ਰਾਜ ਵਿਚ ਸਾਉਣੀ ਸਾਲ 2015-16 ਲਈ ਕਪਾਹ ਦੀ ਖੇਤੀ ਨੂੰ ਪਰਫੂਲਿਤ ਕਰਨ ਅਤੇ ਕਿਸਾਨਾਂ ਦੇ ਆਰਥਿਕ ਪੱਧਰ ਨੂੰ ਹੋਰ ਉੱਚਾ ਚੁੱਕਣ ਲਈ ਪੰਜਾਬ ਸਰਕਾਰ ਵਲੋ ਅੰਤਰਰਾਸ਼ਟਰੀ ਪੱਧਰ ਦੀਆਂ ਕੰਪਨੀਆਂ ਦੇ ਸਹਿਯੋਗ ਨਾਲ ਆਧੁਨਿਕ ਮਸ਼ੀਨਾਂ, ਨਿਉਮੈਟਿਕ ਪਲਾਂਟਰਾਂ ਰਾਂਹੀ ਨਰਮੇ ਦੀ ਬਿਜਾਈ ਕੀਤੀ ਜਾ ਰਹੀ ਹੈ। ਪੰਜਾਬ ਸਰਕਾਰ ਵਲੋ ਵਿਸ਼ਵ ਪ੍ਰਸਿਧ ਕੰਪਨੀਆਂ ਜਾਨ ਡੀਅਰ, ਮਨਸੈਟੌ ਅਤੇ ਬਾਇਅਰ ਨਾਲ ਸਮਝੌਤੇ ਹੋ ਚੁੱਕੇ ਹਨ ਅਤੇ 1.25 ਕਰੋੜ ਰੁਪਏ ਦੀ ਲਾਗਤ ਨਾਲ ਕਪਾਹ ਨੂੰ ਸਾਫ ਕਰਨ ਅਤੇ ਸੁਕਾਉਣ ਵਾਲੀ ਮਸ਼ੀਨ ਮਾਰਕਿਟ ਕਮੇਟੀ ਮਲੋਟ ਵਿਖੇ ਸਥਾਪਤ ਕੀਤੀ ਗਈ ਹੈ।ਇਸ ਗੱਲ ਦਾ ਪ੍ਰਗਟਾਵਾ ਕਰਦਿਆਂ ਪੰਜਾਬ ਦੇ ਖੇਤੀਬਾੜੀ ਮੰਤਰੀ ਜਥੇਦਾਰ ਤੋਤਾ ਸਿੰਘ ਨੇ ਦੱਸਿਆ ਕਿ ਪਿਛਲੇ ਸਾਲ ਇਸ ਆਧੁਨਿਕ ਪ੍ਰਾਜੈਕਟ ਤਹਿਤ 1400 ਏਕੜ ਰਕਬਾ ਲਿਆਂਦਾਂ ਗਿਆ ਸੀ ਅਤੇ ਇਸ ਪ੍ਰਜੈਕਟ ਦੇ ਉਸਾਰੂ ਨਤੀਜਿਆਂ ਨੂੰ ਵੇਖਦਿਆਂ ਸਰਕਾਰ ਵਲੋਂ ਇਸ ਦਾ ਹੋਰ ਰਕਬਾ ਵਧਾਉਣ ਸਬੰਧੀ ਵਿਚਾਰ ਕੀਤਾ ਗਿਆ। ਇਸ ਲਈ ਇਸ ਵਰ੍ਹੇ ਇਸ ਨਿਵੇਕਲੀ ਤਕਨੀਕ ਰਾਂਹੀ ਰਾਜ ਵਿਚ 4000 ਏਕੜ ਰਕਬੇ ਵਿਚ ਕਪਾਹ ਦੀ ਬਿਜਾਈ, ਤੁੜਵਾਈ ਅਤੇ ਸੁਕਾਈ ਤੱਕ ਕੀਤੀ ਜਾ ਰਹੀ ਹੈ ਤਾਂ ਜੋ ਕਿਸਾਨਾਂ ਦੀ ਆਰਥਿਕਤਾ ਨੂੰ ਮੁੜ ਲੀਹਾਂ ਤੇ ਲਿਆਦਾਂ ਜਾਵੇ ਅਤੇ ਖੇਤੀ ਵਿਭਿੰਨਤਾ ਦੀ ਯੋਜਨਾ ਨੂੰ ਹੁਲਾਰਾ ਮਿਲ ਸਕੇ। ਉਨ੍ਹਾਂ ਕਿਹਾ ਕਿ ਕਪਾਹ ਦੀ ਖੇਤੀ ਹੀ ਇਕ ਅਜਿਹੀ ਖੇਤੀ ਹੈ ਜਿਸ ਵਿਚ ਹੱਥੀ ਮਿਹਨਤ ਕਰਨੀ ਪੈਦੀ ਸੀ ਲੇਕਿਨ ਮਸ਼ੀਨੀਕਰਨ ਨਾਲ ਇਹ ਅਸਾਨ ਹੋ ਗਈ ਹੈ ਅਤੇ ਇਸ ਤਕਨੀਕ ਨਾਲ ਫਸਲ ਦਾ ਵੱਧ ਝਾੜ ਪ੍ਰਾਪਤ ਹੁੰਦਾ ਹੈ।
