ਚੰਡੀਗੜ੍ਹ ਯੂਨੀਵਰਸਿਟੀ ਘੜੂੰਆਂ ਦੇ ਕੰਪਿਊਟਰ ਸਾਇੰਸ ਐਂਡ ਇੰਜੀਨੀਅਰਿੰਗ ਛੇਵੇਂ ਸਮੈਸਟਰ ਦੇ ਅਦਿੱਤਿਆ ਕੁਮਾਰ ਸ਼ਰਮਾ ਨੇ ਨੈਸ਼ਨਲ ਸਕਿੱਲ ਡਿਵੈੱਲਪਮੈਂਟ ਕਾਰਪੋਰੇਸ਼ਨ ਵੱਲੋਂ ਨਵੀਂ ਦਿੱਲੀ ਵਿਖੇ ਕਰਵਾਏ ਗਏ ਕੌਮੀ ਖੋਜ ਮੁਕਾਬਲੇ 'ਸਕਿੱਲ ਇੰਡੀਆ -2016' ਵਿੱਚ ਦੂਜਾ ਅਹਿਮ ਸਥਾਨ ਹਾਸਲ ਕਰਕੇ ਰਾਸ਼ਟਰੀ ਪੱਧਰ 'ਤੇ ਵੱਡੀ ਧਾਂਕ ਜਮਾਈ ਹੈ। ਲਗਪਗ 24 ਵੱਖ-ਵੱਖ ਸ਼੍ਰੇਣੀਆਂ ਤਹਿਤ ਹੋਏ ਇਸ ਵਕਾਰੀ ਪ੍ਰਤਿਭਾ ਖੋਜ ਮੁਕਾਬਲੇ 'ਚ ਸਕਿੱਲ ਡਿਵੈੱਲਪਮੈਂਟ ਐਂਡ ਐਂਟਰਪ੍ਰੀਨੀਓਰਸ਼ਿਪ ਮੰਤਰਾਲੇ ਦੇ ਕੇਂਦਰੀ ਮੰਤਰੀ ਰਾਜੀਵ ਪ੍ਰਤਾਪ ਰੂੜੀ ਨੇ 'ਵਰਸਿਟੀ ਦੇ ਵਿਦਿਆਰਥੀ ਅਦਿੱਤਿਆ ਕੁਮਾਰ ਸ਼ਰਮਾ ਨੂੰ ਆਈ. ਟੀ. ਸਾਫਟਵੇਅਰ ਸਲਿਊਸ਼ਨਜ਼ ਫਾਰ ਬਿਜ਼ਨਸ ਵਰਗ 'ਚ ਫਸਟ ਰਨਰਅੱਪ ਰਹਿਣ 'ਤੇ 75 ਹਜ਼ਾਰ ਦੀ ਰਾਸ਼ੀ ਦਾ ਨਕਦ ਪੁਰਸਕਾਰ ਦੇ ਕੇ ਨਿਵਾਜਿਆ। ਕੇਂਦਰ ਸਰਕਾਰ ਦੇ ਸਕਿੱਲ ਇੰਡੀਆ ਪ੍ਰੋਗਰਾਮ ਤਹਿਤ ਵੱਧ ਤੋਂ ਵੱਧ ਨੌਜਵਾਨਾਂ ਨੂੰ ਕੌਸ਼ਲ ਇੰਡੀਆ ਕੁਸ਼ਲ ਇੰਡੀਆ ਯੋਜਨਾ ਨਾਲ ਜੋੜਨ ਲਈ ਆਯੋਜਿਤ ਕੀਤੇ ਗਏ ਇਸ ਵਕਾਰੀ ਪ੍ਰਤਿਭਾ ਖੋਜ ਮੁਕਾਬਲੇ ਲਈ ਪਹਿਲੇ ਪੜਾਅ 'ਤੇ ਆਨਲਾਈਨ ਪ੍ਰੀਖਿਆ ਲਈ ਗਈ, ਜਿਸਨੂੰ ਆਨੰਦ ਕੁਮਾਰ ਨੇ ਆਸਾਨੀ ਨਾਲ ਪਾਰ ਕਰਦੇ ਹੋਏ ਦੂਜੇ ਪੜਾਅ ਦੇ ਜ਼ੋਨਲ ਪੱਧਰੀ ਮੁਕਾਬਲੇ 'ਚ ਉੱਤਰੀ ਜ਼ੋਨ ਵੱਲੋਂ ਆਨਲਾਈਨ ਰੇਲਵੇ ਰਿਜ਼ਰਵਰੇਸ਼ਨ ਦਾ ਵੈੱਬ ਪੋਰਟਲ ਬਨਾਉਣ ਦਾ ਪ੍ਰੋਜੈਕਟ ਦਿੱਤਾ ਗਿਆ, ਪਰ ਆਨੰਦ ਕੁਮਾਰ ਨੇ ਇੱਥੇ ਵੀ ਨੈੱਸਕਾਮ ਅਤੇ ਮਾਈਕਰੋਸਾਫਟ ਦੇ ਮਾਹਿਰਾਂ ਸਾਹਮਣੇ ਆਪਣੀ ਬਿਹਤਰੀਨ ਤਕਨੀਕੀ ਮੁਹਾਰਤ ਵਿਖਾਉਂਦੇ ਹੋਏ ਦਿੱਲੀ ਵਿਖੇ ਹੋਣ ਵਾਲੇ ਫਾਈਨਲ ਮੁਕਾਬਲੇ ਲਈ ਆਪਣੀ ਜਗ੍ਹਾ ਪੱਕੀ ਕਰ ਲਈ। ਇਸ ਤੋਂ ਬਾਅਦ ਵਿਸ਼ਵ ਯੁਵਾ ਹੁਨਰ ਦਿਵਸ ਮੌਕੇ ਪ੍ਰਗਤੀ ਮੈਦਾਨ ਦਿੱਲੀ ਵਿਖੇ ਹੋਏ ਕੌਮੀ ਪੱਧਰ ਦੇ ਦੋ ਰੋਜ਼ਾ ਫਾਈਨਲ ਮੁਕਾਬਲੇ 'ਚ ਸਮੂਹ ਪ੍ਰਤੀਯੋਗੀਆਂ ਨੂੰ ਨਿਵੇਕਲੀ ਆਨ ਲਾਈਨ ਟਿਕਟ ਬੁਕਿੰਗ ਪ੍ਰਣਾਲੀ ਈਜਾਦ ਕਰਨ ਦਾ ਟੀਚਾ ਦਿੱਤਾ ਗਿਆ, ਜਿਸ ਦੌਰਾਨ ਚੰਡੀਗੜ੍ਹ ਯੂਨੀਵਰਸਿਟੀ ਦੇ ਉਕਤ ਵਿਦਿਆਰਥੀ ਨੇ ਮਾਈਕਰੋਸਾਫਟ ਅਤੇ ਨੈੱਸਕਾਮ ਦੇ ਮਾਹਿਰਾਂ ਅੱਗੇ ਦਿੱਤੀ ਆਪਣੀ 30 ਮਿੰਟਾਂ ਦੀ ਪੇਸ਼ਕਾਰੀ ਨਾਲ ਆਈ. ਟੀ. ਐੱਸ. ਐੱਸ. ਬੀ. ਵਰਗ 'ਚ ਰਾਸ਼ਟਰੀ ਪੱਧਰ 'ਤੇ ਦੂਜਾ ਸਥਾਨ ਪ੍ਰਾਪਤ ਕੀਤਾ।
ਆਨੰਦ ਕੁਮਾਰ ਨੇ ਆਪਣੀ ਇਸ ਕੋਮੀ ਪ੍ਰਾਪਤੀ 'ਤੇ ਖ਼ੁਸ਼ੀ ਦਾ ਇਜ਼ਹਾਰ ਕਰਦੇ ਹੋਏ ਆਖਿਆ ਕਿ ਉਕਤ 24 ਵੱਖ-ਵੱਖ ਸ਼੍ਰੇਣੀਆਂ ਤਹਿਤ ਪਹਿਲੇ ਤਿੰਨ ਸਥਾਨ ਹਾਸਲ ਕਰਨ ਵਾਲੇ ਵਿਦਿਆਰਥੀਆਂ ਦੇ ਤਕਨੀਕੀ ਸਕਿੱਲਜ਼ ਨੂੰ ਹੋਰ ਨਿਖ਼ਾਰਨ ਵਾਸਤੇ ਭਾਰਤ ਸਰਕਾਰ ਦੇ ਦਿਸ਼ਾ ਨਿਰਦੇਸ਼ਾਂ ਹੇਠ ਨੈੱਸਕਾਮ ਦੇ ਉੱਘੇ ਮਾਹਿਰਾਂ ਵੱਲੋਂ ਉੱਚੀ ਪੱਧਰੀ ਵਿਵਹਾਰਕ ਸਿਖਲਾਈ ਪ੍ਰਦਾਨ ਕੀਤੀ ਜਾਵੇਗੀ। ਇਸ ਉਪਰੰਤ ਸਰਵੋਤਮ ਕਾਰਗੁਜ਼ਾਰੀ ਵਿਖਾਉਣ ਵਾਲੇ ਵਿਦਿਆਰਥੀਆਂ ਨੂੰ ਕੇਂਦਰ ਸਰਕਾਰ ਦੁਆਰਾ ਆਬੂ ਧਾਬੀ, ਦੁਬਈ ਵਿਖੇ ਹੋਣ ਵਾਲੇ 'ਕੌਮਾਂਤਰੀ ਹੁਨਰ ਮੁਕਾਬਲੇ-2017' ਵਿੱਚ ਦੇਸ਼ ਦੀ ਪ੍ਰਤੀਨਿਧਤਾ ਕਰਨ ਦਾ ਮੌਕਾ ਪ੍ਰਦਾਨ ਕੀਤਾ ਜਾਵੇਗਾ।ਚੰਡੀਗੜ੍ਹ ਯੂਨੀਵਰਸਿਟੀ ਘੜੂੰਆਂ ਦੇ ਕੁਲਪਤੀ ਸ. ਸਤਨਾਮ ਸਿੰਘ ਸੰਧੂ ਨੇ ਕੌਮੀ ਪੱਧਰ 'ਤੇ ਵਧੀਆ ਕਾਰਗੁਜ਼ਾਰੀ ਵਿਖਾਉਣ ਵਾਲੇ ਵਿਦਿਆਰਥੀ ਅਤੇ ਉਸਦੇ ਅਧਿਆਪਕਾਂ ਨੂੰ ਵਧਾਈ ਦਿੰਦੇ ਹੋਏ ਆਖਿਆ ਕਿ ਸਾਨੂੰ ਇਸ ਗੱਲ ਦੀ ਬੇਹੱਦ ਖ਼ੁਸ਼ੀ ਹੈ ਕਿ ਸਾਡੇ ਵਿਦਿਆਰਥੀ ਤਕਨੀਕੀ ਖੇਤਰ 'ਚ ਵੱਡੀਆਂ ਮੱਲਾਂ ਮਾਰ ਰਹੇ ਹਨ। ਉਨ੍ਹਾਂ ਰਾਸ਼ਟਰੀ ਪੱਧਰ 'ਤੇ 'ਵਰਸਿਟੀ ਦਾ ਨਾਂ ਚਮਕਾਉਣ ਵਾਲੇ ਵਿਦਿਆਰਥੀਆਂ ਨੂੰ ਹੱਲਾਸ਼ੇਰੀ ਦਿੰਦੇ ਹੋਏ ਕਿਹਾ ਕਿ ਪ੍ਰਤਿਭਾ ਖੋਜ ਮੁਕਾਬਲਿਆਂ 'ਚ ਵੱਡੀਆਂ ਮੱਲਾਂ ਮਾਰਨ ਵਾਲੇ ਇਨ੍ਹਾਂ ਵਿਦਿਆਰਥੀਆਂ ਦਾ ਭਵਿੱਖ ਬਹੁਤ ਹੀ ਸੁਨਿਹਰਾ ਹੈ। ਉਨ੍ਹਾਂ ਕਿਹਾ ਕਿ ਸਾਡੇ ਵਿਦਿਆਰਥੀ ਆਈ. ਆਈ. ਟੀਜ਼ ਅਤੇ ਐਨ. ਆਈ. ਟੀਜ਼. ਜਿਹੀਆਂ ਵਕਾਰੀ ਸੰਸਥਾਵਾਂ ਨੂੰ ਕਰੜੀ ਟੱਕਰ ਦੇ ਰਹੇ ਹਨ।