ਆਮ ਆਦਮੀ ਪਾਰਟੀ ਦੇ ਲੁਧਿਆਣਾ ਜ਼ੋਨ ਕੋਆਰਡੀਨੇਟਰ ਕਰਨਲ ਸੀ. ਐਮ. ਲਖਨਪਾਲ ਨੇ ਜਗਰਾਓਂ ਵਿਖੇ ਜੂਝਾਰ ਕੰਪਨੀ ਦੀ ਤੇਜ਼ ਰਫਤਾਰ ਬੱਸ ਵਲੋਂ ਦੋ ਲੜਕੀਆਂ ਨੂੰ ਸੜਕ ਹਾਦਸੇ ਵਿੱਚ ਮਾਰਨ ਦੀ ਘਟਨਾ ਨੂੰ ਅਤਿ ਗੰਭੀਰ ਦੱਸਦੇ ਹੋਏ ਇਸਦੀ ਸਖਤ ਸ਼ਬਦਾਂ ਵਿੱਚ ਨਿਖੇਧੀ ਕੀਤੀ। ਉਹਨਾਂ ਇਸ ਹਾਦਸੇ ਤੇ ਗਹਿਰਾ ਦੁੱਖ ਪ੍ਰਗਟ ਕਰਦਿਆਂ ਮਾਰੀਆਂ ਗਈਆਂ ਹੋਣਹਾਰ ਲੜਕੀਆਂ ਦੇ ਪਰਿਵਾਰਾਂ ਨਾਲ ਆਪਣੀ ਗਹਿਰੀ ਹਮਦਰਦੀ ਦਾ ਪ੍ਰਗਟਾਵਾ ਕੀਤਾ ਅਤੇ ਪਰਿਵਾਰ ਅਤੇ ਸਮਾਜ ਲਈ ਇਸ ਨੂੰ ਨਾ ਪੂਰਾ ਹੋਣ ਵਾਲਾ ਘਾਟਾ ਦੱਸਿਆ।ਕਰਨਲ ਲਖਨਪਾਲ ਨੇ ਕਿਹਾ ਕਿ ਇਸ ਕੰਪਨੀ ਦੀਆਂ ਬੱਸਾਂ ਦਾ ਸਟਾਫ ਸੜ੍ਹਕ ਤੇ ਤੇਜ਼ ਅਤੇ ਲਾਪਰਵਾਹੀ ਨਾਲ ਬੱਸਾਂ ਚਲਾਉਣ ਲਈ ਪਹਿਲਾਂ ਹੀ ਬਹੁਤ ਬਦਨਾਮ ਹੈ, ਜਿਸ ਕਾਰਣ ਸੜ੍ਹਕ ਹਾਦਸਿਆਂ ਵਿੱਚ ਬਹੁਤ ਸਾਰੇ ਵਿਅਕਤੀ ਅਜਾਈਂ ਜਾਨਾਂ ਗੁਆ ਚੁੱਕੇ ਹਨ।
ਉਹਨਾਂ ਮੰਗ ਕੀਤੀ ਕਿ ਦੋਸ਼ੀ ਡਰਾਇਵਰ ਖਿਲਾਫ ੩੦੨ ਦਾ ਕੇਸ ਦਰਜ ਕੀਤਾ ਜਾਵੇ ਅਤੇ ਬੱਸ ਕੰਪਨੀ ਦੇ ਖਿਲਾਫ ਵੀ ਸਖਤ ਕਾਰਵਾਈ ਕੀਤੀ ਜਾਵੇ।ਜਗਰਾਓਂ ਵਿਖੇ ਆਮ ਆਦਮੀ ਪਾਰਟੀ ਦੇ ਵਾਲੰਟੀਅਰਜ਼ ਨੇ ਕਿਸਾਨ ਵਿੰਗ ਦੇ ਜ਼ੋਨ ਕੋਆਰਡੀਨੇਟਰ ਗੁਰਜੀਤ ਸਿੰਘ ਗਿੱਲ, ਲੇਬਰ ਵਿੰਗ ਦੀ ਜ਼ੋਨ ਕੋਆਰਡੀਨੇਟਰ ਰਜਿੰੰਦਰਪਾਲ ਕੌਰ ਅਤੇ ਜਗਰਾਓਂ ਦੇ ਸਰਕਲ ਕੋਆਰਡੀਨੇਟਰ ਗੋਪੀ ਸ਼ਰਮਾ ਅਤੇ ਅਰਸ਼ਦੀਪ ਸਿੰਘ ਦੀ ਅਗਵਾਈ ਵਿੱਚ ਧਰਨਾ ਲਾ ਕੇ ਸੜ੍ਹਕ ਜਾਮ ਕੀਤੀ ਗਈ ਅਤੇ ੩੦੨ ਦਾ ਕੇਸ ਦੋਸ਼ੀਆਂ ਖਿਲਾਫ ਦਰਜ ਕਰਨ ਦੀ ਮੰਗ ਕੀਤੀ। ਪੁਲਿਸ ਵਲੋਂ ਡਰਾਇਵਰ ਖਿਲਾਫ ੩੦੨ ਦਾ ਕੇਸ ਦਰਜ ਕਰਕੇ ਐਫ. ਆਈ. ਆਰ ਦੀ ਕਾਪੀ ਧਰਨੇ ਵਾਲੀ ਜਗਾਹ ਤੇ ਦਖਾਉਣ ਪਿੱਛੋਂ ਧਰਨਾ ਉਠਾਇਆ ਗਿਆ। ਇਸ ਸਮੇਂ ਧਰਨੇ ਵਿੱਚ ਸਰਵਜੀਤ ਕੌਰ, ਸੁਖਵਿੰਦਰ ਸਿੰਘ, ਬੁੱਟਾ ਕਾਉਂਕੇ, ਉਮੇਸ਼ ਛਾਬੜਾ, ਸੁਖਵਿੰਦਰ ਢੋਲਣ, ਸੋਰਵ ਕਲਸੀ, ਰੁਪਿੰਦਰ ਸਰਾਂ, ਇੰਦਰਪ੍ਰੀਤ ਸਿੰਘ, ਰਾਣਾ ਸ਼ਿਵਦੀਪ, ਵਨੀਤ ਜਗੋਤਾ ਆਦਿ ਸ਼ਾਮਿਲ ਹੋਏ।