ਪੰਜਾਬੀ ਗੀਤਕਾਰੀ ਵਿੱਚ ਸਨਮਾਨਯੋਗ ਨਾਂ ਸਥਾਪਤ ਕਰ ਚੁੱਕੇ ਗੀਤਕਾਰ ਤੇ ਅਦਾਕਾਰ ਮਲਕੀਅਤ ਮੀਤ ਹੁਣ ਅਦਾਕਾਰੀ ਖੇਤਰ ਵਿੱਚ ਵੀ ਆਪਣੀ ਪੁਖਤਾ ਪਹਿਚਾਣ ਸਥਾਪਤ ਕਰਦੇ ਜਾ ਰਹੇ ਹਨ। ਕੁਝ ਦਿਨ ਪਹਿਲਾਂ ਰਿਲੀਜ ਹੋਈ ਪੰਜਾਬੀ ਫਿਲਮ “ਪਿੰਡ ਅਮਰੀਕਾ” ਵਿੱਚ ਆਪਣੀ ਅਦਾਕਾਰੀ ਨਾਲ ਚਰਚਾ ਵਿੱਚ ਆਏ ਮਲਕੀਅਤ ਮੀਤ ਹੁਣ ਨਿਰਦੇਸ਼ਕ ਕਵੀ ਰਾਜ ਦੀ ਫਿਲਮ “ਸਰਾਭਾ” ਨਾਲ ਚਰਚਾ ਵਿੱਚ ਹਨ। 3 ਨਵੰਬਰ ਨੂੰ ਰਿਲੀਜ ਹੋ ਰਹੀ ਇਸ ਫ਼ਿਲਮ ਵਿੱਚ ਜਿੱਥੇ ਉਹਨਾਂ ਇੱਕ ਸ਼ਾਨਦਾਰ ਭੂਮਿਕਾ ਨਿਭਾਈ ਹੈ ਉੱਥੇ ਉਹ ਇਸ ਫਿਲਮ ਦੇ ਸਹਾਇਕ ਨਿਰਦੇਸ਼ਕ ਵੀ ਹਨ।
ਉਹ ਦੱਸਦੇ ਹਨ ਕਿ ਉਹਨਾਂ ਆਪਣੀ ਸ਼ੁਰੂਆਤ ਬਤੌਰ ਗੀਤਕਾਰ ਕੀਤੀ ਸੀ। ਮਨਮੋਹਨ ਵਾਰਸ ਦੇ ਚਰਚਿਤ ਗੀਤ ‘’ਤੇਰੀ ਚੜ੍ਹਦੀ ਜਵਾਨੀ ਨੇ ਲੁੱਟਿਆ ਸ਼ਹਿਰ ਸਾਰੇ ਦਾ ਸਾਰਾ, ਤੂੰ ਇਸ਼ਕੇ ਨੂੰ ਰੋਗ ਦੱਸਦੀ, ਯਾਰ ਡਰਾਇਵਰ ਦੀ ਪੱਕੀ ਰੂਟ ਨਾਲ ਯਾਰੀ’’ , ਵਰਗੇ ਅਨੇਕਾਂ ਚਰਚਿਤ ਗੀਤਾਂ ਦੇ ਲੇਖਕ ਮਲਕੀਅਤ ਮੀਤ ਭਾਵੇਂ ਕਈ ਸਾਲਾਂ ਤੋਂ ਅਮਰੀਕਾ ਵਿੱਚ ਰਹਿ ਰਹੇ ਹਨ ਪਰੰਤੂ ਉਹਨਾਂ ਦਾ ਦਿੱਲ ਹਰ ਵੇਲੇ ਪੰਜਾਬ ਦੇ ਵਿਚ ਧੜਕਦਾ ਹੈ। ਉਸਨੇ ਆਪਣੇ ਗੀਤਾਂ ਰਾਹੀਂ ਪੰਜਾਬ ਦੀ ਮਿੱਟੀ ਦੀ ਖੁਸ਼ਬੂ ਨੂੰ ਬੜ੍ਹੀ ਸਹਿਜਤਾ ਨਾਲ ਬਿਆਨ ਕੀਤਾ ਹੈ। ਮਲਕੀਅਤ ਮੀਤ ਦਾ ਕਲਾ ਸ਼ਫ਼ਰ ਬੜ੍ਹਾ ਹੀ ਦਿਲਚਸਪ ਹੈ। ਉਸਨੇ ਇੱਕ ਬਾਲ ਕਲਾਕਾਰ ਵਜੋਂ ਅਦਾਕਾਰੀ ਖੇਤਰ ਵਿੱਚ ਪਰਵੇਸ਼ ਕੀਤਾ।
