ਦੇਸ਼ ਦੀ ਰਾਜਧਾਨੀ ਦਿੱਲੀ ਅਤੇ ਦੇਹਰਾਦੂਨ ਤੋਂ ਉਚ ਵਿਦਿਆ ਪ੍ਰਾਪਤ ਕਰਕੇ ਅਫਸਰ ਬਣਨ ਦੀ ਬਜਾਏ ਕਿਸਾਨ ਹੋਣ ਵਿੱਚ ਫਖਰ ਮਹਿਸੂਸ ਕਰ ਰਿਹਾ ਹੈ ਜ਼ਿਲ੍ਹੇ ਦੇ ਪਿੰਡ ਨਿਹਾਲ ਖੇੜਾ ਦਾ ਵਿਕਾਸ ਰਾਏ। ਉਹ ਖੁਦ ਮਿਟੀ ਨਾਲ ਮਿਟੀ ਹੋ ਕੇ ਆਪਣੀ ਪਰਿਵਾਰਕ 150 ਏਕੜ ਵਾਲੇ ਚੌਧਰੀ ਸ਼ੌਪਿਤ ਰਾਏ ਫਾਰਮ ਵਿਖੇ ਖੇਤੀ ਕਰ ਰਿਹਾ ਹੈ। ਉਹ ਆਪਣੇ ਆਪ ਨੂੰ ਦੇਸ਼ ਦਾ ਸਭ ਤੋਂ ਮੋਹਰੀ ਕਿਸਾਨ ਹੋਣ ਵਿੱਚ ਵੀ ਖੁਸ਼ੀ ਤੇ ਮਾਣ ਮਹਿਸੂਸ ਕਰ ਰਿਹਾ ਹੈ ਜਿਸ ਵੱਲੋਂ ਭਾਰਤ ਵਿੱਚ ਸਭ ਤੋਂ ਪਹਿਲਾਂ ਜਰਮਨੀ ਤੋਂ ਖੇਤੀ ਸੰਦ ਲਿਆ ਕੇ ਨਵੀਂ ਤਕਨੀਕ ਨਾਲ ਖੇਤੀ ਕਰਨੀ ਸ਼ੁਰੂ ਕੀਤੀ ਗਈ। ਅਗਾਂਹਵਧੂ ਸੋਚ ਦੇ ਮਾਲਕ ਕਿਸਾਨ ਵਿਕਾਸ ਰਾਏ ਦਾ ਕਹਿਣਾ ਹੈ ਕਿ ਉਹ ਖੇਤੀ ਨੂੰ ਲਾਹੇਵੰਦ ਧੰਦਾ ਨਾ ਸਮਝ ਕੇ ਜ਼ਿੰਦਗੀ ਦਾ ਆਨੰਦ ਮਾਨਣ ਲਈ ਕਿਸਾਨ ਬਣ ਕੇ ਖੇਤੀ ਕਰਨ ਨੂੰ ਤਰਜੀਹ ਦਿੰਦਾ ਹੈ। ਉਸਦੀ ਹੋਰਨਾਂ ਕਿਸਾਨਾਂ ਨੂੰ ਵੀ ਸਲਾਹ ਹੈ ਕਿ ਉਹ ਖੇਤੀ ਨੂੰ ਕਦੇ ਪੈਸਿਆਂ ਵਾਲਾ ਧੰਦਾ ਨਾ ਸਮਝਣ। ਉਨ੍ਹਾਂ ਕਿਸਾਨਾਂ ਨੂੰ ਇਹ ਵੀ ਕਿਹਾ ਕਿ ਆਪਣੀਆਂ ਜ਼ਮੀਨਾ ਵਿੱਚ ਕਦੇ ਵੀ ਸਪਰੇਆਂ ਨੂੰ ਮਿਕਸ ਕਰਕੇ ਨਾ ਛਿੜਕਣ ਅਤੇ ਅੰਧਾਧੁੰਦ ਰਸਾਇਣਾ ਤੇ ਖਾਦਾਂ ਦੀ ਵਰਤੋਂ ਕਰਨ ਤੋਂ ਪਰਹੇਜ਼ ਕਰਨ ਨੂੰ ਤਰਜੀਹ ਦੇਣ। ਕਿਸਾਨ ਸ੍ਰੀ ਰਾਏ ਨੇ ਦੱਸਿਆ ਕਿ ਉਸ ਵੱਲੋਂ ਦਿਲੀ ਯੂਨੀਵਰਸਿਟੀ ਤੇ ਦੇਹਰਾਦੂਨ ਤੋਂ ਬੀ.ਕਾਮ ਦੀ ਪੜ੍ਹਾਈ ਕੀਤੀ ਗਈ ਸੀ ਜੇ ਉਹ ਚਾਹੁੰਦਾ ਤਾਂ ਹੋਰ ਪੜ੍ਹ ਕੇ ਵੱਡਾ ਅਫਸਰ ਬਣ ਸਕਦਾ ਸੀ ਪਰ ਉਸਨੂੰ ਆਪਣੀ ਮਾਂ-ਭੂਮੀ ਨਾਲ ਪਿਆਰ ਸੀ ਇਸ ਕਾਰਨ ਉਸ ਨੇ ਖੇਤੀ ਕਰਨ ਨੂੰ ਤਰਜੀਹ ਦੇਣਾ ਠੀਕ ਸਮਝਿਆ।
