ਬੀਤੇ ਦਿਨੀਂ ਭਾਈ ਪਰਮਜੀਤ ਸਿੰਘ ਉਰਫ ਪੰਮਾ ਇੰਗਲੈਂਡ ਤੋਂ ਪੁਰਤਗਾਲ ਆਪਣੀ ਪਤਨੀ ਪਿੰਕੀ ਕੌਰ, ਬੇਟੀ ਪਰਵਿੰਦਰ ਕੌਰ (11 ਸਾਲ), ਗੁਰਬਾਣੀ ਕੌਰ (10 ਸਾਲ), ਪ੍ਰਭ ਸਿਮਰਨ ਸਿੰਘ (9 ਸਾਲ) ਅਤੇ ਸਾਹਿਬ ਸਿੰਘ (7 ਸਾਲ) ਸਮੇਤ ਪੁਰਤਗਾਲ ਘੁੰਮਣ ਆਏ ਸਨ ਨੂੰ ਇੰਟਰਪੋਲ ਨੇ ਪੁਰਤਗਾਲ ਦੀ 'ਫੋਰਗੀਨਰ ਐਂਡ ਬਾਡਰ ਸਰਵਿਸਜ਼' (ਸੈਫ਼) ਰਾਹੀਂ ਫਾਰੋ ਦੇ ਹੋਟਲ ਪ੍ਰਾਈਜ਼ ਵਿਚੋਂ ਗ੍ਰਿਫ਼ਤਾਰ ਕਰ ਲਿਆ ਸੀ। ਪੁਰਤਗਾਲ (ਸੈਫ਼) ਵਲੋਂ ਭਾਈ ਪਰਮਜੀਤ ਸਿੰਘ ਪੰਮਾ ਨੂੰ ਏਵੋਰਾ ਸ਼ਹਿਰ ਦੀ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ ਸੀ। ਜਿਸ ਤੋਂ ਬਾਅਦ ਪੁਰਤਗੇਜ਼ੀ ਅਦਾਲਤ ਵਲੋਂ ਵਕੀਲਾਂ ਦੀਆਂ ਦਲੀਲਾਂ ਤੋਂ ਬਾਅਦ ਪੰਮਾ ਦੇ ਕੇਸ ਦੀ ਸੁਣਵਾਈ 4 ਜਨਵਰੀ ਪਾਈ ਗਈ ਸੀ। ਭਾਈ ਪੰਮਾ ਦੇ ਕੇਸਾਂ ਸਬੰਧੀ ਜਾਣਕਾਰੀ ਦਿੰਦਿਆਂ ਭਾਈ ਪੰਮਾ ਦੀ ਪਤਨੀ ਪਿੰਕੀ ਕੌਰ ਨੇ ਦੱਸਿਆਂ ਕਿ ਭਾਈ ਪਰਮਜੀਤ ਸਿੰਘ ਨੂੰ ਸਾਰੇ ਕੇਸਾਂ ਵਿੱਚੋਂ ਰਿਹਾਅ ਕੀਤਾ ਗਿਆ ਸੀ। ਸੰਨ 2010 ਵਿੱਚ ਇੰਗਲੈਂਡ ਤੋਂ ਮਿਡਲੈਂਡ (ਬਰਮਿੰਗਮ) ਦੀ ਪੁਲਿਸ ਨੇ ਭਾਰਤ ਜਾ ਕੇ ਕੇਸਾਂ ਦੀ ਪੂਰੀ ਪੜਤਾਲ ਕਰਨ ਤੋਂ ਬਾਅਦ ਪੰਮਾ ਨੂੰ ਬੇ ਦੋਸ਼ਾਂ ਕਰਾਰ ਦਿੱਤਾ ਸੀ। ਪ੍ਰੰਤੂ ਹੁਣ ਇਸ ਮੌਕੇ ਮੇਰੇ ਪਤੀ ਨੂੰ ਸੌੜੀ ਰਾਜਨੀਤੀ ਦਾ ਸ਼ਿਕਾਰ ਬਣਾਇਆ ਜਾ ਰਿਹਾ ਹੈ।
