ਖ਼ਾਲਸਾ ਕਾਲਜ, ਪਟਿਆਲਾ ਦੇ ਪ੍ਰਿੰਸੀਪਲ ਡਾ. ਧਰਮਿੰਦਰ ਸਿੰਘ ਉੱਭਾ ਵੱਲੋਂ ਅੱਜ ਪਟਿਆਲਾ ਜੋਨਲ ਯੁਵਕ ਮੇਲੇ ਦੇ ਸਭਿਆਚਾਰਕ ਮੁਕਾਬਲਿਆਂ ਵਿਚ ਜੇਤੂ ਰਹੇ ਕਾਲਜ ਦੇ ਵਿਦਿਆਰਥੀਆਂ ਨੂੰ ਸਨਮਾਨਤ ਕੀਤਾ ਗਿਆ। ਡਾ. ਉੱਭਾ ਨੇ ਕਾਲਜ ਵੱਲੋਂ ਦੂਸਰੇ ਸਥਾਨ ਤੇ ਆ ਕੇ ਹੈਟਰਿਕ ਬਣਾਉਣ ਲਈ ਕਾਲਜ ਦੇ ਡੀਨ ਸਭਿਆਚਾਰਕ ਸਰਗਰਮੀਆਂ ਅਤੇ ਇੰਚਾਰਜ ਅਧਿਆਪਕ ਸਾਹਿਬਾਨ ਨੂੰ ਵਧਾਈ ਦਿੱਤੀ। ਇਸ ਮੌਕੇ ਬੋਲਦਿਆਂ ਡਾ. ਉੱਭਾ ਨੇ ਕਿਹਾ ਕਿ ਵਿਦਿਆ ਅਤੇ ਖੇਡਾਂ ਦੇ ਨਾਲ-ਨਾਲ ਕਾਲਜ ਸਭਿਆਚਾਰਕ ਸਰਗਰਮੀਆਂ ਲਈ ਵੀ ਭਰਪੂਰ ਉਪਰਾਲੇ ਕਰਦਾ ਰਹਿੰਦਾ ਹੈ ਜਿਸ ਸਦਕਾ ਕਾਲਜ ਦੇ ਵਿਦਿਆਰਥੀ ਪਿਛਲੇ ਪੰਜ ਸਾਲ ਤੋਂ ਜੋਨਲ ਯੁਵਕ ਮੇਲੇ ਦੌਰਾਨ ਮੱਲਾਂ ਮਾਰਦੇ ਆ ਰਹੇ ਹਨ। 2009 ਵਿਚ ਕਾਲਜ ਨੇ ਜੋਨਲ ਯੁਵਕ ਮੇਲੇ ਦੌਰਾਨ ਪਹਿਲੇ ਸਥਾਨ ਤੇ ਆ ਕੇ ਓਵਰਆਲ ਟਰਾਫੀ ਹਾਸਲ ਕੀਤੀ 2010, 2011 ਅਤੇ 2012 ਦੌਰਾਨ ਲਗਾਤਾਰ ਕਾਲਜ ਤਿੰਨ ਸਾਲ ਤੋਂ ਦੂਸਰੇ ਸਥਾਨ ਤੇ ਆ ਰਿਹਾ ਹੈ। ਡਾ. ਉੱਭਾ ਨੇ ਕਿਹਾ ਕਿ ਸਾਡੇ ਲਈ ਇਹ ਬਹੁਤ ਮਾਣ ਵਾਲੀ ਗੱਲ ਹੈ ਕਿ ਇਨ੍ਹਾਂ ਮੁਕਾਬਲਿਆਂ ਦੌਰਾਨ ਜੋਨਲ ਪੱਧਰ ਤੇ ਖ਼ਾਲਸਾ ਕਾਲਜ, ਕਾਲਜਾਂ ਵਿਚੋਂ ਪਹਿਲੇ ਸਥਾਨ 'ਤੇ ਰਿਹਾ ਹੈ। ਕਾਲਜ ਦੇ ਡੀਨ ਸਭਿਆਚਾਰਕ ਸਰਗਰਮੀਆਂ ਡਾ. ਹਰਵਿੰਦਰ ਕੌਰ ਨੇ ਦੱਸਿਆ ਕਿ ਇਸ ਮੇਲੇ ਦੌਰਾਨ ਰੰਗੋਲੀ ਵਿਚ ਬੀ.