"ਪ੍ਰੈਸ ਕਲੱਬ ਆਨੰਦਪੁਰ ਸਾਹਿਬ (ਰਜਿ)" ਵੱਲੋਂ 20 ਜੁਲਾਈ ਨੂੰ ਕਰਵਾਇਆ ਜਾ ਰਿਹਾ ਸਮਾਗਮ ਸ਼ਾਨਦਾਰ ਢੰਗ ਦੇ ਨਾਲ ਹੋਵੇਗਾ। ਜਦਕਿ ਇਸ ਦੌਰਾਨ ਜਿੱਥੇ ਪ੍ਰੈਸ ਕਲੱਬ ਦੀ ਸ਼ਿੱਦਤ ਦੇ ਨਾਲ ਉਸਾਰੀ ਗਈ ਇਮਾਰਤ ਦਾ ਉਦਘਾਟਨ ਪੰਜਾਬ ਵਿਧਾਨ ਸਭਾ ਦੇ ਸਪੀਕਰ ਰਾਣਾ ਕੇ ਪੀ ਸਿੰਘ ਵੱਲੋਂ ਕੀਤਾ ਜਾਵੇਗਾ ਉੱਥੇ ਹੀ "ਮਾਣ ਸ੍ਰੀ ਆਨੰਦਪੁਰ ਸਾਹਿਬ ਦਾ ਅਵਾਰਡ" ਵੀ ਉੱਘੇ ਸਮਾਜ ਸੇਵੀ ਮਾਤਾ ਗੁਰਚਰਨ ਕੌਰ ਨੂੰ ਦਿੱਤਾ ਜਾਵੇਗਾ।ਇਸ ਸਬੰਧੀ "ਪ੍ਰੈਸ ਕਲੱਬ ਆਨੰਦਪੁਰ ਸਾਹਿਬ (ਰਜਿ)" ਦੇ ਸਮੂੰਹ ਮੈਂਬਰਾਂ ਨੇ ਸਮਾਗਮ ਸਬੰਧੀ ਕੀਤੇ ਜਾਣ ਵਾਲੇ ਪ੍ਰਬੰਧਾਂ ਦਾ ਜਾਇਜ਼ਾ ਲਿਆ ਅਤੇ ਤਿਆਰੀਆਂ ਨੂੰ ਅੰਤਿਮ ਛੋਹਾਂ ਦਿੰਦੇ ਹੋਏ ਕਿਹਾ ਕਿ ਵਾਹਿਗੁਰੂ ਦੀ ਅਪਾਰ ਕ੍ਰਿਪਾ ਸਦਕਾ ਅੱਜ ਇਹ ਦਿਨ ਆਇਆ ਹੈ ਕਿ ਵਿਸ਼ਵ ਦੇ ਨਕਸ਼ੇ 'ਤੇ ਦਿੱਸਣ ਵਾਲੇ ਖਾਲਸਾ ਪੰਥ ਦੇ ਜਨਮ ਸਥਾਨ ਸ੍ਰੀ ਆਨੰਦਪੁਰ ਸਾਹਿਬ ਦੇ ਪੱਤਰਕਾਰਾਂ ਦੇ ਕੋਲ ਵੀ ਮਿਲ ਕੇ ਬੈਠਣ ਲਈ ਇੱਕ ਛੱਤ "ਪ੍ਰੈਸ ਕਲੱਬ" ਦੇ ਰੂਪ 'ਚ ਨਸੀਬ ਹੋਣ ਜਾ ਰਹੀ ਹੈ। ਹਾਲਾਂਕਿ"ਪ੍ਰੈਸ ਕਲੱਬ" ਦੀ ਉਸਾਰੀ ਦਾ ਪ੍ਰੋਜੈਕਟ ਅਜੇ ਵੱਡਾ ਹੈ ਪਰ ਫਿਰ ਵੀ ਮੁੱਢਲੇ ਤੌਰ ਤੇ ਤਿਆਰ ਕੀਤਾ ਕਿ ਪਹਿਲ ਹਿੱਸਾ ਇਲਾਕੇ ਦੇ ਲੋਕਾਂ ਲਈ 20 ਜੁਲਾਈ ਨੂੰ ਸਮਰਪਿਤ ਕੀਤਾ ਜਾਵੇਗਾ।