ਆਮ ਆਦਮੀ ਪਾਰਟੀ ਦੇ ਨੇਤਾਵਾਂ ਦੀ ਅਗਵਾਈ ਵਿਚ ਰਾਜ ਭਰ ਵਿਚ ਹਜਾਰਾਂ ਦੀ ਤਾਦਾਦ ਵਿਚ ਵਰਕਰਾਂ ਨੇ ਅੱਜ ਸਾਰੇ ਜਿਲਾ ਹੈਡਕਵਾਟਰਾਂ 'ਤੇ ਪ੍ਰਦਰਸ਼ਨ ਕਰਕੇ ਆਮ ਆਦਮੀ ਪਾਰਟੀ ਦੇ ਦਿੱਲੀ ਤੋਂ ਐਮ.ਐਲ.ਏ ਨਰੇਸ਼ ਯਾਦਵ ਦੀ ਗਿਰਫਤਾਰੀ ਦਾ ਵਿਰੋਧ ਕੀਤਾ। ਇਸ ਪਿਛੋਂ ਨੇਤਾਵਾਂ ਨੇ ਮਾਣਯੋਗ ਰਾਸ਼ਟਰਪਤੀ ਦੇ ਨਾਮ ਮੈਮੋਰੰਡਮ ਸੰਬੰਧਤ ਡਿਪਟੀ ਕਮਿਸ਼ਨਰਾਂ ਨੂੰ ਦਿੱਤੇ। ਪ੍ਰੈਸ ਨੂੰ ਜਾਰੀ ਬਿਆਨ ਵਿਚ ਆਮ ਆਦਮੀ ਪਾਰਟੀ ਦੇ ਸੂਬਾ ਕਨਵੀਨਰ ਸੁੱਚਾ ਸਿੰਘ ਛੋਟੇਪੁਰ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੇ ਐਮ.ਐਲ.ਏ ਦੀ ਗਿਰਫਤਾਰੀ ਬਾਦਲਾਂ ਦੀ ਆਪ ਪ੍ਰਤੀ ਕੋਝੀ ਸਾਜਿਸ਼ ਅਤੇ ਪਿਛਲੇ 9 ਸਾਲਾਂ ਦੌਰਾਨ ਕੀਤੇ ਗਏ ਕੁਕਰਮਾਂ ਨੂੰ ਲੋਕਾਂ ਸਾਹਮਣੇ ਲੈ ਕੇ ਆਉਣ ਦੀ ਸਜਾ ਹੈ। ਛੋਟੇਪੁਰ ਨੇ ਕਿਹਾ ਕਿ ਸਰਕਾਰ ਦੇ ਕੰਮਾਂ ਦੇ ਨਾਂ ਤੇ ਦੱਸਣ ਲਈ ਬਾਦਲਾਂ ਕੋਲ ਕੁਝ ਵੀ ਨਹੀਂ ਹੈ ਅਤੇ ਉਹ ਲੋਕਾਂ ਦੇ ਰੋਹ ਨੂੰ ਬਰਦਾਸਤ ਕਰ ਪਾਉਣ ਵਿਚ ਨਾਕਾਮ ਸਿੱਧ ਹੋ ਰਹੇ ਹਨ ਅਤੇ ਦੂਸਰੇ ਪਾਸੇ ਆਮ ਆਦਮੀ ਪਾਰਟੀ ਨੂੰ ਹਰ ਰੋਜ ਪੰਜਾਬੀਆਂ ਤੋਂ ਪਿਆਰ ਅਤੇ ਸਨੇਹ ਪ੍ਰਾਪਤ ਹੋ ਰਿਹਾ ਹੈ। ਪੰਜਾਬੀਆਂ ਦੇ ਆਪ ਪ੍ਰਤੀ ਰੁਝਾਨ ਨੂੰ ਬਾਦਲ ਹਜਮ ਨਹੀਂ ਕਰ ਪਾ ਰਿਹਾ ਹੈ।
ਆਪ ਨੇਤਾ ਨੇ ਕਿਹਾ ਕਿ ਨਰੇਸ਼ ਯਾਦਵ ਦੇ ਖਿਲਾਫ ਪੰਜਾਬ ਪੁਲਿਸ ਦੁਆਰਾ ਦਰਜ ਕੀਤਾ ਗਿਆ ਮਾਮਲਾ ਇਕ ਰਾਜਨੀਤਿਕ ਬਦਲਾ ਲਊ ਕਾਰਜ ਤੋਂ ਵੱਧ ਕੁਝ ਵੀ ਨਹੀਂ ਹੈ। ਪਵਿੱਤਰ ਕੁਰਾਨ ਸ਼ਰੀਫ ਦੀ ਬੇਅਦਬੀ ਦੇ ਦੋਸ਼ੀ ਵਿਜੈ ਕੁਮਾਰ ਦੇ ਖੁਦ ਵੀ.ਐਚ.ਪੀ. ਨਾਲ ਸੰਬੰਧ ਹੋਣ ਦੀ ਗੱਲ ਮੰਨਣ ਤੋਂ ਬਾਅਦ ਵੀ ਪੁਲਿਸ ਦੁਆਰਾ ਉਸ ਉਤੇ ਦਬਾਅ ਪਾ ਕੇ ਇਸ ਕੇਸ ਵਿਚ ਨਰੇਸ਼ ਯਾਦਵ ਦਾ ਨਾਮ ਘਸੀਟਣ ਲਈ ਕਿਹਾ ਗਿਆ। ਨਰੇਸ਼ ਯਾਦਵ ਪੁਲਿਸ ਦੁਆਰਾ ਬੁਲਾਏ ਜਾਣ ਤੇ ਹਰ ਬਾਰ ਪੇਸ਼ ਹੋ ਕੇ ਜਾਂਚ ਵਿਚ ਸਹਿਯੋਗ ਦਿੰਦਾ ਰਿਹਾ ਹੈ ਅਤੇ ਭਵਿੱਖ ਵਿਚ ਵੀ ਦਿੰਦਾ ਰਹੇਗਾ। ਆਮ ਲੋਕ ਬਾਦਲਾਂ ਦੀਆਂ ਇਨ੍ਹਾਂ ਕੋਝੀਆਂ ਚਾਲਾਂ ਤੋਂ ਜਾਣੂ ਹਨ ਅਤੇ ਇਸਦਾ ਜਵਾਬ ਉਹ 2017 ਦੀਆਂ ਚੋਣਾਂ ਵਿਚ ਉਨ੍ਹਾਂ ਦੀ ਭਾਸ਼ਾ ਵਿਚ ਹੀ ਦੇਣਗੇ।