ਅੱਜ ਇਥੇ ਪੰਜਾਬ ਦੇ ਟਰਾਂਸਪੋਰਟ ਮੰਤਰੀ ਅਜੀਤ ਸਿੰਘ ਕੋਹਾੜ ਦੀ ਪ੍ਰਧਾਨਗੀ ਹੇਠ ਟਰਾਂਸਪੋਰਟ ਵਿਭਾਗ ਦੀ ਸਾਲ 2015-16 ਦੀ ਕਾਰਗੁਜ਼ਾਰੀ ਜਾਇਜ਼ਾ ਮੀਟਿੰਗ ਹੋਈ ਜਿਸ ਵਿੱਚ ਸ੍ਰੀ ਆਰ. ਵੈਕਂਟ ਰਤਨਮ, ਆਈ.ਏ.ਐਸ., ਪ੍ਰਮੁੱਖ ਸਕੱਤਰ ਟਰਾਂਸਪੋਰਟ, ਸ੍ਰੀ ਰਾਵਿੰਦਰ ਸਿੰਘ, ਆਈ.ਏ.ਐਸ., ਮੈਨੇਜਿੰਗ ਡਾਇਰੈਕਟਰ, ਪੀ.ਆਰ.ਟੀ.ਸੀ., ਸ੍ਰੀ ਅਸ਼ਵਨੀ ਕੁਮਾਰ, ਆਈ.ਏ.ਐਸ., ਡਾਇਰੈਕਟਰ ਸਟੇਟ ਟਰਾਂਸਪੋਰਟ ਅਤੇ ਪੰਜਾਬ ਰਾਜ ਵਿੱਚ ਪੀ.ਆਰ.ਟੀ.ਸੀ, ਪਨਬਸ ਅਤੇ ਪੰਜਾਬ ਰੋਡਵੇਜ਼ ਦੇ ਜਨਰਲ ਮੈਨੇਜਰ ਵੀ ਸ਼ਾਮਲ ਹੋਏ । ਮੀਟਿੰਗ ਵਿੱਚ ਸਾਲ 2015-16 ਦੀ ਟਰਾਂਸਪੋਰਟ ਵਿਭਾਗ ਦੀ ਸਮੁਚੀ ਕਾਰਗੁਜ਼ਾਰੀ ਨੂੰ ਘੋਖਿਆ ਗਿਆ ।ਮੀਟਿੰਗ ਦੌਰਾਨ ਸ੍ਰ ਕੋਹਾੜ ਨੇ ਦੱਸਿਆ ਕਿ ਪੀ.ਆਰ.ਟੀ.ਸੀ ਦੀ ਸਾਲ 2014-15 ਦੋਰਾਨ ਕੁਲ ਆਮਦਨ 400 ਕਰੋੜ ਰੁਪਏ ਅਤੇ ਕੁਲ ਖਰਚਾ 427 ਕਰੋੜ ਰੁਪਏ ਸੀ । ਸਾਲ 2015-16 ਦੋਰਾਨ ਆਮਦਨ ਵਧ ਕੇ 464 ਕਰੋੜ ਰੁਪਏ ਅਤੇ ਖਰਚਾ ਘਟ ਕੇ 426 ਕਰੋੜ ਰੁਪਏ ਆਇਆ । ਇਸ ਤਰਾਂ ਸਾਲ 2014-15 ਵਿੱਚ ਜਿੱਥੇ ਪੀ.ਆਰ.ਟੀ.ਸੀ ਦਾ ਉਪਰੇਟਿੰਗ ਘਾਟਾ 27 ਕਰੋੜ ਰੁਪਏ ਸੀ ਸਾਲ 2015-16 ਦੋਰਾਨ ਇਸ ਨੇ 38 ਕਰੋੜ ਰੁਪਏ ਦਾ ਉਪਰੇਟਿੰਗ ਲਾਭ ਕਮਾਇਆ ਜੋ ਇਕ ਵਧੀਆ ਉਪਲਬਧੀ ਹੈ ।
ਉਹਨਾਂ ਅੱਗੇ ਦੱਸਿਆ ਕਿ ਪੀ.ਆਰ.ਟੀ.ਸੀ ਦੀ ਇਹ ਉਪਲਬਧੀ ਰਿਟਾਇਰਡ ਕਰਮਚਾਰੀਆਂ ਲਈ ਸਰਕਾਰ ਤੋ ਪ੍ਰਾਪਤ ਹੋਣ ਵਾਲੀ ਗਰਾਂਟ ਅਤੇ ਰਿਟਾਇਰਡ ਕਰਮਚਾਰੀਆਂ ਨੂੰ ਦਿਤੀ ਗਈ ਪੈਨਸ਼ਨ ਦੀ ਰਕਮ ਦੀ ਗਨਣਾ ਕਰਨ ਉਪਰੰਤ ਹੈ ।ਟਰਾਂਸਪੋਰਟ ਮੰਤਰੀ ਵੱਲੋਂ ਅਧਿਕਾਰੀਆਂ ਨੂੰ ਇਸ ਵਿੱਚ ਹੋਰ ਸੁਧਾਰ ਲਿਆਉਣ ਲਈ ਹਦਾਇਤ ਕੀਤੀ ।ਪੰਜਾਬ ਰੋਡਵੇਜ/ਪਨਬਸ ਦੀ ਕਾਰਗੁਜ਼ਾਰੀ ਨੂੰ ਵਿਚਾਰਣ ਉਪਰੰਤ ਸ੍ਰ. ਕੋਹਾੜ ਨੇ ਦੱਸਿਆ ਕਿ ਨਵੀਆਂ ਬੱਸਾਂ ਪਾਉਣ ਉਪਰੰਤ ਆਮਦਨ ਵਿੱਚ ਭਾਂਵੇ ਕੁਝ ਵਾਧਾ ਹੋਇਆ ਹੈ ਪਰੰਤੂ ਇਹ ਵਾਧਾ ਨਾਕਾਫੀ ਹੈ ਅਤੇ ਇਸ ਨੂੰ ਹੋਰ ਵਧਾਉਣ ਲਈ ਸਖਤ ਮਿਹਨਤ ਕਰਨ ਦੀ ਲੋੜ ਹੈ । ਖਰਚੇ ਵਿੱਚ ਵੀ ਹੋਰ ਕਿਫਾਇਤ ਕੀਤੀ ਜਾ ਸਕਦੀ ਹੈ । ਸ. ਕੋਹਾੜ ਵੱਲੋਂ ਸਾਰੇ ਅਧਿਕਾਰੀਆਂ ਨੂੰ ਸਖਤ ਮਿਹਨਤ ਕਰਨ, ਵਿਭਾਗ ਦੀ ਆਮਦਨ ਵਿੱਚ ਵਾਧਾ ਕਰਨ ਅਤੇ ਖਰਚੇ ਵਿੱਚ ਕਿਫਾਇਤ ਕਰਕੇ ਰਾਜ ਦੇ ਲੋਕਾਂ ਨੂੰ ਵਧੀਆ ਸਫਰ ਸਹੂਲਤਾ ਮੁਹਈਆ ਕਰਵਾਉਣ ਦੀ ਹਦਾਇਤ ਕੀਤੀ ਅਤੇ ਉਨ੍ਹਾਂ ਦੀ ਕਰਗੁਜ਼ਾਰੀ ਨੂੰ ਹਰ ਮਹੀਨੇ ਰੀਵਿਊ ਕਰਨ ਸਬੰਧੀ ਵੀ ਫੈਸਲਾ ਕੀਤਾ ।