ਬਾਗੀ ਧੜਿਆਂ ਵੱਲੋਂ ਬਣਾਏ ਨਵੇਂ ਫਰੰਟ ਨਾਲ ਆਪ ਦੇ ਪੁੱਠੇ ਦਿਨ ਸ਼ੁਰੂ ਹੋ ਗਏ ਹਨ। ਲੰਬਾ ਸਮਾਂ ਪਾਰਟੀ ਅੰਦਰ ਰਹਿ ਕੇ ਉਹ ਆਪ ਦੇ ਪੰਜਾਬ-ਵਿਰੋਧੀ ਪੈਂਤੜਿਆਂ ਅਤੇ ਮਾੜੇ ਇਰਾਦਿਆਂ ਨੂੰ ਭਾਂਪ ਚੁੱਕੇ ਹਨ। ਇਸ ਲਈ ਆਪ ਨੂੰ ਪੰਜਾਬ ਤੋਂ ਬਾਹਰ ਕਰਨ ਲਈ ਹੁਣ ਇਹਨਾਂ ਬਾਗੀਆਂ ਨੇ ਸਿਰ ਜੋੜ ਲਏ ਹਨ।ਇਹ ਸ਼ਬਦ ਉਪ ਮੁੱਖ ਮੰਤਰੀ ਸ਼ ਸੁਖਬੀਰ ਸਿੰਘ ਬਾਦਲ ਦੇ ਸਲਾਹਕਾਰ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਬੁਲਾਰੇ ਸ਼ ਮਨਜਿੰਦਰ ਸਿੰਘ ਸਿਰਸਾ ਨੇ ਇੱਥੇ ਪ੍ਰੈਸ ਨੋਟ ਜਾਰੀ ਕਰਦਿਆਂ ਕਹੇ। ਉਹ ਆਮ ਆਦਮੀ ਪਾਰਟੀ ਦੇ ਬਾਗੀ ਧੜਿਆਂ ਵੱਲੋਂ ਬਣਾਏ ਨਵੇਂ ਧੜੇ 'ਪੰਜਾਬ ਫਰੰਟ' ਉੱਤੇ ਟਿੱਪਣੀ ਕਰ ਰਹੇ ਸਨ।ਸ਼ ਸਿਰਸਾ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੇ ਦਿੱਲੀ ਵਾਲੇ ਆਗੂਆਂ ਦੇ ਭ੍ਰਿਸ਼ਟ ਅਤੇ ਦੁਰਾਚਾਰੀ ਕਿਰਦਾਰ ਤੋਂ ਸਿਰਫ ਆਮ ਲੋਕ ਹੀ ਦੁਖੀ ਨਹੀਂ, ਸਗੋਂ ਆਪ ਦੇ ਆਪਣੇ ਵਰਕਰ ਵੀ ਤੰਗ ਹੋ ਕੇ ਬਗਾਵਤ ਕਰ ਚੁੱਕੇ ਹਨ। ਡਾæ ਧਰਮਵੀਰ ਗਾਂਧੀ ਨੇ ਆਪ ਬਾਗੀਆਂ ਦੇ ਜਿਹੜੇ 'ਪੰਜਾਬ ਫਰੰਟ' ਦਾ ਐਲਾਨ ਕੀਤਾ ਹੈ, ਉਹ ਵਿਧਾਨ ਸਭਾ ਚੋਣਾਂ ਦੌਰਾਨ ਆਮ ਆਦਮੀ ਪਾਰਟੀ ਦਾ ਮਰਸੀਆ ਪੜ੍ਹੇਗਾ। ਉਹਨਾਂ ਕਿਹਾ ਕਿ ਆਪ ਮੁਖੀ ਅਰਵਿੰਦ ਕੇਜਰੀਵਾਲ ਵੱਲੋਂ ਲਿਆਂਦੇ ਯੂਪੀ ਅਤੇ ਬਿਹਾਰ ਦੇ ਵਿਅਕਤੀ ਸ਼ਰੇਆਮ ਟਿਕਟਾਂ ਦੀ ਨੀਲਾਮੀ ਕਰ ਰਹੇ ਹਨ। ਉਹ ਸਾਫ ਸੁਥਰੇ ਕਿਰਦਾਰ ਵਾਲੇ ਸਥਾਨਕ ਆਗੂਆਂ ਨੂੰ ਦਰਕਿਨਾਰ ਕਰਕੇ ਅਜਿਹੇ ਵਿਅਕਤੀਆਂ ਨੂੰ ਟਿਕਟਾਂ ਦੇ ਰਹੇ ਹਨ, ਜਿਹੜੇ ਉਹਨਾਂ ਅੱਗੇ ਨੋਟਾਂ ਦੀਆਂ ਥੈਲੀਆਂ ਚੜ੍ਹਾਉਂਦੇ ਹਨ।
