ਡਾ.ਬੀ.ਆਰ. ਅੰਬੇਦਕਰ ਛੇਵੇਂ ਵਿਸ਼ਵ ਕੱਪ ਕਬੱਡੀ-2016 ਦੇ 10ਵੇਂ ਦਿਨ ਦੇ ਮੈਚ ਇਤਿਹਾਸਤ ਤੇ ਧਾਰਮਿਕ ਪਿੰਡ ਚੋਹਲਾ ਸਾਹਿਬ ਦੇ ਸ੍ਰੀ ਗੁਰੂ ਅਰਜਨ ਦੇਵ ਜੀ ਖੇਡ ਸਟੇਡੀਅਮ ਵਿਖੇ ਹੋਏ। ਪੁਰਸ਼ ਤੇ ਮਹਿਲਾ ਵਰਗ ਦੇ ਪੂਲ ਬੀ ਦੇ ਖੇਡੇ ਗਏ ਦੋ-ਦੋ ਮੈਚ ਖੇਡੇ ਗਏ। ਅੱਜ ਦੇ ਮੈਚਾਂ ਨਾਲ ਪੁਰਸ਼ਾਂ ਤੇ ਮਹਿਲਾ ਦੋਵੇਂ ਵਰਗਾਂ ਦੇ ਪੂਲ ਬੀ ਦੇ ਲੀਗ ਮੁਕਾਬਲੇ ਖਤਮ ਹੋ ਗਏ। ਪੁਰਸ਼ਾਂ ਦੇ ਪੂਲ ਬੀ ਦੇ ਅਖਰੀਲੇ ਦੌਰ ਦੇ ਮੈਚਾਂ ਵਿੱਚ ਪਿਛਲੇ ਵਾਰ ਤੀਜਾ ਸਥਾਨ ਹਾਸਲ ਕਰਨ ਵਾਲੀ ਇਰਾਨ ਦੀ ਟੀਮ ਨੇ ਅਮਰੀਕਾ ਨੂੰ 45-34 ਨਾਲ ਹਰਾਉਂਦਿਆਂ ਲੀਗ ਦੇ ਸਾਰੇ ਦੇ ਸਾਰੇ 5 ਮੈਚ ਜਿੱਤ ਕੇ ਪੂਲ ਵਿੱਚ ਚੋਟੀ ਦਾ ਸਥਾਨ ਹਾਸਲ ਕੀਤਾ। ਅਮਰੀਕਾ ਇਸ ਪੂਲ ਵਿੱਚ ਦੂਜੇ ਸਥਾਨ 'ਤੇ ਰਹੀ। ਦੋਵੇਂ ਟੀਮਾਂ ਇਸ ਪੂਲ ਵਿੱਚੋਂ ਸੈਮੀ ਫਾਈਨਲ ਵਿੱਚ ਪਹੁੰਚੀਆਂ। ਇਸੇ ਤਰ੍ਹਾਂ ਮਹਿਲਾ ਵਰਗ ਦੇ ਪੂਲ ਬੀ ਦੇ ਅਹਿਮ ਮੈਚ ਵਿੱਚ ਅਮਰੀਕਾ ਨੇ ਫਸਵੇਂ ਮੁਕਾਬਲੇ ਵਿੱਚ ਪਿਛਲੇ ਵਾਰ ਦੀ ਉਪ ਜੇਤੂ ਨਿਊਜ਼ੀਲੈਂਡ ਟੀਮ ਨੂੰ 29-28 ਨਾਲ ਹਰਾ ਕੇ ਪੂਲ ਵਿੱਚ ਸਿਖਰਲਾ ਸਥਾਨ ਮੱਲਿਆ। ਇਸ ਪੂਲ ਵਿੱਚੋਂ ਸੈਮੀ ਫਾਈਵਲ ਵਿੱਚ ਪਹੁੰਚਣ ਵਾਲੀ ਟੀਮ ਨਿਊਜ਼ੀਲੈਂਡ ਦੂਜੇ ਸਥਾਨ 'ਤੇ ਰਹੀ। ਦਿਨ ਦੇ ਦੋ ਹੋਰ ਮੈਚਾਂ ਵਿੱਚ ਪੁਰਸ਼ ਵਰਗ ਵਿੱਚ ਕੀਨੀਆ ਨੇ ਅਰਜਨਟਾਈਨਾ ਨੂੰ 60-34 ਨਾਲ ਹਰਾ ਕੇ ਲੀਗ ਵਿੱਚ ਦੂਜੀ ਜਿੱਤ ਹਾਸਲ ਕੀਤੀ ਜਦੋਂ ਕਿ ਮਹਿਲਾ ਵਰਗ ਦੇ ਇਕ ਹੋਰ ਮੈਚ ਵਿੱਚ ਸੀਆਰਾ ਲਿਓਨ ਨੇ ਤਨਜ਼ਾਨੀਆ ਨੂੰ 50-25 ਨਾਲ ਹਰਾ ਕੇ ਵਿਸ਼ਵ ਕੱਪ ਵਿੱਚ ਪਲੇਠੀ ਜਿੱਤ ਹਾਸਲ ਕੀਤੀ।
ਇਸ ਤੋਂ ਪਹਿਲਾਂ ਅੱਜ ਦੇ ਮੁਕਾਬਲਿਆਂ ਦੇ ਮੁੱਖ ਮਹਿਮਾਨ ਲੋਕ ਸਭਾ ਮੈਂਬਰ ਸ. ਰਣਜੀਤ ਸਿੰਘ ਬ੍ਰਹਮਪੁਰਾ ਨੇ ਪਹਿਲੇ ਮੈਚ ਦੀਆਂ ਟੀਮਾਂ ਕੀਨੀਆ ਤੇ ਅਰਜਨਟਾਈਨਾ ਦੇ ਖਿਡਾਰੀਆਂ ਨਾਲ ਜਾਣ-ਪਛਾਣ ਕੀਤੀ ਅਤੇ ਇਸ ਤੋਂ ਪਹਿਲਾਂ ਹਵਾ ਵਿੱਚ ਗੁਬਾਰਿਆਂ ਨਾਲ ਵਿਸ਼ਵ ਕੱਪ ਦਾ ਲੋਗੋ ਛੱਡ ਕੇ ਮੈਚਾਂ ਦਾ ਰਸਮੀ ਉਦਘਾਟਨ ਕੀਤਾ। ਇਸ ਮੌਕੇ ਸ. ਬ੍ਰਹਮਪੁਰਾ ਨੇ ਵਿਸ਼ਵ ਕੱਪ ਦੇ ਮੈਚਾਂ ਲਈ ਨਵੇਂ ਬਣੇ ਸ੍ਰੀ ਗੁਰੂ ਅਰਜਨ ਦੇਵ ਜੀ ਖੇਡ ਸਟੇਡੀਅਮ ਦਾ ਵੀ ਉਦਘਾਟਨ ਕੀਤਾ। ਇਸ ਮੌਕੇ ਸ. ਰਵਿੰਦਰ ਸਿੰਘ ਬ੍ਰਹਮਪੁਰਾ, ਸ. ਵਿਰਸਾ ਸਿੰਘ ਵਲਟੋਹਾ, ਸ. ਹਰੀ ਸਿੰਘ ਜ਼ੀਰਾ, ਸ. ਮਨਜੀਤ ਸਿੰਘ ਮੰਨਾ, ਸ. ਹਰਮੀਤ ਸਿੰਘ ਸੰਧੂ ਤੇ ਸ. ਬਲਜੀਤ ਸਿੰਘ ਜਲਾਲਉਸਮਾ (ਸਾਰੇ ਵਿਧਾਇਕ), ਸਾਬਕਾ ਜਥੇਦਾਰ ਸਿੰਘ ਸਾਹਿਬ ਭਾਈ ਜਸਵੀਰ ਸਿੰਘ ਰੋਡੇ, ਸਾਬਕਾ ਮੰਤਰੀ ਸ. ਵੀਰ ਸਿੰਘ ਲੋਪੋਕੇ, ਡਿਪਟੀ ਕਮਿਸ਼ਨਰ ਇੰਜਨੀਅਰ ਡੀ.ਪੀ.ਐਸ.ਖਰਬੰਦਾ, ਐਸ.ਐਸ.ਪੀ. ਸ੍ਰੀ ਮਨਮੋਹਨ ਸ਼ਰਮਾ, ਕੌਮਾਂਤਰੀ ਹਾਕੀ ਖਿਡਾਰੀ ਜੁਗਰਾਜ ਸਿੰਘ ਡੀ.ਐਸ.