ਜ਼ਿਲ੍ਹਾ ਲੁਧਿਆਣਾ ਦਾ ਮਹੱਤਵਪੂਰਨ ਪਿੰਡ ਕਿਲ੍ਹਾ ਰਾਏਪੁਰ ਖੇਡਾਂ ਅਤੇ ਰਾਜਸੀ ਖੇਤਰ ਵਿੱਚ ਆਪਣੀ ਵੱਖਰੀ ਪਛਾਣ ਸਥਾਪਤ ਕਰਨ ਤੋਂ ਬਾਅਦ ਹੁਣ ਅੰਤਰਰਾਸ਼ਟਰੀ ਪੱਧਰ 'ਤੇ ਵਪਾਰਕ ਕੇਂਦਰ ਵਜੋਂ ਵੀ ਵਿਕਸਤ ਹੋਣ ਜਾ ਰਿਹਾ ਹੈ। ਪੰਜਾਬ ਸਰਕਾਰ ਦੇ ਵਿਸ਼ੇਸ਼ ਉੱਦਮ ਸਦਕਾ ਉੱਤਰੀ ਖਿੱਤੇ ਖਾਸ ਕਰ ਪੰਜਾਬ ਵਿੱਚ ਆਰਥਿਕ ਸਰਗਰਮੀਆਂ ਨੂੰ ਵੱਡਾ ਹੁਲਾਰਾ ਦੇਣ ਲਈ ਕੇਂਦਰੀ ਰੇਲਵੇ ਮੰਤਰੀ ਸ੍ਰੀ ਸੁਰੇਸ਼ ਪ੍ਰਭੂ ਅਤੇ ਪੰਜਾਬ ਦੇ ਉੱਪ ਮੁੱਖ ਮੰਤਰੀ ਸ. ਸੁਖਬੀਰ ਸਿੰਘ ਬਾਦਲ ਲੁਧਿਆਣਾ ਜ਼ਿਲ੍ਹੇ ਦੇ ਕਿਲਾ ਰਾਏਪੁਰ ਵਿਖੇ 14 ਮਈ, 2015 ਨੂੰ ਮਲਟੀ ਮਾਡਲ ਲੌਜਿਸਟਿਕ ਹੱਬ (ਐਮ.ਐਮ.ਐਲ.ਐਚ) ਦਾ ਨੀਂਹ ਪੱਥਰ ਰੱਖਣਗੇ।
ਪ੍ਰਬੰਧਾਂ ਸੰਬੰਧੀ ਰੱਖੀ ਮੀਟਿੰਗ ਦੌਰਾਨ ਇਸ ਪੂਰੇ ਪ੍ਰੋਜੈਕਟ ਬਾਰੇ ਜਾਣਕਾਰੀ ਦਿੰਦਿਆਂ ਪੰਜਾਬ ਸਰਕਾਰ ਦੇ ਸਿੰਚਾਈ ਮੰਤਰੀ ਸ੍ਰ. ਸ਼ਰਨਜੀਤ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਪੰਜਾਬ ਸਰਕਾਰ ਵੱਲੋਂ ਇਸ ਵੱਡੇ ਪ੍ਰੋਜੈਕਟ ਲਈ ਪਿੰਡ ਕਿਲ੍ਹਾ ਰਾਏਪੁਰ ਨੂੰ ਚੁਣਨਾ ਜ਼ਿਲ੍ਹਾ ਲੁਧਿਆਣਾ ਲਈ ਬੜੇ ਹੀ ਮਾਣ ਵਾਲੀ ਗੱਲ ਹੈ। ਇਸ ਨਾਲ ਜਿੱਥੇ ਇਸ ਖੇਤਰ ਵਿੱਚ ਵਪਾਰਕ ਗਤੀਵਿਧੀਆਂ ਵਧਣ ਨਾਲ ਇਲਾਕੇ ਦੀ ਆਰਥਿਕਤਾ ਨੂੰ ਹੁਲਾਰਾ ਮਿਲੇਗਾ, ਉਥੇ ਹਜ਼ਾਰਾਂ ਦੀ ਗਿਣਤੀ ਵਿੱਚ ਨੌਜਵਾਨਾਂ ਅਤੇ ਕਿਰਤੀਆਂ ਨੂੰ ਸਿੱਧੇ ਜਾਂ ਅਸਿੱਧੇ ਤੌਰ 'ਤੇ ਰੁਜ਼ਗਾਰ ਵੀ ਮੁਹੱਈਆ ਹੋਵੇਗਾ। ਐਮ.