ਹਲਕਾ ਵਿਧਾਇਕ ਮਨਪ੍ਰੀਤ ਸਿੰਘ ਇਯਾਲੀ ਦੇ ਵਿਸ਼ੇਸ਼ ਯਤਨਾਂ ਅਤੇ ਰੁਚੀ ਨਾਲ ਪਿੰਡ ਗੁੱਜਰਵਾਲ ਵਿਖੇ ਕਰੀਬ 50 ਲੱਖ ਰੁਪਏ ਦੀ ਲਾਗਤ ਨਾਲ ਤਿਆਰ ਕੀਤਾ ਗਿਆ ਆਧੁਨਿਕ ਖੇਡ ਮੈਦਾਨ ਅੱਜ ਖ਼ਿਡਾਰੀਆਂ ਅਤੇ ਆਮ ਲੋਕਾਂ ਦੀ ਸਹੂਲਤ ਲਈ ਅਰਪਿਤ ਕਰ ਦਿੱਤਾ ਗਿਆ। ਇਸ ਬਹੁਮੰਤਵੀ ਖੇਡ ਮੈਦਾਨ ਦਾ ਉਦਘਾਟਨ ਡਿਪਟੀ ਕਮਿਸ਼ਨਰ ਸ੍ਰੀ ਰਜਤ ਅਗਰਵਾਲ ਵੱਲੋਂ ਕੀਤਾ ਗਿਆ। ਉਦਘਾਟਨੀ ਸਮਾਰੋਹ ਦੌਰਾਨ ਜਿੱਥੇ ਦੂਰੋਂ ਨੇੜਿਉਂ ਪਹੁੰਚੇ ਹਜ਼ਾਰਾਂ ਦੀ ਗਿਣਤੀ ਵਿੱਚ ਪ੍ਰਦਰਸ਼ਨੀ ਫੁੱਟਬਾਲ ਮੈਚ ਦਾ ਆਨੰਦ ਮਾਣਿਆ ਉਥੇ ਸੱਭਿਆਚਾਰਕ ਰੰਗਾਰੰਗ ਪ੍ਰੋਗਰਾਮ ਵੀ ਪੇਸ਼ ਕੀਤਾ ਗਿਆ।ਬੇਹੱਦ ਰੋਮਾਂਚ ਭਰਪੂਰ ਉਦਘਾਟਨੀ ਸਮਾਰੋਹ ਨੂੰ ਸੰਬੋਧਨ ਕਰਦਿਆਂ ਡਿਪਟੀ ਕਮਿਸ਼ਨਰ ਸ੍ਰੀ ਰਜਤ ਅਗਰਵਾਲ ਨੇ ਇਸ ਵੱਡੀ ਪ੍ਰਾਪਤੀ ਲਈ ਜਿੱਥੇ ਹਲਕਾ ਵਿਧਾਇਕ ਸ੍ਰ. ਮਨਪ੍ਰੀਤ ਸਿੰਘ ਇਯਾਲੀ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ ਉਥੇ ਪਿੰਡ ਅਤੇ ਹਲਕਾ ਵਾਸੀਆਂ ਨੂੰ ਵਧਾਈ ਵੀ ਦਿੱਤੀ। ਉਨ੍ਹਾਂ ਕਿਹਾ ਕਿ ਇਸ ਖੇਡ ਮੈਦਾਨ ਦਾ ਇਕੱਲੇ ਖ਼ਿਡਾਰੀਆਂ ਨੂੰ ਹੀ ਨਹੀਂ ਸਗੋਂ ਬਾਕੀ ਲੋਕਾਂ ਨੂੰ ਵੀ ਭਰਪੂਰ ਫਾਇਦਾ ਮਿਲੇਗਾ, ਕਿਉਂਕਿ ਦਿਨ ਵੇਲੇ ਜਿੱਥੇ ਖਿਡਾਰੀ ਇਥੇ ਖੇਡਣਗੇ, ਉਥੇ ਸਵੇਰੇ ਸ਼ਾਮ ਮੈਦਾਨ ਦੇ ਆਸੇ ਪਾਸੇ ਬਣੇ ਫੁੱਟਪਾਥ 'ਤੇ ਲੋਕ ਸੈਰ ਵੀ ਕਰਿਆ ਕਰਨਗੇ। ਸ੍ਰੀ ਅਗਰਵਾਲ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਇਸ ਵਡਮੁੱਲੀ ਦਾਤ ਨੂੰ ਹੁਣ ਸੰਭਾਲ ਕੇ ਰੱਖਣ ਅਤੇ ਇਸ ਦੇ ਰੱਖ ਰਖਾਵ ਵਿੱਚ ਕੋਈ ਕਮੀ ਨਾ ਰਹੇ। ਉਨ੍ਹਾਂ ਹੋਰ ਕਿਹਾ ਕਿ ਉਨ੍ਹਾਂ ਦੀ ਅਧੀਨਗੀ ਵਿੱਚ ਜਿੰਨੇ ਵੀ ਅਫ਼ਸਰ ਸਿਖ਼ਲਾਈ ਲਈ ਜਾਂ ਕਿਸੇ ਹੋਰ ਮਨੋਰਥ ਲਈ ਜ਼ਿਲ੍ਹਾ ਲੁਧਿਆਣਾ ਵਿੱਚ ਆਉਣਗੇ, ਉਨ੍ਹਾਂ ਨੂੰ ਇਹ ਮੈਦਾਨ ਦੇਖਣ ਲਈ ਜ਼ਰੂਰ ਪ੍ਰੇਰਿਤ ਕੀਤਾ ਜਾਇਆ ਕਰੇਗਾ।
ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਹਲਕਾ ਵਿਧਾਇਕ ਸ੍ਰ. ਮਨਪ੍ਰੀਤ ਸਿੰਘ ਇਯਾਲੀ ਨੇ ਕਿਹਾ ਕਿ ਹਲਕਾ ਦਾਖਾ ਦੇ ਵੱਖ-ਵੱਖ ਪਿੰਡਾਂ ਵਿਚ ਵਿਕਾਸ ਕੰਮਾਂ ਦੀ ਕ੍ਰਾਂਤੀ ਚੱਲ ਰਹੀ ਹੈ। ਹਲਕਾ ਵਿਕਾਸ ਪੱਖੋਂ ਪੂਰੇ ਪੰਜਾਬ ਵਿਚੋਂ ਆਪਣੀ ਵੱਖਰੀ ਪਹਿਚਾਣ ਨੂੰ ਦਰਸਾ ਰਿਹਾ ਹੈ। ਹਲਕੇ ਦੇ 40 ਪਿੰਡਾਂ ਵਿਚ ਆਧੁਨਿਕ ਸਹੂਲਤਾਂ ਨਾਲ ਭਰਪੂਰ ਖੇਡ ਮੈਦਾਨ ਬਨਾਉਣੇ ਸ਼ੁਰੂ ਕੀਤੇ ਹਨ। ਇਸ ਕੜੀ ਤਹਿਤ ਪਹਿਲਾ ਆਧੁਨਿਕ ਖੇਡ ਮੈਦਾਨ 50 ਲੱਖ ਰੁਪਏ ਦੀ ਲਾਗਤ ਨਾਲ ਪਿੰਡ ਗੁੱਜਰਵਾਲ ਵਿਖੇ ਲੋਕਾਂ ਨੂੰ ਸਮਰਪਿਤ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਇਸ ਸਟੇਡੀਅਮ ਦੀ ਅਗਲੀ ਮੁਰੰਮਤ ਅਤੇ ਸੰਭਾਲ ਲਈ ਵੀ ਉਚੇਚਾ ਬਜਟ ਰੱਖਿਆ ਗਿਆ ਹੈ। ਇਸ ਸਟੇਡੀਅਮ ਦੇ ਬਣਨ ਵਿਚ ਜਾਂ ਇਸ ਨੂੰ ਅੱਗੇ ਸੰਭਾਲਣ ਲਈ ਪਿੰਡ ਦੀ ਪੰਚਾਇਤ, ਨੌਜਵਾਨ ਵਰਗ, ਖੇਡ ਕਲੱਬ, ਪ੍ਰਵਾਸੀ ਖੇਡ ਪ੍ਰਮੋਟਰ ਅਤੇ ਸਮਾਜ ਸੇਵੀ ਸਖਸ਼ੀਅਤਾਂ ਨੇ ਹਰ ਪੱਖੋਂ ਸਹਿਯੋਗ ਦਿੱਤਾ ਅਤੇ ਹੋਰ ਸਹਿਯੋਗ ਦੇਣ ਦਾ ਭਰੋਸਾ ਵੀ ਦਿੱਤਾ ਹੈ, ਜਿਸ ਲਈ ਉਨ੍ਹਾਂ ਸਾਰੀਆਂ ਧਿਰਾਂ ਦਾ ਧੰਨਵਾਦ ਕੀਤਾ।ਉਨ੍ਹਾਂ ਦੱਸਿਆ ਕਿ ਗੁੱਜਰਵਾਲ ਮਾਡਰਨ ਖੇਡ ਸਟੇਡੀਅਮ ਦਾ ਕੰਮ ਮੁਕੰਮਲ ਹੋਣ ਤੋਂ ਬਾਅਦ ਹਲਕਾ ਦਾਖਾ ਦੇ 13 ਹੋਰ ਪਿੰਡਾਂ ਵਿਚ ਕੰਮ ਜੰਗੀ ਪੱਧਰ 'ਤੇ ਸ਼ੁਰੂ ਹੋ ਗਿਆ ਹੈ। ਹਲਕਾ ਦਾਖਾ ਵਿਖੇ 7 ਏਕੜ ਵਿਚ ਖੇਡ ਸਟੇਡੀਅਮ ਦਾ ਕੰਮ ਸ਼ੁਰੂ ਹੋਣ ਤੋਂ ਇਲਾਵਾ ਜਾਂਗਪੁਰ, ਰੁੜਕਾ, ਪੰਡੋਰੀ, ਕੁਲਾਰ, ਜੋਧਾਂ, ਚਮਿੰਡਾ, ਹਾਂਸ ਕਲਾਂ, ਜੱਸੋਵਾਲ, ਭਰੋਵਾਲ ਕਲਾਂਸ, ਚੱਕ ਕਲਾਂ, ਰੂਮੀ, ਛੱਜਾਵਾਲ, ਲਤਾਲਾ ਆਦਿ ਪਿੰਡਾਂ ਵਿਚ ਖੇਡ ਪਾਰਕਾਂ ਦਾ ਕੰਮ ਸ਼ੁਰੂ ਹੋ ਚੁੱਕਿਆ ਹੈ, ਜੋ ਆਉਣ ਵਾਲੇ 4 ਮਹੀਨਿਆਂ ਵਿਚ ਮੁਕੰਮਲ ਹੋ ਜਾਵੇਗਾ। ਇਨ੍ਹਾਂ ਅੰਤਰਾਸ਼ਟਰੀ ਪੱਧਰ ਦੇ ਬਣ ਰਹੇ ਖੇਡ ਸਟੇਡੀਅਮ ਦੀ ਉਸਾਰੀ 'ਤੇ 20 ਕਰੋੜ ਦੀ ਰਾਸ਼ੀ ਖਰਚ ਆਵੇਗੀ।
ਗੁੱਜਰਵਾਲ ਤੋਂ ਬਾਅਦ ਪਿੰਡ ਚੱਕ ਕਲਾਂ ਵਿਖੇ ਆਧੁਨਿਕ ਸਹੂਲਤਾਂ ਨਾਲ ਲੈੱਸ ਤਿਆਰ ਹੋਇਆ ਬਹੁਮੰਤਵੀ ਵਾਲੀਵਾਲ ਕੋਰਟ ਵੀ 20 ਦਸੰਬਰ ਨੂੰ ਖਿਡਾਰੀਆਂ ਅਤੇ ਪਿੰਡ ਦੇ ਆਮ ਲੋਕਾਂ ਨੂੰ ਸਮਰਪਿਤ ਕਰ ਦਿੱਤਾ ਜਾਵੇਗਾ।ਵਿਧਾਇਕ ਇਯਾਲੀ ਨੇ ਦੱਸਿਆ ਕਿ ਪਿੰਡ ਗੋਰਸੀਆਂ ਕਾਦਰ ਬਖਸ ਵਿਖੇ ਆਧੁਨਿਕ ਸਹੂਲਤਾਂ ਨਾਲ ਲੈੱਸ ਇਕ ਸਕਿੱਲ ਸੈਂਟਰ ਵੀ ਸਥਾਪਿਤ ਕੀਤਾ ਜਾਵੇਗਾ, ਜਿਸ ਵਿਚ ਖਿਡਾਰੀਆਂ ਨੂੰ ਅੰਤਰਾਰਸ਼ਟਰੀ ਪੱਧਰ ਦੇ ਮਿਆਰ ਦੀ ਕੋਚਿੰਗ, ਟ੍ਰੇਨਿੰਗ ਤੇ ਹੋਰ ਸਹੂਲਤਾਂ ਕੀਤੀਆਂ ਜਾਣਗੀਆਂ। ਆਮ ਲੋਕਾਂ ਦੀ ਸਰੀਰਿਕ ਤੰਦਰੁਸਤੀ ਅਤੇ ਖੇਡ ਤਰੱਕੀ ਦੇ ਇਸ ਪ੍ਰੋਜੈਕਟ ਵਿੱਚ ਕਬੱਡੀ, ਬਾਸਕਿਟਬਾਲ, ਹਾਕੀ, ਫੁੱਟਬਾਲ, ਵਾਲੀਬਾਲ, ਐਥਲੈਟਿਕਸ ਆਦਿ ਖੇਡਾਂ ਨੂੰ ਪ੍ਰਮੁੱਖਤਾ ਦਿੱਤੀ ਜਾਵੇਗੀ। ਇਸ ਮੌਕੇ ਖੇਡੇ ਗਏ ਪ੍ਰਦਰਸ਼ਨੀ ਫੁੱਟਬਾਲ ਮੁਕਾਬਲੇ ਵਿੱਚ ਪਿੰਡ ਜਾਂਗਪੁਰ ਦੀ ਟੀਮ ਨੇ ਰੁੜਕਾ ਕਲਾਂ ਦੀ ਟੀਮ ਨੂੰ 1-0 ਗੋਲ ਦੇ ਫਰਕ ਨਾਲ ਹਰਾਇਆ ਅਤੇ ਇਨਾਮ ਹਾਸਿਲ ਕੀਤਾ। ਮੈਚ ਉਪਰੰਤ ਸੱਭਿਆਚਾਰਕ ਗਰੁੱਪ ਵੱਲੋਂ ਰੰਗਾਰੰਗ ਪ੍ਰੋਗਰਾਮ ਵੀ ਪੇਸ਼ ਕੀਤਾ ਗਿਆ, ਜਿਸ ਦਾ ਲੋਕਾਂ ਨੇ ਭਰਪੂਰ ਆਨੰਦ ਲਿਆ।
ਕਿਸ ਤਰ੍ਹਾਂ ਦਾ ਹੈ ਗੁੱਜਰਵਾਲ ਦਾ ਖੇਡ ਪਾਰਕ