ਜਲੰਧਰ ਦੂਰਦਰਸ਼ਨ ਤੋਂ ਉਸਨੇ ਇੱਕ ਬਾਲ ਕਲਾਕਾਰ ਵਜੋਂ “ਰੈਣ ਬਸੇਰਾ , ਬੁਨਿਆਦ, ਸਫ਼ਰ, ਪੀਲੇ ਪੱਤੇ ਬੋਹੜ ਦੇ, ਅਮਨ” ਆਦਿ ਅਨੇਕਾਂ ਨਾਟਕਾਂ ਵਿੱਚ ਅਦਾਕਾਰੀ ਵਿਖਾਈ। ਦੁਆਬਾ ਕਾਲਜ ਪੜਦਿਆਂ ਚੜ੍ਹਦੀ ਜਵਾਨੀ ਦੇ ਦਿਨਾਂ ਚ ਉਹ ਕਹਾਣੀਆਂ ਅਤੇ ਗੀਤ ਲਿੱਖਣ ਲੱਗਿਆ। ਉਸਦੇ ਗੀਤਾਂ ਨੂੰ ਮਨਮੋਹਨ ਵਾਰਸ, ਕਮਲਜੀਤ, ਸੋਨੂ ਨਿਗਮ, ਜਸਵੀਰ ਜੱਸੀ, ਜਸਪਿੰਦਰ ਨਰੂਲਾ, ਮਲਕੀਤ ਸਿੰਘ ਯੂ ਕੇ ਅਤੇ ਰੈਪ ਥਿੰਦ ਨੇ ਗਾਇਆ ਹੈ। ਹੌਲੀ ਹੌਲੀ ਉਸਦਾ ਰੁਝਾਨ ਡਾਇਲਾਗ ਅਤੇ ਫ਼ਿਲਮ ਲੇਖਣੀ ਵੱਲ ਵੀ ਹੋ ਗਿਆ। ਕਾਲਜ ਦੇ ਡਰਾਮਾ ਵਿਭਾਗ ਦਾ ਉਹ ਸਰਗਰਮ ਕਲਾਕਾਰ ਰਿਹਾ।
ਇਸ ਦੌਰਾਨ ਉਸਨੇ ਅਨੇਕਾਂ ਨਾਟਕਾਂ ਦਾ ਸਫ਼ਲ ਮੰਚਨ ਕੀਤਾ। ਮਲਕੀਅਤ ਮੀਤ ਦੱਸਦਾ ਹੈ ਕਿ ਭਾਈ ਗੁਰਸ਼ਰਨ ਸਿੰਘ ਜੀ ਨਾਲ ਉਸਨੇ ਤਿੰਨ ਸਾਲ ਲਗਾਤਾਰ ਨਾਟਕ ਖੇਡੇ , ਜਿਥੋਂ ਉਸਨੇ ਕਲਾ ਦੀਆਂ ਬਾਰੀਕੀਆਂ ਦਾ ਡੂੰਘਾ ਗਿਆਨ ਹਾਸਲ ਕੀਤਾ। ਫ਼ਿਲਮਾਂ ਦੀ ਗੱਲ ਕਰੀਏ ਤਾਂ ਦਿਲਜੀਤ ਦੁਸ਼ਾਂਝ ਨਾਲ ਉਸਦੀ ਪਹਿਲੀ ਫ਼ਿਲਮ “ਦ ਲਾਇਨ ਆਫ ਪੰਜਾਬ” ਸੀ ਜਿਸ ਵਿਚ ਉਸਨੇ ਇੰਦਰ ਮੋਹਨ ਦਾ ਨੈਗੇਟਿਵ ਕਿਰਦਾਰ ਨਿਭਾਇਆ। ਉਸਤੋਂ ਬਾਅਦ ਜਸਵੀਰ ਜੱਸੀ ਨਾਲ “ਖੁਸ਼ੀਆਂ, ਰਹੇ ਚੜ੍ਹਦੀ ਕਲਾ ਪੰਜਾਬ ਦੀ,” ਪੁਨੀਤ ਇਸ਼ਰ ਅਤੇ ਸਲਮਾਨ ਖਾਨ ਨਾਲ “ਆਈ.