ਗਿਆਨ ਜੋਤੀ ਇੰਸਟੀਚਿਊਟ ਆਫ਼ ਮੈਨੇਜਮੈਂਟ ਅਤੇ ਟੈਕਨੌਲੋਜੀ, ਫ਼ੇਜ਼ 2 ਵੱਲੋਂ ਜੀ ਐੱਸ ਲਾਗੂ ਕਰਨ ਨਾਲ ਪੈਣ ਵਾਲੇ ਪ੍ਰਭਾਵਾਂ ਸਬੰਧੀ ਜਾਣਕਾਰੀ ਸਾਂਝੀ ਕਰਨ ਲਈ ਇਕ ਸੈਮੀਨਾਰ ਦਾ ਆਯੋਜਨ ਕੀਤਾ ਗਿਆ। ਇਸ ਸੈਮੀਨਾਰ ਵਿਚ ਟ੍ਰਾਈ ਸਿਟੀ ਦੇ ਪ੍ਰਸਿੱਧ ਚਾਰਟਰਡ ਅਕਾਊਂਟੈਂਟ ਅਲੋਕ ਕ੍ਰਿਸ਼ਨ ਨੇ ਸ਼ਿਰਕਤ ਕਰਦੇ ਹੋਏ ਭਵਿਖ ਦੇ ਮੈਨੇਜਰਾਂ ਨਾਲ ਸਬੰਧਿਤ ਵਿਸ਼ੇ ਤੇ ਅਹਿਮ ਨੁਕਤੇ ਸਾਂਝੇ ਕੀਤੇ। ਸੀ ਏ ਅਲੋਕ ਕ੍ਰਿਸ਼ਨ ਨੇ ਆਪਣੇ ਸੰਬੋਧਨ ਵਿਚ ਕਿਹਾ ਕਿ ਭਾਰਤ ਇਕ ਅਜਿਹੀ ਮਾਰਕੀਟ ਬਣ ਚੁੱਕਾ ਹੈ ਜਿਸ ਵਿਚ ਉਤਪਾਦਨ ਦੀ ਕੀਮਤ ਆਵਾਜਾਈ ਅਤੇ ਸਮੇਂ ਨਾਲ ਜੁੜ ਕੇ ਇਸ ਦੇ ਲਾਗਤ ਮੁੱਲ ਨੂੰ ਪ੍ਰਭਾਵਿਤ ਕਰਦੇ ਹਨ। ਸਮਾਨ ਇਕ ਥਾਂ ਤੋਂ ਦੂਜੀ ਥਾਂ ਤੇ ਪਹੁੰਚਣ ਦੌਰਾਨ ਗੁੰਝਲਦਾਰ ਟੈਕਸ ਪ੍ਰਕਿਰਿਆ ਸਦਕਾ ਹੋਰ ਮਹਿੰਗਾ ਹੋ ਜਾਂਦਾ ਸੀ। ਜਿਸ ਦਾ ਪ੍ਰਭਾਵ ਸਿੱਧਾ ਗਾਹਕ ਦੀ ਜੇਬ ਤੇ ਪੈਦਾ ਸੀ। ਇਸ ਦੇ ਨਾਲ ਹੀ ਵਪਾਰੀ ਉੱਪਰ ਵੀ ਵੱਖ ਵੱਖ ਟੈਕਸ ਦੇਣ ਦਾ ਝੰਜਟ ਰਹਿੰਦਾ ਸੀ। ਇਸ ਨਵੇਂ ਤਰੀਕੇ ਨਾਲ ਜਿੱਥੇ ਟੈਕਸ ਪ੍ਰਕਿਰਿਆ ਸਸਤੀ ਹੋਈ ਹੈ ਉੱਥੇ ਹੀ ਸਰਕਾਰ ਦੇ ਮਾਲੀਏ ਵਿਚ ਵਾਧਾ ਹੋਇਆ ਹੈ। ਜਿਸ ਕਾਰਨ ਜੀ ਡੀ ਪੀ ਦੇ ਵਧਣ ਦੇ ਵੀ ਆਸਾਰ ਹਨ । ਸੀ ਏ ਅਲੋਕ ਕ੍ਰਿਸ਼ਨ ਨੇ ਉਦਯੋਗ ਲਈ ਘੱਟ ਟੈਕਸਟ ਦਾ ਬੋਝ, ਜੀ ਐੱਸ ਟੀ ਪ੍ਰਕਿਰਿਆ ਨੂੰ ਆਸਾਨ ਕਰਨ ਜਿਹੇ ਮੁੱਦੇ ਵੀ ਵਿਦਿਆਰਥੀਆਂ ਨਾਲ ਸਾਂਝੇ ਕੀਤੇ।