ਇਸ ਮੌਕੇ ਸਮੂੰਹ ਮੈਂਬਰਾਂ ਨੇ ਇਸ ਉਸਾਰੀ ਦੇ ਲਈ ਜਿੱਥੇ ਪੰਜਾਬ ਸਰਕਾਰ, ਸਿਵਲ ਤੇ ਪੁਲੀਸ ਪ੍ਰਸ਼ਾਸਨ ਦਾ ਧੰਨਵਾਦ ਕੀਤਾ ਉੱਥੇ ਹੀ ਖਾਸ ਤੌਰ ਤੇ ਨਗਰ ਕੌਂਸਲ ਸ੍ਰੀ ਆਨੰਦਪੁਰ ਸਾਹਿਬ ਦਾ ਵੀ ਧੰਨਵਾਦ ਕੀਤਾ। ਜਦਕਿ ਉਨ੍ਹਾਂ ਦੱਸਿਆ ਕਿ ਹਰ ਸਾਲ ਦੀ ਤਰ੍ਹਾਂ ਇਸ ਸਾਲ "ਮਾਣ ਸ੍ਰੀ ਆਨੰਦਪੁਰ ਸਾਹਿਬ ਦਾ ਅਵਾਰਡ" ਦੇਣ ਦੇ ਲਈ ਸਮਾਜ ਸੇਵਾ ਦਾ ਵਿਸ਼ਾ ਚੁਣਿਆ ਗਿਆ ਸੀ। ਜਿਸਦੇ ਤਹਿਤ ਤਿੰਨ ਨਾਵਾਂ ਦੇ ਪੈਨਲਾਂ ਦੀ ਘੋਖ ਕਰਨ ਤੋਂ ਬਾਅਦ ਬੀਤੇ ਚਾਰ ਦਹਾਕਿਆਂ ਤੋਂ ਮਨੁੱਖਤਾ ਦੇ ਭਲੇ ਲਈ ਜੂਝਣ ਵਾਲੀ ਮਤਾ ਗੁਰਚਰਨ ਕੌਰ ਨੂੰ ਇਹ ਅਵਾਰਡ ਦੇਣ ਦਾ ਫੈਸਲਾ ਲਿਆ ਗਿਆ ਹੈ। ਇਸ ਮੌਕੇ ਸਮੁੱਚੀ ਕਾਰਜਕਾਰਣੀ ਦੇ ਤਹਿਤ ਪ੍ਰਧਾਨ ਬੀ ਐਸ ਚਾਨਾ, ਸੀਨੀਅਰ ਮੀਤ ਪ੍ਰਧਾਨ ਸੁਰਿੰਦਰ ਸਿੰਘ ਸੋਨੀ, ਮੀਤ ਪ੍ਰਧਾਨ ਮਧੂ ਸੂਦਨ ਤੇ ਨਰਿੰਦਰ ਨੱਡਾ, ਜਨਰਲ ਸਕੱਤਰ ਰਾਜਪਾਲ ਆਂਗਰਾ, ਮੁੱਖ ਸਲਾਹਕਾਰ ਨਰਿੰਦਰ ਸ਼ਰਮਾ, ਕਾਰਜਕਾਰਣੀ ਮੈਂਬਰ ਦਲਜੀਤ ਸਿੰਘ ਅਰੋੜਾ, ਚੇਅਰਮੈਨ ਜਰਨੈਲ ਸਿੰਘ ਨਿੱਕੂਵਾਲ ਤੇ ਸੁਖਵਿੰਦਰ ਪਾਲ ਸਿੰਘ ਸੁੱਖੂ, ਖਜ਼ਾਨਚੀ ਬਲਵਿੰਦਰ ਸਿੰਘ ਲੋਧੀਪੁਰ, ਜੁਆਇੰਟ ਸਕੱਤਰ ਦਵਿੰਦਰ ਪਾਲ ਸਿੰਘ ਅਤੇ ਮਨਪ੍ਰੀਤ ਮਿੰਟੂ ਵੀ ਹਾਜ਼ਰ ਸਨ।