ਭਾਰਤੀ ਰਿਜਰਵ ਬੈਂਕ ਪੱਛੜੇ ਹੋਏ ਪੇਂਡੂ ਇਲਾਕਿਆਂ ਵਿਚ ਸਰਕਾਰੀ ਬੈਂਕਾਂ ਦੇ ਸਹਿਯੋਗ ਨਾਲ ਬਿਹਤਰ ਬੈਂਕਿੰਗ ਸੇਵਾਵਾਂ ਮੁਹੱਈਆ ਕਰਵਾਵੇਗਾ ਤਾਂ ਜੋ ਪੱਛੜੇ ਹੋਏ ਪੇਂਡੂ ਇਲਾਕਿਆਂ ਦਾ ਸਮੁੱਚਾ ਵਿਕਾਸ ਹੋ ਸਕੇ।ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਰਿਜਰਵ ਬੈਂਕ ਚੰਡੀਗੜ੍ਹ ਦੇ ਖੇਤਰੀ ਡਾਇਰੈਕਟਰ ਸ੍ਰੀ ਨਿਰਮਲ ਚੰਦ ਨੇ ਪਿੰਡ ਜੜੌਤ ਵਿਖੇ ਰਿਜਰਵ ਬੈਂਕ, ਨਬਾਰਡ, ਨੈਸ਼ਨਲ ਬੈਂਕ, ਮਾਲਵਾ ਗ੍ਰਾਮਿਣ ਬੈਂਕ ਅਤੇ ਸਰਕਾਰੀ ਵਿਭਾਗਾਂ ਦੇ ਸਹਿਯੋਗ ਨਾਲ ਕਰਵਾਏ ਗਏ ਇੱਕ ਰੋਜਾ ਵਿੱਤੀ ਸਾਖਰਤਾ ਸੈਮੀਨਾਰ ਨੂੰ ਸੰਬੋਧਨ ਕਰਦਿਆਂ ਕੀਤਾ।ਸ੍ਰੀ ਨਿਰਮਲ ਚੰਦ ਨੇ ਇਸ ਮੌਕੇ ਲੋਕਾਂ ਦੇ ਭਰਵੇਂ ਇਕੱਠ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਲੋਕਾਂ ਨੂੰ ਬੈਂਕਾਂ ਨਾਲ ਜੁੜ ਕੇ ਸਰਕਾਰ ਵੱਲੋਂ ਉਨ੍ਹਾਂ ਦੇ ਹਿੱਤ ਵਿਚ ਚਲਾਈਆਂ ਗਈਆਂ ਸਕੀਮਾਂ ਦਾ ਵੱਧ ਤੋਂ ਵੱਧ ਲਾਹਾ ਲੈਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਜਿਨ੍ਹਾਂ ਪਿੰਡਾਂ ਵਿਚ ਬੈਂਕ ਸ਼ਾਖਾਵਾਂ ਨਹੀਂ ਹਨ, ਉੱਥੇ ਬੈਕਿੰਗ ਪ੍ਰਤੀਨਿਧ (ਬੀ.ਸੀ) ਦੇ ਰਾਂਹੀ ਬੈਂਕਿੰਗ ਸੇਵਾਵਾਂ ਉਪਲਬਧ ਕਰਾਉਣ ਦਾ ਬੀੜਾ ਚੁੱਕਿਆ ਗਿਆ ਹੈ ਅਤੇ ਬੀ.ਸੀ. ਦੀ ਮੱਦਦ ਨਾਲ ਪੇਂਡੂ ਲੋਕ ਪੈਸੇ ਜਮਾ ਅਤੇ ਕਢਵਾ ਸਕਦੇ ਹਨ। ਜਿਸ ਨਾਲ ਉਨ੍ਹਾਂ ਨੂੰ ਬੈਂਕ ਜਾਣ ਦੀ ਜਰੂਰਤ ਨਹੀਂ ਹੈ ਅਤੇ ਉਹ ਘਰ ਬੈਠੇ ਹੀ ਆਪਣੀ ਪੈਨਸ਼ਨ ਦੀ ਰਕਮ ਆਦਿ ਪ੍ਰਾਪਤ ਕਰ ਸਕਦੇ ਹਨ। ਉਨ੍ਹਾਂ ਡਿਜੀਟਲ ਲੈਣ ਦੇਣ ਤੇ ਜੋਰ ਦਿੰਦਿਆਂ ਕਿਹਾ ਕਿ ਹਾਲ ਹੀ ਵਿੱਚ ਸ਼ੁਰੂ ਹੋਈ ਭੀਮ ਐਪ ਦਾ ਵੱਧ ਤੋਂ ਵੱਧ ਪ੍ਰਯੋਗ ਕੀਤਾ ਜਾਵੇ। ਇਸ ਤੋਂ ਇਲਾਵਾ ਕੰਪਿਊਟਰ ਅਤੇ ਮੋਬਾਇਲ ਫੋਨ ਦੇ ਮਾਧਿਅਮ ਰਾਂਹੀ ਜਰੂਰੀ ਸਾਵਧਾਨੀਆਂ ਰੱਖਦਿਆਂ ਹੋਇਆਂ ਡਿਜੀਟਲ ਲੈਣ ਦੇਣ ਦੇ ਵੱਖ-ਵੱਖ ਤਰੀਕੇ ਜਿਨ੍ਹਾਂ ਵਿਚ ਕਰੈਡਿਟ/ਡੈਬਿਟ ਕਾਰਡ, ਸਵਦੇਸੀ ਕਾਰਡ, ਰੁਪਏ ਕਾਰਡ ਦਾ ਪ੍ਰਯੋਗ ਕੀਤਾ ਜਾ ਸਕਦਾ ਹੈ।
