ਵਿਧਾਨ ਸਭਾ ਹਲਕਾ ਡੇਰਾਬਸੀ ਤੋਂ ਆਜ਼ਾਦ ਉਮੀਦਵਾਰ ਦੀਪਇੰਦਰ ਸਿੰਘ ਢਿੱਲੋਂ ਦੇ ਹੱਕ 'ਚ ਅੱਜ ਉਨ੍ਹਾਂ ਦੀ ਧਰਮ ਪਤਨੀ ਰੁਪਿੰਦਰ ਕੌਰ ਢਿੱਲੋਂ, ਭੈਣਾਂ ਲੱਡੀ ਵਿਰਕ ਅਤੇ ਪਿੱਕੀ ਸੰਧੂ ਨੇ ਜ਼ੀਰਕਪੁਰ ਦੇ ਕਈ ਕਲੋਨੀਆਂ ਤੇ ਨਗਰਾਂ ਵਿਚ ਘਰ-ਘਰ ਜਾ ਕੇ ਚੋਣ ਪ੍ਰਚਾਰ ਕੀਤਾ। ਰੁਪਿੰਦਰ ਕੌਰ ਢਿੱਲੋਂ ਨੇ ਏ.ਕੇ.ਐਸ.ਇਨਕਲੇਵ ਫ਼ੇਜ਼ ਇਕ, ਦੋ ਅਤੇ ਤਿੰਨ ਵਿਚ ਘਰ-ਘਰ ਜਾ ਕੇ ਲੋਕਾਂ ਕੋਲੋਂ ਦੀਪਇੰਦਰ ਸਿੰਘ ਢਿੱਲੋਂ ਦੇ ਹੱਕ 'ਚ ਵੋਟਾਂ ਦੀ ਮੰਗ ਕੀਤੀ। ਇਸ ਮੌਕੇ ਉਨ੍ਹਾਂ ਦੇ ਨਾਲ ਸੰਤੋਸ਼ ਕਸ਼ਿਅਪ, ਪਰਮਜੀਤ ਕੌਰ, ਉਰਮਲਾ ਸ਼ਰਮਾ, ਸੁਮਿਤ ਗਰਗ, ਦੀਪਤੀ ਸ਼ਰਮਾ, ਸਰਬਜੀਤ ਸਿੰਘ, ਦਲਬੀਰ ਪਾਲ, ਬਬਲਾ, ਪਵਨ ਗਰਗ, ਜੋਨੀ, ਰਿਆਸਤ ਅਲੀ ਅਤੇ ਨਵਜੋਤ ਸਿੰਘ ਆਦਿ ਵੀ ਹਾਜ਼ਰ ਸਨ।ਦੀਪਇੰਦਰ ਸਿੰਘ ਢਿੱਲੋਂ ਦੀ ਭੈਣ ਲੱਡੀ ਵਿਰਕ ਨੇ ਟੈਲੀਫ਼ੋਨ ਕਲੋਨੀ ਅਤੇ ਸ੍ਰੀ ਗੁਰੂ ਨਾਨਕ ਕਲੋਨੀ ਵਿਚ ਘਰ-ਘਰ ਜਾ ਕੇ ਸੁਆਣੀਆਂ ਨੂੰ ਦੀਪਇੰਦਰ ਸਿੰਘ ਢਿੱਲੋਂ ਦੇ ਚੋਣ ਨਿਸ਼ਾਨ 'ਸਿਲਾਈ ਮਸ਼ੀਨ' 'ਤੇ ਮੋਹਰਾਂ ਲਗਾਉਣ ਦੀ ਅਪੀਲ ਕੀਤੀ। ਉਨ੍ਹਾਂ ਨੇ ਜਜ਼ਬਾਤੀ ਅਪੀਲ ਕਰਦਿਆਂ ਆਖਿਆ ਕਿ, ਸਾਡਾ ਵੀਰ ਪਿਛਲੇ ਲੰਬੇ ਸਮੇਂ ਤੋਂ ਪਰਿਵਾਰ ਅਤੇ ਘਰ ਦੀ ਫ਼ਿਕਰ ਛੱਡ ਕੇ ਹਲਕੇ ਦੀ ਸੇਵਾ ਲਈ ਆਪਣਾ ਸਭ ਕੁਝ ਸਮਰਪਿਤ ਕਰੀ ਬੈਠਾ ਹੈ, ਪਰ ਅੱਜ ਉਨ੍ਹਾਂ ਦੇ ਨਾਲ ਕਾਂਗਰਸ ਪਾਰਟੀ ਨੇ ਧੋਖਾ ਕੀਤਾ ਹੈ। ਜੇਕਰ ਧੋਖਾ ਸਿਰਫ਼ ਢਿੱਲੋਂ ਨਾਲ ਹੁੰਦਾ ਤਾਂ ਵੀ ਬਰਦਾਸ਼ਤ ਹੋ ਸਕਦਾ ਸੀ, ਪਰ ਇਹ ਧੋਖਾ ਸਾਰੇ ਹਲਕੇ ਨਾਲ ਹੋਇਆ ਹੈ, ਕਿਉਂਕਿ ਹਲਕਾ ਵਾਸੀਆਂ ਦੀਆਂ ਆਸਾਂ ਤੇ ਉਮੀਦਾਂ ਦੇ ਉਲਟ ਪੈਰਾਸ਼ੂਟ ਰਾਹੀਂ ਇਥੇ ਅਜਿਹਾ ਉਮੀਦਵਾਰ ਭੇਜਿਆ ਗਿਆ ਹੈ, ਜਿਸ ਦਾ ਹਲਕੇ ਦੇ ਲੋਕਾਂ ਨਾਲ ਕੋਈ ਵੀ ਵਾਹ-ਵਾਸਤਾ ਨਹੀਂ ਹੈ।
ਉਨ੍ਹਾਂ ਆਖਿਆ ਕਿ, ਇਹ ਹਲਕੇ ਦੇ ਲੋਕਾਂ ਦੀ ਗੈਰਤ ਨੂੰ ਚੁਣੌਤੀ ਦਿੱਤੀ ਗਈ ਹੈ ਤੇ ਹਲਕੇ ਦੇ ਲੋਕਾਂ ਨੂੰ ਇਸ ਦਾ ਢੁੱਕਵਾਂ ਜੁਆਬ ਦੇਣ ਲਈ ਤਿਆਰ ਹੋ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਆਖਿਆ ਕਿ, ਦੀਪਇੰਦਰ ਸਿੰਘ ਢਿੱਲੋਂ ਨੇ ਚੋਣ ਲੜਨ ਦਾ ਫ਼ੈਸਲਾ ਖੁਦ ਨਹੀਂ ਕੀਤਾ, ਸਗੋਂ ਹਲਕੇ ਦੇ ਲੋਕਾਂ ਨੇ ਹੀ ਉਨ੍ਹਾਂ ਨੂੰ ਚੋਣ ਲੜਨ ਦਾ ਆਦੇਸ਼ ਦਿੱਤਾ ਸੀ, ਜਿਸ ਨੂੰ ਉਨ੍ਹਾਂ ਖਿੜੇ ਮੱਥੇ ਪ੍ਰਵਾਨ ਕੀਤਾ ਹੈ। ਹੁਣ ਹਲਕੇ ਦੇ ਲੋਕਾਂ ਨੂੰ ਚਾਹੀਦਾ ਹੈ ਕਿ ਉਹ ਆਪਣੀਆਂ ਆਸਾਂ 'ਤੇ ਫ਼ੁੱਲ ਚੜ੍ਹਾਉਣ ਵਾਲੇ ਸਮਰਪਿਤ ਉਮੀਦਵਾਰ ਦਾ ਉਤਸ਼ਾਹ ਤੇ ਆਸਾਂ ਕਾਇਮ ਰੱਖਦਿਆਂ ਬਾਹਰਲਿਆਂ ਨੂੰ ਬੁਰੀ ਤਰ੍ਹਾਂ ਭਜਾਉਣ। ਇਸ ਮੌਕੇ ਉਨ੍ਹਾਂ ਦੇ ਨਾਲ ਨਿਰਮਲਾ ਦੇਵੀ, ਪਰਮਜੀਤ ਕੌਰ, ਸ਼ਿਵਾਨੀ, ਅਫ਼ਸਾਨਾ, ਰੁਪਿੰਦਰ ਗਿੱਲ, ਅਸ਼ਵਨ ਜੈਨ ਅਤੇ ਨਵਜੋਤ ਸਿੰਘ ਆਦਿ ਵੀ ਹਾਜ਼ਰ ਸਨ। ਇਸੇ ਤਰ੍ਹਾਂ ਪਿੱਕੀ ਸੰਧੂ ਨੇ ਬਲਟਾਣਾ ਪਿੰਡ ਵਿਚ ਘਰ-ਘਰ ਜਾ ਕੇ ਦੀਪਇੰਦਰ ਸਿੰਘ ਢਿੱਲੋਂ ਦੇ ਹੱਕ 'ਚ ਚੋਣ ਪ੍ਰਚਾਰ ਕੀਤਾ। ਇਸ ਮੌਕੇ ਉਨ੍ਹਾਂ ਦੇ ਨਾਲ ਹਰਜੀਤ ਸਿੰਘ ਮਿੰਟਾ, ਦਵਿੰਦਰ ਕੌਰ, ਦੀਪ ਸ਼ਿਖਾ, ਸੁਦੇਸ਼ ਕੌਸ਼ਲ, ਰਤਨਜੀਤ ਸਿੰਘ, ਜਸਪਾਲ ਸਿੰਘ ਅਤੇ ਸੰਜੀਵ ਸਿੰਘ ਆਦਿ ਵੀ ਹਾਜ਼ਰ ਸਨ।