ਉਨ੍ਹਾਂ ਦੱਸਿਆ ਕਿ ਉਹ 1987 ਤੋਂ ਖੁਦ ਇਕ ਕਿਸਾਨ ਬਣ ਕੇ ਖੇਤੀ ਕਰ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ 2004 ਤੱਕ ਉਸ ਕੋਲ ਲਗਪਗ 110 ਏਕੜ ਕਿਨੂੰ ਦੇ ਬਾਗ ਸਨ ਪਰ ਇਸ ਇਲਾਕੇ ਵਿਚ ਸੇਮ ਦੀ ਸਮੱਸਿਆ ਹੋਣ ਕਾਰਨ ਉਸਨੂੰ ਬਾਗ ਪੁੱਟਣੇ ਪਏ। ਪਾਣੀ ਦੀ ਮਹੱਤਤਾ ਨੂੰ ਸਮਝਦਿਆਂ ਹੀ ਉਸ ਵੱਲੋਂ ਜ਼ਿਆਦਾਤਰ ਕਣਕ ਅਤੇ ਨਰਮੇ ਦੀ ਹੀ ਖੇਤੀ ਕੀਤੀ ਜਾ ਰਹੀ ਹੈ। ਹੁਣ ਤੱਕ ਕਦੇ ਵੀ ਉਸ ਵੱਲੋਂ ਝੋਨਾ ਲਗਾਉਣ ਨੂੰ ਤਰਜੀਹ ਨਹੀਂ ਦਿੱਤੀ ਗਈ ਤੇ ਨਾ ਹੀ ਕਦੇ ਵੀ ਆਪਣੀ ਫਸਲ ਦੀ ਰਹਿੰਦ-ਖੂਹੰਦ ਨੂੰ ਅੱਗ ਲਗਾਈ ਗਈ ਹੈ। ਉਸ ਵੱਲੋਂ ਹਮੇਸ਼ਾ ਘੱਟ ਪਾਣੀ ਵਾਲੀਆਂ ਫਸਲਾਂ ਬੀਜਣ ਨੂੰ ਹੀ ਤਰਜੀਹ ਦਿੱਤੀ ਜਾਂਦੀ ਹੈ। ਇਸ ਕਾਰਨ ਉਸ ਵੱਲੋਂ ਆਪਣਾ ਵਾਧੂ ਪਾਣੀ ਕਈ ਵਾਰ ਲੋੜੀਂਦੇ ਕਿਸਾਨਾਂ ਨੂੰ ਦੇ ਦਿੱਤਾ ਜਾਂਦਾ ਹੈ। ਕਿਸਾਨ ਵਿਕਾਸ ਰਾਏ ਨੇ ਅੱਗੇ ਦੱਸਿਆ ਕਿ ਖੇਤੀ ਲਈ ਚੰਗੇ ਸੰਦਾ ਦਾ ਹੋਣਾ ਬਹੁਤ ਜ਼ਰੂਰੀ ਹੈ। ਲੋਕਲ ਬਣੇ ਸੰਦ ਸਿਰਫ 3 ਤੋਂ 4 ਇੰਚ ਤੱਕ ਹੀ ਜ਼ਮੀਨ ਦੀ ਡੂੰਘਾਈ ਤੱਕ ਪਹੁੰਚਦੇ ਜਦੋਂ ਕਿ ਉਸ ਵੱਲੋਂ ਲਿਆਂਦੇ ਗਏ ਜਰਮਨੀ ਸੰਦ 8 ਤੋਂ 10 ਇੰਚ ਤੱਕ ਜ਼ਮੀਨ ਦੀ ਖੁਦਾਈ ਕਰਕੇ ਵਹਾਈ ਯੋਗ ਬਣਾਉਂਦੇ ਹਨ। ਨਵੀ ਤਕਨੀਕ ਵਾਲੇ ਸੰਦਾਂ ਦੀ ਇਹ ਵੀ ਵਿਸ਼ੇਸ਼ਤਾ ਹੈ ਕਿ ਉਹ ਇਕੋ ਸਮੇਂ ਕਲਟੀਵੇਟਰ, ਤਵੀਆਂ ਤੇ ਸੁਹਾਗੇ ਦਾ ਵੀ ਕੰਮ ਕਰਦੇ ਹਨ ਜਿਸ ਨਾਲ ਸਮੇ ਤੇ ਪੈਸੇ ਦੀ ਬੱਚਤ ਹੁੰਦੀ ਹੈ। ਸ੍ਰੀ ਰਾਏ ਨੇ ਆਪਣੇ ਖੇਤੀ ਦੇ ਤਜ਼ਰਬੇ ਸਾਂਝੇ ਕਰਦਿਆਂ ਕਿਹਾ ਕਿ ਉਹ ਸਿਰਫ ਕਣਕ ਵਿੱਚ ਪ੍ਰਤੀ ਏਕੜ ਡਾਇਆ ਦਾ ਇਕ ਗੱਟਾ ਤੇ ਯੂਰੀਆ ਦਾ ਡੇਢ ਗੱਟੇ ਦੀ ਅਤੇ ਨਰਮੇ ਦੀ ਫਸਲ ਲਈ ਪ੍ਰਤੀ ਏਕੜ ਅੱਧਾ ਬੈਗ ਯੂਰੀਆ ਦੀ ਵਰਤੋਂ ਕਰਦਾ ਹੈ।
