ਤ੍ਰਿਣਮੂਲ ਕਾਂਗਰਸ ਦੇ ਪੰਜਾਬ ਪ੍ਰਧਾਨ ਤੇ ਸਾਬਕਾ ਸੰਸਦ ਮੈਂਬਰ ਜਗਮੀਤ ਸਿੰਘ ਬਰਾੜ ਨੇ ਸੂਬੇ ਅੰਦਰ ਪਾਰਟੀ ਦੇ ਤੀਜ਼ੇ ਦਫਤਰ ਦਾ ਅੱਜ ਬਠਿੰਡਾ ਵਿਖੇ ਉਦਘਾਟਨ ਕੀਤਾ। ਇਸ ਮੌਕੇ ਉਨ੍ਹਾਂ ਨਾਲ ਹੋਰ ਜ਼ਿਲ੍ਹਿਆਂ ਤੋਂ ਜ਼ਿਲ੍ਹਾ ਕੋਆਰਡੀਨੇਟਰ ਤੇ ਮਾਲਵਾ ਖੇਤਰ ਤੋਂ ਸੀਨੀਅਰ ਸਾਥੀ ਵੀ ਸਨ।ਉਨ੍ਹਾਂ ਨੇ ਐਲਾਨ ਕੀਤਾ ਕਿ ਟੀ.ਐਮ.ਸੀ ਆਉਣ ਵਾਲੇ ਥੋੜ੍ਹੇ ਹੀ ਦਿਨਾਂ ਦੌਰਾਨ ਪੰਜਾਬ ਦੇ ਸਾਰੇ ਜ਼ਿਲ੍ਹਿਆਂ ਅੰਦਰ ਦਫਤਰ ਖੋਲ੍ਹੇਗੀ ਤੇ ਸੂਬਾ ਪੱਧਰ 'ਤੇ ਪਾਰਟੀ ਢਾਂਚਾ ਵੀ ਤਿਆਰ ਕੀਤਾ ਜਾਵੇਗਾ। ਉਨ੍ਹਾਂ ਨੇ ਕਿਹਾ ਕਿ ਅਸੀਂ 17 ਦਸੰਬਰ ਨੂੰ ਅਮਰਿੰਦਰ ਦੇ ਵਿਧਾਨ ਸਭਾ ਹਲਕੇ 'ਚ ਦਫਤਰ ਖੋਲ੍ਹਿਆ ਸੀ ਅਤੇ ਦੋ ਦਿਨ ਬਾਅਦ ਅਸੀਂ ਹਰਸਿਮਰਤ ਬਾਦਲ ਦੇ ਹਲਕੇ 'ਚ ਜਗ੍ਹਾ ਬਣਾ ਲਈ ਹੈ ਤੇ ਜ਼ਲਦੀ ਹੀ ਅਸੀਂ ਭ੍ਰਿਸ਼ਟਾਚਾਰ ਦੇ ਇਸ ਤਾਣੇਬਾਣੇ ਨੂੰ ਜੜ੍ਹੋਂ ਉਖਾੜ ਦਿਆਂਗੇ।ਇਸ ਦੌਰਾਨ ਬਰਾੜ ਨੇ ਹਰਸਿਮਰਤ ਬਾਦਲ ਦੇ ਘਮੰਡੀ ਰਵੱਈਏ ਦੀ ਨਿੰਦਾ ਕਰਦਿਆਂ ਕਿਹਾ ਕਿ ਮੈਡਮ ਨੰਨ੍ਹੀ ਛਾਂ ਦੇ ਘਮੰਡ ਨੇ ਬਠਿੰਡਾ ਦੇ ਲੋਕਾਂ ਦੇ ਮਾਣ ਨੂੰ ਠੇਸ ਪਹੁੰਚਾਈ ਹੈ। ਇਸੇ ਤਰ੍ਹਾਂ, ਉਨ੍ਹਾਂ ਨੇ ਕਿਹਾ ਕਿ ਸੁਖਬੀਰ ਸਰ੍ਹੇਆਮ ਉਨ੍ਹਾਂ ਗੁੰਡਾ ਅਨਸਰਾਂ ਨੂੰ ਬਚਾਅ ਰਹੇ ਹਨ, ਜਿਨ੍ਹਾਂ ਨੇ ਇਮਾਨਦਾਰ ਪੁਲਿਸ ਵਾਲੇ ਨੂੰ ਪ੍ਰਤਾੜਤ ਕੀਤਾ ਸੀ ਅਤੇ ਸੱਤਾ ਤੇ ਨਸ਼ੇ 'ਚ ਚੂਰ ਹੋ ਕੇ ਇਕ ਜਸ਼ਨ ਦੌਰਾਨ ਨੌਜ਼ਵਾਨ ਲੜਕੀ ਦਾ ਕਤਲ ਕੀਤਾ ਸੀ, ਜਦਕਿ ਮਜੀਠੀਆ ਨੇ ਇਕ ਪੂਰੀ ਪੀੜ੍ਹੀ ਨੂੰ ਚਿੱਟੇ ਨਾਲ ਬਰਬਾਦ ਕਰ ਦਿੱਤਾ ਤੇ ਹੁਣ ਇਹ ਮਜੇ ਵਾਸਤੇ ਨੌਜ਼ਵਾਨ ਕੁੜੀਆਂ ਨੂੰ ਮਾਰ ਰਹੇ ਹਨ, ਲੇਕਿਟ ਅਜਿਹਾ ਹੋਰ ਸਹਿਣ ਨਹੀਂ ਕੀਤਾ ਜਾਵੇਗਾ।ਉਨ੍ਹਾਂ ਨੇ ਪਠਾਨਕੋਟ ਹਮਲੇ ਮਾਮਲੇ 'ਚ ਦਾਗੀ ਪੁਲਿਸ ਅਫਸਰ ਸਲਵਿੰਦਰ ਸਿੰਘ ਨੂੰ ਚਿੱਟ ਦੇ ਕੇ ਰੱਖਿਆ ਫੋਰਸਾਂ ਤੇ ਪਠਾਨਕੋਟ ਦੇ ਲੋਕਾਂ ਨੂੰ ਧੋਖਾ ਦੇਣ 'ਤੇ ਕੇਂਦਰ ਸਰਕਾਰ ਉਪਰ ਹਮਲਾ ਬੋਲਦਿਆਂ ਕਿਹਾ ਕਿ ਮੋਦੀ ਹਰ ਰੋਜ ਛੋਟੇ ਸਿਆਸੀ ਹਿੱਤਾਂ ਖਾਤਿਰ ਫੌਜ਼ ਦਾ ਨਾਂਮ ਵੇਚਦੇ ਹਨ ਅਤੇ ਹੁਣ ਇਨ੍ਹਾਂ ਨੇ ਬਿਕ੍ਰਮ ਮਜੀਠੀਆ ਦੇ ਦਬਾਅ ਹੇਠ ਸਲਵਿੰਦਰ ਸਿੰਘ ਨੂੰ ਕਲੀਨ ਚਿੱਟ ਦੇ ਦਿੱਤੀ।
ਜਦਕਿ ਪੰਜਾਬ ਦਾ ਹਰ ਬੱਚਾ ਜਾਣਦਾ ਹੈ ਕਿ ਸਲਵਿੰਦਰ ਸਰਹੱਦ ਤੋਂ ਬੇਸ ਦੇ ਗੇਟਾਂ ਤੱਕ ਆਪਣੀ ਸਰਕਾਰੀ ਕਾਰ 'ਚ ਅੱਤਵਾਦੀਆਂ ਨੂੰ ਲੈ ਕੇ ਆਇਆ ਸੀ, ਲੱਖ ਲਾਹਨਤਾਂ ਅਜਿਹੀ ਸਰਕਾਰ 'ਤੇ ਜੋ ਚਿੱਟੇ ਦਾ ਮੁੱਲ ਸ਼ਹੀਦਾਂ ਦੇ ਖੂਨ ਤੋਂ ਜ਼ਿਆਦਾ ਲਾਉਂਦੀ ਹੈ।ਉਨ੍ਹਾਂ ਨੇ ਬਠਿੰਡਾ ਏਅਰਪੋਰਟ ਦੇ ਵੱਡੇ ਵੱਡੇ ਦਾਅਵਿਆਂ ਨੂੰ ਚੋਣਾਂ ਦਾ ਸਟੰਟ ਕਰਾਰ ਦੇ ਕੇ ਖਾਰਿਜ ਕੀਤਾ ਤੇ ਇਸਦੇ ਉਦੇਸ਼ ਨੂੰ ਲੈ ਕੇ ਸਵਾਲ ਪੁੱਛਿਆ ਕਿ ਇਹ ਡਰੱਗ ਤੇ ਡਰਾਮਾ ਸਰਕਾਰ ਮੋਹਾਲੀ ਏਅਰਪੋਰਟ ਨੂੰ ਸ਼ਹੀਦ ਭਗਤ ਸਿੰਘ ਦਾ ਨਾਂਮ ਨਹੀਂ ਦੇ ਸਕੀ, ਅੰਮ੍ਰਿਤਸਰ ਏਅਰਪੋਰਟ ਬੰਦ ਹਾਲਤ 'ਚ ਹੈ, ਤਾਂ ਹੁਣ ਇਹ ਨਵਾਂ ਡਰਾਮਾ ਉਨ੍ਹਾਂ ਲੋਕ ਨਾਲ ਕੀ ਕਰੇਗਾ, ਜਿਹੜੇ ਖੁਦਕੁਸ਼ੀਆਂ ਕਰ ਰਹੇ ਹਨ, ਨਸ਼ਿਆਂ ਤੇ ਗੈਂਗਵਾਰ ਨਾਲ ਪੀੜਤ ਹਨ ਅਤੇ ਏ.ਟੀ.ਐਮ ਦੀਆਂ ਲਾਈਨਾਂ 'ਚ ਮਰ ਰਹੇ ਹਨ, ਪੰਜਾਬ ਨੂੰ ਹੱਲ ਚਾਹੀਦਾ ਹੈ, ਪ੍ਰਚਾਰ ਨਹੀਂ।ਆਪ ਨਾਲ ਚੋਣਾਂ ਤੋਂ ਪਹਿਲਾਂ ਗਠਜੋੜ ਦੀ ਸੰਭਾਵਨਾ ਬਾਰੇ ਸਵਾਲ ਪੁੱਛੇ ਜਾਣ 'ਤੇ, ਉਨ੍ਹਾਂ ਨੇ ਕਿਹਾ ਕਿ ਟੀ.ਐਮ.ਸੀ ਇਕ ਕੌਮੀ ਪੱਧਰੀ ਪਾਰਟੀ ਹੈ ਤੇ ਆਉਂਦਿਆਂ ਦਿਨਾਂ ਦੌਰਾਨ ਅਸੀਂ ਮਮਤਾ ਜੀ ਨੂੰ ਜ਼ਮੀਨੀ ਹਾਲਾਤਾਂ ਦੀ ਰਿਪੋਰਟ ਦੇਵਾਂਗੇ। ਇਸ ਬਾਰੇ ਫੈਸਲਾ ਉਨ੍ਹਾਂ ਤੇ ਕੇਜਰੀਵਾਲ ਵੱਲੋਂ ਲਿਆ ਜਾਵੇਗਾ ਅਤੇ ਉਨ੍ਹਾਂ ਨੂੰ ਭਰੋਸਾ ਹੈ ਕਿ ਆਉਂਦਿਆਂ ਦਿਨਾਂ 'ਚ ਇਹ ਗਠਜੋੜ ਉਭਰ ਕੇ ਸਾਹਮਣੇ ਆਏਗਾ।ਉਥੇ ਹੀ, ਸਮਾਰੋਹ ਦੌਰਾਨ ਮੌਜ਼ੂਦ ਇਕ ਸਥਾਨਕ ਆਗੂ ਨੇ ਨਾਂਮ ਨਾ ਦੱਸੇ ਜਾਣ ਦੀ ਇੱਛਾ 'ਤੇ ਕਿਹਾ ਕਿ ਸਾਨੂੰ ਲੋਕ ਭਲਾਈ ਪਾਰਟੀ ਤੋਂ ਬਹੁਤ ਜ਼ਿਆਦਾ ਸਮਰਥਨ ਮਿੱਲ ਰਿਹਾ ਹੈ, ਪਰ ਹੁਣ ਟੀ.ਐਮ.ਸੀ ਮਾਲਵਾ ਖੇਤਰ 'ਚ ਜਗਮੀਤ ਸਿੰਘ ਬਰਾੜ ਦੀ ਅਗਵਾਈ ਹੇਠ ਇਕ ਅਹਿਮ ਰੋਲ ਨਿਭਾਏਗੀ। ਇਲਾਕੇ ਦਾ ਲਗਭਗ ਹਰ ਉਮੀਦਵਾਰ ਉਨ੍ਹਾਂ ਵੱਲੋਂ ਆਪਣੇ ਵਾਸਤੇ ਪ੍ਰਚਾਰ ਚਾਹੁੰਦਾ ਹੈ, ਪਰ ਇਹ ਉਦੋਂ ਮੁਮਕਿਨ ਹੈ, ਜਦੋਂ ਅਸੀਂ ਲੋਕਾਂ ਨੂੰ ਇਕ ਸਾਂਝਾ ਸੰਦੇਸ਼ ਦੇਈਏ।