ਤਾਂਤਰਿਕਾਂ-ਜੋਤਸ਼ੀਆਂ ਵੱਲੋਂ ਲੋਕਾਂ ਦੀਆਂ ਸਾਰੀਆਂ ਸਮੱਸਿਆਵਾਂ ਦੇ ਹੱਲ ਕਰਨ ਦੇ ਨਾਂ ਹੇਠ ਠੱਗੀਆਂ ਜਾਰੀ ਹਨ। ਆਏ ਦਿਨ ਪੜ੍ਹੇ ਲਿਖੇ ਲੋਕ ਵੀ ਇਹਨਾਂ ਦੇ ਸ਼ਬਦੀ ਜਾਲ ਵਿੱਚ ਫਸ ਰਹੇ ਹਨ ਅਤੇ ਆਪਣੀ ਆਰਥਿਕ, ਮਾਨਸਿਕ ਅਤੇ ਸਰੀਰਕ ਲੁੱਟ ਕਰਵਾ ਰਹੇ ਹਨ। ਇਸੇ ਤਰ੍ਹਾਂ ਦੇ ਹੀ ਇੱਕ ਕੇਸ ਵਿੱਚ ਤਰਕਸ਼ੀਲ ਸੁਸਾਇਟੀ ਪੰਜਾਬ ਦੇ ਕਾਰਕੁੰਨਾਂ ਨੇ ਚੰਡੀਗੜ੍ਹ ਦੇ ਤਾਂਤਰਿਕ ਵੱਲੋਂ ਲੁੱਟੇ 57000 ਰੁਪਏ ਵਾਪਿਸ ਕਰਵਾਏ ਹਨ। ਤਰਕਸ਼ੀਲ ਸੁਸਾਇਟੀ ਪੰਜਾਬ ਦੀ ਇਕਾਈ ਮੋਹਾਲੀ ਦੇ ਕਾਰਕੁੰਨਾਂ ਨੇ ਅੱਜ ਸ਼ਹੀਦ ਭਗਤ ਸਿੰਘ ਲਾਇਬ੍ਰੇਰੀ ਬਲੌਂਗੀ ਵਿਖੇ ਇਸ ਗੱਲ ਦਾ ਖੁਲਾਸਾ ਕੀਤਾ। ਦੱਸਣਯੋਗ ਹੈ ਕਿ ਲਧਿਆਣਾ ਵਾਸੀ ਰਾਜੇਸ਼ ਕੁਮਾਰ ਦੇ ਦੋ ਤਲਾਕ ਹੋ ਚੁੱਕੇ ਹਨ। ਉਹ ਤੀਜਾ ਵਿਆਹ ਕਰਵਾਉਣ ਦੇ ਚੱਕਰ ਵਿੱਚ ਚੰਡੀਗੜ੍ਹ ਦੇ ਇੱਕ ਤਾਂਤਰਿਕ ਹਫੀਜ ਅਨਵਰ ਉਲ ਹੱਕ ਦੇ ਧੱਕੇ ਚੜ੍ਹ ਗਿਆ ਜੋ ਕਿ ਚੰਡੀਗੜ੍ਹ ਦੀ ਇੱਕ ਮਸ਼ਹੂਰ ਸਿਆਸਤਦਾਨ ਦਾ ਪਤੀ ਹੈ। ਹਫੀਜ ਨੇ ਪੂਜਾ-ਪਾਠ ਕਰਨ ਦੇ ਚੱਕਰ ਵਿੱਚ ਉਸ ਕੋਲੋਂ ਦੋ ਕਿਸ਼ਤਾਂ ਵਿੱਚ ਕੁੱਲ 57000 ਹਜ਼ਾਰ ਰੁਪਿਆ ਠੱਗ ਲਿਆ ਪ੍ਰੰਤੂ ਜਦੋਂ ਰਾਜੇਸ਼ ਕੁਮਾਰ ਦਾ ਕੰਮ ਨਾ ਬਣਿਆ ਅਤੇ ਉਸ ਨੇ ਪੈਸੇ ਮੰਗਣੇ ਸ਼ੁਰੂ ਕੀਤੇ ਤਾਂ ਤਾਂਤਰਿਕ ਨੇ ਤੰਤਰ-ਮੰਤਰ ਦੇ ਨਾਂ ਹੇਠ ਉਲਟਾ ਉਸ ਨੂੰ ਹੀ ਡਰਾਉਣਾ ਸ਼ੁਰੂ ਕਰ ਦਿੱਤਾ।
