ਪੰਜਾਬ ਇੰਜੀਨੀਅਰਿੰਗ ਕਾਲਜ (ਡੀਮਡ ਟੂ ਬੀ ਯੂਨੀਵਰਸਿਟੀ), ਚੰਡੀਗੜ੍ਹ ਦੇ ਗਣਿਤ ਵਿਭਾਗ ਵੱਲੋਂ ਅੱਜ ਰੀਅਲ ਐਨਾਲਿਸਿਸ ਅਤੇ ਗਰੂਪ ਥਿਊਰੀ ਵਿਸ਼ਿਆਂ ’ਤੇ ਛੇ ਦਿਨਾਂ ਦੀ ਟੀਚਰਜ਼ ਐਨਰਿੱਚਮੈਂਟ ਵਰਕਸ਼ਾਪ (ਟੀਈਡਬਲਯੂ) ਦਾ ਸ਼ਾਨਦਾਰ ਉਦਘਾਟਨ ਕੀਤਾ ਗਿਆ। ਇਹ ਵਰਕਸ਼ਾਪ ਨੈਸ਼ਨਲ ਸੈਂਟਰ ਫੋਰ ਮੈਥਮੈਟਿਕਸ ਆਈਆਈਟੀ ਬੰਬੇ ਅਤੇ ਟੀਆਈਐਫ਼ਆਰ ਮੁੰਬਈ ਦਾ ਸਾਂਝਾ ਕੇਂਦਰ ਦੇ ਸਹਿਯੋਗ ਨਾਲ ਆਯੋਜਿਤ ਕੀਤੀ ਜਾ ਰਹੀ ਹੈ।
ਉਦਘਾਟਨੀ ਸਮਾਰੋਹ ਵਿੱਚ ਪ੍ਰੋ. ਆਸ਼ਾ ਗੁਪਤਾ (ਮੁੱਖੀ, ਗਣਿਤ ਵਿਭਾਗ), ਡਾ. ਰੱਤਨ ਲਾਲ, ਅਤੇ ਡਾ. ਅੰਕਿਤ ਕੁਮਾਰ ਨੇ ਭਾਗੀਦਾਰਾਂ ਦਾ ਗਰਮਜੋਸ਼ੀ ਨਾਲ ਸਵਾਗਤ ਕੀਤਾ। ਇਹ ਪੂਰਾ ਆਯੋਜਨ ਪੇਕ ਦੇ ਮਾਣਯੋਗ ਡਾਇਰੈਕਟਰ ਪ੍ਰੋ. ਰਾਜੇਸ਼ ਕੁਮਾਰ ਭਾਟੀਆ ਦੀ ਪੈਟਰੋਨਸ਼ਿਪ ਹੇਠ ਕੀਤਾ ਜਾ ਰਿਹਾ ਹੈ। ਪਹਿਲੇ ਦਿਨ ਵਿਸ਼ੇਸ਼ ਵਕਤਾ ਵਜੋਂ ਡਾ. ਸੁਰਿੰਦਰ ਪਾਲ ਸਿੰਘ ਕੈਥ (ਪੀਯੂ, ਚੰਡੀਗੜ੍ਹ) ਵੀ ਹਾਜ਼ਰ ਰਹੇ।
ਇਸ ਵਰਕਸ਼ਾਪ ਦਾ ਮੁੱਖ ਉਦੇਸ਼ ਕਾਲਜ ਪੱਧਰ ਦੇ ਗਣਿਤ ਅਧਿਆਪਕਾਂ ਨੂੰ ਰੀਅਲ ਐਨਾਲਿਸਿਸ ਅਤੇ ਗਰੂਪ ਥਿਊਰੀ ਦੀਆਂ ਉੱਚ ਪੱਧਰੀ ਅਤੇ ਬੁਨਿਆਦੀ ਧਾਰਨਾਵਾਂ ਦਾ ਵਿਸਤ੍ਰਿਤ ਗਿਆਨ ਪ੍ਰਦਾਨ ਕਰਨਾ ਹੈ। ਛੇ ਦਿਨਾਂ ਦੇ ਇਸ ਸਕਾਲਰਲੀ ਪ੍ਰੋਗਰਾਮ ਵਿੱਚ ਭਾਗੀਦਾਰਾਂ ਨੂੰ ਲਿਮਿਟਸ, ਕਨਟੀਨਿਊਟੀ, ਡਿਫਰੈਨਸ਼ਿਏਬਿਲਿਟੀ, ਸੀਕੁਐਂਸ ਦੀ ਕਨਵਰਜੈਂਸ ਆਦਿ ਵਿਸ਼ਿਆਂ ਬਾਰੇ ਗਹਿਰੇ ਅਤੇ ਤਕਨੀਕੀ ਵਿਵਰਣ ਦਿੱਤੇ ਜਾਣਗੇ।
