ਆਮ ਆਦਮੀ ਪਾਰਟੀ ਪੰਜਾਬ ਦੇ ਐਸ.ਸੀ/ਐਸ.ਟੀ ਦੇ ਮੁਖੀ ਦੇਵ ਮਾਨ ਨੇ ਆਪਣੇ ਕੈਨੇਡਾ ਦੀ ਇਕ ਔਰਤ ਸ਼ਮਾ ਦੁਆਰਾ ਉਨਾਂ ਉਤੇ ਛੇੜਛਾੜ ਦੇ ਲਗਾਏ ਗਏ ਇਲਜ਼ਾਮਾਂ ਨੂੰ ਝੂਠਾ ਅਤੇ ਬੇ-ਬੁਨਿਆਦ ਕਰਾਰ ਦਿੱਤਾ ਹੈ। ਮਾਨ ਨੇ ਕਿਹਾ ਕਿ ਅਜਿਹੀਆਂ ਕਾਰਵਾਈਆਂ ਅਕਾਲੀ ਦਲ ਦੇ ਇਸ਼ਾਰੇ 'ਤੇ ਹੋ ਰਹੀਆਂ ਹਨ।ਪ੍ਰੈਸ ਨੂੰ ਜਾਰੀ ਇੱਕ ਬਿਆਨ ਵਿਚ ਮਾਨ ਨੇ ਕਿਹਾ ਕਿ ਉਹ ਸੰਨ 2000 ਤੋਂ ਇਕ ਕਲਾਕਾਰ ਵਜੋਂ ਕੈਨੇਡਾ ਜਾ ਰਿਹਾ ਹੈ ਅਤੇ 2010 ਤੋਂ ਵਰਕ ਪਰਮੀਟ 'ਤੇ ਉਥੇ ਰਿਹਾ। ਇਸ ਦੌਰਾਨ ਉਸਦੇ ਖਿਲਾਫ ਅਜਿਹਾ ਕੋਈ ਇਲਜ਼ਾਮ ਨਹੀਂ ਲੱਗਿਆ ਅਤੇ ਨਾ ਹੀ ਕਦੇ ਪੁਲਿਸ ਨੇ ਉਸਨੂੰ ਇਸ ਸੰਬੰਧੀ ਪੁੱਛਿਆ। ਪੰਜਾਬ ਚੋਣਾਂ ਵਿਚ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਬਣਦੇ ਸਾਰ ਹੀ ਉਨਾਂ ਉਤੇ ਅਜਿਹੇ ਝੂਠੇ ਅਤੇ ਬੇ-ਬੁਨਿਆਦ ਲੱਗਣੇ ਸ਼ੁਰੂ ਹੋ ਗਏ ਹਨ। ਉਨਾਂ ਇਸ ਕਾਰਜ ਲਈ ਅਕਾਲੀਆਂ ਦੀ ਸ਼ਹਿ 'ਤੇ ਕੰਮ ਕਰ ਰਹੇ ਕੈਨੇਡਿਅਨ ਮੂਲ ਦੇ ਯਸ਼ ਸਰਮਾ ਅਤੇ ਜੱਸੀ ਜਸਰਾਜ ਨੂੰ ਜਿੰਮੇਵਾਰ ਠਹਿਰਾਇਆ ਹੈ।ਮਾਨ ਨੇ ਕਿਹਾ ਕਿ ਕੈਨੇਡਾ ਇੱਕ ਅਜਿਹਾ ਮੁਲਕ ਹੈ ਜਿਸ ਵਿਚ ਅਜਿਹੀ ਘਟਨਾ ਦੇ ਤੁਰੰਤ ਬਾਅਦ ਪੁਲਿਸ ਤੁਹਾਡੀ ਪੁੱਛਗਿਛ ਕਰਦੀ ਹੈ ਪਰੰਤੂ ਕਿਉਂ ਜੋ ਉਨਾਂ ਨੇ ਕਦੀ ਅਜਿਹਾ ਕੋਈ ਕੰਮ ਨਹੀਂ ਕੀਤਾ ਇਸ ਲਈ ਪੁਲਿਸ ਨੇ ਉਨਾਂ ਨੂੰ ਕਦੇ ਵੀ ਨਹੀਂ ਪੜਤਾਲਿਆ।
ਉਨਾਂ ਨੇ ਕਿਹਾ ਕਿ ਪੰਜਾਬ ਵਿਚ ਆਮ ਆਦਮੀ ਪਾਰਟੀ ਦੀ ਚੜਤ ਨੂੰ ਵੇਖ ਕੇ ਵਿਰੋਧੀ ਪਾਰਟੀਆਂ ਸ੍ਰੋਮਣੀ ਅਕਾਲੀ ਦਲ ਅਤੇ ਕਾਂਗਰਸ ਬੌਖਲਾ ਗਏ ਹਨ ਅਤੇ ਅਜਿਹੀਆਂ ਮਨ ਘੜੰਤ ਅਤੇ ਬੇ-ਬੁਨਿਆਦ ਕਾਰਵਾਈਆਂ ਕਰ ਰਹੇ ਹਨ।ਮਾਨ ਨੇ ਕਿਹਾ ਕਿ ਪੰਜਾਬ ਵਿਚ ਦਲਿਤ ਵੋਟ ਬੈਂਕ ਦਾ ਆਮ ਆਦਮੀ ਪਾਰਟੀ ਵੱਲ ਝੁਕਾਅ ਹੋਣ ਅਤੇ ਪਾਰਟੀ ਵਿਚ ਉਨਾਂ ਦੇ ਦਲਿਤ ਵਿੰਗ ਦੇ ਮੁਖੀ ਹੋਣ ਕਾਰਨ ਉਨਾਂ ਨੂੰ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ। ਉਨਾਂ ਕਿਹਾ ਕਿ ਅਜਿਹੀਆਂ ਘਟੀਆ ਪੱਧਰ ਦੀਆਂ ਕਾਰਵਾਈਆਂ ਭਵਿੱਖ ਵਿਚ ਵੀ ਹੁੰਦੀਆਂ ਰਹਿਣਗੀਆਂ ਪਰੰਤੂ ਉਹ ਇਸ ਤੋਂ ਘਬਰਾਉਣ ਵਾਲੇ ਨਹੀਂ ਅਤੇ ਅਰਵਿੰਦ ਕੇਜਰੀਵਾਲ ਦੇ ਪੰਜਾਬ ਬਦਲਣ ਦੇ ਸੁਪਨੇ ਨੂੰ ਸੱਚ ਕਰਨ ਲਈ ਤਨਦੇਹੀ ਨਾਲ ਕਾਰਜ ਕਰਦੇ ਰਹਿਣਗੇ।