ਸੋਪਿੰਨਜ਼ ਸਕੂਲ, ਸੈਕਟਰ 32 ਵੱਲੋਂ ਕੈਂਸਰ ਦੀ ਮਰੀਜ਼ਾਂ ਲਈ ਇਕ ਖ਼ਾਸ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਗਿਆ। ਇਸ ਮੌਕੇ ਤੇ ਵਿਦਿਆਰਥੀਆਂ ਵੱਲੋਂ ਉਨ੍ਹਾਂ ਨੂੰ ਗੁਲਾਬ ਭੇਟ ਕਰਦੇ ਹੋਏ ਖ਼ੂਬਸੂਰਤ ਜ਼ਿੰਦਗੀ ਦੀ ਕਾਮਨਾ ਕੀਤੀ। ਇਸ ਦੇ ਨਾਲ ਹੀ ਵਿਦਿਆਰਥੀਆਂ ਵੱਲੋਂ ਇਸ ਦਿਨ ਨੂੰ ਯਾਦਗਾਰੀ ਬਣਾਉਦੇਂ ਹੋਏ ਸਟੇਜ ਤੇ ਕਈ ਰੰਗਾਂ ਰੰਗ ਪ੍ਰੋਗਰਾਮ ਵੀ ਪੇਸ਼ ਕੀਤੇ ਜੋ ਕਿ ਆਏ ਮਹਿਮਾਨਾਂ ਲਈ ਇਕ ਯਾਦਗਾਰੀ ਦਿਨ ਵਜੋਂ ਹੋ ਨਿੱਬੜੇ। ਜ਼ਿਕਰਖਾਸ ਹੈ ਕਿ ਕੈਂਸਰ ਇਕ ਅਜਿਹੀ ਭਿਆਨਕ ਬਿਮਾਰੀ ਹੈ ਜੋ ਕਿ ਇਨਸਾਨ ਜ਼ਿੰਦਗੀ ਲਈ ਬਹੁਤ ਘਾਤਕ ਸਿੱਧ ਹੁੰਦੀ ਹੈ। ਇਸ ਦੌਰਾਨ ਕੈਂਸਰ ਦਾ ਮਰੀਜ਼ ਭਾਰੀ ਮਾਨਸਿਕ ਅਤੇ ਸਰੀਰਕ ਪ੍ਰੇਸ਼ਾਨੀ ਵਿਚੋਂ ਗੁਜ਼ਰਦਾ ਹੈ। ਅਜਿਹੇ ਸਮੇਂ ਵਿਚ ਵਿਦਿਆਰਥੀਆਂ ਵੱਲੋਂ ਕੀਤਾ ਗਿਆ ਇਹ ਉਪਰਾਲਾ ਯਕੀਨਨ ਸ਼ਲਾਘਾਯੋਗ ਰਿਹਾ ਜੋ ਹਾਜ਼ਰ ਮਰੀਜ਼ਾਂ ਲਈ ਖ਼ੁਸ਼ੀਆਂ ਭਰਿਆਂ ਮਾਹੌਲ ਬਣਾ ਗਿਆ।
ਇਸ ਮੌਕੇ ਤੇ ਕੈਂਸਰ ਤੇ ਜਿੱਤ ਪਾਉਣ ਵਾਲੇ ਮਰੀਜ਼ਾਂ ਨੇ ਵੀ ਸਟੇਜ ਤੇ ਆਪਣਾ ਤਜਰਬਾ ਸਾਂਝਾ ਕਰਦੇ ਹੋਏ ਦੱਸਿਆਂ ਕਿ ਉਹ ਆਪਣੀ ਇੱਛਾ ਸ਼ਕਤੀ ਅਤੇ ਦ੍ਰਿੜ ਸੰਕਲਪ ਨਾਲ ਹੀ ਇਸ ਨਾਮੁਰਾਦ ਬਿਮਾਰੀ ਤੋਂ ਛੁਟਕਾਰਾ ਲੈ ਸਕੇ ਹਨ। ਉਨ੍ਹਾਂ ਵਿਦਿਆਰਥੀਆਂ ਨੂੰ ਵੀ ਪ੍ਰੇਰਨਾ ਦਿੰਦੇ ਹੋਏ ਕਿਹਾ ਕਿ ਜੇਕਰ ਉਹ ਇਕ ਸਫਲ ਇਨਸਾਨ ਬਣਨਾ ਚਾਹੁੰਦੇ ਹਨ ਤਾਂ ਦ੍ਰਿੜ ਸੰਕਲਪ ਅਤੇ ਮਜ਼ਬੂਤ ਇੱਛਾ ਸ਼ਕਤੀ ਉਨ੍ਹਾਂ ਦੀ ਸਫਲ ਜ਼ਿੰਦਗੀ ਵਿਚ ਸਹਾਇਕ ਹੋਵੇਗੀ। ਸਕੂਲ ਦੇ ਪ੍ਰਿੰਸੀਪਲ ਸ਼ੂਰਿਤਾ ਸ਼ਰਮਾ ਨੇ ਸਕੂਲ ਕੈਂਪਸ ਵਿਚ ਆਏ ਮਹਿਮਾਨਾਂ ਨੂੰ ਜੀ ਆਇਆਂ ਕਹਿੰਦੇ ਹੋਏ ਸਭ ਦੇ ਨਿਰੋਗ ਰਹਿਣ ਦੀ ਕਾਮਨਾ ਕੀਤੀ। ਪ੍ਰਿੰਸੀਪਲ ਸ਼ਰਮਾ ਨੇ ਆਪਣੇ ਵਿਚਾਰ ਪੇਸ਼ ਕਰਦੇ ਹੋਏ ਕਿਹਾ ਕਿ ਜ਼ਿੰਦਗੀ ਵਿਚ ਜੇਕਰ ਹਰ ਤਕਲੀਫ਼ ਦਾ ਸਾਹਮਣਾ ਹੱਸਦੇ ਹੋਏ ਕੀਤਾ ਜਾਵੇ ਤਾਂ ਨਾ ਸਿਰਫ਼ ਉਹ ਤਕਲੀਫ਼ ਅੱਧੀ ਰਹਿ ਜਾਂਦੀ ਹੈ ਬਲਕਿ ਉਸ ਦਾ ਹੱਲ ਵੀ ਲੱਭ ਜਾਂਦਾ ਹੈ। ਇਸ ਮੌਕੇ ਤੇ ਵਿਦਿਆਰਥੀਆਂ ਵੱਲੋਂ ਸਟੇਜ ਤੇ ਕੀਤੀ ਪੇਸ਼ਕਾਰੀ ਵਿਚ ਕੈਂਸਰ ਪੀੜਤਾਂ ਨੇ ਵੀ ਹਿੱਸਾ ਲੈਦੇ ਹੋਏ ਉਨ੍ਹਾਂ ਦਾ ਸਾਥ ਦਿਤਾ।