀ ਹੈ ਨੂੰ ਅੰਤਰਰਾਸ਼ਟਰੀ ਵਿਕਲਾਂਗ ਦਿਵਸ ਮੌਕੇ ਬੀਤੀ ਤਿੰਨ ਦਸੰਬਰ ਨੂੰ ਦੇਸ਼ ਦੇ ਰਾਸ਼ਟਰਪਤੀ ਰਾਮ ਨਾਥ ਕੋਵਿੰਦ ਵਲੋਂ 'ਇੰਪਵਾਵਰਮੈਂਟ ਆਫ ਪਰਸਨਜ਼ ਵਿਦ ਡਿਸਏਬੀਲਿਟੀਜ਼–2018 ਕੈਟਾਗਿਰੀ ਵਿਚ 'ਰੋਲ ਆਫ ਮਾਡਲ' ਵਜੋਂ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ ਹੈ।ਦੱਸਣਯੋਗ ਹੈ ਕਿ ਹਨੂੰਮਾਨ ਚੌਕ ਗੁਰਦਾਸਪੁਰ ਦੀ ਵਸਨੀਕ ਡਾ. ਕਿਰਨ ਕੁਮਾਰੀ ਨੇਤਰਹੀਣ ਹੋਣ ਦੇ ਬਾਵਜੂਦ ਆਪਣੀ ਸਖਤ ਮਿਹਨਤ ਦੇ ਬਲਬੂਤੇ ਯੂਨੀਵਰਸਿਟੀ ਦੇ ਸਮਾਜ ਵਿਗਿਆਨ ਵਿਭਾਗ ਵਿਚ ਇਕ ਅਧਿਆਪਕਾਂ ਵਜੋਂ ਸਫਲ ਸੇਵਾਵਾਂ ਨਿਭਾ ਰਹੀ ਹੈ। ਉਨਾਂ ਦੇ ਅੰਤਰਗਿਤ ਇਕ ਵਿਦਿਆਰਥੀ ਵਲੋਂ ਆਪਣੀ ਪੀ.ਐਚ ਡੀ ਸੰਪੰਨ ਕਰ ਲਈ ਗਈ ਹੈ ਜਦ ਕਿ ਪੰਜ ਹੋਰ ਵਿਦਿਆਰਥੀ ਪੀ.ਐਚ.ਡੀ ਤੇ ਸੱਤ ਵਿਦਿਆਰਥੀ ਐਮ.ਫਿਲ ਕਰ ਰਹੇ ਹਨ। ਪੰਜਾਬ ਸਰਕਾਰ ਵਲੋਂ ਵੀ ਡਾ. ਕਿਰਨ ਕੁਮਾਰੀ ਨੂੰ ਪਿਛਲੇ ਸਾਲ ਤਿੰਨ ਦਸੰਬਰ ਨੂੰ ਵਿਸ਼ੇਸ ਤੋਰ ਤੇ ਸਨਮਾਨਿਤ ਕੀਤਾ ਜਾ ਚੁੱਕਾ ਹੈ।
ਇਸ ਪ੍ਰਾਪਤੀ ਤੋਂ ਇਲਾਵਾ ਡਾ. ਕਿਰਨ ਇਸ ਸਮੇ ਪੰਜਾਬ ਸੂਬੇ ਦੇ ਵਿਕਲਾਂਗ ਬੋਰਡ ਦੇ ਸਲਾਹਕਾਰ ਵਜੋਂ ਸੇਵਾਵਾਂ ਨਿਭਾ ਰਹੇ ਹਨ। ਆਪਣੀਆਂ ਇਨਾਂ ਪ੍ਰਾਪਤੀਆਂ ਕਾਰਨ ਉਹ ਜ਼ਿੰਦਗੀ ਵਿਚ ਹੋਰਨਾਂ ਲੋਕਾਂ ਲਈ ਵੀ ਪ੍ਰੇਰਨਾ ਸਰੋਤ ਵਜੋਂ ਵਿਚਰ ਰਹੇ ਹਨ।ਡਾ. ਕਿਰਨ ਕੁਮਾਰੀ ਪੁੱਤਰੀ ਸਵ. ਬਿਸੰਬਰ ਦਾਸ ਨੇ ਅੱਖਾਂ ਦੀ ਰੋਸ਼ਨੀ ਨਾ ਹੋਣ ਕਾਰਨ ਵੀ ਉੱਚ ਯੋਗਤਾ ਹਾਸਿਲ ਕੀਤੀ ਹੈ ਤੇ ਉਸਦੀ ਮਿਹਨਤ ਤੇ ਦ੍ਰਿੜ ਸ਼ਕਤੀ ਅੱਗੇ ਇਹ ਕਮੀ ਉਸ ਨੂੰ ਸਫਲਤਾ ਹਾਸਿਲ ਕਰਨ ਵਿਚ ਰੋਕਣ ਤੋਂ ਅਸਮਰੱਥ ਰਹੀ। ਉਨਾਂ 1987 ਵਿਚ ਮੈਟ੍ਰਿਕ ਪਾਸ ਕੀਤੀ ਤੇ 19 ਸਾਲ ਦੀ ਉਮਰ ਵਿਚ ਹੀ ਡਿਗਰੀ ਹਾਸਿਲ ਕਰ ਲਈ। ਡਾ. ਕਿਰਨ ਕੁਮਾਰੀ ਨੇ ਮੁੜ ਵਸੇਬੇ ਵਿਸ਼ੇ ਹੇਠ ਸੰਨ 2012 ਵਿਚ ਪੰਜਾਬ ਯੂਨੀਵਰਸਿਟੀ , ਚੰਡੀਗੜ ਤੋਂ ਪੀ.ਐਚ.ਡੀ.ਹਾਸਿਲ ਕੀਤੀ। ਇਸ ਤੋ ਇਲਾਵਾ ਡਾ. ਕਿਰਨ ਕੁਮਾਰੀ ਨੇ ਇੰਗਲਿਸ਼ ਸਟੋਨੋਗ੍ਰਾਫੀ, 80 ਸ਼ਬਦ ਪ੍ਰਤੀ ਮਿੰਟ ਦੀ ਸਪੀਡ ਵਿਚ ਹਾਸਿਲ ਕੀਤੀ ਹੋਈ ਹੈ। ਡਾ. ਕਿਰਨ ਕੁਮਾਰੀ 2012 ਤੋਂ ਨਾਰਥ ਵੈਸਟ ਇੰਡੀਅਨ ਸੋਸਾਲੋਜੀ ਸੁਸਾਇਟੀ ਵਿਚ ਲਾਈਫ ਮੈਂਬਰ ਹਨ। ਸਾਲ 2010 ਤੋਂ ਉਹ ਨੈਸ਼ਨਲ ਫੈਡਰੇਸ਼ਨ ਫਾਰ ਦਾ ਬਲਾਈਂਡ ਵਿਚ ਲਾਈਫ ਮੈਂਬਰ ਹਨ ਅਤੇ 2013 ਤੋਂ ਗਵਰਨਿੰਗ ਬੋਰਡ ਆਫ ਦਿ ਵੋਕੇਸ਼ਨਲ ਰੀਹੈਬਲੀਟੇਸ਼ਨ ਟਰੇਨਿੰਗ ਸੈਂਟਰ, ਲੁਧਿਆਣਾ ਦੇ ਮੈਂਬਰ ਹਨ।ਡਾ. ਕਿਰਨ ਕੁਮਾਰੀ ਨੂੰ ਵੱਖ-ਵੱਖ ਸੰਸਥਾਵਾਂ ਤੋਂ ਕਈ ਵਾਰ ਸਨਮਾਨਿਤ ਵੀ ਕੀਤਾ ਜਾ ਚੁੱਕਾ ਹੈ। ਪੰਜਾਬ ਸਰਕਾਰ ਵਲੋਂ 2017 ਵਿਚ ਸਟੇਟ ਲੈਵਲ ਤੇ ਸਨਮਾਨਿਤ ਕੀਤਾ ਜਾ ਚੁੱਕਾ ਹੈ।