ਪੰਜਾਬ ਸਰਕਾਰ ਵੱਲੋਂ ਸ਼ੁਰੂ ਕੀਤੇ ਗਏ ਮਿਸ਼ਨ ਤੰਦਰੁਸਤ ਪੰਜਾਬ ਵਿਚ ਦੰਦਾਂ ਦੇ ਡਾਕਟਰਾਂ ਦਾ ਸਹਿਯੋਗ ਲੈਣ ਲਈ ਅੱਜ ਇਕ ਵਿਸ਼ੇਸ ਸੈਮੀਨਾਰ ਸਿਵਲ ਸਰਜਨ ਡਾ. ਹਰਦੀਪ ਸਿੰਘ ਘਈ ਦੇ ਦਿਸ਼ਾ ਨਿਰਦੇਸ਼ ਹੇਠ ਡਿਪਟੀ ਡਾਇਰੈਕਟਰ ਕਮ ਡੈਂਟਲ ਹੈਲਥ ਅਫਸਰ ਡਾ. ਸ਼ਰਨਜੀਤ ਕੌਰ ਸਿੱਧੂ ਅਤੇ ਸੀਨੀਅਰ ਮੈਡੀਕਲ ਅਫਸਰ ਡਾ. ਰਜਿੰਦਰ ਅਰੋੜਾ ਦੀ ਪ੍ਰਧਾਨਗੀ ਹੇਠ ਕੀਤਾ ਗਿਆ, ਜਿਸ ਵਿਚ ਦੰਦਾਂ ਦੇ ਡਾਕਟਰਾਂ ਨੂੰ ਇਹ ਸਮਝਾਇਆ ਗਿਆ ਕਿ ਉਹ ਕੇਵਲ ਦੰਦਾਂ ਦਾ ਇਲਾਜ ਹੀ ਨਾ ਕਰਨ ਬਲਕਿ ਆਪਣੇ ਕੋਲ ਆਉਂਦੇ ਮਰੀਜਾਂ ਵਿਚੋਂ ਤੰਬਾਕੂ ਸੇਵਨ ਕਰਨ ਵਾਲੇ ਮਰੀਜਾਂ ਦੀ ਪਛਾਣ ਕਰਨ ਅਤੇ ਉਨਾਂ ਨੂੰ ਤੰਬਾਕੂ, ਗੁਟਖਾ ਤੇ ਸਿਗਰੇਟ ਦੇ ਬਦਲ ਦੱਸਣ, ਤਾਂ ਜੋ ਮੂੰਹ ਦੇ ਕੈਂਸਰ ਤੋਂ ਅਜਿਹੇ ਰੋਗੀਆਂ ਨੂੰ ਬਚਾਇਆ ਜਾ ਸਕੇ। ਡਾ. ਸਿੱਧੂ ਨੇ ਦੱਸਿਆ ਕਿ ਤੰਬਾਕੂ ਪਦਾਰਥਾਂ ਨਾਲ ਹੋਣ ਵਾਲੇ ਫੇਫੜਿਆਂ ਦੇ ਕੈਂਸਰ ਅਤੇ ਗਲੇ ਦੇ ਕੈਂਸਰ ਤੋਂ ਬਹੁਤ ਸਮਾਂ ਪਹਿਲਾਂ ਮੂੰਹ ਦਾ ਕੈਂਸਰ ਹੋਣ ਦਾ ਖ਼ਤਰਾ ਅਜਿਹੇ ਮਰੀਜਾਂ 'ਤੇ ਰਹਿੰਦਾ ਹੈ ਅਤੇ ਇਸ ਦੇ ਲੱਛਣ ਵੀ ਮੂੰਹ ਤੋਂ ਹੀ ਪਤਾ ਲੱਗ ਜਾਂਦੇ ਹਨ ਕਿ ਇਹ ਮਰੀਜ਼ ਜ਼ਿਆਦਾ ਤੰਬਾਕੂ ਪਦਾਰਥ ਲੈ ਰਿਹਾ ਹੈ। ਉਨਾਂ ਸਾਰੇ ਸਰਜਨਾਂ ਨੂੰ ਹਦਾਇਤ ਕੀਤੀ ਕਿ ਉਹ ਦੰਦਾਂ ਦਾ ਇਲਾਜ ਕਰਵਾਉਣ ਆਉਂਦੇ ਮਰੀਜਾਂ ਨੂੰ ਇਸ ਪੱਖ ਤੋਂ ਜ਼ਰੂਰ ਵਾਚਣ ਤੇ ਲੋੜ ਪੈਣ 'ਤੇ ਤੰਬਾਕੂ ਪਦਾਰਥਾਂ ਦੇ ਬਦਲ ਪੇਸ਼ ਕਰਨ, ਤਾਂ ਜੋ ਮਰੀਜ਼ ਨੂੰ ਮੌਤ ਦੇ ਮੂੰਹ ਤੋਂ ਬਚਾਇਆ ਜਾ ਸਕੇ। ਡਾ. ਰਾਜਿੰਦਰ ਅਰੋੜਾ ਨੇ ਦੱਸਿਆ ਕਿ ਦੰਦਾਂ ਦੇ ਡਾਕਟਰਾਂ ਵੱਲੋਂ ਕੀਤੇ ਜਾ ਰਹੇ ਕੰਮਾਂ ਦੀ ਸਰਾਹਨਾ ਕਰਦੇ ਦੱਸਿਆ ਕਿ ਤੁਹਾਡੇ ਵਿਭਾਗ ਦੇ ਡਾਕਟਰਾਂ ਵਿਚੋਂ ਡਾ. ਸੌਰਵ ਤੇ ਡਾ. ਪਰਮਿੰਦਰ ਨੂੰ ਹਾਲ ਹੀ ਵਿਚ ਚੰਗੇ ਕੰਮਾਂ ਲਈ ਆਜ਼ਾਦੀ ਦਿਵਸ ਦੇ ਜਸ਼ਨਾਂ ਮੌਕੇ ਸਨਮਾਨਿਤ ਕੀਤਾ ਗਿਆ ਹੈ, ਜੋ ਕਿ ਬੜੇ ਮਾਣ ਵਾਲੀ ਗੱਲ ਹੈ। ਉਨਾਂ ਕਿਹਾ ਕਿ ਰਾਜ ਵਿਚ ਡਰੱਸ ਅਤੇ ਕੌਸਮੈਟਿਕ ਐਕਟ ਅਧੀਨ ਸਿਗਰੇਟ ਨੂੰ ਆਨ ਅਪਰੂਵਡ ਡਰੱਗ ਐਲਾਨਿਆ ਗਿਆ ਹੈ ਅਤੇ ਕਾਨੂੰਨ ਅਨੁਸਾਰ ਬੱਚਿਆਂ ਨੂੰ ਤੰਬਾਕੂ ਵੇਚਣ ਵਾਲੇ ਨੂੰ ਸੱਤ ਸਾਲ ਦੀ ਕੈਦ ਹੋ ਸਕਦੀ ਹੈ।