ਸ਼ ਸਿਰਸਾ ਨੇ ਕਿਹਾ ਕਿ ਆਪ ਇੱਕ ਪੰਜਾਬ-ਵਿਰੋਧੀ ਅਤੇ ਸਿੱਖ-ਵਿਰੋਧੀ ਪਾਰਟੀ ਹੈ, ਜਿਹੜੀ ਸਿਰਫ ਸੱਤਾ ਹਥਿਆਉਣ ਲਈ ਪੰਜਾਬ ਦੇ ਲੋਕਾਂ ਨੂੰ ਗੁੰਮਰਾਹ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਜੇਕਰ ਆਪ ਸੱਤਾ ਵਿਚ ਆ ਗਈ ਤਾਂ ਇਸ ਨੇ ਪੰਜਾਬ ਦੇ ਲੋਕਾਂ ਦੀਆਂ ਸਾਰੀਆਂ ਸਹੂਲਤਾਂ ਬੰਦ ਕਰ ਦੇਣੀਆਂ ਹਨ। ਨਾ ਤਾਂ ਇੱਥੇ ਬਿਜਲੀ ਮੁਫਤ ਮਿਲਣੀ ਹੈ ਅਤੇ ਨਾਲ ਹੀ ਆਟਾ ਦਾਲ ਅਤੇ ਸ਼ਗਨ ਸਕੀਮ ਵਰਗੀਆਂ ਲੋਕ ਭਲਾਈ ਦੀਆਂ ਸਹੂਲਤਾਂ ਜਾਰੀ ਰਹਿਣੀਆਂ ਹਨ। ਆਪ ਆਗੂਆਂ ਨੇ ਪੰਜਾਬ ਦਾ ਪਾਣੀ ਵੀ ਹਰਿਆਣਾ ਅਤੇ ਦਿੱਲੀ ਨੂੰ ਦੇ ਦੇਣਾ ਹੈ।ਆਪ ਆਗੂਆਂ ਦੀ ਸਿਧਾਂਤਾਂ ਤੋਂ ਕੋਰੀ ਰਾਜਨੀਤੀ ਉਤੇ ਟਿੱਪਣੀ ਕਰਦਿਆਂ ਅਕਾਲੀ ਆਗੂ ਨੇ ਕਿਹਾ ਕਿ ਸਾਫ ਸੁਥਰੀ ਰਾਜਨੀਤੀ ਵਰਗੇ ਜੁਮਲੇ ਵਰਤ ਕੇ ਦਿੱਲੀ ਵਿਚ ਸੱਤਾ 'ਚ ਆਈ ਇਹ ਪਾਰਟੀ ਸਭ ਤੋਂ ਨਿਕੰਮੀ ਅਤੇ ਭ੍ਰਿਸ਼ਟ ਸਾਬਿਤ ਹੋਈ ਹੈ। ਜਿਸ ਕਰਕੇ ਪੰਜਾਬ ਵਿਚ ਇਸ ਨੂੰ ਭਾਰੀ ਬਗਾਵਤ ਦਾ ਸਾਹਮਣਾ ਕਰਨਾ ਪਿਆ ਹੈ। ਪੰਜਾਬ ਫਰੰਟ, ਡੈਮੋਕਰੇਟਿਕ ਸਵਰਾਜ ਪਾਰਟੀ, ਵਾਲੰਟੀਅਰ ਫਰੰਟ ਅਤੇ ਆਪਣਾ ਫਰੰਟ ਆਦਿ ਸਾਰੇ ਧੜੇ ਆਪ ਦੀਆਂ ਨੀਤੀਆਂ ਤੋਂ ਤੰਗ ਹੋ ਕੇ ਹੋਂਦ ਵਿਚ ਆਏ ਹਨ। ਹੁਣ ਇਹਨਾਂ ਧੜਿਆਂ ਨੇ ਮਿਲ ਕੇ ਆਪ ਨੂੰ ਸਬਕ ਸਿਖਾਉਣ ਦੀ ਤਿਆਰੀ ਕਰ ਲਈ ਹੈ। ਆ ਰਹੀਆਂ ਚੋਣਾਂ ਦੌਰਾਨ ਇਹਨਾਂ ਬਾਗੀਆਂ ਨੇ ਪੰਜਾਬ ਅੰਦਰ ਆਪ ਦਾ ਮਰਸੀਆ ਪੜ੍ਹ ਦੇਣਾ ਹੈ।