ਪੰਜਾਬ ਦੇ ਤਿੰਨ ਵੱਡੇ ਸ਼ਹਿਰਾਂ ਅੰਮ੍ਰਿਤਸਰ, ਜਲੰਧਰ ਅਤੇ ਲੁਧਿਆਣਾ ਨੂੰ ਸਮਾਰਟ ਸਿਟੀ ਵਜੋਂ ਵਿਕਸਤ ਕਰਨ ਦਾ ਮੁੱਢਲਾ ਖਾਕਾ ਤਿਆਰ ਕਰਨ ਲਈ ਅੱਜ ਸਥਾਨਕ ਸਰਕਾਰਾਂ ਵਿਭਾਗ ਮੰਤਰੀ ਨਵਜੋਤ ਸਿੰਘ ਸਿੱਧੂ, ਕੇਂਦਰ ਸਰਕਾਰ ਦੇ ਸ਼ਹਿਰੀ ਵਿਕਾਸ ਵਿਭਾਗ ਦੇ ਵਧੀਕ ਸਕੱਤਰ ਡਾ: ਸਮੀਰ ਸ਼ਰਮਾ ਵੱਖ ਵੱਖ ਕੰਮਾਂ ਲਈ ਨਿਯੁਕਤ ਕੀਤੇ ਗਏ ਸਲਾਹਕਾਰਾਂ, ਪ੍ਰਾਜੈਕਟ ਇੰਚਾਰਜਾਂ ਅਤੇ ਉਕਤ ਤਿੰਨ ਸਹਿਰਾਂ ਦੇ ਸੀਨੀਅਰ ਅਧਿਕਾਰੀਆਂ ਨਾਲ ਅੰਮ੍ਰਿਤਸਰ ਵਿਖੇ ਲੰਬੀ ਮੀਟਿੰਗ ਕੀਤੀ ਇਸ ਮੌਕੇ ਸੰਬੋਧਨ ਕਰਦੇ ਸ੍ਰ ਨਵਜੋਤ ਸਿੰਘ ਸਿੱਧੂ ਨੇ ਕਿਹਾ ਕਿ ਸਾਰੇ ਕੰਮਾਂ ਲਈ ਸਮਾਂ ਸੀਮਾਂ ਤੈਅ ਕੀਤੀ ਜਾਵੇ ਅਤੇ ਅਧਿਕਾਰੀ ਉਸ ਸਮੇਂ ਵਿੱਚ ਕੰਮ ਪੂਰਾ ਕਰਨ ਲਈ ਪਾਬੰਦ ਹੋਣਗੇ। ਉਨਾਂ ਕਿਹਾ ਕਿ ਸਾਰੇ ਕੰਮਾਂ ਦੀ ਗੁਣਵੱਤਾ ਬਰਕਰਾਰ ਰੱਖੀ ਜਾਵੇ ਅਤੇ ਸਾਰੇ ਵਿਭਾਗ ਇਕ ਟੀਮ ਬਣ ਕੇ ਇਨਾਂ ਕੰਮਾਂ ਨੂੰ ਨੇਪਰੇ ਚਾੜਣ। ਉਨ•ਾਂ ਅੰਮ੍ਰਿਤਸਰ ਦੇ ਬੀ:ਆਰ:ਟੀ:ਐਸ ਪ੍ਰਾਜੈਕਟ ਨੂੰ ਵੀ ਮੁਕੰਮਲ ਹਾਲਤ ਵਿੱਚ ਚਾਲੂ ਕਰਨ ਤੇ ਜੋਰ ਦਿੰਦੇ ਕਿਹਾ ਕਿ ਬੱਸਾਂ ਦਾ ਵਕਫਾ ਘੱਟ ਤੋਂ ਘੱਟ ਰੱਖਕੇ ਸਾਰੇ ਰੂਟ ਚਾਲੂ ਕੀਤੇ ਜਾਣ।ਮੀਟਿੰਗ ਵਿੱਚ ਤਿੰਨਾਂ ਸ਼ਹਿਰਾਂ ਦੇ ਵਿਕਾਸ ਲਈ ਤਿਆਰ ਕੀਤਾ ਗਿਆ ਖਰੜਾ ਵੇਖਦੇ ਹੋਏ ਡਾ: ਸ਼ਰਮਾ ਨੇ ਜਰੂਰੀ ਸੁਝਾਓ ਅਤੇ ਤਰਮੀਮਾਂ ਦਿੰਦੇ ਹੋਏ ਇਸ ਖਾਕੇ ਨੂੰ ਤੁਰੰਤ ਹਕੀਕਤ ਵਿੱਚ ਬਦਲਣ ਲਈ ਟੈਂਡਰ ਅਤੇ ਹੋਰ ਪ੍ਰਕਿਰਿਆ ਸ਼ੁਰੂ ਕਰਨ ਦੀ ਹਦਾਇਤ ਕੀਤੀ। ਪੰਜਾਬ ਸਰਕਾਰ ਦੇ ਸਥਾਨਕ ਸਰਕਾਰਾਂ ਵਿਭਾਗ ਦੇ ਪ੍ਰਿੰਸੀਪਲ ਸਕੱਤਰ ਸ੍ਰੀ ਏ:ਵੇਨੂੰ ਪ੍ਰਸ਼ਾਦ ਨੇ ਇਸ ਮੌਕੇ ਕਿਹਾ ਕਿ ਪਹਿਲਾਂ ਵਿਧਾਨ ਸਭਾ ਚੋਣਾਂ ਅਤੇ ਫਿਰ ਸਥਾਨਕ ਸਰਕਾਰਾਂ ਵਿਭਾਗ ਦੀਆਂ ਚੋਣਾਂ ਕਾਰਨ ਇਹ ਕੰਮ ਕੁਝ ਚਿਰ ਲਈ ਅਟਕਿਆ ਸੀ ਜਿਸ ਨੂੰ ਛੇਤੀ ਹੀ ਲੀਹ ਉਤੇ ਪਾ ਦਿੱਤਾ ਜਾਵੇਗਾ। ਉਨਾਂ ਭਰੋਸਾ ਿਦੱਤਾ ਕਿ ਉਕਤ ਸ਼ਹਿਰਾਂ ਦੇ ਵਿਕਾਸ ਲਈ ਫੰਡ ਵੀ ਨਿਰੰਤਰ ਪੰਜਾਬ ਸਰਕਾਰ ਵੱਲੋਂ ਮਿਲਦੇ ਰਹਿਣਗੇ। ਉਨਾਂ ਸਬੰਧਤ ਸ਼ਹਿਰਾਂ ਦੇ ਅਧਿਕਾਰੀਆਂ ਨੂੰ ਹਦਾਇਤ ਕੀਤੀ ਕਿ ਉਹ ਸ਼ਹਿਰ ਵਾਸੀਆਂ ਲਈ ਜਰੂਰੀ ਅਤੇ ਵਰਤੋਂ ਵਾਲੇ ਪ੍ਰਾਜੈਕਟ ਹੀ ਸ਼ੁਰੂ ਕਰਨ ਨਾ ਕਿ ਚਿੱਟਾ ਹਾਥੀ ਬਣੇ ਰਹਿਣ ਵਾਲੇ ਕੰਮਾਂ 'ਤੇ ਫਜੂਲ ਖਰਚੀ ਕੀਤੀ ਜਾਵੇ।
ਡਾ: ਸਮੀਰ ਸ਼ਰਮਾ ਨੇ ਇਸ ਮੌਕੇ ਅੰਮ੍ਰਿਤਸਰ ਦੇ ਸਾਰੇ ਪਾਰਕਾਂ ਦਾ ਵਿਕਾਸ ਥੀਮ ਪਾਰਕ ਵਜੋਂ ਕਰਨ ਦਾ ਸੁਝਾਓ ਦਿੰਦੇ ਕਿਹਾ ਕਿ ਯੂਰਪੀਅਨ ਪਾਰਕਾਂ ਦੀ ਨਕਲ ਜਰੂਰੀ ਨਹੀਂ ਬਲਕਿ ਲੋਕਾਂ ਦੀ ਚਾਹਤ ਅਤੇ ਸਥਾਨਕ ਸੰਸਕ੍ਰਿਤੀ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਇਮਾਰਤਾਂ ਅਤੇ ਪਾਰਕਾਂ ਦੇ ਡਿਜਾਇਨ ਤਿਆਰ ਕੀਤੇ ਜਾਣ। ਉਨਾਂ ਇਸ ਲਈ ਲੋਕਾਂ ਕੋਲੋਂ ਸੁਝਾਓ ਲੈਣ ਦੀ ਹਦਾਇਤ ਵੀ ਕੀਤੀ। ਸ਼ਹਿਰਾਂ ਵਿੱਚ ਬਣਨ ਵਾਲੀਆਂ ਕਾਰ ਪਾਰਕਿੰਗ ਦੇ ਮੁੱਦੇ ਤੇ ਉਨਾਂ ਕਿਹਾ ਕਿ ਇਹ ਘੱਟ ਸਥਾਨ ਵਿੱਚ ਵੱਧ ਕਾਰਾਂ ਰੋਕ ਸਕਣ ਦੇ ਸਮਰੱਥ ਹੋਣ ਇਸ ਲਈ ਉਚ ਤਕਨੀਕ ਦੀ ਵਰਤੋਂ ਕੀਤੀ ਜਾਵੇ। ਉਨਾਂ ਸੂਰਜੀ ਊਰਜਾ ਦੀ ਵਰਤੋਂ ਕਰਨ ਲਈ ਸਰਕਾਰੀ ਇਮਾਰਤਾਂ ਦੇ ਨਾਲ ਨਾਲ ਨਿੱਜੀ ਇਮਾਰਤਾਂ ਉਤੇ ਵੀ ਸੂਰਜੀ ਊਰਜਾ ਪਲਾਂਟ ਲਗਾਉਣ ਦੀ ਹਦਾਇਤ ਵੀ ਕੀਤੀ।