ਐਮ.ਸਿੰਘ”, ਅਮਰ ਨੂਰੀ ਨਾਲ “ਪਿੰਡ ਅਮਰੀਕਾ” ਆਦਿ ਫ਼ਿਲਮਾਂ ਵਿੱਚ ਯਾਦਗਾਰੀ ਕਿਰਦਾਰ ਨਿਭਾਏ।
ਗਿੱਪੀ ਗਰੇਵਾਲ ਨਾਲ ਫ਼ਿਲਮ “ਛਿੰਦਾ ਛਿੰਦਾ ਨੋ ਪਾਪਾ” ਵਿੱਚ ਵੀ ਮਲਕੀਅਤ ਮੀਤ ਦਾ ਚੰਗਾ ਕਿਰਦਾਰ ਹੈ। ਇਨ੍ਹੀਂ ਦਿਨੀਂ ਮਲਕੀਤ ਮੀਤ ਦੀ ਗੱਦਰ ਲਹਿਰ ਦੇ ਅਣਛੂਹੇ ਪਹਿਲੂਆਂ ਅਧਾਰਤ ਫ਼ਿਲਮ “ਸਰਾਭਾ” ਵੀ ਰਿਲੀਜ਼ ਹੋ ਰਹੀ ਹੈ। ਜਿਸ ਵਿੱਚ ਉਸਨੇ ਜੇਲ੍ਹਰ ਸੁੱਚਾ ਸਿੰਘ ਦਾ ਕਿਰਦਾਰ ਨਿਭਾਇਆ ਹੈ। ਹਾਲੀਵੁੱਡ ਨਿਰਦੇਸ਼ਕ ਕਵੀ ਰਾਜ ਦੀ ਇਹ ਫ਼ਿਲਮ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੀ ਜ਼ਿੰਦਗੀ ਦੇ ਅਣਫੋਲੇ ਪੰਨਿਆ ਨੂੰ ਪੇਸ਼ ਕਰੇਗੀ। ਮਲਕੀਅਤ ਮੀਤ ਨੇ ਦੱਸਿਆ ਕਿ ਆਉਣ ਵਾਲੇ ਦਿਨਾਂ ਵਿੱਚ ਉਹ ਬਤੌਰ ਨਿਰਮਾਤਾ ਨਿਰਦੇਸ਼ਕ ਵੀ ਆਪਣੀਆਂ ਦੋ ਫ਼ਿਲਮਾਂ “ਮੌਜ ਮਸਤੀਆਂ” ਅਤੇ “ਫਾਇਨਲ ਲਿਸਟ” ਲੈ ਕੇ ਆਵੇਗਾ। ਉਹਨਾਂ ਦਾ ਕਹਿਣਾ ਹੈ ਕਿ ਉਹਨਾਂ ਦੇ ਗੀਤਾਂ ਵਾਂਗ ਹੀ ਉਸਦੀ ਫਿਲਮਾਂ ਵੀ ਅਰਥ ਭਰਪੂਰ ਹੋਣਗੀਆਂ । ਕਲਾ ਖੇਤਰ ਵਿੱਚ ਉਸਨੇ ਹਮੇਸ਼ਾ ਹੀ ਕੁਝ ਵੱਖਰਾ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ ਜੋ ਪ੍ਰਵਾਨ ਵੀ ਚੜੀ ਹੈ।