ਫੈਡਰੇਸ਼ਨ ਆਫ ਇੰਡੀਅਨ ਚੈਂਬਰ ਆਫ ਕਾਮਰਸ ਐਂਡ ਇੰਡਸਟਰੀ ( ਫਿੱਕੀ ) ਵੱਲੋਂ ਕਰਵਾਈ ਗਈ ਦੋ ਦਿਨਾਂ ਕੌਮੀ ਕਾਨਫਰੰਸ ਵਿੱਚ 15 ਦੇਸ਼ਾ ਤੋਂ ਆਏ ਪ੍ਰਤੀਨਿਧੀਆਂ ਨੂੰ ਸੱਦਾ ਦਿੱਤਾ ਕਿ ਉਹ ਸੁਲਤਾਨਪੁਰ ਲੋਧੀ 'ਚ ਪਵਿੱਤਰ ਕਾਲੀ ਵੇਈਂ ਦੇ ਦਰਸ਼ਨਾਂ ਲਈ ਆਉਣ ਜਿਸ ਨੂੰ ਪੰਜਾਬ ਦੀਆਂ ਸੰਗਤਾਂ ਨੇ ਆਪਣੇ ਹੱਥੀ ਸਾਫ ਕਰਕੇ ਨਵੀਂ ਮਿਸਾਲ ਪੈਦਾ ਕੀਤੀ ਹੈ।ਨਵੀਂ ਦਿੱਲੀ ਦੇ ਫਿੱਕੀ ਹਾਊਸ ਵਿੱਚ ਕਰਵਾਈ ਦੋ ਦਿਨਾਂ ਕਾਨਫਰੰਸ 'ਚ ਸੰਤ ਸੀਚੇਵਾਲ ਜੀ ਨੂੰ ਪਵਿੱਤਰ ਵੇਈ ਬਾਰੇ ਤੇ ਪੰਜਾਬ ਦੇ ਪਾਣੀਆਂ 'ਚ ਘੁਲ ਰਹੀਆਂ ਜ਼ਹਿਰਾਂ ਤੇ ਇਸ ਦੇ ਹੱਲ ਬਾਰੇ ਹੋਈ ਵਿਚਾਰ ਚਰਚਾ 'ਚ ਹਿੱਸਾ ਲਿਆ । ਏਸੇ ਦੌਰਾਨ ਸੰਤ ਸੀਚੇਵਾਲ ਦੀ ਸਯੁੰਕਤ ਰਾਸ਼ਟਰ ਦੇ ਵਾਤਾਵਰਣ ਪ੍ਰੋਗਰਾਮ ਦੇ ਫਰਾਂਸ ਤੋਂ ਆਏ ਨਹਿਰੀ ਅਫਸਰ ਲੌਰੰਸ ਮੀਲਾ ਆਈ ਨਾਲ ਵੀ ਮੁਲਾਕਾਤ ਹੋਈ।
ਫਿੱਕੀ ਹਾਊਸ 'ਚ ਦੋ ਦਿਨਾਂ ਹੋਈ 'ਇੰਡੀਅਨ ਕਾਨਫਰੰਸ ਆਨ ਲਾਈਫ਼ ਸਾਈਕਲ ਮੈਨਜ਼ਮੈਂਟ' ਵਿਸ਼ੇ 'ਤੇ ਹੋਈ ਕਾਨਫਰੰਸ ਪਹਿਲੀਵਾਰ ਹੈ ਜਦੋਂ ਪੰਜਾਬ ਦੀਆਂ ਸੰਗਤਾਂ ਵੱਲੋਂ ਸੰਤ ਬਲਬੀਰ ਸਿੰਘ ਸੀਚੇਵਾਲ ਜੀ ਅਗਵਾਈ ਹੇਠ ਹੋਈ ਕਾਰ ਸੇਵਾ ਦੀ ਚਰਚਾ ਹੋਈ। ਡੈਲੀਗੇਟਾਂ ਨਾਲ ਖੁਲ੍ਹੀ ਚਰਚਾ 'ਚ ਵਿਦੇਸ਼ਾਂ ਤੋਂ ਆਏ ਪ੍ਰਤੀਨਿਧੀਆ ਨੇ ਸੰਤ ਸੀਚੇਵਾਲ ਜੀ ਪੰਜਾਬ ਦੇ ਵਾਤਾਵਰਣ ਬਾਰੇ ਤੇ ਪਵਿੱਤਰ ਕਾਲੀ ਵੇਈਂ ਦੀ ਕਾਰ ਸੇਵਾ ਦੌਰਾਨ ਆਈਆਂ ਚਣੌਤੀਆਂ ਬਾਰੇ ਕਈ ਤਰ੍ਹਾਂ ਦੇ ਸਵਾਲ- ਜਵਾਬ ਕੀਤੇ।