ਇਸ ਤੋਂ ਬਾਅਦ ਕੇਸ ਤਰਕਸ਼ੀਲ ਸੁਸਾਇਟੀ ਪੰਜਾਬ ਦੀ ਇਕਾਈ ਮੋਹਾਲੀ ਕੋਲ ਆਇਆ ਤਾਂ ਉਹਨਾਂ ਨੇ ਇਸ ਦੀ ਸ਼ਿਕਾਇਤ ਪੁਲਿਸ ਕੋਲ ਕੀਤੀ। ਹੁਣ ਤਾਂਤਰਿਕ ਨੇ ਆਪਣੇ ਆਪ ਨੂੰ ਫਸਦਾ ਦੇਖ ਰਾਜੇਸ਼ ਕੁਮਾਰ ਕੋਲੋਂ ਠੱਗੇ 57000 ਰੁਪਏ ਵਾਪਸ ਕਰ ਦਿੱਤੇ।ਇੱਥੇ ਆਪ ਬੀਤੀ ਦੱਸਦਿਆਂ ਰਾਜੇਸ਼ ਕੁਮਾਰ ਨੇ ਦੱਸਿਆ ਕਿ ਤਾਂਤਰਿਕ ਨੇ ਉਸ ਕੋਲੋਂ ਵਿਆਹ ਕਰਵਾਉਣ ਅਤੇ ਚੰਗੀ ਨੌਕਰੀ ਲਗਾਉਣ ਲਈ ਇੱਕ ਲੱਖ ਰੁਪਏ ਦੀ ਮੰਗ ਕੀਤੀ ਸੀ ਅਤੇ ਸੌਦਾ 75000 ਰੁਪਏ ਵਿੱਚ ਤੈਅ ਹੋਇਆ ਸੀ। ਤਾਂਤਰਿਕ ਨੇ ਪਹਿਲਾਂ 25000 ਰੁਪਿਆ ਨਗਦ ਲਿਆ। ਉਸ ਤੋਂ ਬਾਅਦ ਉਸ ਨੇ 32000 ਹਜਾਰ ਰੁਪਿਆ ਬੈਂਕ ਖਾਤੇ ਰਾਹੀਂ ਜਮਾਂ ਕਰਵਾਇਆ। ਇੱਥੇ ਖਾਸ ਗੱਲ ਇਹ ਹੈ ਕਿ ਜਦੋਂ ਤਾਂਤਰਿਕ ਦੇ ਖਾਤੇ ਦੀ ਪੜਤਾਲ ਕੀਤੀ ਗਈ ਤਾਂ ਇਹ ਸੰਜੀਵ ਬੱਬਰ ਦੇ ਨਾਂ ਦੇ ਵਿਅਕਤੀ ਦੇ ਨਾਂ ਹੇਠ ਨਿੱਕਲਿਆ। ਪੈਸੇ ਵਾਪਸ ਕਰਨ ਲਈ ਵੀ ਸੰਜੀਵ ਬੱਬਰ ਨੂੰ ਹੀ ਭੇਜਿਆ ਗਿਆ। ਇਸ ਮੌਕੇ ਤਰਕਸ਼ੀਲ ਆਗੂ ਜਰਨੈਲ ਕ੍ਰਾਂਤੀ ਨੇ ਕਿਹਾ ਕਿ ਮਿਤੀ 3 ਜੁਲਾਈ 2014 ਨੂੰ ਪੁਲਿਸ ਕੋਲ ਇਸ ਕੇਸ ਸੰਬੰਧੀ ਸ਼ਿਕਾਇਤ ਕੀਤੀ ਗਈ ਸੀ। ਕੇਸ ਦੌਰਾਨ ਹਫੀਜ ਅਨਵਰ ਉਲ ਹੱਕ ਨੇ ਆਪਣੀ ਪਤਨੀ ਦਾ ਸਿਆਸੀ ਪ੍ਰਭਾਵ ਵੀ ਵਰਤਿਆ ਅਤੇ ਕੇਸ ਨੂੰ ਪ੍ਰਭਾਵਿਤ ਕਰਨ ਦੀ ਵੀ ਕੋਸ਼ਿਸ਼ ਕੀਤੀ।
'ਵਸ਼ੀਕਰਨ, ਕੀਤਾ-ਕਰਾਇਆ, ਮੁੱਠ ਕਰਨੀ' ਸੱਭ ਬਕਵਾਸ