ਇਸ ਦੇ ਨਾਲ ਗਰੂਪ ਥਿਊਰੀ ਦੇ ਮੁੱਖ ਸਿਧਾਂਤ, ਇਸ ਦੀ ਸੰਰਚਨਾ ਅਤੇ ਪ੍ਰੂਫ਼ ਦੇ ਤਰਕਸ਼ੀਲ ਮਾਡਲਾਂ ਦੀ ਵੀ ਵਿਗਿਆਨਕ ਢੰਗ ਨਾਲ ਚਰਚਾ ਕੀਤੀ ਜਾਵੇਗੀ। ਵਰਕਸ਼ਾਪ ਦਾ ਮਹੱਤਵਪੂਰਨ ਹਿੱਸਾ ਚਰਚਾ ਸੈਸ਼ਨ, ਟਿਊਟੋਰਿਅਲ ਸੈਸ਼ਨ, ਅਤੇ ਇੰਟਰਐਕਟਿਵ ਪ੍ਰੋਬਲਮ-ਸੋਲਵਿੰਗ ਸੈਸ਼ਨ ਹਨ, ਜਿਨ੍ਹਾਂ ਵਿਚ ਭਾਗੀਦਾਰ ਆਪਣੇ ਪ੍ਰਸ਼ਨਾਂ 'ਤੇ ਸਿੱਧੀ ਗੱਲਬਾਤ ਕਰ ਸਕਣਗੇ ਅਤੇ ਵਿਸ਼ੇਸ਼ਗਿਆਂ ਦੀ ਰਹਿਨੁਮਾਈ ਨਾਲ ਗਣਿਤਕ ਧਾਰਨਾਵਾਂ ਨੂੰ ਹੋਰ ਮਜ਼ਬੂਤ ਕਰ ਸਕਣਗੇ।
ਇਹ ਵਰਕਸ਼ਾਪ ਅਧਿਆਪਕਾਂ ਨੂੰ ਨਾ ਸਿਰਫ਼ ਵਿਸ਼ੇ ਦਾ ਗਿਆਨ ਦੇਵੇਗੀ, ਸਗੋਂ ਉਨ੍ਹਾਂ ਨੂੰ ਅਮੂਰਤ ਗਣਿਤ ਨੂੰ ਆਸਾਨ ਅਤੇ ਤਰਕਸ਼ੀਲ ਢੰਗ ਨਾਲ ਸਮਝਾਉਣ ਦੀਆਂ ਨਵੀਆਂ ਤਕਨੀਕਾਂ ਵੀ ਸਿਖਾਏਗੀ। ਆਉਣ ਵਾਲੇ ਦਿਨਾਂ ਵਿੱਚ, ਇਸ ਵਰਕਸ਼ਾਪ ਵਿੱਚ ਪ੍ਰਸਿੱਧ ਵਕਤਾ—ਪ੍ਰੋ. ਦਿਨੇਸ਼ ਖੁਰਾਨਾ (ਪੀਯੂ, ਚੰਡੀਗੜ੍ਹ), ਡਾ. ਵਰਧਰਾਜ ਰਵੀ ਸ੍ਰੀਨਿਵਾਸਨ (IISER, ਮੋਹਾਲੀ), ਡਾ. ਸੁਰਿੰਦਰ ਪਾਲ ਸਿੰਘ ਕੈਥ (ਪੀਯੂ, ਚੰਡੀਗੜ੍ਹ) ਅਤੇ ਡਾ. ਸੌਰਭ ਵਰਮਾ (ਆਈਆਈਆਈਟੀ, ਅਲਾਹਾਬਾਦ) ਆਪਣੇ ਵਿਸ਼ੇਸ਼ ਲੈਕਚਰ ਦੇਣਗੇ, ਜੋ ਭਾਗੀਦਾਰਾਂ ਲਈ ਬਹੁਤ ਹੀ ਲਾਭਕਾਰੀ ਸਾਬਤ ਹੋਣਗੇ।