ਵਿਧਾਨ ਸਭਾ ਹਲਕਾ ਡੇਰਾਬਸੀ ਤੋਂ ਆਜ਼ਾਦ ਉਮੀਦਵਾਰ ਦੀਪਇੰਦਰ ਸਿੰਘ ਢਿੱਲੋਂ ਨੂੰ ਲਗਾਤਾਰ ਪਾਰਟੀਬਾਜ਼ੀ ਅਤੇ ਧੜ੍ਹੇਬੰਦੀ ਤੋਂ ਉਪਰ ਉਠ ਕੇ ਲੋਕਾਂ ਦਾ ਸਮਰਥਨ ਮਿਲ ਰਿਹਾ ਹੈ। ਜਿਹੜੇ ਪਿੰਡ ਵੀ ਦੀਪਇੰਦਰ ਸਿੰਘ ਢਿੱਲੋਂ ਜਾ ਰਹੇ ਹਨ ਪਿੰਡਾਂ ਦੇ ਲੋਕ ਹੱਡਚੀਰਵੀਂ ਠੰਡ ਦੇ ਬਾਵਜੂਦ ਢਿੱਲੋਂ ਦੇ ਚੋਣ ਜਲਸੇ ਵਿਚ ਭਰਵੀਂ ਸ਼ਮੂਲੀਅਤ ਕਰ ਰਹੇ ਹਨ। ਚੋਣ ਪ੍ਰਚਾਰ ਤਹਿਤ ਅੱਜ ਦੀਪਇੰਦਰ ਸਿੰਘ ਢਿੱਲੋਂ ਨੇ ਪਿੰਡ ਘੋਲੂਮਾਜਰਾ, ਬੈਰਮਾਜਰਾ, ਲਹਿਲੀ, ਹੰਸਾਲਾ, ਰਾਜੂਮਾਜਰਾ, ਜਲਾਲਪੁਰ ਅਤੇ ਮਗਰਾ ਪਿੰਡਾਂ ਵਿਚ ਭਰਵੇਂ ਚੋਣ ਜਲਸਿਆਂ ਨੂੰ ਸੰਬੋਧਨ ਕੀਤਾ। ਇਸ ਮੌਕੇ ਪਿੰਡਾਂ ਦੇ ਲੋਕਾਂ ਨੇ ਉਨ੍ਹਾਂ ਨੂੰ ਪੂਰੇ ਜੋਸ਼ ਅਤੇ ਉਤਸ਼ਾਹ ਨਾਲ ਸਮਰਥਨ ਦੇਣ ਦਾ ਐਲਾਨ ਕਰ ਦਿੱਤਾ। ਘੋਲੂਮਾਜਰਾ ਪਿੰਡ ਵਿਚ ਲੋਕਾਂ ਨੇ ਦੀਪਇੰਦਰ ਸਿੰਘ ਢਿੱਲੋਂ ਨੂੰ ਕਿੰਨੂਆਂ ਨਾਲ ਵੀ ਤੋਲਿਆ। ਇਸ ਮੌਕੇ ਸੰਬੋਧਨ ਕਰਦਿਆਂ ਦੀਪਇੰਦਰ ਸਿੰਘ ਢਿੱਲੋਂ ਨੇ ਆਖਿਆ ਕਿ, ਹਲਕੇ ਵਿਚ ਲੜਾਈ ਹੱਕ ਅਤੇ ਸੱਚ ਦੀ ਹੈ। ਇਕ ਪਾਸੇ ਸਰਮਾਏਦਾਰ ਅਤੇ ਦੂਜੇ ਹਲਕਿਆਂ ਦੇ ਨਕਾਰੇ ਉਮੀਦਵਾਰ ਹਨ ਅਤੇ ਦੂਜੇ ਪਾਸੇ ਹਲਕੇ ਦੇ ਲੋਕ ਹਨ, ਜਿਨ੍ਹਾਂ ਨੇ ਮੈਨੂੰ ਆਪਣੀ ਅਗਵਾਈ ਕਰਨ ਦਾ ਮਾਣ ਦਿੱਤਾ ਹੈ।