ਗੱਲਬਾਤ ਦੌਰਾਨ ਤਰਕਸ਼ੀਲ ਆਗੂ ਲੈਕਚਰਾਰ ਗੁਰਮੀਤ ਖਰੜ ਨੇ ਦੱਸਿਆ ਕਿ ਤਾਂਤਰਿਕਾਂ-ਜੋਤਸ਼ੀਆਂ ਵੱਲੋਂ ਅਪਣਾਏ ਜਾਂਦੇ ਢਕੋਸਲੇ ਜਿਵੇਂ ਵਸ਼ੀਕਰਨ, ਕੀਤਾ-ਕਰਾਇਆ, ਮੁੱਠਕਰਨੀ ਆਦਿ ਸਾਰਾ ਕੁੱਝ ਬਕਵਾਸ ਹਨ ਅਤੇ ਆਮ ਲੋਕਾਂ ਨੂੰ ਲੁੱਟਣ ਦੇ ਸੰਦ ਹਨ। ਉਹਨਾਂ ਦਾਅਵਾ ਕੀਤਾ ਕਿ ਉਹ ਕਿਸੇ ਵੀ ਗਤੀਵਿਧੀ ਰਾਹੀਂ ਕਿਸੇ ਤਰਕਸ਼ੀਲ ਮੈਂਬਰ ਨੂੰ ਨੁਕਸਾਨ ਪਹੁੰਚਾ ਦੇਣ ਤਾਂ ਬਦਲੇ ਵਿੱਚ ਸੁਸਾਇਟੀ ਉਹਨਾਂ ਨੂੰ 5 ਲੱਖ ਰੁਪਏ ਦਾ ਨਗਦ ਇਨਾਮ ਦੇਵੇਗੀ।
ਫੋਨ ਤੇ ਲੁੱਟ ਕਰਨ ਦਾ ਨਵਾਂ ਤਰੀਕਾ
ਤਰਕਸ਼ੀਲ ਆਗੂ ਜਰਨੈਲ ਕ੍ਰਾਂਤੀ ਨੇ ਕਿਹਾ ਕਿ ਤਾਂਤਰਿਕਾਂ ਦੇ ਅਖਬਾਰੀ ਇਸ਼ਤਿਹਾਰਾਂ ਵਿੱਚ ਕੋਈ ਅਤਾ-ਪਤਾ ਨਹੀਂ ਦਿੱਤਾ ਹੁੰਦਾ ਬਲਕਿ ਸਿਰਫ ਫੋਨ ਨੰਬਰ ਹੀ ਹੁੰਦਾ ਹੈ। ਇਸ਼ਤਿਹਾਰ ਦੇ ਝਾਂਸੇ ਵਿੱਚ ਆ ਕੇ ਜਦੋਂ ਇਹਨਾਂ ਨੂੰ ਕੋਈ ਫੋਨ ਕਰਦਾ ਹੈ ਤਾਂ ਇਹ ਕੰਮ ਕਰਵਾਉਣ ਅਤੇ ਪੂਜਾ-ਪਾਠ ਕਰਵਾਉਣ ਦੇ ਨਾਂ ਹੇਠ ਸਿੱਧਾ ਖਾਤਿਆਂ ਵਿੱਚ ਹੀ ਪੈਸਾ ਜਮਾਂ ਕਰਵਾ ਲੈਦੇ ਹਨ ਜੋ ਕਿ ਇਹਨਾਂ ਦੇ ਨਾਂ ਤੇ ਨਹੀਂ ਹੁੰਦਾ। ਜਦੋਂ ਲੋਕਾਂ ਦਾ ਕੰਮ ਨਹੀਂ ਹੁੰਦਾ ਤਾਂ ਤਾਂਤਰਿਕ ਉਹਨਾਂ ਦਾ ਫੋਨ ਚੁੱਕਣਾ ਬੰਦ ਕਰ ਦਿੰਦੇ ਹਨ ਅਤੇ ਲੁੱਟੇ ਗਏ ਵਿਅਕਤੀ ਕੋਲ ਹੱਥ ਤੇ ਹੱਥ ਧਰ ਕੇ ਬੈਠਣ ਤੋਂ ਇਲਾਵਾ ਕੋਈ ਚਾਰਾ ਨਹੀਂ ਹੁੰਦਾ। ਉਹਨਾਂ ਕਿਹਾ ਕਿ ਬਹੁਤੇ ਲੋਕ ਸ਼ਰਮ ਦੇ ਮਾਰੇ ਵੀ ਆਪਣੀ ਜੁਬਾਨ ਨਹੀਂ ਖੋਲਦੇ।