ਪੰਜਾਬ 'ਤੇ ਰਾਜ਼ ਕਰਨ ਵਾਲੀ ਪਾਰਟੀ ਦੇ ਸਰਪ੍ਰਸਤ ਬਾਦਲ ਪਰਿਵਾਰ ਨੇ ਪੰਜਾਬ ਦਾ ਖਜ਼ਾਨਾ ਕੰਗਾਲ ਕਰਨ ਬਾਅਦ ਹੁਣ ਸਰਕਾਰੀ ਜਾਇਦਾਦਾਂ ਵੱਲ ਅੱਖ ਰੱਖ ਲਈ ਹੈ। ਇਹਨਾਂ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਵਿਧਾਨ ਸਭਾ ਹਲਕਾ ਆਤਮ ਨਗਰ ਤੋ ਵਿਧਾਇਕ ਸਿਮਰਜੀਤ ਸਿੰਘ ਬੈਂਸ ਅਤੇ ਵਿਧਾਨ ਸਭਾ ਹਲਕਾ ਦੱਖਣੀ ਤੋ ਵਿਧਾਇਕ ਸ. ਬਲਵਿੰਦਰ ਸਿੰਘ ਬੈਂਸ ਨੇ ਦੱਸਿਆ ਕਿ ਫਿਰੋਜ਼ਪੁਰ ਰੋਡ ਤੇ ਬਿਜਲੀ ਬੋਰਡ ਵਿਖੇ ਦਫਤਰ ਵਿੱਚ ਇੱਕ ਛੱਤ ਹੇਠਾਂ 16 ਦਫਤਰ ਚੱਲ ਰਹੇ ਹਨ ਜਿੱਥੇ ਇਲਾਕਾ ਨਿਵਾਸੀਆਂ ਨੂੰ ਆਪਣੇ ਰੋਜ਼ ਦੇ ਕੰਮ ਕਾਰ ਕਰਵਾਉਣ ਲਈ ਥਾਂ-ਥਾਂ ਧੱਕੇ ਨਹੀ ਖਾਣੇ ਪੈਂਦੇ ਅਤੇ ਉਕਤ ਦਫਤਰ ਦੀ ਥਾਂ ਕਲੱਬ ਨੂੰ ਮਿੱਟੀ ਦੇ ਭਾਅ ਅਲਾਟ ਕਰਵਾਕੇ ਹੁਣ ਬਾਦਲ ਪਰਿਵਾਰ ਪੰਜਾਬ ਵਾਸੀਆਂ ਨਾਲ ਵੱਡੀ ਧੋਖਾਧੜੀ ਕਰਨ ਲਈ ਤਰਲੋਮੱਛੀ ਹੈ। ਵਿਧਾਇਕ ਬੈਂਸ ਨੇ ਇੱਕ ਸਨਸਨੀਖੇਜ਼ ਖੁਲਾਸਾ ਕਰਦਿਆਂ ਦੱਸਿਆ ਕਿ ਕਰੀਬ 3500 ਕਰੋੜ ਮਾਰਕਿਟ ਮੁੱਲ ਵਾਲੀ ਜਾਇਦਾਦ ਨੂੰ ਸਿਰਫ 900 ਕਰੋੜ ਵਿੱਚ ਵੇਚਣ ਲਈ ਬਾਦਲ ਪਰਿਵਾਰ ਨੇ ਇਹ ਸਾਰੀ ਸਕੀਮ ਰਚੀ ਹੈ।
