ਪੰਜਾਬ ਸਟੇਟ ਬੋਰਡ ਆਫ ਟੈਕਨਿਕਲ ਐਜੁਕੇਸ਼ਨ ਐਂਡ ਇੰਡਸਟਰੀਅਲ ਟਰੇਨਿੰਗ ਨੇ ਸਾਲ 2016-17 ਦੇ ਡਿਪਲੋਮਾ ਕੋਰਸਾਂ ਵਿਚ ਦਾਖਲੇ ਲਈ ਲੈਣ ਵਾਲੇ 'ਜੇਈਟੀ' ਇਮਤਿਹਾਨ ਨੂੰ ਖਤਮ ਕਰ ਦਿੱਤਾ ਹੈ। ਪੰਜਾਬ ਅਨਏਡਿਡ ਕਾਲਜਿਸ ਐਸੋਸੀਏਸ਼ਨ 'ਪੁੱਕਾ' ਨੇ ਪੰਜਾਬ ਵਿਚ ਜੁਆਇੰਟ ਐਂਟਰੈਸ ਟੈਸਟ 'ਜੇਈਟੀ' ਇਮਤਿਹਾਨਾਂ ਨੂੰ ਖਤਮ ਕਰਨ ਦੇ ਫੈਸਲੇ ਦਾ ਸਵਾਗਤ ਕੀਤਾ ਹੈ। ਇਸ ਤੋਂ ਪਹਿਲਾਂ ਹੋਰ ਕਈ ਰਾਜਾਂ ਨੇ ਵੀ ਜੇਈਟੀ ਇਮਤਿਹਾਨਾਂ ਨੂੰ ਖਤਮ ਕਰ ਦਿੱਤਾ ਹੈ। ਪੁੱਕਾ ਦੇ ਪ੍ਰਧਾਨ ਡਾ: ਅੰਸ਼ੂ ਕਟਾਰੀਆ ਨੇ ਸਰਕਾਰ ਦੇ ਇਸ ਫੈਸਲੇ ਦਾ ਸੁਆਗਤ ਕਰਦਿਆਂ ਤਕਨੀਕੀ ਸਿੱਖਿਆ ਮੰਤਰੀ ਸ਼੍ਰੀ ਮਦਨ ਮੋਹਨ ਮਿੱਤਲ ਅਤੇ ਪੰਜਾਬ ਸਟੇਟ ਬੋਰਡ ਆਫ ਟੈਕਨਿਕਲ ਐਜੁਕੇਸ਼ਨ ਐਂਡ ਇੰਡਸਟਰੀਅਲ ਟਰੇਨਿੰਗ ਦੇ ਚੇਅਰਮੈਨ, ਸ. ਸੇਵਾ ਸਿੰਘ ਸੇਖਵਾਂ ਦਾ ਧੰਨਵਾਦ ਕੀਤਾ ਹੈ।ਦਸਣਯੋਗ ਹੈ ਕਿ ਪੰਜਾਬ ਦੇ ਜਿਆਦਾਤਰ ਪ੍ਰਾਈਵੇਟ ਅਨਏਡਿਡ ਕਾਲਜਾਂ ਵਿਚ ਸੀਟਾ ਖਾਲੀ ਪਈਆਂ ਹਨ ਪ੍ਰੰਤੂ ਪੰਜਾਬ ਸਰਕਾਰ ਵਲੋਂ ਫਿਰ ਵੀ 10 ਪਾਸ ਕਰਨ ਤੋਂ ਬਾਅਦ ਟੈਕਨੀਕਲ ਡਿਪਲੋਮਾ ਕੋਰਸਾਂ ਵਿਚ ਦਾਖਲੇ ਦੇ ਚਾਹਵਾਨ ਵਿਦਿਆਰਥੀਆਂ ਲਈ ਜੁਆਇੰਟ ਐਂਟਰੇਸ ਟੈਸਟ ਜੇਈਟੀ ਲਿਆ ਜਾਂਦਾ ਰਿਹਾ ਸੀ।
ਪ੍ਰੰਤੂ ਹੁਣ ਆਨਲਾਈਨ ਕਾਊਂਸਲਿੰਗ ਕਰਕੇ ਮੈਰਿਟ ਦੇ ਆਧਾਰ ਤੇ ਦਾਖਲਾ ਦਿੱਤਾ ਜਾਵੇਗਾ। ਇਸ ਨਾਲ ਜਿੱਥੇ ਵਿਦਿਆਰਥੀਆਂ ਅਤੇ ਉਨ੍ਹਾਂ ਦੇ ਮਾਂਬਾਪ ਦਾ ਪੈਸਾ ਅਤੇ ਸਮਾਂ ਬਚੇਗਾ ਉਥੇ ਕਾਲਜਾਂ ਲਈ ਵੀ ਪ੍ਰੇਸ਼ਾਨੀ ਘਟੇਗੀ।ਜਿਕਰਯੋਗ ਹੈ ਕਿ ਪੰਜਾਬ ਵਿਚ 140 ਪ੍ਰਾਈਵੇਟ ਅਤੇ 25 ਸਰਕਾਰੀ ਪੌਲਿਟੈਕਨਿਕ ਕਾਲਜ ਹਨ। ਜਿਨ੍ਹਾਂ ਵਿਚ 60,000 ਡਿਪਲੋਮਾ ਸੀਟਾਂ ਹਨ। ਸਾਲ 2015-16 ਵਿਚ 40,000 ਸੀਟਾ ਹੀ ਭਰੀਆਂ ਜਾ ਸਕੀਆਂ, ਜਦਕਿ 20,000 ਸੀਟਾਂ ਖਾਲੀ ਰਹਿ ਗਈਆਂ। ਜਿਸ ਕਾਰਨ ਬੱਚਿਆਂ ਨੂੰ ਅਸਾਨੀ ਨਾਲ ਇਨ੍ਹਾਂ ਕਾਲਜਾ ਵਿਚ ਦਾਖਲਾ ਮਿਲ ਜਾਦਾ ਹੈ। ਇਸਦੇ ਚਲਦਿਆਂ ਜੇਈਟੀ ਟੈਸਟ ਦੇਣ ਦਾ ਰੁਝਾਨ ਲਗਾਤਾਰ ਘਟਦਾ ਜਾ ਰਿਹਾ ਸੀ। ਹੁਣ ਪੰਜਾਬ ਸਰਕਾਰ ਨੇ ਹਰਿਆਣਾ ਦੀ ਤਰਜ ਤੇ ਟੈਸਟ ਲੈਣ ਦੀ ਬਜਾਏ ਮੈਰਿਟ ਦੇ ਆਧਾਰ ਤੇ ਦਾਖਲੇ ਕਰਨ ਦਾ ਫੈਸਲਾ ਕੀਤਾ ਹੈ।ਡਾ: ਅੰਸ਼ੂ ਕਟਾਰੀਆ ਨੇ ਕਿਹਾ ਕਿ ਇਸ ਟੈਸਟ ਦੇ ਖਤਮ ਹੋਣ ਨਾਲ ਕਾਲਜਾਂ ਵਿਚ ਵਿਦਿਆਰਥੀਆ ਮੈਰਿਟ ਦੇ ਆਧਾਰ ਤੇ ਸਿੱਧਾ ਦਾਖਲਾ ਹੋ ਸਕੇਗਾ।