ਏ. ਭਾਗ ਤੀਜਾ ਦੇ ਵਿਦਿਆਰਥੀ ਪਰਮਿੰਦਰ ਸਿੰਘ, ਐਲੋਕਿਊਸ਼ਨ ਵਿਚ ਬੀ.ਕਾਮ ਭਾਗ ਦੂਜਾ ਦੀ ਮਾਧਵੀ ਦੁੱਗਲ, ਲੋਕ ਗੀਤ ਅਤੇ ਗੀਤ ਵਿਚ ਬੀ.ਏ ਭਾਗ ਪਹਿਲਾ ਦੀ ਅਬਸ਼ਾਨਾ ਨੇ ਪਹਿਲਾ ਸਥਾਨ ਹਾਸਲ ਕਰਕੇ ਕਾਲਜ ਦਾ ਨਾਮ ਰੌਸ਼ਨ ਕੀਤਾ ਹੈ।ਗਰੁੱਪ ਆਈਟਮਾਂ ਵਿਚ ਕਾਲਜ ਨੇ ਗਿੱਧਾ, ਫੋਕ ਆਰਕੈਸਟਰਾ, ਭਾਰਤੀ ਸਮੂਹ ਗੀਤ, ਪੱਛਮੀ ਸਮੂਹ ਗੀਤ ਅਤੇ ਵਿਅਕਤੀਗਤ ਪੱਧਰ ਤੇ ਬੀ.ਏ ਭਾਗ ਦੂਜਾ ਦੇ ਰਮਜਾਨ ਖਾਂ ਨੇ ਕਲਾਸੀਕਲ ਵੋਕਲ, ਬੀ.ਏ ਭਾਗ ਪਹਿਲਾ ਦੇ ਨਰਿੰਦਰਪਾਲ ਅਤੇ ਰਣਜੀਤ ਸਿੰਘ ਨੇ ਪ੍ਰਕਸ਼ਨ ਅਤੇ ਨਾਨ ਪ੍ਰਕਸ਼ਨ ਵਿਚ, ਬੀ.ਏ ਭਾਗ ਤੀਜਾ ਦੇ ਗੁਰਪ੍ਰੀਤ ਸਿੰਘ ਨੇ ਮੌਕੇ ਤੇ ਚਿੱਤਰਕਾਰੀ ਵਿਚ ਦੂਸਰਾ ਸਥਾਨ ਹਾਸਲ ਕੀਤਾ। ਗਰੁੱਪ ਆਈਟਮਾਂ ਨਾਟਕ, ਸਕਿੱਟ ਅਤੇ ਭੰਗੜਾ ਅਤੇ ਵਿਅਕਤੀਗਤ ਆਈਟਮਾਂ ਵਿਚ ਐੱਮ.ਏ. ਅੰਗਰੇਜ਼ੀ ਦੀ ਅਰਸ਼ਦੀਪ ਕੌਰ ਨੇ ਪੱਛਮੀ ਸੋਲੋ, ਬੀ.ਏ ਭਾਗ ਦੂਜਾ ਦੇ ਸਤਨਾਮ ਸਿੰਘ ਨੇ ਕਾਰਟੂਨਿੰਗ ਅਤੇ ਬੀ.ਏ ਭਾਗ ਤੀਜਾ ਦੇ ਸਰਬਜੀਤ ਸਿੰਘ ਨੇ ਪੋਸਟਰ ਮੇਕਿੰਗ ਵਿਚ ਤੀਸਰਾ ਸਥਾਨ ਹਾਸਲ ਕੀਤਾ। ਗਰੁੱਪ ਸ਼ਬਦ ਅਤੇ ਬੀ.ਏ ਭਾਗ ਦੂਜਾ ਦੇ ਚਮਕੌਰ ਸਿੰਘ ਵੱਲੋਂ ਕੀਤੀ ਗਈ ਕਲੇਅ ਮਾਡਲਿੰਗ ਚੌਥੇ ਸਥਾਨ 'ਤੇ ਰਹੇ। ਇਸ ਮੌਕੇ ਸਮੂਹ ਟੀਚਿੰਗ ਅਤੇ ਨਾਨ ਟੀਚਿੰਗ ਸਟਾਫ ਵੱਲੋਂ ਜੇਤੂ ਵਿਦਿਆਰਥੀਆਂ ਨੂੰ ਵਧਾਈ ਦਿੱਤੀ।