ਐਮ.ਐਲ.ਐਚ 500 ਕਰੋੜ ਰੁਪਏ ਦੀ ਨਾਲ ਉਸਾਰਿਆ ਜਾਵੇਗਾ ਅਤੇ ਇਹ ਸੂਬੇ ਵਿੱਚ ਸਨਅਤੀ ਪੱਖ ਤੋਂ ਪਰਿਵਰਤਣ ਲਿਆਉਣ ਲਈ ਵੱਡੀ ਪੱਧਰ 'ਤੇ ਸਹਾਈ ਹੋਵੇਗਾ।ਉਨ੍ਹਾਂ ਨੇ ਕਿਹਾ ਕਿ ਲੁਧਿਆਣਾ ਦੇ ਨੇੜੇ ਬਣਾਇਆ ਜਾ ਰਿਹਾ ਇਹ ਐਮ.ਐਮ.ਐਲ.ਐਚ. ਲੁਧਿਆਣਾ-ਧੂਰੀ-ਜਾਖਲ ਫੀਡਰ ਲਾਈਨ ਆਦਿ ਨਾਲ ਮਾਲ ਢੋਆ-ਢੁਆਈ ਦੇ ਪੂਰਬੀ ਗਲਿਆਰੇ ਦਾ ਸਿੱਧਾ ਸੰਪਰਕ ਸਥਾਪਤ ਕਰੇਗਾ ਅਤੇ ਇਹ ਲਾਈਨ ਰਿਵਾੜੀ ਵਿਖੇ ਪੱਛਮੀ ਗਲਿਆਰੇ ਦੇ ਨਾਲ ਸੰਪਰਕ ਪੈਦਾ ਕਰੇਗੀ ਜਿਸ ਨਾਲ ਸੂਬੇ ਦੇ ਉਦਯੋਗ ਨੂੰ ਵੱਡਾ ਲਾਭ ਹੋਵੇਗਾ। ਜ਼ਿਕਰਯੋਗ ਹੈ ਕਿ ਦਾਨਕੁਨੀ ਤੋਂ ਅੰਮ੍ਰਿਤਸਰ ਤੱਕ ਮਾਲ ਢੋਆ-ਢੁਆਈ ਦੇ ਪੂਰਬੀ ਗਲਿਆਰੇ ਅਤੇ ਜੇ.ਐਨ.ਪੀ.ਟੀ. ਨਵੀਂ ਮੁੰਬਈ ਤੋਂ ਖੁਰਜਾ (ਉੱਤਰ ਪ੍ਰਦੇਸ਼) ਅਤੇ ਪੰਜਾਬ ਤੱਕ ਦੇ ਪੱਛਮੀ ਮਾਲ ਢੋਆ-ਢੁਆਈ ਦੇ ਪਾਸਾਰ ਨਾਲ ਇਸ ਖਿੱਤੇ ਵਿੱਚ ਅਣਕਿਆਸੇ ਆਰਥਿਕ ਵਿਕਾਸ ਦਾ ਨਵਾਂ ਯੁੱਗ ਸ਼ੁਰੂ ਹੋਵੇਗਾ।
ਇਸ ਸ਼ਾਨਾਮੱਤੇ ਪ੍ਰਾਜੈਕਟ ਦੀ ਅਹਿਮੀਅਤ ਇਸ ਪੱਖ ਤੋਂ ਵੀ ਬਹੁਤ ਮਹੱਤਵਪੂਰਨ ਹੈ ਕਿ ਫੌਰਨ ਟਰੇਡ ਐਕਟ, 1992 ਦੇ ਅਨੁਸਾਰ ਭਵਿੱਖ ਵਿੱਚ ਸਿਰਫ ਐਮ.ਐਮ.ਐਲ.ਐਚ. ਹੀ ਦਰਾਮਦ-ਬਰਾਮਦ ਕਾਰਗੋ ਨਾਲ ਨਿਪਟ ਸਕਦਾ ਹੈ। ਇਹ ਐਮ.ਐਮ.ਐਲ.ਐਚ. ਘਰੇਲੂ ਤੇ ਅੰਤਰਰਾਸ਼ਟਰੀ ਮਾਲ ਢੋਆ-ਢੁਆਈ ਦੇ ਵਾਸਤੇ ਕੰਟੇਨਰਾਂ ਦੀ ਸਹੂਲਤ ਮੁਹੱਈਆ ਕਰਵਾਏਗਾ। ਇਸੇ ਤਰ੍ਹਾਂ ਹੀ ਇਹ ਪ੍ਰਾਜੈਕਟ ਇਕ ਲੱਖ ਮੀਟਰਕ ਟਨ ਅਨਾਜ ਦੀ ਵਿਗਿਆਨਕ ਵਿਧੀ ਰਾਹੀਂ ਭੰਡਾਰਨ ਕਰਨ ਦੀ ਸੁਵਿਧਾ ਮੁਹੱਈਆ ਕਰਵਾਏਗਾ। ਇੱਥੇ ਸਟੀਲ, ਖਾਦਾਂ, ਸੀਮੈਂਟ ਅਤੇ ਹੋਰਨਾਂ ਵਸਤਾਂ ਦੇ ਭੰਡਾਰਨ ਦੀ ਸਹੂਲਤ ਹੋਵੇਗੀ ਜਿਸ ਦੇ ਨਾਲ ਸਾਂਭ-ਸੰਭਾਲ ਦੇ ਖਰਚਿਆਂ ਵਿੱਚ ਕਮੀ ਆਵੇਗੀ। ਉਨ੍ਹਾਂ ਕਿਹਾ ਕਿ ਇਹ ਐਮ.ਐਮ.ਐਲ.ਐਚ. ਅਤਿ ਆਧੁਨਿਕ ਸਹੂਲਤਾਂ ਨਾਲ ਲੈਸ ਹੋਵੇਗਾ, ਜਿਨ੍ਹਾਂ ਵਿੱਚ ਬਹੁ-ਮੰਤਵੀ ਗੁਦਾਮ ਅਤੇ ਤਾਪਮਾਨ 'ਤੇ ਨਿਯੰਤਰਨ ਕਰਨ ਵਾਲੇ ਗੁਦਾਮ ਆਦਿ ਸ਼ਾਮਿਲ ਹੈ। ਇਸ ਨਾਲ ਵਪਾਰ ਤੇ ਵਣਜ ਨੂੰ ਹੁਲਾਰਾ ਮਿਲੇਗਾ।ਜ਼ਿਕਰਯੋਗ ਹੈ ਕਿ ਪੰਜਾਬ ਤੋਂ ਮੌਜੂਦਾ ਦਰਾਮਦ-ਬਰਾਮਦ ਆਵਾਜਾਈ ਚਾਰ ਲੱਖ ਕੰਟੇਨਰਾਂ ਦੀ ਹੈ, ਜਿਨ੍ਹਾਂ ਵਿੱਚ ਪੰਜਾਬ ਤੋਂ ਘਰੇਲੂ 25000 ਕੰਟੇਨਰਾਂ ਦਾ ਆਦਾਨ-ਪ੍ਰਦਾਨ ਹੈ।
ਇਸ ਪ੍ਰਾਜੈਕਟ ਦਾ ਪਹਿਲਾ ਪੜਾਅ ਮੁਕੰਮਲ ਹੋਣ 'ਤੇ ਦਰਾਮਦ-ਬਰਾਮਦ ਆਵਾਜਾਈ ਦੀ ਸਮਰੱਥਾ 7.50 ਲੱਖ ਹੋ ਜਾਵੇਗੀ, ਜੋ ਕਿ ਸਾਲ 2035 ਤੱਕ ਸਾਮਾਨ ਦੀ ਕੁੱਲ ਢੋਆ-ਢੁਆਈ ਦਾ 45 ਫੀਸਦੀ ਹੋ ਜਾਵੇਗੀ। ਐਮ.