ਪੀ. ਤੇ ਸ੍ਰੀਮਤੀ ਅਮਨਦੀਪ ਕੌਰ ਡੀ.ਐਸ.ਪੀ., ਖੇਡ ਵਿਭਾਗ ਦੇ ਸਹਾਇਕ ਡਾਇਰੈਕਟਰ ਸ੍ਰੀ ਕਰਤਾਰ ਸਿੰਘ ਸੈਂਹਬੀ ਤੇ ਜ਼ਿਲਾ ਖੇਡ ਅਫਸਰ ਸ੍ਰੀ ਸੁਖਬੀਰ ਕੌਰ ਵੀ ਹਾਜ਼ਰ ਸਨ।
ਪਹਿਲਾ ਮੈਚ
ਇਰਾਨ ਨੇ ਅਮਰੀਕਾ ਨੂੰ 45-34 ਨਾਲ ਹਰਾਇਆ
ਦਿਨ ਦੇ ਪਹਿਲੇ ਅਤੇ ਪੁਰਸ਼ ਵਰਗ ਦੇ ਪੂਲ ਬੀ ਦੇ ਸਭ ਤੋਂ ਅਹਿਮ ਮੁਕਾਬਲੇ ਵਿੱਚ ਇਰਾਨ ਨੇ ਅਮਰੀਕਾ ਨੂੰ 45-34 ਨਾਲ ਹਰਾ ਕੇ ਲਗਾਤਾਰ ਪੰਜਵੀਂ ਜਿੱਤ ਨਾਲ ਪੂਲ ਬੀ ਵਿੱਚੋਂ ਪਹਿਲਾ ਸਥਾਨ ਹਾਸਲ ਕਰ ਕੇ ਸੈਮੀ ਫਾਈ੍ਵਨਲ ਵਿੱਚ ਦਾਖਲਾ ਪਾਇਆ। ਅਮਰੀਕਾ ਟੀਮ ਚਾਰ ਜਿੱਤਾਂ ਨਾਲ ਪੂਲ ਵਿੱਚੋਂ ਦੂਜੇ ਸਥਾਨ 'ਤੇ ਰਹਿੰਦੀ ਹੋਈ ਸੈਮੀ ਫਾਈਨਲ ਵਿੱਚ ਪਹੁੰਚੀ। ਇਹ ਮੁਕਾਬਲਾ ਬਹੁਤ ਫਸਵਾਂ ਰਿਹਾ। ਇਰਾਨ ਵੱਲੋਂ ਰੇਡਰ ਸਿਆਨ ਥਲੀਲ ਨੇ 10, ਬਹਿਨਾਮ ਜਾਵੇਦ ਨੇ 9 ਤੇ ਪਾਏਮਾਨ ਨੇ 4 ਅੰਕ ਬਟੋਰੇ ਜਦੋਂ ਕਿ ਜਾਫੀ ਅਲੀਜ਼ਾ ਸਫਾਰੀ ਨੇ 5 ਤੇ ਆਮਿਰ ਨੇ 4 ਜੱਫੇ ਲਾਏ। ਅਮਰੀਕਾ ਵੱਲੋਂ ਰੇਡਰ ਬਲਜੀਤ ਸਿੰਘ ਨੇ 11, ਜੱਜ ਨੇ 6 ਤੇ ਹਰਵਿੰਦਰ ਹੈਪੀ ਨੇ 5 ਅੰਕ ਲਏ ਅਤੇ ਜਾਫੀ ਨਵੀ ਜੌਹਲ ਨੇ 3 ਤੇ ਡੌਂਟੇ ਨੇ 2 ਜੱਫੇ ਲਾਏ।
ਦੂਜਾ ਮੈਚ
ਕੀਨੀਆ ਨੇ ਅਰਜਨਟਾਈਨਾ ਨੂੰ 60-34 ਨਾਲ ਹਰਾਇਆ