ਉਨ੍ਹਾਂ ਅੱਗੇ ਕਿਹਾ ਕਿ ਇਸ ਨਾਲ ਦੇਸ਼ ਵਿਚ ਬਣ ਰਹੇ ਸਮਾਨ ਦੀ ਇਕੋ ਜਿਹੇ ਤਰੀਕੇ ਨਾਲ ਵੇਚ ਮੁੱਲ ਰੱਖਣਾ ਸੌਖਾ ਹੋ ਜਾਵੇਗਾ। ਇਸ ਤਰਾਂ ਇਹ ਉਦਯੋਗ ਅਤੇ ਵਪਾਰ ਦੇ ਪਸਾਰ ਲਈ ਇਕ ਬਿਹਤਰੀਨ ਕਦਮ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਬੇਸ਼ੱਕ ਇਸ ਟੈਕਸ ਦੇ ਆਉਣ ਨਾਲ ਟੈਕਸਾਂ ਵਿਚ ਪਾਰਦਰਸ਼ਤਾ ਆ ਜਾਵੇਗੀ ਜਿਸ ਨਾਲ ਵਪਾਰੀ ਲਈ ਵਪਾਰ ਕਰਨਾ ਵੀ ਆਸਾਨ ਹੋਵੇਗਾ।ਇਸ ਮੌਕੇ ਤੇ ਡਾਇਰੈਕਟਰ ਡਾ. ਅਨੀਤ ਬੇਦੀ ਨੇ ਆਪਣੇ ਸੰਬੋਧਨ ਵਿਚ ਕਿਹਾ ਕਿ ਬੇਸ਼ੱਕ ਜੀ ਐੱਸ ਟੀ ਦੀ ਸ਼ੁਰੂਆਤ ਸੰਨ 2000 ਸਾਬਕਾ ਪ੍ਰਧਾਨ ਮੰਤਰੀ ਅਟਲ ਬਿਹਾਰੀ ਵਾਜਪਾਈ ਦੇ ਸਮੇਂ ਵਿਚ ਹੋ ਗਈ ਸੀ ਪਰ ਫਿਰ ਵਿਚ ਇਸ ਬਿੱਲ ਨੂੰ ਲਾਗੂ ਹੋਣ ਲਈ 16 ਸਾਲ ਦਾ ਸਫ਼ਰ ਕਰਨਾ ਪਿਆ। ਡਾ. ਬੇਦੀ ਨੇ ਇਸ ਮੌਕੇ ਜੀ ਐੱਸ ਟੀ ਬਾਰੇ ਕਈ ਅਹਿਮ ਗੱਲਾਂ ਵੀ ਸਾਂਝੀਆਂ ਕੀਤੀਆਂ। ਗਿਆਨ ਜੋਤੀ ਗਰੁੱਪ ਦੇ ਚੇਅਰਮੈਨ ਜੇ ਐੱਸ ਬੇਦੀ ਨੇ ਕਿਹਾ ਕਿ ਜੀ ਐੱਸ ਟੀ ਲਾਗੂ ਕਰਨ ਨਾਲ ਭਾਰਤ ਵਿਚ ਟੈਕਸ ਪ੍ਰਣਾਲੀ ਨੂੰ ਤਰਕਸੰਗਤ ਬਣਾਉਣ ਵੱਲ ਵੱਡਾ ਕਦਮ ਹੈ। ਇਹ ਘਰੇਲੂ ਅਤੇ ਅੰਤਰਰਾਸ਼ਟਰੀ ਕੰਪਨੀਆਂ ਲਈ ਭਾਰਤੀ ਅਰਥਵਿਵਸਥਾ ਵਿਚ ਨਿਵੇਸ਼ ਕਰਨ ਲਈ ਬਿਹਤਰੀਨ ਸਕਾਰਾਤਮਿਕ ਮਾਹੌਲ ਪੈਦਾ ਕਰਨ ਵੱਲ ਮਦਦ ਕਰ ਰਿਹਾ ਹੈ।ਇਸ ਦੌਰਾਨ ਵਿਦਿਆਰਥੀਆਂ ਨੇ ਵੀ ਪ੍ਰਸ਼ਨ ਉੱਤਰ ਸੈਸ਼ਨ ਦੌਰਾਨ ਕਈ ਅਹਿਮ ਸਵਾਲ ਪੁੱਛੇ ਜਿਨ੍ਹਾਂ ਦਾ ਸੀ ਏ ਅਲੋਕ ਕ੍ਰਿਸ਼ਨ ਨੇ ਵਿਸਥਾਰ ਸਹਿਤ ਜਵਾਬ ਦਿਤਾ।