ਉਨ੍ਹਾਂ ਆਖਿਆ ਕਿ, ਹਲਕੇ ਤੋਂ ਬਾਹਰਲੇ ਉਮੀਦਵਾਰਾਂ 'ਤੇ ਭਰੋਸਾ ਨਹੀਂ ਕੀਤਾ ਜਾ ਸਕਦਾ, ਕਿਉਂਕਿ ਉਹ ਸਿਆਸਤ ਨੂੰ ਵਪਾਰ ਵਾਂਗ ਕਰਦੇ ਹਨ, ਇਕ ਹਲਕੇ ਦੇ ਲੋਕਾਂ ਵਲੋਂ ਨਕਾਰਨ ਤੋਂ ਬਾਅਦ ਦੂਜੇ ਹਲਕੇ ਵਿਚ ਚਲੇ ਜਾਂਦੇ ਹਨ। ਉਨ੍ਹਾਂ ਦਾ ਲੋਕਾਂ ਦੇ ਦੁੱਖ-ਸੁੱਖ ਜਾਂ ਹਿੱਤਾਂ ਨਾਲ ਕੋਈ ਵੀ ਵਾਹ-ਵਾਸਤਾ ਨਹੀਂ ਹੁੰਦਾ। ਦੀਪਇੰਦਰ ਸਿੰਘ ਢਿੱਲੋਂ ਨੇ ਆਖਿਆ ਕਿ, ਓਪਰੇ ਬੰਦੇ ਨੂੰ ਤਾਂ ਕੋਈ ਆਪਣੇ ਪਰਿਵਾਰ ਦਾ ਮੈਂਬਰ ਵੀ ਨਹੀਂ ਬਣਾਉਂਦਾ, ਫ਼ਿਰ ਬਾਹਰਲੇ ਉਮੀਦਵਾਰਾਂ ਨੂੰ ਡੇਰਾਬਸੀ ਹਲਕੇ ਦਾ ਆਗੂ ਕਿਵੇਂ ਬਣਾਇਆ ਜਾ ਸਕਦਾ ਹੈ? ਡੇਰਾਬਸੀ ਹਲਕੇ ਦੇ ਲੋਕ ਸਿਆਣੇ ਅਤੇ ਸੂਝਵਾਨ ਹਨ, ਉਹ ਜਲਦੀ ਹੀ ਬਾਹਰਲੇ ਅਤੇ ਧਾੜ੍ਹਵੀਆਂ ਵਾਂਗ ਇਥੇ ਪੈਸੇ ਦੇ ਜ਼ੋਰ ਨਾਲ ਵੋਟਾਂ ਲੈਣ ਦੇ ਚਾਹਵਾਨ ਉਮੀਦਵਾਰਾਂ ਦਾ ਬੋਰੀ ਬਿਸਤਰਾ-ਗੋਲ ਕਰਕੇ ਉਨ੍ਹਾਂ ਦੇ ਅਸਲੀ ਟਿਕਾਣੇ 'ਤੇ ਭੇਜ ਦੇਣਗੇ।ਇਸ ਮੌਕੇ ਉਨ੍ਹਾਂ ਦੇ ਨਾਲ ਭੁਪਿੰਦਰ ਸਿੰਘ ਭਿੰਦਾ ਰਾਣੀਮਾਜਰਾ, ਕਰਨੈਲ ਸਿੰਘ ਹਮਾਯੂੰਪੁਰ, ਮਾ. ਸੋਹਨ ਲਾਲ, ਬਚਨ ਸਿੰਘ ਬਸੌਲੀ, ਕੇਵਲ ਸਿੰਘ ਘੋਲੂਮਾਜਰਾ, ਕਰਨੈਲ ਸਿੰਘ ਚਾਚਾ, ਸੁਰਜਨ ਸਿੰਘ, ਗੁਲਜ਼ਾਰ ਸਿੰਘ, ਸਾਬਕਾ ਸਰਪੰਚ ਕਰਮ ਚੰਦ, ਰਾਜ ਰਤਨ ਸ਼ਰਮਾ, ਗਿਆਨ ਸਿੰਘ ਬੈਰਮਾਜਰਾ, ਕਰਮ ਚੰਦ ਧੀਮਾਨ, ਸਰਪੰਚ ਹਰਵਿੰਦਰ ਸਿੰਘ, ਸੁਸ਼ੀਲ ਰਾਣਾ, ਓਮੀ ਰਾਣਾ ਅਤੇ ਸੋਹਨ ਸਿੰਘ ਭੱਟੀ ਆਦਿ ਵੀ ਹਾਜ਼ਰ ਸਨ।