ਸਰਕਾਰੀ ਸਕੂਲਾਂ ਦੇ ਅਧਿਆਪਕਾਂ ਤੋਂ ਪੜ੍ਹਾਈ ਤੋਂ ਇਲਾਵਾ ਹੋਰ ਵਾਧੂ ਲਏ ਜਾ ਰਹੇ ਗ਼ੈਰ ਅਕਾਦਮਿਕ ਕਾਰਜਾਂ ਦੀ ਸਮੀਖਿਆ ਲਈ ਵਿਭਾਗ ਵੱਲੋਂ ਸਿੱਖਿਆ ਨਿਰਦੇਸ਼ਕ ਦੀ ਅਗਵਾਈ 'ਚ ਜਲਦੀ ਹੀ ਇੱਕ ਵਿਸ਼ੇਸ਼ ਕਮੇਟੀ ਗਠਿਤ ਕੀਤੀ ਜਾ ਰਹੀ ਹੈ, ਜਿਸ 'ਚ ਸਮੂਹ ਜ਼ਿਲਿਆਂ ਦੇ ਸਿੱਖਿਆ ਅਧਿਕਾਰੀਆਂ ਨੂੰ ਵੀ ਸ਼ਾਮਲ ਕੀਤਾ ਜਾਵੇਗਾ। ਇਹ ਕਮੇਟੀ ਅਧਿਆਪਕਾਂ ਦੇ ਵੱਖ-ਵੱਖ ਜ਼ਰੂਰੀ ਅਤੇ ਗ਼ੈਰ ਜ਼ਰੂਰੀ ਕਾਰਜਾਂ ਦਾ ਸਮੁੱਚਾ ਮੁਲਾਂਕਣ ਵੀ ਕਰੇਗੀ ਤਾਂ ਜੋ ਅਧਿਆਪਕਾਂ ਦੇ ਵਾਧੂ ਬੋਝ ਨੂੰ ਘਟਾਇਆ ਜਾ ਸਕੇ। ਇਹ ਕਮੇਟੀ ਦੋ ਮਹੀਨਿਆਂ 'ਚ ਆਪਣੀ ਰਿਪੋਰਟ ਦੇ ਦੇਵੇਗੀ। ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਸਿੱਖਿਆ ਮੰਤਰੀ ਪੰਜਾਬ ਡਾ. ਦਲਜੀਤ ਸਿੰਘ ਚੀਮਾ ਨੇ ਚੰਡੀਗੜ੍ਹ ਯੂਨੀਵਰਸਿਟੀ ਘੜੂੰਆਂ ਵਿਖੇ 44ਵੀਂ ਸਾਲਾਨਾ ਵਿਗਿਆਨ, ਗਣਿਤ ਅਤੇ ਵਾਤਾਵਰਨ ਖੋਜ ਮਾਡਲ ਪ੍ਰਦਰਸ਼ਨੀ ਦੇ ਆਖਰੀ ਦਿਨ ਇਨਾਮ ਵੰਡ ਸਮਾਗਮ ਦੌਰਾਨ ਬੋਲਦਿਆਂ ਕੀਤਾ। 350 ਤੋਂ ਵੱਧ ਸਰਕਾਰੀ ਸਕੂਲਾਂ ਦੇ ਵਿਦਿਆਰਥੀਆਂ ਦੇ ਖੋਜ ਮੁਕਾਬਲਿਆਂ ਦੌਰਾਨ ਜੇਤੂ ਰਹੇ ਵਿਦਿਆਰਥੀਆਂ ਨੂੰ ਇਨਾਮ ਤਕਸੀਮ ਕਰਨ ਉਪਰੰਤ ਬੋਲਦਿਆਂ ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਇਸ ਅਕਾਦਮਿਕ ਵਰ੍ਹੇ ਤੋਂ ਪੰਜਵੀਂ ਅਤੇ ਅੱਠਵੀਂ ਦੀ ਪ੍ਰੀਖਿਆ ਵੀ ਦੁਬਾਰ ਤੋਂ ਆਰੰਭ ਕਰਨ ਜਾ ਰਹੀ ਹੈ, ਜਿਸਦਾ ਇਮਤਿਹਾਨ ਐੱਸ ਸੀ ਈ ਆਰ ਟੀ ਲਵੇਗੀ। ਉਨ੍ਹਾਂ ਇਸ ਮੌਕੇ ਸਰਕਾਰੀ ਸਕੂਲਾਂ ਦੇ ਵਿਦਿਆਰਥੀਆਂ ਦੇ ਖੋਜ ਮਾਡਲਾਂ ਦੇ ਨਿਰੀਖਣ ਉਪਰੰਤ ਆਖਿਆ ਕਿ ਆਉਣ ਵਾਲੇ ਸਮੇਂ ਦੀਆਂ ਚੁਣੌਤੀਆਂ ਦਾ ਡੱਟ ਕੇ ਮੁਕਾਬਲਾ ਕਰਨ ਅਤੇ ਉਨ੍ਹਾਂ ਅੰਦਰ ਵਿਗਿਆਨਕ ਨਜ਼ਰੀਆ ਵਿਕਸਿਤ ਕਰਨ ਲਈ ਸਾਨੂੰ ਆਪਣੇ ਵੱਧ ਤੋਂ ਵੱਧ ਵਿਦਿਆਰਥੀਆਂ ਨੂੰ ਵਿਗਿਆਨ ਅਤੇ ਗਣਿਤ ਆਦਿ ਵਿਸ਼ਿਆਂ ਵੱਲ ਪ੍ਰੋਤਸਾਹਤ ਕਰਨ ਦੀ ਲੋੜ ਹੈ।
ਪੰਜਾਬ ਰਾਜ ਸਕੂਲ ਸਿੱਖਿਆ ਵਿਭਾਗ ਵੱਲੋਂ ਆਯੋਜਿਤ ਇਸ ਤਿੰਨ ਰੋਜ਼ਾ ਵਿਗਿਆਨ ਪ੍ਰਦਰਸ਼ਨੀ ਦੌਰਾਨ ਜਲੰਧਰ ਸਮੁੱਚੇ ਤੌਰ 'ਤੇ ਵਿਜੇਤਾ ਬਣਿਆ ਜਦਕਿ ਲੁਧਿਆਣਾ ਨੂੰ ਦੂਜਾ ਅਤੇ ਮੋਗਾ ਨੂੰ ਮਿਲਿਆ ਤੀਜਾ ਸਥਾਨ ਮਿਲਿਆ। ਇਸ ਦੌਰਾਨ ਵੱਖ-ਵੱਖ ਖੋਜ ਮਾਡਲ ਮੁਕਾਬਲਿਆਂ 'ਚ ਸਿਹਤ, ਖੁਰਾਕ ਅਤੇ ਸਾਫ ਸਫਾਈ ਦੇ ਸੈਕੰਡਰੀ ਸਕੂਲ ਵਰਗ 'ਚ ਕਪੂਰਥਲੇ ਦੇ ਜਵਾਲਾਪੁਰ ਦੇ ਜਤਿੰਦਰ ਕੁਮਾਰ ਨੂੰ ਪਹਿਲਾ, ਜੀ ਐੱਮ ਐੱਸ ਐੱਸ ਫਾਜ਼ਿਲਕਾ ਦੇ ਬਲਵਿੰਦਰ ਸਿੰਘ ਨੂੰ ਦੂਜਾ ਸਥਾਨ ਹਾਸਲ ਹੋਇਆ ਜਦਕਿ ਸੀਨੀਅਰ ਸੈਕੰਡਰੀ ਸਕੂਲ ਵਰਗ 'ਚ ਟੈਗੋਰ ਮਾਡਲ ਜੀ ਐੱਮ ਐੱਸ ਐੱਸ ਜਲੰਧਰ ਦੀ ਤਨਵੀ ਨੂੰ ਪਹਿਲਾ ਅਤੇ ਸੰਗਰੂਰ ਦੇ ਜਸਕਰਨ ਦੀਪ ਨੂੰ ਦੂਜਾ ਸਥਾਨ ਮਿਲਿਆ। ਕੁਦਰਤੀ ਸਰੋਤ ਪ੍ਰਬੰਧਨ ਵਰਗ ਵਿਚੋਂ ਸੈਕੰਡਰੀ ਸਕੂਲ ਵਰਗ 'ਚ ਦਿਦਾਕਾ ਵਾਲਾ ਮੋਗਾ ਦੇ ਗੁਰਲਾਭ ਸਿੰਘ ਨੂੰ ਪਹਿਲਾ ਤੇ ਲੁਧਿਆਣਾ ਦੀ ਹਰਸ਼ਿਤਾ ਨੂੰ ਦੂਜਾ ਜਦਕਿ ਸੀਨੀਅਰ ਸੈਕੰਡਰੀ ਵਰਗ 'ਚ ਜਲੰਧਰ ਦੇ ਰੋਹਿਤ ਵਰਮਾ ਨੂੰ ਪਹਿਲਾ ਅਤੇ ਖੁੱਡੀਆਂ ਫਾਜ਼ਿਲਕਾ ਦੇ ਸ਼ੁਭਹੀਤ ਸ਼ਰਮਾ ਨੂੰ ਦੂਜਾ, ਬਿਜ਼ਨਸ ਇੰਡਸਟਰੀ ਵਰਗ 'ਚ ਸੈਕੰਡਰੀ ਵਰਗ 'ਚ ਦਿਓਧਰ ਮੋਗਾ ਦੀ ਹਰਪ੍ਰੀਤ ਕੌਰ ਨੂੰ ਪਹਿਲਾ, ਰੋਪੜ ਦੇ ਅੰਮ੍ਰਿਤਪਾਲ ਸਿੰਘ ਨੂੰ ਦੂਜਾ ਸਥਾਨ ਪ੍ਰਾਪਤ ਹੋਇਆ ਅਤੇ ਸੀਨੀਅਰ ਸੈਕੰਡਰੀ ਵਰਗ 'ਚ ਦਸ਼ਮੇਸ਼ਾ ਸਕੂਲ ਲੁਧਿਆਣਾ ਦੇ ਗੁਰਦੀਪ ਸਿੰਘ ਨੂੰ ਪਹਿਲਾ ਜਦਕਿ ਬਠਿੰਡਾ ਦੇ ਗੁਰਪ੍ਰੀਤ ਸਿੰਘ ਨੂੰ ਦੂਜਾ ਸਥਾਨ ਪ੍ਰਾਪਤ ਹੋਇਆ। ਖੇਤੀਬਾੜੀ ਅਤੇ ਖੁਰਾਕ ਸੁਰੱਖਿਆ ਸ਼੍ਰੇਣੀ 'ਚ ਜਸਕਰਨ ਸਿੰਘ ਨੂੰ ਪਹਿਲਾ, ਰੋਪੜ ਦੇ ਗੁਰਵਿੰਦਰ ਸਿੰਘ ਨੂੰ ਦੂਜਾ, ਸੀਨੀਅਰ ਸੈਕੰਡਰੀ ਵਰਗ 'ਚ ਆਰੀਆ ਗਰਲਜ਼ ਸਕੂਲ ਪਠਾਨਕੋਟ ਦੀ ਕਾਜਲ ਨੂੰ ਪਹਿਲਾ ਅਤੇ ਕੁੱਕਰੀ ਕਲਾਂ ਮੋਗਾ ਦੇ ਹਰਪ੍ਰੀਤ ਨੂੰ ਦੂਜਾ ਸਥਾਨ ਮਿਲਿਆ। ਗਣਿਤ ਖੋਜ ਵਰਗ 'ਚ ਤਲਵਾੜਾ ਦੀ ਮਨੀਸ਼ਾ ਦੇਵੀ ਨੂੰ ਪਹਿਲੀ ਅਤੇ ਲੁਧਿਆਣਾ ਦੇ ਹਰਦੀਪ ਸਿੰਘ ਨੂੰ ਦੂਜੀ ਪੁਜ਼ੀਸ਼ਨ ਮਿਲੀ। ਸੀਨੀਅਰ ਸੈਕੰਡਰੀ ਸ਼੍ਰੇਣੀ 'ਚ ਫਰੀਦਕੋਟ ਦੀ ਪ੍ਰਿਅੰਕਾ ਨੂੰ ਪਹਿਲਾ ਅਤੇ ਮਨਪ੍ਰੀਤ ਨੂੰ ਦੂਜਾ ਸਥਾਨ ਮਿਲਿਆ। ਇਸ ਰਾਜ ਪੱਧਰੀ ਮੁਕਾਬਲੇ ਦੌਰਾਨ ਜੇਤੂ ਰਹੇ ਵਿਦਿਆਰਥੀ ਅਤੇ ਸਕੂਲ ਆਈ ਆਈ ਟੀ ਦਿੱਲੀ ਵਿਖੇ 5 ਤੋਂ 9 ਦਸੰਬਰ ਤੱਕ ਚੱਲਣ ਵਾਲੇ ਕੌਮੀ ਮੁਕਾਬਲਿਆਂ 'ਚ ਪੰਜਾਬ ਦੀ ਪ੍ਰਤੀਨਿਧਤਾ ਕਰਨਗੇ।
ਸਕੂਲ ਸਿੱਖਿਆ ਵਿਭਾਗ ਦੇ ਜਨਰਲ ਮੈਨੇਜਰ ਪ੍ਰਦੀਪ ਕੁਮਾਰ ਅਗਰਵਾਲ ਨੇ ਇਸ ਮੌਕੇ ਆਖਿਆ ਕਿ ਵਿਦਿਆਰਥੀਆਂ ਦੇ ਮਾਡਲ ਵੇਖ ਕੇ ਲੱਗਦਾ ਹੈ ਕਿ ਸਾਡੇ ਵਿਦਿਆਰਥੀ ਵਿਗਿਆਨ ਅਤੇ ਗਣਿਤ ਵਰਗੇ ਵਿਸ਼ਿਆਂ 'ਚ ਬੇਹੱਦ ਰੁਚੀ ਰੱਖਦੇ ਹਨ। ਸਾਡੇ ਸਾਇੰਸ ਅਤੇ ਗਣਿਤ ਦੇ ਅਧਿਆਪਕਾਂ ਨੂੰ ਵਿਦਿਆਰਥੀਆਂ ਦੀ ਰੁਚੀ ਨੂੰ ਹੱਲਾਸ਼ੇਰੀ ਪ੍ਰਦਾਨ ਕਰਨ ਲਈ ਇਹ ਵਿਸ਼ੇ ਹੋਰ ਵਧੇਰੇ ਰੌਚਿਕਤਾ ਨਾਲ ਪੜ੍ਹਾਉਣੇ ਚਾਹੀਦੇ ਹਨ। ਚੰਡੀਗੜ੍ਹ ਯੂਨੀਵਰਸਿਟੀ ਦੇ ਚਾਂਸਲਰ ਸ. ਸਤਨਾਮ ਸਿੰਘ ਸੰਧੂ ਨੇ ਇਸ ਮੌਕੇ ਆਖਿਆ ਕਿ ਅੱਜ ਸਾਡੇ ਦੇਸ਼ ਨੂੰ ਵਿਗਿਆਨ ਅਤੇ ਤਕਨਾਲੌਜੀ ਦੇ ਖੇਤਰ 'ਚ ਪੂਰੀ ਤਰ੍ਹਾਂ ਸਵੈ ਨਿਰਭਰ ਬਨਾਉਣ ਲਈ ਸਕੂਲ ਪੱਧਰ ਤੋਂ ਹੀ ਵਿਦਿਆਰਥੀਆਂ ਅੰਦਰ ਖੋਜ ਰੁਚੀਆਂ ਵਿਕਸਿਤ ਕਰਨ ਦੀ ਲੋੜ ਹੈ। ਉਨ੍ਹਾਂ ਕਿਹਾ ਕਿ ਸਿੱਖਿਆ ਵਿਭਾਗ ਦਾ ਇਹ ਉਪਰਾਲਾ ਸਰਕਾਰੀ ਸਕੂਲਾਂ ਦੇ ਹੋਣਹਾਰ ਵਿਦਿਆਰਥੀਆਂ ਦੀਆਂ ਖੋਜ ਰੁਚੀਆਂ ਅਤੇ ਪ੍ਰਤਿਭਾ ਦੇ ਪ੍ਰਗਟਾਵੇ ਲਈ ਢੁੱਕਵਾਂ ਮੰਚ ਮੁਹੱਈਆ ਕਰਵਾਉਣ ਪੱਖੋਂ ਬਹੁਤ ਹੀ ਲਾਹੇਵੰਦ ਸਿੱਧ ਹੋ ਰਿਹਾ ਹੈ।