ਹਲਕਾ ਜਗਰਾਉਂ ਅਤੇ ਹਲਕਾ ਰਾਏਕੋਟ ਦੇ ਨਾਲ-ਨਾਲ ਮਾਲਵਾ ਖੇਤਰ ਨੂੰ ਦੁਆਬੇ ਨਾਲ ਜੋੜਨ ਵਾਲਾ ਅਬੋਹਰ ਬ੍ਰਾਂਚ ਅਖਾੜਾ ਨਹਿਰ ਦਾ ਪ੍ਰਮੁੱਖ ਪੁਲ, ਜੋ ਕੁੱਝ ਸਮਾਂ ਪਹਿਲਾਂ ਬਣਨਾਂ ਸ਼ੁਰੂ ਹੋ ਗਿਆ ਸੀ, ਪਰੰਤੂ ਧਰਤੀ ਵਿੱਚ ਪੱਥਰ ਆ ਜਾਣ ਕਾਰਨ ਕੰਮ ਬੰਦ ਹੋ ਗਿਆ ਸੀ। ਇਸ ਪੁਲ ਦਾ ਹਲਕਾ ਜਗਰਾਉਂ ਦੇ ਵਿਧਾਇਕਾ ਬੀਬੀ ਸਰਵਜੀਤ ਕੌਰ ਮਾਣੂੰਕੇ ਵੱਲੋਂ ਮੌਕੇ ਤੇ ਪਹੁੰਚਕੇ ਅਧਿਕਾਰੀਆਂ ਦੀ ਮੌਜੂਦਗੀ ਵਿੱਚ ਲੱਡੂ ਵੰਡਕੇ ਕੰਮ ਮੁੜ ਸ਼ੁਰੂ ਕਰਵਾ ਦਿੱਤਾ ਗਿਆ ਹੈ।
ਮੌਕੇ ਤੇ ਜੇ.ਸੀ.ਬੀ.ਮਸ਼ੀਨ ਵੱਲੋਂ ਖੁਦਾਈ ਵੀ ਸ਼ੁਰੂ ਕਰ ਦਿੱਤੀ ਹੈ। ਇੱਥੇ ਦੱਸਣਯੋਗ ਹੈ ਕਿ ਅਖਾੜਾ ਨਹਿਰ ਉਪਰ ਬਣਿਆ ਪੁਰਾਣਾ ਤੇ ਭੀੜਾ ਪੁਲ 38 ਸਾਲ ਪਹਿਲਾਂ ਆਪਣੀ ਮਿਆਦ ਪੁਗਾ ਚੁੱਕਾ ਸੀ ਅਤੇ ਇਸ ਪੁਲ ਤੇ ਲੱਗਦੇ ਵੱਡੇ ਜ਼ਾਮ ਲੋਕਾਂ ਦਾ ਲੜਾਈ-ਝਗੜਾ ਵੀ ਰਹਿੰਦਾ ਸੀ ਅਤੇ ਆਪਣੇ ਕੰਮ ਤੇ ਸਮੇਂ ਸਿਰ ਪਹੁੰਚਣ ਲਈ ਲੋਕਾਂ ਨੂੰ ਜ਼ਾਮ ਵੱਡੀ ਸਮੱਸਿਆ ਦਾ ਸਾਹਮਣਾ ਵੀ ਕਰਨਾਂ ਪੈਦਾ ਸੀ।
ਲੋਕਾਂ ਦੀ ਵੱਡੀ ਸਮੱਸਿਆ ਹੱਲ ਕਰਨ ਲਈ ਵਿਧਾਇਕਾ ਬੀਬੀ ਸਰਵਜੀਤ ਕੌਰ ਮਾਣੂੰਕੇ ਯਤਨ ਕਰਕੇ ਮੌਜ਼ੂਦਾ ਪੰਜਾਬ ਸਰਕਾਰ ਪਾਸੋਂ ਨਵਾਂ ਪੁਲ ਮੰਨਜ਼ੂਰ ਕਰਵਾਕੇ ਅੱਠ ਕਰੋੜ ਦੇ ਲਗਭਗ ਪੈਸਾ ਵੀ ਜਾਰੀ ਕਰਵਾ ਲਿਆ ਗਿਆ ਸੀ ਅਤੇ ਇਸਦਾ ਕੰਮ ਵੀ ਸ਼ੁਰੂ ਹੋ ਗਿਆ ਸੀ। ਪਰੰਤੂ ਜਦੋਂ ਨਵੇਂ ਪੁੱਲ ਨੂੰ ਬਨਾਉਣ ਦਾ ਕੰਮ ਸ਼ੁਰੂ ਹੋਇਆ ਤਾਂ ਪਿੱਲਰ ਬਨਾਉਣ ਲਈ ਕੀਤੀ ਜਾ ਰਹੀ ਖੁਦਾਈ ਦੌਰਾਨ ਧਰਤੀ ਵਿੱਚ ਪੁਰਾਣੇ ਘਰਾਟਾਂ ਵਾਲੇ ਪੱਥਰ ਆ ਗਏ ਤੇ ਡਰਿਲਿੰਗ ਕਰਨ ਦੇ ਬਾਵਜੂਦ ਵੀ ਅੱਗੇ ਖੁਦਾਈ ਨਹੀਂ ਹੋ ਸਕੀ ਸੀ।