ਅੱਜ ਦਿਨ ਦੇ ਦੂਜੇ ਮੈਚ ਵਿੱਚ ਪੁਰਸ਼ਾਂ ਦੇ ਪੂਲ ਵਿੱਚ ਕੀਨੀਆ ਨੇ ਅਰਜਨਟਾਈਨਾ ਨੂੰ 60-34 ਨਾਲ ਹਰਾ ਕੇ ਵਿਸ਼ਵ ਕੱਪ ਵਿੱਚ ਦੂਜੀ ਜਿੱਤ ਹਾਸਲ ਕੀਤੀ। ਅਰਜਨਟਾਈਨਾ ਨੂੰ ਚੌਥੀ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਇਸ ਪੂਲ ਦੇ ਸਾਰੇ ਲੀਗ ਮੈਚ ਖਤਮ ਹੋਣ ਉਪਰੰਤ ਇਸ਼ ਪੂਲ ਵਿੱਚ ਕੀਨੀਆ ਚੌਥੇ ਤੇ ਅਰਜਨਟਾਈਨਾ ਪੰਜਵੇਂ ਸਥਾਨ 'ਤੇ ਰਹਿ ਕੇ ਲੀਗ ਦੌਰ ਵਿੱਚੋਂ ਬਾਹਰ ਹੋ ਗਈਆ। ਕੀਨੀਆ ਵੱਲੋਂ ਰੇਡਰ ਰੈਂਬੋ ਨੇ 24 ਤੇ ਹੋਲਿਕਸ ਨੇ 15 ਅੰਕ ਲਏ ਜਦੋਂ ਕਿ ਜਾਫੀ ਮਲਾਬਾ ਨੇ 5 ਤੇ ਰੋਬਿਟ ਨੇ 3 ਜੱਫੇ ਲਾਏ। ਅਰਜਨਟਾਈਨਾ ਵੱਲੋਂ ਰੇਡਰ ਬਰੂਨੋ ਨੇ 10 ਤੇ ਅਲੈਂਗਜੈਂਡਰਾ ਨੇ 7 ਅੰਕ ਬਟੋਰੇ।
ਤੀਜਾ ਮੈਚ
ਮਹਿਲਾ ਵਰਗ; ਅਮਰੀਕਾ ਨੇ ਨਿਊਜ਼ੀਲੈਂਡ ਨੂੰ 29-28 ਨਾਲ ਹਰਾਇਆ
ਦਿਨ ਦੇ ਸਭ ਤੋਂ ਖਿੱਚਭਰਪੂਰ ਅਤੇ ਫਸਵੀਂ ਟੱਕਰ ਵਾਲੇ ਮੈਚ ਵਿੱਚ ਅਮਰੀਕਾ ਨੇ ਨਿਊਜ਼ੀਲੈਂਡ ਨੂੰ 29-28 ਨਾਲ ਹਰਾ ਕੇ ਲਗਾਤਾਰ ਤੀਜੀ ਜਿੱਤ ਨਾਲ ਮਹਿਲਾ ਵਰਗ ਦੇ ਪੂਲ ਬੀ ਵਿਚੋਂ ਪਹਿਲੇ ਸਥਾਨ ਨਾਲ ਸੈਮੀ ਫਾਈਨਲ ਵਿੱਚ ਦਾਖਲਾ ਪਾਇਆ। ਨਿਊਜ਼ੀਲੈਂਡ ਟੀਮ ਦੋ ਜਿੱਤਾਂ ਨਾਲ ਇਸ ਪੂਲ ਵਿੱਚੋਂ ਦੂਜੇ ਸਥਾਨ 'ਤੇ ਰਹਿੰਦੀ ਹੋਈ ਸੈਮੀ ਫਾਈਨਲ ਵਿੱਚ ਪਹੁੰਚਣ ਵਾਲੀ ਇਸ ਪੂਲ ਦੀ ਦੂਜੀ ਟੀਮ ਬਣੀ। ਇਸ ਮੈਚ ਵਿੱਚ ਕਾਫੀ ਉਤਰਾਅ-ਚੜ੍ਹਾਅ ਰਹੇ। ਦੋਵੇਂ ਟੀਮਾਂ ਨੇ ਕਈ ਮੌਕਿਆਂ 'ਤੇ ਲੀਡ ਲਈ ਅਤੇ 28-28 'ਤੇ ਬਰਾਬਰੀ ਦੇ ਸਕੋਰ ਉਪਰੰਤ ਆਖਰੀ ਰੇਡ 'ਤੇ ਅਮਰੀਕਾ ਦੀ ਜਾਫੀ ਨੇ ਨਿਊਜ਼ੀਲੈਂਡ ਦੀ ਸਟਾਰ ਰੇਡਰ ਅਤੇ ਕਪਤਾਨ ਕ੍ਰਿਸਟੀਅਨ ਮੋਟੋ ਨੂੰ ਜੱਫਾ ਲਗਾ ਕੇ ਅਮਰੀਕਾ ਨੂੰ 29-28 ਨਾਲ ਹਰਾਇਆ। ਅਮਰੀਕਾ ਵੱਲੋਂ ਕਪਤਾਨ ਗੁਰਅੰਮ੍ਰਿਤ ਹੈਰੀ ਖਾਲਸਾ ਨੇ 8, ਨੋਵਾ ਤੇ ਆਈਲਿਨ ਨੇ 4-4 ਅੰਕ ਲਏ ਜਦੋਂ ਕਿ ਜਾਫ ਲਾਈਨ ਵਿੱਚੋਂ ਫੋਬੇ ਨੇ 7 ਤੇ ਕੈਡਿਸ ਨੇ 4 ਜੱਫੇ ਲਾਏ। ਨਿਊਜ਼ੀਲੈਂਡ ਟੀਮ ਵੱਲੋਂ ਰੇਡਰ ਮੋਟੋ ਨੇ 10 ਤੇ ਕਰੋਫਿਟ ਨੇ 4 ਅੰਕ ਲਏ ਜਦੋਂ ਕਿ ਜਾਫੀ ਟੇਲਰ ਫੋਰਡ ਨੇ 4 ਤੇ ਕੈਥਲਿਨ ਨੇ 3 ਜੱਫੇ ਲਾਏ।
ਚੌਥਾ ਮੈਚ
ਸੀਆਰਾ ਲਿਓਨ ਨੇ ਤਨਜ਼ਾਨੀਆ ਨੂੰ 50-25 ਨਾਲ ਹਰਾਇਆ
ਦਿਨ ਦਾ ਆਖਰੀ ਤੇ ਚੌਥਾ ਮੈਚ ਮਹਿਲਾ ਵਰਗ ਦੇ ਪੂਲ ਬੀ ਦੀਆਂ ਦੋ ਅਫਰੀਕਨ ਟੀਮਾਂ ਸੀਆਰਾ ਲਿਓਨ ਤੇ ਤਨਜ਼ਾਨੀਆ ਵਿਚਾਲੇ ਖੇਡਿਆ ਗਿਆ। ਸੀਆਰਾ ਲਿਓਨ ਨੇ ਤਨਜ਼ਾਨੀਆ ਨੂੰ 50-25 ਨਾਲ ਹਰਾ ਕੇ ਵਿਸ਼ਵ ਕੱਪ ਵਿੱਚ ਪਹਿਲੀ ਜਿੱਤ ਹਾਸਲ ਕੀਤੀ। ਤਨਜ਼ਾਨੀਆ ਦੀ ਟੀਮ ਦੀ ਇਹ ਲਗਾਤਾਰ ਤੀਜੀ ਹਾਰ ਸੀ। ਦੋਵੇਂ ਟੀਮਾਂ ਇਸ ਪੂਲ ਵਿੱਚੋਂ ਬਾਹਰ ਹੋ ਗਈਆਂ। ਸੀਆਰਾ ਲਿਓਨ ਵੱਲੋਂ ਰੇਡਰ ਕੈਂਟਾਹ ਰਮਾਤੂ ਨੇ 12, ਡੌਲਸੇ ਨੇ 9 ਅੰਕ ਲਏ ਜਦੋਂ ਕਿ ਜਾਫੀ ਕਰੋਮਾ ਨੇ 7 ਤੇ ਕਾਰਗਬੂ ਨੇ 6 ਜੱਫੇ ਲਾਏ। ਤਨਜ਼ਾਨੀਆ ਵੱਲੋਂ ਰੇਡਰ ਹਾਈਨੈਸ ਨੇ 14 ਅੰਕ ਲਏ ਅਤੇ ਜਾਫੀ ਸਾਲੀਮਾ ਨੇ 2 ਜੱਫੇ ਲਾਏ।