ਪਿੰਡ ਗੁੱਜਰਵਾਲ ਦੇ ਆਈ.ਟੀ.ਆਈ. ਕਾਲਜ ਵਿਖੇ 4 ਏਕੜ ਵਿਚ ਖੇਡ ਪਾਰਕ ਕਮ ਖੇਡ ਮੈਦਾਨ ਯੂਰਪੀਨ ਮੁਲਕਾਂ ਦੀ ਤਰਜ 'ਤੇ ਤਿਆਰ ਕੀਤਾ ਗਿਆ ਹੈ। ਇਸ ਖੇਡ ਪਾਰਕ ਵਿਚ ਸਲੈਕਸ਼ਨ ਵੰਨ ਘਾਹ ਲਗਾਇਆ ਗਿਆ ਹੈ ਅਤੇ ਪਾਰਕ ਦੇ ਆਲੇ-ਦੁਆਲੇ ਚਾਰੇ ਪਾਸੇ 7 ਫੁੱਟ ਉੱਚੀ ਫੈਨਸਿੰਗ ਲਗਾਈ ਗਈ ਹੈ ਤਾਂ ਜੋ ਬਾਹਰੋਂ ਕਿਸੇ ਵੀ ਤਰ੍ਹਾਂ ਦੀ ਕੋਈ ਆਮਦ ਨਾ ਹੋ ਸਕੇ। ਖੇਡ ਮੈਦਾਨ ਦੇ ਆਲੇ-ਦੁਆਲੇ 10 ਫੁੱਟ ਚੌੜਾ ਫੁੱਟਪਾਥ ਲੋਕਾਂ ਦੇ ਸੈਰ ਕਰਨ ਲਈ ਬਣਾਇਆ ਗਿਆ ਹੈ। ਇਸ ਫੁੱਟਪਾਥ 'ਤੇ ਬੱਚੇ, ਔਰਤਾਂ ਤੇ ਬਜ਼ੁਰਗ ਸੈਰ ਕਰ ਸਕਦੇ ਹਨ ਜਦਕਿ 600 ਬੰਦਿਆਂ ਦੇ ਕਰੀਬ ਬੈਠਣ ਲਈ ਬੈਂਚ ਲਗਾਏ ਗਏ ਹਨ। ਸੈਰ ਕਰਨ ਵਾਲੇ ਰਾਸਤੇ 'ਤੇ ਫੁੱਟ ਲਾਈਟਸ ਅਤੇ ਖੇਡ ਮੈਦਾਨ ਵਿਚ ਖੇਡਣ ਲਈ ਫਲੱਬ ਲਾਈਟਸ ਦਾ ਉਚੇਚਾ ਪ੍ਰਬੰਧ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ 3 ਹੱਟਸ ਬਣਾਈਆਂ ਗਈਆਂ ਹਨ, ਇੱਕ ਹੱਟ ਵੀ.ਆਈ.ਪੀਜ਼ ਲਈ ਤੇ ਦੋ ਹੱਟਸ ਆਮ ਲੋਕਾਂ ਦੇ ਬੈਠਣ ਲਈ ਬਣਾਈਆਂ ਗਈਆਂ ਹਨ। ਗਰਾਉਂਡ ਨੂੰ ਪਾਣੀ ਦੇਣ ਲਈ ਫੁਹਾਰੇ (ਸਪਰਿੰਕਲ) ਲਗਾਏ ਗਏ ਹਨ। ਇਸ ਮੈਦਾਨ ਵਿਚ ਫੁੱਟਬਾਲ, ਹਾਕੀ, ਕਬੱਡੀ ਆਦਿ ਹੋਰ ਮੈਚਾਂ ਦੀ ਖੇਡ ਮੁਕਾਬਲੇ ਹੋ ਸਕਦੇ ਹਨ ਪਰ ਗੁੱਜਰਵਾਲ ਖੇਡ ਮੈਦਾਨ ਦੀ ਮੁੱਖ ਵਰਤੋਂ ਫੁੱਟਬਾਲ ਲਈ ਹੀ ਹੋਵੇਗੀ। ਇਹ ਸਟੇਡੀਅਮ ਸਰਕਾਰੀ ਸ੍ਰੋਤਾਂ ਤੋਂ ਜਾਰੀ ਹੋਏ ਫੰਡਾਂ ਅਤੇ ਨਰੇਗਾ ਸਕੀਮ ਦੇ ਨਿਯਮਾਂ ਤਹਿਤ ਸਿਰੇ ਚੜ੍ਹਿਆ ਹੈ।