ਮੋਰਿਡਾ ਇਲਾਕੇ 'ਚ ਪੈਂਦੇ ਪਿੰਡ ਦਤਾਰਪੁਰ 'ਚ ਦੋ ਵਿਅਕਤੀਆਂ ਦੀ ਸ਼ੱਕੀ ਹਲਾਤਾ 'ਚ ਹੋਈ ਮੋਤ ਕਾਰਨ ਦਹਿਸ਼ਤ ਦਾ ਮਾਹੋਲ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਇੰਸਪੈਕਟਰ ਪਲਵਿੰਦਰ ਸਿੰਘ ਥਾਣਾ ਮੁੱਖੀ ਮੋਰਿੰਡਾ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਅੱਜ ਸਵੇਰੇ ਇਤਲਾਹ ਮਿਲੀ ਕਿ ਨਜ਼ਦੀਕੀ ਪਿੰਡ ਦਤਾਰਪੁਰ ਦੇ ਇੱਕ ਘਰ ਵਿੱਚ ਦੋ ਵਿਅਕਤੀਆਂ ਦੀ ਰਾਤ ਸਮੇਂ ਮੋਤ ਹੋ ਗਈ ਹੈ। ਜਿਸ 'ਤੇ ਸਮੇਤ ਪੁਲਸ ਪਾਰਟੀ ਮੌਕੇ 'ਤੇ ਪਹੁੰਚੇ ਅਤੇ ਹਲਾਤਾਂ ਦਾ ਜ਼ਾਇਜ਼ਾ ਲਿਆ। ਉਨ੍ਹਾਂ ਦੱੱਸਿਆ ਕਿ ਮ੍ਰਿਤਕ ਵਿਅਕਤੀਆਂ ਦੀ ਪਹਿਚਾਣ ਪਾਲ ਸਿੰਘ ਪੁੱਤਰ ਸ਼ੇਰ ਸਿੰਘ ਵਾਸੀ ਪਿੰਡ ਟੋਡਰਪੁਰ ਖਮਾਣੋ ਜਿਲ੍ਹਾ ਫਤਹਿਗੜ੍ਹ ਸਾਹਿਬ ਹਾਲ ਵਾਸੀ ਦਤਾਰਪੁਰ ਅਤੇ ਗੁਰਮੇਲ ਸਿੰਘ ਉਰਫ਼ ਫੋਜ਼ੀ ਪੁੱਤਰ ਜਸਵੰਤ ਸਿੰਘ ਵਾਸੀ ਪਿੰਡ ਨਥਮਲਪੁਰ ਦੋਵਾਂ ਦੀ ਉਮਰ ਕਰੀਬ 60 ਸਾਲ ਵੱਜੋਂ ਹੋਈ ਹੈ। ਪਾਲ ਸਿੰਘ ਦੇ ਭਤੀਜੇ ਰਣਜੀਤ ਸਿੰਘ ਪੁੱਤਰ ਗੁਰਦਿਆਲ ਸਿੰਘ ਨੇ ਪੁਲਸ ਨੂੰ ਦੱਸਿਆ ਕਿ ਦੋਵੇਂ ਮ੍ਰਿਤਕ ਵਿਅਕਤੀ ਗੂੜ੍ਹੇ ਮਿੱਤਰ ਸਨ ਅਤੇ ਹਰ ਸਮੇਂ ਇਕੱਠੇ ਹੀ ਰਹਿੰਦੇ ਸਨ। ਬੀਤੇ ਦਿਨ ਸ਼ਾਮ ਕਰੀਬ 6 ਵਜੇ ਦੋਵੇਂ ਲਗਭੱਗ 20 ਦਿਨਾਂ ਬਾਅਦ ਘਰ ਆਏ ਸਨ।
ਦੋਵੇਂ ਘਰ 'ਤੇ ਬਣੇ ਚੁਬਾਰੇ 'ਚ ਗਲਾਸ ਅਤੇ ਪਾਣੀ ਵਗੈਰਾ ਲੈ ਕੇ ਚਲੇ ਗਏ ਅਤੇ ਮੀਟ ਸ਼ਰਾਬ ਖਾਣ ਪੀਣ ਲੱਗੇ। ਰਣਜੀਤ ਸਿੰਘ ਨੇ ਦੱਸਿਆ ਕਿ ਘਰ ਦੀ ਰਸੋਈ 'ਚ ਲੱਗੀ ਟੁੱਟੀ ਵਿਚ ਪਾਣੀ ਨਹੀਂ ਆ ਰਿਹਾ ਸੀ ਜਿਸ ਕਾਰਨ ਮੇਰੀ ਪਤਨੀ ਅਨੀਲਾ ਕੁਮਾਰੀ ਜਦੋਂ ਪਾਣੀ ਦੀ ਟੈਂਕੀ ਦੇਖਣ ਲਈ ਛੱਤ 'ਤੇ ਗਈ ਤਾਂ ਉਸਨੇ ਦੇਖਿਆ ਕਿ ਮੇਰੇ ਚਾਚਾ ਪਾਲ ਸਿੰਘ ਬੈਡ 'ਤੇ ਪਏ ਤੜ੍ਹਫ ਰਹੇ ਹਨ। ਉਸਨੇ ਮੈਨੂੰ ਤੁਰੰਤ ਹੇਠਾਂ ਆ ਕੇ ਦੱਸਿਆ ਤਾਂ ਮੈਂ ਅਪਣੇ ਚਾਚਾ ਪਾਲ ਸਿੰਘ ਨੂੰ ਤੁਰੰਤ ਸਥਾਨਕ ਕੱਕੜ੍ਹ ਹਸਪਤਾਲ ਲੈ ਗਿਆ ਜਿਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ ਅਤੇ ਵਾਪਸ ਉਸਨੂੰ ਘਰ ਲੈ ਆਏ। ਜਦੋਂ ਘਰ ਆਏ ਤਾਂ ਅੰਕਲ ਦੀ ਵੀ ਮੋਤ ਹੋ ਚੁੱਕੀ ਸੀ। ਪੁਲਸ ਨੇ ਰਣਜੀਤ ਸਿੰਘ ਦੇ ਬਿਆਨਾ 'ਤੇ ਦੋਵੇਂ ਮ੍ਰਿਤਕ ਵਿਅਕਤੀਆਂ ਦੀਆਂ ਲਾਸ਼ਾ ਨੂੰ ਪੋਸਟ ਮਾਰਟਮ ਕਰਾਉਣ ਲਈ ਸਰਕਾਰੀ ਹਸਪਤਾਲ ਰੂਪਨਗਰ ਭੇਜ ਦਿੱਤਾ ਹੈ ਅਤੇ ਲੀਮਾਨੋਵ ਵੋਧਕਾ ਸ਼ਰਾਬ ਦੀ ਇੱਕ ਖਾਲੀ ਬੋਤਲ ਅਤੇ ਪੀਟਰ ਸ਼ਕੌਚ ਸ਼ਰਾਬ ਦੀ ਸੀਲ ਬੰਦ ਬੋਤਲ ਨੂੰ ਅਪਣੇ ਕਬਜ਼ੇ ਲੈ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਮੌਕੇ 'ਤੇ ਪਹੁੰਚੇ ਹਰਪਾਲ ਸਿੰਘ ਅਤੇ ਉਨ੍ਹਾਂ ਦੇ ਪੁੱਤਰ ਧਰਮਿੰਦਰ ਸਿੰਘ ਵਾਸੀ ਪਿੰਡ ਨਥਮਲਪੁਰ ਨੇ ਪੱਤਰਕਾਰਾ ਨੂੰ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਗੁਰਮੇਲ ਸਿੰਘ ਫੋਜ਼ੀ ਉਸਦਾ ਚਾਚਾ ਹੈ ਅਤੇ ਉਹ ਲਗਭੱਗ 15/20 ਸਾਲਾਂ ਤੋਂ ਬਾਹਰ ਹੀ ਰਹਿੰਦਾ ਹੈ। ਇਸ ਮੌਕੇ ਹਾਜ਼ਰ ਲੋਕ ਆਪਸ ਵਿੱਚ ਘੁਸਰ ਮੁਸਰ ਕਰਦੇ ਵੀ ਸੁਣੇ ਗਏ ਕਿ ਇੱਕ ਸ਼ਰਾਬ ਦੀ ਬੋਤਲ ਪੀਣ ਨਾਲ ਦੋ ਵਿਅਕਤੀਆਂ ਦੀ ਮੌਤ ਕਿਵੇਂ ਹੋ ਸਕਦੀ ਹੈ ਅਤੇ ਕਮਰੇ 'ਚ ਮੀਟ ਵੀ ਵਿਖਰਿਆ ਹੋਇਆ ਹੈ। ਲੋਕਾਂ ਦਾ ਕਹਿਣਾ ਸੀ ਕਿ ਦੋਵੇਂ ਵਿਅਕਤੀ ਪਹਿਲਾਂ ਵੀ ਸ਼ਰਾਬ ਪੀਂਦੇ ਰਹਿੰਦੇ ਸਨ ਇਸ ਤਰ੍ਹਾਂ ਇਹ ਮਾਮਲਾ ਕੁਝ ਸ਼ੱਕੀ ਜਾਪਦਾ ਹੈ। ਪਰ ਕੁਝ ਵੀ ਹੋਵੇ ਪੁਲਸ ਦੀ ਜਾਂਚ ਤੋਂ ਬਾਅਦ ਇਹ ਮਾਮਲਾ ਸ਼ੀਸ਼ੇ ਦੀ ਤਰ੍ਹਾਂ ਸਾਫ਼ ਹੋ ਜਾਵੇਗਾ।