ਰਕਸ਼ਾ ਮੰਤਰੀ ਸ਼੍ਰੀ ਰਾਜਨਾਥ ਸਿੰਘ ਨੇ 5 ਫਰਵਰੀ, 2026 ਨੂੰ ਨਵੀਂ ਦਿੱਲੀ ਦੇ ਸਾਊਥ ਬਲਾਕ ਤੋਂ ਅਰਜਨਟੀਨਾ ਦੇ ਮਾਊਂਟ ਐਕੋਨਕਾਗੁਆ ਲਈ ਇੱਕ ਸੰਯੁਕਤ ਅਭਿਆਨ ਨੂੰ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ। 6,961 ਮੀਟਰ ਦੀ ਉਚਾਈ ਵਾਲਾ ਇਹ ਪਹਾੜ ਦੱਖਣ ਅਮਰੀਕਾ ਦੀ ਸਭ ਤੋਂ ਉੱਚੀ ਚੋਟੀ ਅਤੇ ਏਸ਼ੀਆ ਤੋਂ ਬਾਹਰ ਦਾ ਸਭ ਤੋਂ ਉੱਚਾ ਪਹਾੜ ਹੈ। ਇਹ ਸੰਯੁਕਤ ਅਭਿਆਨ ਨਹਿਰੂ ਪਰਬਤਾਰੋਹਣ ਸੰਸਥਾ (ਐੱਨਆਈਐੱਮ), ਉੱਤਰਕਾਸ਼ੀ ਅਤੇ ਜਵਾਹਰ ਪਰਬਤਾਰੋਹਣ ਸੰਸਥਾ ਅਤੇ ਵਿੰਟਰ ਸਪੋਰਟਸ (ਜੇਆਈਐੱਮ ਐਂਡ ਡਬਲਿਊਐੱਸ), ਪਹਿਲਗਾਮ ਦੁਆਰਾ ਸੰਚਾਲਿਤ ਕੀਤਾ ਜਾ ਰਿਹਾ ਹੈ।
ਰਕਸ਼ਾ ਮੰਤਰੀ ਨੇ ਨਹਿਰੂ ਪਰਬਤਾਰੋਹਣ ਸੰਸਥਾ ਅਤੇ ਜਵਾਹਰ ਪਰਬਤਾਰੋਹਣ ਅਤੇ ਵਿੰਟਰ ਸਪੋਰਟਸ ਨੂੰ ਕਰਮਚਾਰੀਆਂ ਨੂੰ ਸਾਹਸ, ਦ੍ਰਿੜ੍ਹਤਾ ਅਤੇ ਸੰਕਲਪ ਨਾਲ ਚੁਣੌਤੀਆਂ ਦਾ ਸਾਹਮਣਾ ਕਰਨ ਲਈ ਤਿਆਰ ਕਰਨ ਦੀ ਸ਼ਲਾਘਾ ਕੀਤੀ। ਟੀਮ ਨੂੰ ਸ਼ੂਭਕਾਮਨਾਵਾਂ ਦਿੰਦੇ ਹੋਏ ਉਨ੍ਹਾਂ ਨੇ ਕਿਹਾ ਕਿ ਇਸ ਪਹੁੰਚ ਤੋਂ ਬਾਹਰ ਦੀ ਚੋਟੀ ‘ਤੇ ਚੜ੍ਹਾਈ ਕਰਨਾ ਸਿਰਫ ਸਰੀਰਕ ਧੀਰਜ ਦੀ ਪ੍ਰੀਖਿਆ ਨਹੀਂ ਹੈ, ਸਗੋਂ ਅਗਵਾਈ, ਟੀਮ ਵਰਕ ਅਤੇ ਮਾਨਸਿਕ ਦ੍ਰਿੜ੍ਹਤਾ ਦੀ ਸੱਚੀ ਪ੍ਰੀਖਿਆ ਹੈ, ਜੋ ਦੇਸ਼ ਦੇ ਸਭ ਤੋਂ ਉੱਤਮ ਪਰਬਤਾਰੋਹੀਆਂ ਦੀ ਪਛਾਣ ਹੈ।
