ਸਮੁੱਚੇ ਭਾਰਤੀਆਂ ਖਾਸ ਕਰਕੇ ਸਿੱਖਾਂ ਲਈ ਬੜੇ ਮਾਣ ਵਾਲੀ ਗੱਲ ਹੋਈ ਜਦੋਂ ਸਿੱਖਾਂ ਦੇ ਮਹਾਨ ਜਰਨੈਲ ਅਤੇ ਮਹਾਰਾਜਾ ਰਣਜੀਤ ਸਿੰਘ ਦੇ ਬੁੱਤ ਦੀ ਸਥਾਪਨਾ ਹਿੰਦੋਸਤਾਨ ਤੋਂ ਬਾਹਰ ਵਿਦੇਸ਼ੀ ਧਰਤੀ ਫਰਾਂਸ ਦੇ ਸ਼ਹਿਰ ਸੈਂਟਟਰੋਪੇ ਵਿਚ ਕੀਤੀ ਗਈ। ਮਹਾਰਾਜਾ ਰਣਜੀਤ ਸਿੰਘ ਦੇ ਬੁੱਤ ਦੀ ਘੁੰਡ ਚੁੱਕਾਈ ਮੌਕੇ ਫਰਾਂਸ ਦੇ ਸ਼ਹਿਰ ਸੈਂਟਟਰੋਪੇ ਦੇ ਮੇਅਰ,ਫਰਾਂਸ ਅਤੇ ਭਾਰਤ ਦੇ ਸੀਨੀਅਰ ਫੌਜੀ ਅਤੇ ਸਿਵਲ ਅਧਿਕਾਰੀਆਂ ਤੋਂ ਇਲਾਵਾ ਭਾਰਤ ਦੇ ਫਰਾਂਸ ਵਿਚ ਰਾਜਦੂਤ ਮੋਹਨ ਕੁਮਾਰ, ਭਾਰਤੀ ਫੌਜ ਦੇ ਸਾਬਕਾ ਜਨਰਲ ਜੇ.ਜੇ. ਸਿੰਘ ਸਮੇਤ ਸੀਨੀਅਰ ਕਾਂਗਰਸੀ ਲੀਡਰ ਰਘੁਵੀਰ ਸਿੰਘ ਜੌੜਾ ਸਮਾਗਮ ਵਿਚ ਵਿਸ਼ੇਸ਼ ਤੌਰ ਤੇ ਪਹੁੰਚੇ। ਇਨਾਂ ਤੋਂ ਇਲਾਵਾ ਡਿਪਟੀ ਮੇਅਰ ਪ੍ਰਿਊਸਟ ਅਲਾਰੀ, ਜਨਰਲ ਅਲਾਡ ਦਾ ਪੋਤਾ ਮਿਸਟਰ ਅਲਾਰੀ, ਸ਼ਾਮ ਸਿੰਘ ਅਟਾਰੀ ਵਾਲੇ ਦਾ ਪੜਪੋਤਾ ਬ੍ਰਿਗੇਡੀਅਰ ਅਟਾਰੀ, ਮੈਂਬਰ ਪਾਰਲੀਮੈਂਟ ਪਾਲ ਯਾਕੋਬੀ ਹਾਜ਼ਰ ਸਨ। ਇਸ ਇਤਿਹਾਸਕ ਮੌਕੇ ਇਨਾਂ ਸਖਸ਼ੀਅਤਾਂ ਤੋਂ ਇਲਾਵਾ ਸੈਂਕੜਿਆਂ ਪੰਜਾਬੀਆਂ ਨੇ ਵੀ ਸਮਾਗਮ ਦੀ ਸ਼ੋਭਾ ਵਧਾਈ। ਇਸ ਮੌਕੇ ਮਹਾਰਾਜਾ ਰਣਜੀਤ ਸਿੰਘ ਦੇ ਬੁੱਤ ਤੋਂ ਇਲਾਵਾ ਉਨਾਂ ਦੀ ਫੌਜ ਵਿਚ ਰਹੇ ਜਨਰਲ ਅਲਾਰਨ ਦੀ ਘਰਵਾਲੀ ਬਾਨੂਪਾਨ ਦੇਈ ਦੇ ਬੁੱਤ ਦੀ ਵੀ ਘੁੰਡ ਚੁੱਕਾਈ ਕੀਤੀ ਗਈ। ਇਸ ਮੌਕੇ ਤੇ ਸੈਂਟਟਰੋਪੇ ਦੇ ਮੇਅਰ ਨੇ ਸਮਾਗਮ ਵਿਚ ਸ਼ਾਮਲ ਹੋਈਆਂ ਉੱਘੀਆਂ ਹਸਤੀਆਂ ਦਾ ਸਨਮਾਨ ਵੀ ਕੀਤਾ ਤੇ ਸ਼ਾਨਦਾਰ ਰਾਤਰੀ ਭੋਜ ਵੀ ਦਿੱਤਾ।