ਡਾ: ਸਮੀਰ ਨੇ ਸ਼ਹਿਰਾਂ ਵਿੱਚ ਪ੍ਰਦੂਸ਼ਣ ਘੱਟ ਕਰਨ ਲਈ ਈ-ਰਿਕਸ਼ਾ ਅਤੇ ਡੀਜਲ ਦੀ ਥਾਂ ਸੀ:ਐਨ:ਜੀ ਨੂੰ ਜਰੂਰੀ ਕਰਨ ਦਾ ਸੁਝਾਓ ਵੀ ਦਿੱਤਾ। ਉਨਾਂ ਕਿਹਾ ਕਿ ਹਰੇਕ ਸ਼ਹਿਰ ਦੀਆਂ ਵੱਖੋ ਵੱਖ ਲੋੜਾਂ ਹਨ ਅਤੇ ਉਨਾਂ ਜਰੂਰਤਾਂ ਅਨੁਸਾਰ ਹੀ ਸਮਾਰਟ ਸਿਟੀ ਪ੍ਰਾਜੈਕਟ ਤਹਿਤ ਕੰਮ ਉਲੀਕੇ ਜਾਣ। ਉਨਾਂ ਭਰੋਸਾ ਦਿਵਾਇਆ ਕਿ ਕੇਂਦਰ ਸਰਕਾਰ ਵੱਲੋਂ ਸਮਾਰਟ ਸਿਟੀ ਪ੍ਰਾਜੈਕਟ ਨੂੰ ਪੂਰਾ ਕਰਨ ਲਈ ਨਿਰੰਤਰ ਫੰਡ ਮਿਲਦੇ ਰਹਿਣਗੇ। ਮੀਟਿੰਗ ਵਿੱਚ ਆਵਾਜਾਈ, ਬਿਜਲੀ ਸਪਲਾਈ, ਵਾਟਰ ਸਪਲਾਈ ਅਤੇ ਸੀਵਰੇਜ, ਸਾਲਿਡ ਵੇਸਟ ਮੈਨੇਜਮੈਂਟ, ਲੈਂਡ ਸਕੇਪ, ਈ-ਗਵਰਨੈਂਸ, ਸਕਿਉਰਟੀ, ਗੈਸ ਸਪਲਾਈ ਅਤੇ ਹੋਰ ਵਿਸ਼ਿਆਂ ਦੇ ਮਾਹਿਰਾਂ ਨੇ ਬਤੌਰ ਸਲਾਹਕਾਰ ਸ਼ਿਰਕਤ ਕੀਤੀ ਅਤੇ ਆਪਣੇ ਅਣਮੁੱਲੇ ਵਿਚਾਰ ਦਿੱਤੇ। ਅੱਜ ਦੀ ਇਸ ਮੀਟਿੰਗ ਵਿੱਚ ਸੀ:ਈ:ਓ ਪੰਜਾਬ ਮਿਊਂਸੀਪਲ ਇਨਫਰਾਸਟਰੱਕਚਰ ਡਿਵੈਲਪਮੈਂਟ ਕੌਂਸਲ ਸ੍ਰੀ ਅਜੋਏ ਸ਼ਰਮਾ, ਡਿਪਟੀ ਕਮਿਸ਼ਨਰ ਅੰਮ੍ਰਿਤਸਰ ਸ੍ਰ ਕਮਲਦੀਪ ਸਿੰਘ ਸੰਘਾ, ਪੁਲਿਸ ਕਮਿਸ਼ਨਰ ਐਸ:ਸ੍ਰੀ ਵਾਸਤਵਾ, ਕਮਿਸ਼ਨਰ ਨਗਰ ਨਿਗਮ ਸੋਨਾਲੀ ਗਿਰੀ, ਸੀ:ਈ:ਓ ਅੰਮ੍ਰਿਤਸਰ ਸਮਾਰਟ ਸਿਟੀ ਪ੍ਰਾਜੈਕਟ ਮੈਡਮ ਦੀਪਤੀ ਉਪਲ, ਜਲੰਧਰ ਦੇ ਸੀ:ਈ:ਓ ਗਰੀਸ਼ ਦਿਆਲਨ, ਲੁਧਿਆਣਾ ਦੇ ਸੀ:ਈ:ਓ ਜਸਕਿਰਨ ਸਿੰਘ ਸਮੇਤ ਹੋਰ ਅਧਿਕਾਰੀ ਹਾਜ਼ਰ ਸਨ।