ਇਸ ਭੱਖਵੀ ਚਰਚਾ ਦੌਰਾਨ ਸੰਤ ਸੀਚੇਵਾਲ ਨੇ ਦੱਸਿਆ ਕਿ ਭਾਰਤ ਦੇ ਦਰਿਆਵਾਂ 'ਚ ਪਾਏ ਜਾ ਰਹੇ ਪ੍ਰਦੂਸ਼ਿਤ ਪਾਣੀਆਂ ਨੂੰ ਟਰੀਟ ਕਰਕੇ ਖੇਤੀ ਲਈ ਵਰਤਿਆ ਜਾਵੇ ਅਜਿਹਾ ਕਰਨ ਨਾਲ ਦਰਿਆ ਵੀ ਸਾਫ਼ ਰਹਿਣਗੇ ਤੇ ਆਰਗੇਨਿਕ ਖੇਤੀ ਵੀ ਹੋਵੇਗੀ ਤੇ ਕਿਸਾਨਾਂ ਨੂੰ ਵੀ ਆਰਥਿਕ ਲਾਭ ਪਹੁੰਚੇਗਾ।ਸੰਤ ਸੀਚੇਵਾਲ ਨੇ ਪ੍ਰਦੂਸ਼ਿਤ ਪਾਣੀ ਨੂੰ ਟਰੀਟ ਕਰਕੇ ਖੇਤੀ ਲਈ ਵਰਤੇ ਜਾਣ ਦੀਆਂ ਸੁਲਤਾਨਪੁਰ, ਦਸੂਹਾ ਤੇ ਸੀਚੇਵਾਲ ਪਿੰਡ ਦੀਆਂ ਉਦਾਹਰਣਾਂ ਪੇਸ਼ ਕੀਤੀਆ।ਵਿਦੇਸ਼ਾਂ ਤੋਂ ਆਏ ਪ੍ਰਤੀਨਿਧੀਆਂ ਨੇ ਪਵਿੱਤਰ ਕਾਲੀ ਵੇਈਂ ਤੇ ਪ੍ਰਦੂਸ਼ਿਤ ਪਾਣੀਆਂ ਬਾਰੇ ਸੰਤ ਸੀਚੇਵਾਲ ਵੱਲੋਂ ਛੇੜੀ ਮਹੁੰਮ ਦੀ ਪ੍ਰਸੰਸਾਂ ਕੀਤੀ।ਇਸ ਮੌਕੇ ਫਿੱਕੀ ਦੀ ਸੀ.ਈ.ਓ ( ਕੁਆਲਿਟੀ ਫੋਰਮ ) ਡਾ: ਸੰਜੀਵਨ ਬਾਜ਼ਾਜ਼ ਨੇ ਸੰਤ ਸੀਚੇਵਾਲ ਨੂੰ ਸਨਮਾਨਿਤ ਕਰਦਿਆ ਐਲਾਨ ਕੀਤਾ ਕਿ ਫਿੱਕੀ ਵੱਲੋਂ ਰਾਜਸਥਾਨ ਦੀ ਊਦੈਪੁਰ ਸੈਂਚਰੀ 'ਚ 6 ਵਿਸ਼ੇਸ਼ ਕਿਸਮ ਦੇ ਰੁੱਖ ਸੀਚੇਵਾਲ ਦੇ ਨਾਂਅ ਦੇ ਲਾਏ ਜਾਣਗੇ।ਇਸ ਮੌਕੇ ਸੰਤ ਸੀਚੇਵਾਲ, ਪਟਿਆਲਾ ਤੋਂ ਐਡਵੋਕੇਟ ਬਲਬੀਰ ਸਿੰਘ ਬਿਲਿੰਗ, ਅਮਰੀਕ ਸਿੰਘ ਸੰਧੂ, ਪ੍ਰੋ ਕੁਲਵਿੰਦਰ ਸਿੰਘ ਗਾਦੜੀ, ਜਸਵੀਰ ਸਿੰਘ ਵੀ ਹਾਜ਼ਰ ਸਨ।