ਐਮ.ਐਲ.ਐਚ. ਤੋਂ ਦੂਹਰੀ ਛੱਤ ਵਾਲੇ ਡੱਬੇ ਵੀ ਸ਼ੁਰੂ ਕੀਤੇ ਜਾਣਗੇ, ਜਿਸ ਨਾਲ ਦੇਸ਼ ਵਿੱਚ ਹੋਣ ਵਾਲੀ ਟਰਾਂਸਪੋਰਟ ਦੀ ਲਾਗਤ ਵਿੱਚ 33 ਫੀਸਦੀ ਕਮੀ ਆਵੇਗੀ। ਸ੍ਰ. ਢਿੱਲੋਂ ਨੇ ਅੱਗੇ ਕਿਹਾ ਕਿ ਇਹ ਪ੍ਰਾਜੈਕਟ ਵਪਾਰ ਤੇ ਕਾਮਰਸ ਨੂੰ ਹੁਲਾਰਾ ਦੇਣ ਤੋਂ ਇਲਾਵਾ 500 ਸੰਗਠਿਤ ਕਿਰਤੀਆਂ ਨੂੰ ਵੀ ਸਿੱਧਾ ਰੁਜ਼ਗਾਰ ਮੁਹੱਈਆ ਕਰਵਾਏਗਾ। ਇਸੇ ਤਰ੍ਹਾਂ ਹੀ ਇਸ ਦੇ ਨਾਲ ਤਕਰੀਬਨ 2000 ਟਰਾਂਸਪੋਰਟਰਾਂ, 1500 ਪ੍ਰਾਈਵੇਟ ਕਿਰਤੀਆਂ ਅਤੇ 500 ਥਰਡ ਪਾਰਟੀ ਸਰਵੇਅਰ ਦੇ ਰੂਪ ਵਿੱਚ ਅਸਿੱਧਾ ਰੁਜ਼ਗਾਰ ਮਿਲੇਗਾ।ਉਨ੍ਹਾਂ ਕਿਹਾ ਕਿ ਐਮ.ਐਮ.ਐਲ.ਐਚ. ਦੇ ਨਾਲ ਸਨਅਤੀ ਅਸਟੇਟ ਸਥਾਪਤ ਕਰਨ ਦੀਆਂ ਸੰਭਾਵਨਾਵਾਂ ਦਾ ਵੀ ਅਧਿਐਨ ਕੀਤਾ ਜਾਵੇਗਾ। ਉਨ੍ਹਾਂ ਅੱਜ ਪ੍ਰਬੰਧਾਂ ਸੰਬੰਧੀ ਕੀਤੀ ਮੀਟਿੰਗ ਵਿੱਚ ਹਲਕਾ ਵਿਧਾਇਕ ਸ੍ਰ. ਦਰਸ਼ਨ ਸਿੰਘ ਸ਼ਿਵਾਲਿਕ, ਹਲਕਾ ਦਾਖਾ ਦੇ ਵਿਧਾਇਕ ਸ੍ਰ. ਮਨਪ੍ਰੀਤ ਸਿੰਘ ਇਯਾਲੀ, ਪੰਜਾਬ ਰਾਜ ਵੇਅਰਹਾਊਸ ਕਾਰਪੋਰੇਸ਼ਨ ਦੇ ਮੈਨੇਜਿੰਗ ਡਾਇਰੈਕਟਰ ਸ੍ਰ. ਏ. ਐੱਸ. ਬੈਂਂਸ, ਸੀਨੀਅਰ ਅਧਿਕਾਰੀ ਸ੍ਰ. ਐੱਚ. ਪੀ. ਐੱਸ. ਬਰਾੜ, ਵਧੀਕ ਪੁਲਿਸ ਕਮਿਸ਼ਨਰ ਲੁਧਿਆਣਾ ਸ੍ਰੀ ਨਵੀਨ ਸਿੰਗਲਾ, ਵਧੀਕ ਡਿਪਟੀ ਕਮਿਸ਼ਨਰ ਖੰਨਾ ਸ੍ਰੀ ਅਜੇ ਸੂਦ ਅਤੇ ਹੋਰ ਅਧਿਕਾਰੀ ਹਾਜ਼ਰ ਸਨ।