ਉਨ੍ਹਾਂ ਹੋਰ ਦੱਸਿਆ ਕਿ ਜ਼ਿਨ੍ਹਾਂ ਲੋਕਾਂ ਦੇ ਮੋਬਾਇਲ ਵਿਚ ਇੰਟਰਨੈਟ ਦੀ ਸੁਵਿਧਾ ਨਹੀ ਹੈ। ਉਹ L99# ਡਾਇਲ ਕਰਕੇ ਬਿਨ੍ਹਾਂ ਇੰਟਰਨੈਟ ਤੋਂ ਬੈਂਕ ਦਾ ਬਕਾਇਆ ਧਨ, ਮਿੰਨੀ ਸਟੇਟਮੈਂਟ ਆਦਿ ਦੀ ਜਾਣਕਾਰੀ ਲੈ ਸਕਦੇ ਹਨ ਅਤੇ ਜੋ ਲੋਕ ਇੰਟਰਨੈਟ ਬੈਕਿੰਗ ਜਾਂ ਮੋਬਾਇਲ ਬੈਕਿੰਗ ਦਾ ਪ੍ਰਯੋਗ ਕਰਦੇ ਹਨ ਉਹ ਮੋਬਾਇਲ ਰਿਚਾਰਜ, ਬਿਜਲੀ ਦੇ ਬਿਲ ਦਾ ਭੁਗਤਾਨ, ਐਲ.ਆਈ.ਸੀ. ਕਿਸਤਾਂ ਦਾ ਭੁਗਤਾਨ ਈ ਬੈਕਿੰਗ ਰਾਂਹੀ ਕਰ ਸਕਦੇ ਹਨ।ਸ੍ਰੀ ਨਿਰਮਲ ਚੰਦ ਨੇ ਹੋਰ ਦੱਸਿਆ ਕਿ ਦੁਕਾਨਦਾਰਾਂ ਨੂੰ ਪੀ.ਓ.ਐਸ. ਮਸ਼ੀਨਾਂ ਦਿੱਤੀਆਂ ਗਈਆਂ ਹਨ ਤਾਂ ਜੋ ਨਕਦੀ ਦੀ ਜਰੂਰਤ ਨਾਂ ਪਵੇ ਅਤੇ ਕੇਵਲ ਕਾਰਡ ਸਵਾਇਪ ਕਰਕੇ ਹੀ ਲੈਣ ਦੇਣ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਦੱਸਿਆ ਕਿ ਨਕਦੀ ਰਹਿਤ ਲੈਣ ਦੇਣ ਕਰਨ ਨਾਲ ਮੁਦਰਾ ਤੇ ਆਉਣ ਵਾਲੇ ਖਰਚੇ ਨੂੰ ਬਚਾਇਆ ਜਾ ਸਕਦਾ ਹੈ ਜਿਸਨੂੰ ਦੇਸ ਦੇ ਵਿਕਾਸ ਕੰਮਾਂ ਲਈ ਵਰਤਿਆ ਜਾ ਸਕਦਾ ਹੈ। ਉਨ੍ਹਾਂ ਲੋਕਾਂ ਨੂੰ ਈਮੇਲ ਸੰਦੇਸ, ਲਾਟਰੀ ਦੇ ਫਰਜੀ ਪ੍ਰਸਤਾਵ, ਨਕਲੀ ਨੋਟਾਂ ਦਾ ਪ੍ਰਚਲਨ, ਏ.ਟੀ.ਐਮ. ਕਾਰਡ ਦੇ ਗਲਤ ਉਪਯੋਗ ਬਾਰੇ ਵੀ ਸੁਚੇਤ ਕੀਤਾ। ਸੈਮੀਨਾਰ ਨੂੰ ਐਲ.ਡੀ.ਐਮ. ਪੰਜਾਬ ਨੈਸ਼ਨਲ ਬੈਂਕ ਆਰ.ਕੇ.ਸੈਣੀ., ਸੀ.ਜੀ.ਐਮ. ਨਬਾਰਡ ਦੀਪਕ ਕੁਮਾਰ, ਰਿਜਨਲ ਮੈਨੇਜਰ, ਸਰਕਲ ਹੈਡ ਪੀ.ਐਨ.ਬੀ. ਸ੍ਰੀ ਡੀ.ਐਸ. ਵਰਮਾਂ, ਬੀ.ਡੀ.ਪੀ.ਓ ਬੀ.ਐਸ. ਗਰੇਵਾਲ, ਜਨਰਲ ਮੈਨੇਜਰ ਐਫ ਆਈ.ਡੀ.ਡੀ,ਆਰ.ਬੀ.ਆਈ. ਚੰਡੀਗੜ੍ਹ ਰਚਨਾ ਦਿਕਸਤ ਅਤੇ ਪਿੰਡ ਜੜੌਤ ਦੇ ਸਰਪੰਚ ਗੁਰਦੇਵ ਸਿੰਘ ਨੇ ਵੀ ਸੰਬੋਧਨ ਕੀਤਾ। ਇਸ ਮੌਕੇ ਵਾਤਾਵਰਣ ਸਵੱਛਤਾ ਲਈ ਪਿੰਡ ਵਿਖੇ ਸਮੂਹ ਅਧਿਕਾਰੀਆਂ ਵੱਲੋਂ ਰੁੱਖ ਵੀ ਲਗਾਏ ਗਏ ਅਤੇ ਸੈਮੀਨਾਰ ਮੌਕੇ ਸੈਲਫ ਹੈਲਪ ਗਰੁੱਪਾਂ ਵੱਲੋਂ ਹੱਥੀ ਤਿਆਰ ਕੀਤੀਆਂ ਵਸਤਾਂ ਦੀ ਪ੍ਰਦਰਸ਼ਨੀ ਵੀ ਲਗਾਈ ਗਈ।