ਉਹਨਾਂ ਦੱਸਿਆ ਕਿ ਹਰ ਪੱਖੋ ਤਬਾਹ ਹੋ ਚੁਕੇ ਪੰਜਾਬ ਦੀਆਂ ਹੁਣ ਬਚਦੀਆਂ ਸਰਕਾਰੀ ਜਾਇਦਾਦਾਂ ਵੀ ਠੱਗ ਕੇ ਲੋਕਾਂ ਨੂੰ ਸਰੇਆਮ ਬੇਵਕੂਫ ਬਣਾਇਆ ਜਾ ਰਿਹਾ ਹੈ। ਵਿਧਾਇਕ ਬੈਂਸ ਨੇ ਕਿਹਾ ਕਿ ਇਸ ਤੋ ਇਲਾਵਾ ਉਕਤ ਦਫਤਰ ਵਿੱਚ 500 ਪਰਿਵਾਰਾਂ ਲਈ ਬਿਜਲੀ ਵਿਭਾਗ ਵੱਲੋ ਰਹਾਇਸ਼ੀ ਕਾਲੋਨੀ ਵੀ ਸਥਾਪਿਤ ਕੀਤੀ ਹੋਈ ਹੈ ਪਰੰਤੂ ਹੁਣ ਖਜ਼ਾਨੇ ਨੂੰ ਕੰਗਾਲ ਕਰਨ ਬਾਅਦ ਬਾਦਲ ਪਰਿਵਾਰ ਨੇ ਇਸ ਬਹੁਕੀਮਤੀ ਸਰਕਾਰੀ ਜਾਇਦਾਦ ਹਥਿਆਉਣ ਲਈ ਜ਼ੋਰ ਅਜਮਾਇਸ਼ ਸ਼ੁਰੂ ਕਰ ਦਿੱਤੀ ਹੈ। ਵਿਧਾਇਕ ਬੈਂਸ ਨੇ ਦੱਸਿਆ ਕਿ ਕਰੀਬ 100 ਏਕੜ ਵਿੱਚ ਸਰਕਾਰ ਵੱਲੋ ਡਾਊਨ ਟਾਊਨ ਕਲੱਬ ਬਨਾਉਣ ਦੀ ਪ੍ਰਵਾਨਗੀ ਦਿੱਤੀ ਹੋਈ ਹੈ ਅਤੇ ਇਸੇ ਸਬੰਧ ਵਿੱਚ ਸਰਕਾਰ ਹੁਣ 32 ਏਕੜ ਵਿੱਚ ਬਣੇ ਇਸ ਮੁੱਖ ਦਫਤਰ ਅਤੇ ਰਹਾਇਸ਼ੀ ਕਾਲੋਨੀ ਨੂੰ ਖਾਲੀ ਕਰਵਾਉਣ ਦੇ ਤੂਲਗੀ ਫਰਮਾਨ ਜ਼ਾਰੀ ਕਰ ਚੁੱਕੀ ਹੈ। ਵਿਧਾਇਕ ਬੈਂਸ ਨੇ ਬਾਦਲ ਪਰਿਵਾਰ ਤੋ ਸਵਾਲ ਕਰਦਿਆਂ ਪੁੱਛਿਆ ਕਿ 500 ਪਰਿਵਾਰ ਅਤੇ ਲੋਕਾਂ ਦਾ ਕੰਮਕਾਜ ਕਰਨ ਵਾਲੇ 16 ਦਫਤਰਾਂ ਨੂੰ ਖਾਲੀ ਕਰਵਾਕੇ ਕੀ ਇੱਕ ਕਲੱਬ ਬਨਾਉਣਾ ਜਿਆਦਾ ਜਰੂਰੀ ਹੈ..? ਵਿਧਾਇਕ ਬੈਂਸ ਨੇ ਕਿਹਾ ਕਿ ਬਾਦਲ ਪਰਿਵਾਰ ਦੀ ਇਸ ਧੱਕੇਸ਼ਾਹੀ ਖਿਲਾਫ 27 ਨਵੰਬਰ ਨੂੰ ਇੱਕ ਮਹਾ ਧਰਨੇ ਦਾ ਆਯੋਜਨ ਕੀਤਾ ਗਿਆ ਹੈ ਜਿੱਥੇ ਬਾਦਲ ਪਰਿਵਾਰ ਦੇ ਕਾਲੇ ਚਿੱਠਿਆਂ ਦਾ ਪੁਲੰਦਾ ਸੰਗਤ ਦੇ ਦਰਬਾਰ ਵਿੱਚ ਭੰਨਿਆ ਜਾਵੇਗਾ।