ਬੀਬੀ ਮਾਣੂੰਕੇ ਵੱਲੋਂ ਉਕਤ ਪੁਲ ਦੇ ਨਿਰਮਾਣ ਦੀ ਗੰਭੀਰਤਾ ਨੂੰ ਵੇਖਦੇ ਹੋਏ ਲੋਕ ਨਿਰਮਾਣ ਵਿਭਾਗ ਦੇ ਅਧਿਕਾਰੀਆਂ ਨਾਲ ਮਿਲਕੇ ਪੁੱਲ ਦਾ ਨਵਾਂ ਐਸਟੀਮੇਟ ਅਤੇ ਨਕਸ਼ਾ ਆਦਿ ਮੁੜ ਤਿਆਰ ਕਰਵਾਕੇ ਪੰਜਾਬ ਸਰਕਾਰ ਕੋਲੋਂ ਮੁੜ ਪਾਸ ਕਰਵਾ ਲਏ ਗਏ ਹਨ ਅਤੇ ਨਵੇਂ ਪੁਲ ਦੀ ਡਿਜ਼ਾਇਨਿੰਗ ਕਰਵਾ ਲਈ ਗਈ ਹੈ। ਉਹਨਾਂ ਕਿਹਾ ਕਿ ਇਹ ਪੁਲ ਪਹਿਲਾਂ 48 ਮੀਟਰ ਲੰਬਾ ਬਣਨਾਂ ਸੀ ਅਤੇ ਹੁਣ ਇਹ ਸਾਢੇ 55 ਮੀਟਰ ਲੰਬਾ ਬਣੇਗਾ।
ਇਸ ਮੌਕੇ ਬੀਬੀ ਸਰਵਜੀਤ ਕੌਰ ਮਾਣੂੰਕੇ ਨੇ ਆਖਿਆ ਕਿ ਅਖਾੜਾ ਨਹਿਰ ਦਾ ਇਹ ਨਵਾਂ ਪੁਲ ਇੱਕ ਸਾਲ ਦੇ ਅੰਦਰ ਅੰਦਰ ਹਰ ਹਾਲਤ ਵਿੱਚ ਮੁਕੰਮਲ ਕਰਵਾਇਆ ਜਾਵੇਗਾ ਅਤੇ ਲੋਕਾਂ ਦੀ ਵੱਡੀ ਸਮੱਸਿਆ ਦਾ ਹੱਲ ਕੀਤਾ ਜਾਵੇਗਾ। ਉਹਨਾਂ ਕਿਹਾ ਕਿ ਕੁੱਝ ਲੋਕ ਜਾਣ-ਬੁੱਝਕੇ ਹਲਕੇ ਦੇ ਕੰਮਾਂ ਪ੍ਰਤੀ ਮਨਘੜਤ ਪੋਸਟਾਂ ਪਾਕੇ ਅਤੇ ਕੂੜ-ਪ੍ਰਚਾਰ ਕਰਕੇ ਭੋਲੇ-ਭਾਲੇ ਆਮ ਲੋਕਾਂ ਨੂੰ ਗੁੰਮਰਾਹ ਕਰ ਰਹੇ ਹਨ। ਇਸ ਲਈ ਲੋਕ ਭਰੋਸਾ ਬਣਾਕੇ ਰੱਖਣ ਅਸੀਂ ਹਲਕੇ ਦੀਆਂ ਸਾਰੀਆਂ ਸਮੱਸਿਆਵਾਂ ਦਾ ਹੱਲ ਕਰਨ ਲਈ ਯਤਨਸ਼ੀਲ ਹਾਂ ਅਤੇ ਲਗਾਤਾਰ ਜੁਟੇ ਹੋਏ ਹਨ।
ਪਰੰਤੂ ਕੁੱਝ ਤਕਨੀਕੀ ਅਤੇ ਵਿਭਾਗੀ ਪ੍ਰਕਿਰਿਆਵਾਂ ਵਿੱਚੋਂ ਗੁਜ਼ਰਨ ਕਾਰਨ ਹਰੇਕ ਕੰਮ ਨੂੰ ਮੁਕੰਮਲ ਕਰਨ ਵਿੱਚ ਸਮਾਂ ਜ਼ਰੂਰ ਲੱਗਦਾ ਹੈ ਅਤੇ ਜਗਰਾਉਂ ਹਲਕੇ ਦੀ ਨੁਹਾਰ ਬਦਲਕੇ ਰਹਾਂਗੇ। ਬੀਬੀ ਮਾਣੂੰਕੇ ਨੇ ਆਖਿਆ ਕਿ ਨਹਿਰ ਦੇ ਪੁਲ ਤੋਂ ਇਲਾਵਾ ਜਗਰਾਉਂ ਸ਼ਹਿਰ ਦੇ ਕਮਲ ਚੌਂਕ ਅਤੇ ਪੁਰਾਣੀ ਦਾਣਾ ਮੰਡੀ ਵਿੱਚ ਖੜਦੇ ਬਰਸਾਤੀ ਪਾਣੀ ਦੀ ਸਮੱਸਿਆ ਹੱਲ ਕਰਨ ਲਈ ਪੰਜਾਬ ਸਰਕਾਰ ਪਾਸੋਂ ਪ੍ਰੋਜ਼ੈਕਟ ਮੰਨਜੂਰ ਹੋ ਚੁੱਕਾ ਹੈ ਅਤੇ ਪੈਸਾ ਜ਼ਾਰੀ ਹੋਣ ਉਪਰੰਤ ਸ਼ਹਿਰ ਵਾਸੀਆਂ ਦੀ ਸਮੱਸਿਆ ਵੀ ਜ਼ਲਦੀ ਹੀ ਹੱਲ ਕਰ ਦਿੱਤੀ ਜਾਵੇਗੀ।
ਉਹਨਾਂ ਆਖਿਆ ਕਿ ਜਗਰਾਉਂ ਸ਼ਹਿਰ ਦੇ 220 ਕੇਵੀ ਬਿਜਲੀ ਗਰਿੱਡ ਦੀ ਬਿਲਡਿੰਗ ਨੂੰ ਵੱਡਾ ਕਰਨ ਦਾ ਕੰਮ ਵੀ ਕੁੱਝ ਦਿਨਾਂ ਤੱਕ ਸ਼ੁਰੂ ਕਰ ਦਿੱਤਾ ਜਾਵੇਗਾ ਅਤੇ ਹਲਕੇ ਦੀਆਂ ਸੜਕਾਂ ਦੇ ਨਵੀਨੀਕਰਨ ਦੇ ਨਾਲ ਨਾਲ ਸ਼ਹਿਰ ਦੇ ਰਾਏਕੋਟ ਰੋਡ ਉਪਰ ਡੇਢ ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਿਆਂ ਅਤਿ-ਆਧੂਨਿਕ ਲਾਲਾ ਲਾਜਪਤ ਰਾਏ ਭਵਨ ਲੋਕਾਂ ਦੀ ਸਹੂਲਤ ਲਈ ਖੋਲ ਦਿੱਤਾ ਜਾਵੇਗਾ।
ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਪੀ.ਡਬਲਿਯੂ.ਡੀ.ਵਿਭਾਗ ਦੇ ਐਸ.ਡੀ.ਓ.ਸਹਿਜ਼ਪ੍ਰੀਤ ਸਿੰਘ ਮਾਂਗਟ, ਕਰਮਜੀਤ ਸਿੰਘ ਜੇਈ, ਮਿਸ:ਜਸਕਿਰਨ ਕੌਰ ਜੇਈ, ਮਿਸ:ਵੀਰਪਾਲ ਕੌਰ ਜੇਈ, ਪਵਨ ਕੁਮਾਰ ਸੁਪਰਵਾਈਜ਼ਰ ਠੇਕੇਦਾਰ, ਵੀਨਾਂ ਕੁਮਾਰੀ ਬੀ.ਡੀ.ਪੀ.ਓ.ਜਗਰਾਉਂ, ਜਸਵੀਰ ਸਿੰਘ ਏ.ਪੀ.ਓ.ਨਰੇਗਾ, ਕੋਆਰਡੀਨੇਟਰ ਕਮਲਜੀਤ ਸਿੰਘ ਕਮਾਲਪੁਰਾ, ਨਿਰਭੈ ਸਿੰਘ ਕਮਾਲਪੁਰਾ, ਸੁਖਦੇਵ ਸਿੰਘ ਕਾਉਂਕੇ, ਮਿੰਟੂ ਕਾਉਂਕੇ, ਗੁਰਚਰਨ ਸਿੰਘ ਰਿਟਾ:ਜੇਈ, ਬਲਵੰਤ ਸਿੰਘ ਮੋਰਟਾਰ ਮੇਟ ਆਦਿ ਵੀ ਹਾਜ਼ਰ ਸਨ।