ਉਸ ਵੱਲੋਂ ਹਮੇਸ਼ਾ ਜ਼ਿਆਦਾ ਯੂਰੀਆ ਤੇ ਅੰਧੇਦੁੰਧ ਕੀਟਨਾਂਸ਼ਕਾਂ ਦੀ ਵਰਤੋਂ ਤੋਂ ਵੀ ਪਰਹੇਜ਼ ਕੀਤਾ ਜਾਂਦਾ ਹੈ। ਇਸ ਤੋਂ ਇਲਾਵਾ ਉਸ ਵੱਲੋਂ ਨਰਮੇ ਦੀ ਉਘਾਈ ਜਾਂਦੀ ਫਸਲ ਦੀ ਕਤਾਰ ਤੋਂ ਕਤਾਰ ਫਾਸਲਾ 4 ਫੁੱਟ ਤੱਕ ਰੱਖਿਆ ਜਾਂਦਾ ਹੈ। ਇਸ ਕਾਰਨ ਉਸਦੇ ਖੇਤ ਵਿੱਚ ਉਘੇ ਨਰਮੇ ਦੀ ਉਚਾਈ 9 ਫੁੱਟ ਤੱਕ ਹੁੰਦੀ ਹੈ। ਕਿਸਾਨ ਸ੍ਰੀ ਰਾਏ ਨੇ ਦੱਸਿਆ ਕਿ ਜ਼ਮੀਨ ਦੀ ਮਹੱਤਤਾ ਨੂੰ ਵੇਖਦਿਆਂ ਉਸ ਵੱਲੋਂ ਆਪਣੀ 25 ਫੀਸਦੀ ਜ਼ਮੀਨ ਹਮੇਸ਼ਾ ਖਾਲੀ ਰੱਖੀ ਜਾਂਦੀ ਹੈ ਤੇ ਅਗਲੀ ਫਸਲ ਦੌਰਾਨ ਉਸ ਤੋਂ ਹੀ ਆਪਣੀ ਖੇਤੀ ਸ਼ੁਰੂ ਕੀਤੀ ਜਾਂਦੀ ਹੈ। ਇਸ ਨਾਲ ਜਿਥੇ ਜ਼ਮੀਨ ਦੀ ਤਾਕਤ ਵੱਧਦੀ ਹੈ ਉਥੇ ਫਸਲ ਦੀ ਉਪਜ ਤੇ ਆਮਦਨ ਵਿੱਚ ਵੀ ਵਾਧਾ ਹੁੰਦਾ ਹੈ। ਇਸ ਕਾਰਨ ਹੀ ਉਸਦੀ ਫਸਲ ਵਿੱਚ ਹੋਰਨਾਂ ਨਾਲੋਂ 30 ਫੀਸਦੀ ਝਾੜ ਜ਼ਿਆਦਾ ਹੁੰਦਾ ਹੈ। ਕਿਸਾਨ ਸ੍ਰੀ ਵਿਕਾਸ ਰਾਏ ਨੇ ਆਪਣੇ ਖੇਤੀ ਦੇ ਤਜ਼ਰਬੇ ਸਾਂਝੇ ਕਰਦਿਆਂ ਦੱਸਿਆ ਕਿ ਉਹ ਰਾਤ 2 ਵਜੇ ਤੋਂ ਲੈ ਕੇ ਸਵੇਰੇ 8 ਵਜੇ ਤੱਕ ਅਤੇ ਦੁਪਹਿਰ 3 ਵਜੇ ਤੋਂ ਸ਼ਾਮ 9 ਵਜੇ ਤੱਕ ਖੁਦ ਟਰੈਕਟਰ ਚਲਾ ਕੇ ਖੇਤੀ ਕਰਦਾ ਹੈ। ਉਸ ਵੱਲੋਂ ਕਦੇ ਵੀ ਹੁਣ ਤੱਕ ਆਪਣੀ ਜ਼ਮੀਨ ਠੇਕੇ 'ਤੇ ਨਹੀਂ ਦਿੱਤੀ ਜਾਂਦੀ। ਉਸ ਵੱਲੋਂ ਮਜ਼ਦੂਰਾਂ ਕੋਲੋ ਸਿਰਫ 8 ਘੰਟੇ ਕੰਮ ਕਰਵਾ ਕੇ ਨਾਲ-ਨਾਲ ਦੀ ਉਨ੍ਹਾਂ ਦਾ ਬਣਦਾ ਮਿਹਨਤਾਨਾ ਦਿੱਤਾ ਜਾਂਦਾ ਹੈ।