ਭਾਈ ਪੰਮਾ ਦੀ ਪਤਨੀ ਨੇ ਅੱਜ ਗੁਰਦੁਆਰਾ ਸਿੱਖ ਸੰਗਤ ਸਾਹਿਬ ਲਿਸਬਨ ਵਿਖੇ ਪੁਰਤਗਾਲ ਦੀਆਂ ਸਮੂਹ ਸੰਗਤਾਂ ਨੂੰ ਵੀ ਕਿਹਾ ਕਿ ਉਨ੍ਹਾਂ ਨੂੰ ਸਹਿਯੋਗ ਦੇ ਕੇ ਉਨ੍ਹਾਂ ਦੇ ਪਤੀ ਨੂੰ ਰਿਹਾਅ ਕਰਵਾਇਆ ਜਾਵੇ। ਗੁਰਦੁਆਰਾ ਸਾਹਿਬ ਦੀ ਕਮੇਟੀ ਅਤੇ ਸੰਗਤਾਂ ਵਲੋਂ ਭਾਈ ਪਰਮਜੀਤ ਪੰਮਾ ਦੇ ਪਰਿਵਾਰ ਨੂੰ ਪੂਰਨ ਭਰੋਸਾ ਦਵਾਇਆ ਗਿਆ ਕਿ ਕੀ ਉਨ੍ਹਾਂ ਵਲੋਂ ਪੂਰਨ ਸਹਿਯੋਗ ਦਿੱਤਾ ਜਾਵੇਗਾ। ਇਸ ਮੌਕੇ ਸਿਖਸ ਫਾਰ ਜਸਟਿਸ ਦੇ ਭਾਈ ਗੁਰਪਤਵੰਤ ਸਿੰਘ ਅਤੇ ਪੁਰਤਗੇਜ਼ੀ ਵਕੀਲ ਮੈਨੂਅਲ ਲੂਈਜ ਫੇਰੇਰਾ ਨੇ ਵੀ ਕਿਹਾ ਕਿ ਉਨ੍ਹਾਂ ਦਾ ਕੇਸ ਪੂਰੀ ਤਰਾਂ ਨਾਲ ਮਜ਼ਬੂਤੀ ਵਿੱਚ ਹੈ ਅਤੇ ਉਨ੍ਹਾਂ ਨੇ ਫਿਰ ਵੀ ਅਦਾਲਤ ਨੂੰ ਬੇਨਤੀ ਕੀਤੀ ਹੈ ਕਿ ਜੇਕਰ ਅਦਾਲਤ ਵਲੋਂ ਕਿਸੇ ਵੀ ਕੇਸ ਦੀ ਪੜਤਾਲ ਕਰਾਉਣੀ ਹੈ ਤਾਂ ਉਹ ਇੰਗਲੈਂਡ ਤੋਂ ਕਰਵਾਈ ਜਾਵੇ। ਕਿਉਂਕਿ ਪਰਮਜੀਤ ਸਿੰਘ ਸੰਨ 1999 ਤੋਂ ਭਾਰਤ ਨਹੀਂ ਗਏ। ਆਪਣੇ ਪਰਿਵਾਰ ਨੂੰ ਯੂਰਪ ਘੁਮਾਉਣ ਆਏ ਸਨ ਕਿਉਂਕਿ ਯੂ ਐਨ ਓ ਵਲੋਂ ਸੰਨ 2000 ਤੋਂ ਉਨ੍ਹਾਂ ਨੂੰ ਟਰੈਵਲ ਪੇਪਰ ਦਿੱਤੇ ਹਨ। ਜਿਸ ਵਿੱਚ ਯੂਰਪ 'ਚ ਕਿਤੇ ਵੀ ਘੁੰਮਣ ਦੀ ਇਜਾਜ਼ਤ ਹੈ। ਇਸ ਮੌਕੇ ਉਨ੍ਹਾਂ ਨਾਲ ਬੀਬੀ ਕਮਲਜੀਤ ਕੌਰ ਪਤਨੀ ਭਾਈ ਸਰਬਜੀਤ ਸਿੰਘ ਬਨੂੜ ਅਤੇ ਬੇਟੀ ਕਮਲਜੀਤ ਕੌਰ ਵੀ ਮੌਜੂਦ ਸਨ।