ਉਨ੍ਹਾਂ ਅੱਗੇ ਕਿਹਾ ਕਿ ਇਹ ਪ੍ਰਾਜੈਕਟ ਪੰਜਾਬ ਐਗਰ’ ਇੰਡਸਟਰੀ ਕਾਰਪੋਰੇਸ਼ਨ ਦੇ ਐਮ.ਡੀ. ਸ੍ਰੀ ਕੇ.ਐਸ ਪੰਨੂੰ ਦੀ ਨਿਗਰਾਨੀ ਹੇਠ ਚੱਲ ਰਿਹਾ ਹੈ। ਉਨ੍ਹਾਂ ਕਿਸਾਨਾਂ ਨੂੰ ਅਪੀਲ ਕੀਤੀ ਕਿ ਉਹ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਦੀਆਂ ਸਿਫਾਰਸ਼ ਅਨੁਸਾਰ ਰਾਸੀ-650,776 ਬੀ.ਜੀ-2, ਐਨ.ਸੀ.ਐਸ-855 ਬੋਲਗਾਰਡ-2, ਅੰਕੁਰ-3028 ਬੋਲਗਾਰਡ-ਬੀ.ਜੀ-2, ਐਮ.ਆਰ.ਸੀ-7017 ਬੋਲਗਾਰਡ-2, ਐਮ.ਆਰ.ਸੀ-7031 ਬੋਲਗਾਰਡ-2 ਆਦਿ ਦੀਆਂ ਕਿਸਮਾਂ ਦੀ ਹੀ ਬਿਜਾਈ ਕਰਨ ਅਤੇ ਬੀਜ ਲੈਣ ਸਮੇਂ ਬਿੱਲ ਜ਼ਰੂਰ ਲੈਣ। ਉਨ੍ਹਾਂ ਦੱਸਿਆ ਕਿ ਪੋਜੈਕਟ ਤਹਿਤ ਕਿਸਾਨਾਂ ਨੂੰ ਨਰਮੇ ਦੇ ਬੀ.ਟੀ ਹਾਈਬਰਿਡ ਰਾਸੀ-773ਬੀ.ਜੀ-2, ਐਸ.ਪੀ 7223ਬੀ.ਜੀ-2, ਐਸ.ਪੀ-7583ਬੀ.ਜੀ-2 ਅਤੇ ਜੇ.ਕੇ-12124ਬੀ.ਜੀ-2 ਦਾ ਬੀਜ 925/ਰੂਪੈ ਪ੍ਰਤੀ ਪੈਕਟ ਕਿਸਾਨਾ ਨੂੰ ਕੁੱਲ 6 ਪੈਕਟ ਦਿੱਤੇ ਜਾਣਗੇ, ਜਿਸ ਵਿਚੋਂ 3000 ਰੂਪੈ ਪ੍ਰਤੀ ਏਕੜ ਸਰਕਾਰ ਵਲੋਂ ਸਬਸਿਡੀ ਦਿੱਤੀ ਜਾਵੇਗੀ। ਉਨ੍ਹਾਂ ਅੱਗੇ ਦੱਸਿਆ ਕਿ ਫਸਲ ਤਿਆਰ ਹੋਣ ਉਪਰੰਤ ਜੋਹਨ ਡੀਅਰ ਕੰਪਨੀ ਦੀ ਨਰਮਾ ਚੁੱਗਣ ਵਾਲੀ ਮਸ਼ੀਨ ਨਾਲ ਨਰਮੇ ਦੀ ਚੁਗਾਈ ਕਰੇਗੀ। ਉਨ੍ਹਾਂ ਅੱਗੇ ਕਿਹਾ ਕਿ ਇਸ ਸਕੀਮ ਨਾਲ ਨਰਮੇ ਦੇ ਸੀਜ਼ਨ ਦੌਰਾਨ ਕਿਸਾਨਾਂ ਨੂੰ ਲੇਬਰ ਦੀ ਆਂਦੀ ਸਮੱਸਿਆ ਨੂੰ ਹੱਲ ਕਰਨਾ ਵੀ ਹੈ।