ਲੋਕਾਂ ਤੱਕ ਅਗਾਂਹਵਧੂ ਸਾਹਿਤ ਪਹੁੰਚਾਉਣ ਦੀ ਪ੍ਰਿਤ ਨੂੰ ਅੱਗੇ ਵਧਾਉਂਦੇ ਹੋਏ ਤਰਕਸ਼ੀਲ ਸੁਸਾਇਟੀ ਪੰਜਾਬ ਦੀ ਇਕਾਈ ਮੋਹਾਲੀ ਨੇ ਸਰਕਾਰੀ ਜਿਲ੍ਹਾ ਪਬਲਿਕ ਲਾਇਬ੍ਰੇਰੀ ਫੇਜ 4 ਨੂੰ ਪੰਜਾਬੀ, ਅੰਗਰੇਜ਼ੀ ਤੇ ਹਿੰਦੀ ਦੀਆਂ 88 ਚੋਣਵੀਆਂ ਪੁਸਤਕਾਂ ਭੇਂਟ ਕੀਤੀਆਂ ਹਨ। ਇਹਨਾਂ ਕਿਤਾਬਾਂ ਵਿੱਚ 72 ਪੰਜਾਬੀ, 13 ਅੰਗਰੇਜ਼ੀ ਅਤੇ 3 ਹਿੰਦੀ ਦੀਆਂ ਕਿਤਾਬਾਂ ਸ਼ਾਮਿਲ ਹਨ। ਇਸ ਸਾਹਿਤ ਵਿੱਚ 50 ਤਰਕਸ਼ੀਲ ਪੁਸਤਕਾਂ ਵੀ ਸ਼ਾਮਿਲ ਹਨ। ਅੱਜ ਇਕਾਈ ਮੈਂਬਰਾਂ ਨੇ ਇਹ ਅਗਾਂਹਵਧੂ ਸਾਹਿਤ ਲਾਇਬ੍ਰੇਰੀਅਨ ਭੁਪਿੰਦਰ ਕੌਰ ਨੂੰ ਭੇਂਟ ਕੀਤਾ। ਤਰਕਸ਼ੀਲ ਆਗੂ ਜਰਨੈਲ ਕ੍ਰਾਂਤੀ ਨੇ ਕਿਹਾ ਕਿ ਸਾਰੀਆਂ ਕਿਤਾਬਾਂ ਸੁਸਾਇਟੀ ਤੇ ਸਮਰਥਕਾਂ ਵੱਲੋਂ ਮੁਫਤ ਪ੍ਰਦਾਨ ਕੀਤੀਆਂ ਗਈਆਂ ਹਨ ਅਤੇ ਸੁਸਾਇਟੀ ਦਾ ਇਹ ਮੰਤਵ ਹੈ ਕਿ ਲੋਕਾਂ ਤੱਕ ਵੱਧ ਤੋਂ ਵੱਧ ਸਾਹਿਤ ਪੁੱਜਣਾ ਚਾਹੀਦਾ ਹੈ। ਤਰਕਸ਼ੀਲ ਇਕਾਈ ਮੋਹਾਲੀ ਦੇ ਜਥੇਬੰਦਕ ਮੁਖੀ ਲੈਕਚਰਾਰ ਸੁਰਜੀਤ ਸਿੰਘ ਨੇ ਦੱਸਿਆ ਕਿ ਇਸ ਸਾਹਿਤ ਵਿੱਚ ਪ੍ਰਸਿੱਧ ਪੁਸਤਕਾਂ ਜਿਵੇਂ ਮੈਕਸਿਮ ਗੋਰਕੀ ਦਾ ਨਾਵਲ ‘ਮਾਂ’(ਹਿੰਦੀ), ਡਾ. ਇਬਰਾਹਿਮ ਟੀ. ਕਾਵੂਰ ਦੀ ‘’ਤੇ ਦੇਵ ਪੁਰਸ਼ ਹਾਰ ਗਏ’, ਸ਼ਹੀਦ ਭਗਤ ਸਿੰਘ ਵੱਲੋਂ ਲਿਖੀ ਪੁਸਤਕ ‘ਮੈਂ ਨਾਸਤਿਕ ਕਿਉਂ ਹਾਂ?’, ਡਾ. ਮੇਵਾ ਸਿੰਘ ਦੀ ‘ਭਗਤੀ ਅਤੇ ਸੂਦਰ’, ਗੁਲਜ਼ਾਰ ਸੰਧੂ ਦੀ ‘25 ਮੁਲਕ, 75 ਗੱਲਾਂ’, ਜੰਗ ਬਹਾਦਰ ਗੋਇਲ ਦੀ ‘ਵਿਸ਼ਵ ਸਾਹਿਤ ਦੇ ਸ਼ਾਹਕਾਰ ਨਾਵਲ’, ਅਮਰਜੀਤ ਚੰਦਨ ਵੱਲੋਂ ਸੰਪਾਦਿਤ ‘ਪਾਸ਼ ਦੀਆਂ ਚਿੱਠੀਆਂ’, ਡਾ. ਸ਼ਿਆਮ ਸੁੰਦਰ ਦੀਪਤੀ ਦੀ ‘ਨੌਜਵਾਨ ਤੇ ਸੈਕਸ ਸਮੱਸਿਆਵਾਂ’, ਰਾਮ ਸਵਰਨ ਲੱਖੇਵਾਲੀ ਵੱਲੋਂ ਸੰਪਾਦਿਤ ‘’ਤੇ ਫਿਰ ਅੱਗ ਲੱਗਣੋ ਬੰਦ ਹੋ ਗਈ’ ਆਦਿ ਸ਼ਾਮਿਲ ਹੈ। ਸਰਕਾਰੀ ਜਿਲ੍ਹਾ ਪਬਲਿਕ ਲਾਇਬ੍ਰੇਰੀ ਦੀ ਲਾਇਬ੍ਰੇਰੀਅਨ ਬੀਬੀ ਭੁਪਿੰਦਰ ਕੌਰ ਨੇ ਤਰਕਸ਼ੀਲ ਸੁਸਾਇਟੀ ਪੰਜਾਬ ਦਾ ਧੰਨਵਾਦ ਕੀਤਾ। ਉਹਨਾਂ ਕਿਹਾ ਕਿ ਇਹ ਚੋਣਵਾਂ ਸਾਹਿਤ ਆਪਣੇ ਮੰਤਵ ਵਿੱਚ ਕਾਮਯਾਬ ਹੋਵੇਗਾ ਤੇ ਲੋਕਾਂ ਦੀ ਸੋਚ ਵਿਗਿਆਨਿਕ ਬਣਾਉਂਦੇ ਹੋਏ ਉਹਨਾਂ ਨੂੰ ਸਾਹਿਤਿਕ ਰੁਚੀਆਂ ਪ੍ਰਦਾਨ ਕਰੇਗਾ। ਇਸ ਮੌਕੇ ਉਪਰੋਕਤ ਤੋਂ ਇਲਾਵਾ ਗੋਰਾ ਹੁਸ਼ਿਆਰਪੁਰੀ, ਸ਼੍ਰੀਮਤੀ ਸੁਮਤੀ ਵਿਸ਼ਿਸ਼ਟ ਸਹਾਇਕ, ਹਰਪਾਲ ਸਿੰਘ ਪੰਜਾਬੀ ਅਧਿਆਪਕ ਵਾਈਪੀਐਸ ਸਕੂਲ, ਚਰਨਜੀਤ ਕੌਰ, ਸ਼ਮਸ਼ੇਰ ਸਿੰਘ ਤੇ ਹਰਪ੍ਰੀਤ ਸ਼ਾਮਿਲ ਸਨ।