ਉਨ੍ਹਾਂ ਨੇ ਭਰੋਸਾ ਪ੍ਰਗਟ ਕੀਤਾ ਕਿ ਮੈਂਬਰ ਦੱਖਣ ਅਮਰੀਕਾ ਦੇ ਸਰਬਉੱਚ ਟੌਪ ਅਤੇ ਏਸ਼ੀਆ ਦੇ ਬਾਹਰ ਸਭ ਤੋਂ ਉੱਚੇ ਪਹਾੜ ‘ਤੇ ਚੜ੍ਹਾਈ ਨੂੰ ਸਫਲਤਾਪੂਰਨ ਪੂਰਾ ਕਰਨਗੇ ਅਤੇ ਦੇਸ਼ ਦਾ ਮਾਣ ਵਧਾਉਣਗੇ। 6 ਮੈਂਬਰੀ ਟੀਮ ਵਿੱਚ ਉੱਚ ਸਿਖਲਾਈ ਪ੍ਰਾਪਤ ਇੰਸਟ੍ਰਕਟਰ ਸ਼ਾਮਲ ਹਨ - ਕਰਨਲ ਹੇਮ ਚੰਦਰ ਸਿੰਘ, ਕੈਪਟਨ ਜੀ ਸੰਤੋਸ਼ ਕੁਮਾਰ, ਸ਼੍ਰੀ ਦੀਪ ਬਹਾਦੁਰ ਸਾਹੀ, ਸ਼੍ਰੀ ਵਿਨੋਦ ਗੁਸੈਨ, ਨਾਇਬ ਸਿਪਾਹੀ ਭੁਪਿੰਦਰ ਸਿੰਘ ਅਤੇ ਹਵਲਦਾਰ ਰਮੇਸ਼ ਕੁਮਾਰ।
ਇਹ ਯਾਤਰਾ 6 ਫਰਵਰੀ, 2026 ਨੂੰ ਸ਼ੁਰੂ ਹੋਵੇਗੀ ਅਤੇ ਅਭਿਆਨ ਦੇ ਮਹੀਨੇ ਦੇ ਅੰਤ ਤੱਕ ਖਤਮ ਹੋਣ ਦੀ ਉਮੀਦ ਹੈ। ਐਕੋਨਕਾਗੁਆ ਪਹਾੜ ‘ਤੇ ਪ੍ਰਾਪਤ ਗਿਆਨ, ਅਨੁਭਵ ਅਤੇ ਆਤਮਵਿਸ਼ਵਾਸ ਦੇਸ਼ ਭਰ ਦੇ ਨੌਜਵਾਨਾਂ, ਹਥਿਆਰਬੰਦ ਬਲਾਂ ਦੇ ਕਰਮਚਾਰੀਆਂ ਅਤੇ ਸਾਹਸੀ ਗਤੀਵਿਧੀਆਂ ਦੇ ਸ਼ੌਕੀਨਾਂ ਦੇ ਸੁਰੱਖਿਅਤ, ਸਸ਼ਕਤ ਅਤੇ ਵਧੇਰੇ ਪ੍ਰਭਾਵੀ ਟ੍ਰੇਨਿੰਗ ਵਿੱਚ ਪ੍ਰਤੱਖ ਤੌਰ ‘ਤੇ ਯੋਗਦਾਨ ਦੇਵੇਗਾ। ਇਹ ਅਭਿਆਨ ਆਲਮੀ ਪੱਧਰ ‘ਤੇ ਸਾਹਸੀ ਗਤੀਵਿਧੀਆਂ ਅਤੇ ਪਹਾੜੀ ਖੋਜ ਵਿੱਚ ਭਾਰਤ ਦੀ ਵਧ ਰਹੀ ਮੌਜੂਦਗੀ ਦਾ ਪ੍ਰਤੀਕ ਵੀ ਹੈ।