ਥਾਣਾ ਸਦਰ ਰੂਪਨਗਰ ਪੁਲੀਸ ਵੱਲੋਂ ਲੋਹਗੜ੍ਹ ਫਿੱਡੇ ਵਿਖੇ ਸਥਿਤ ਭਾਰਤ ਪਟਰੌਲੀਅਮ ਕਾਰਪੋਰੇਸ਼ਨ ਲਿਮ. ਅਤੇ ਮੋਹਨ ਟਰਾਂਸਪੋਰਟ ਕੰਪਨੀ ਦੇ ਮੈਨੇਜਰ ਅਤੁਲ ਕੁਮਾਰ ਅਤੇ ਉਨ੍ਹਾਂ ਦੇ ਡਰਾਇਵਰ ਅਤੇ ਹੋਰ ਸਟਾਫ ਮੈਂਬਰਾਂ ਨਾਲ ਕੁੱਟਮਾਰ ਕਰਕੇ ਲੁੱਟਖੋਹ ਕਰਨ ਸਬੰਧੀ 18 ਮਈ 2022 ਨੂੰ ਦਰਜ ਹੋਏ ਕੇਸ ਦੇ ਸਬੰਧ ਵਿੱਚ ਦੋ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਥਾਣਾ ਸਦਰ ਰੂਪਨਗਰ ਦੇ ਐਸ.ਐਚ.ਓ. ਰੋਹਿਤ ਸ਼ਰਮਾ ਨੇ ਦੱਸਿਆ ਕਿ ਸ਼ਿਕਾਇਤਕਰਤਾ ਅਤੁੱਲ ਕੁਮਾਰ ਦੇ ਬਿਆਨਾਂ ਦੇ ਆਧਾਰ ਤੇ ਗੁਰਮੀਤ ਸਿੰਘ ਉਰਫ ਮੀਤ ਵਾਸੀ ਦਬੁਰਜੀ ਅਤੇ ਪਰਮਜੀਤ ਸਿੰਘ ਉਰਫ ਪੰਮੂ ਵਾਸੀ ਲੋਹਗੜ੍ਹ ਫਿੱਡੇ ਅਤੇ ਹੋਰਨਾਂ ਵਿਅਕਤੀਆਂ ਦੇ ਖਿਲਾਫ ਅਧੀਨ ਧਾਰਾ 323, 379 ਬੀ, 385, 148, 149, 120 ਬੀ ਆਈ.ਪੀ.ਸੀ. ਤਹਿਤ ਕੇਸ ਦਰਜ ਰਜਿਸਟਰ ਹੋਇਆ ਸੀ ਕਿ ਪਰਮਜੀਤ ਸਿੰਘ ਉਕਤ ਅਤੇ ਗੁਰਮੀਤ ਸਿੰਘ ਆਪਣੇ ਹੋਰ ਸਾਥੀਆਂ ਸਮੇਤ ਅੰਬੂਜਾ ਸੀਮਿੰਟ ਫੈਕਟਰੀ ਦੇ ਬਾਹਰ ਮੋਹਨ ਟਰਾਂਸਪੋਰਟ ਕੰਪਨੀ ਲੋਹਗੜ੍ਹ ਫਿੱਡੇ ਅਤੇ ਬੀ.ਪੀ.ਸੀ.ਐਲ. ਪਟਰੌਲ ਪੰਪ ਲੋਹਗੜ੍ਹ ਫਿੱਡੇ ਦੇ ਮੈਨੇਜਰ ਅਤੁੱਲ ਕੁਮਾਰ ਜੋ ਉਸ ਸਮੇਂ ਬੈਠਾ ਨਕਦੀ ਗਿਣ ਰਿਹਾ ਸੀ, ਪਾਸ ਉਸ ਦੇ ਡਰਾਇਵਰ ਨੂੰ ਲੈ ਕੇ ਆਏ ਅਤੇ ਉੱਥੇ ਗੁੰਡਾ ਗਰਦੀ ਕਰਦੇ ਹੋਏ ਅਤੁੱਲ ਕੁਮਾਰ ਅਤੇ ਉਸ ਦੇ ਸਟਾਫ ਮੈਂਬਰਾਂ ਤੇ ਹਮਲਾ ਕਰਕੇ ਅਤੁੱਲ ਕੁਮਾਰ ਦੇ ਹੱਥ ਤੇ ਲੱਗੀ ਐਪਲ ਕੰਪਨੀ ਦੀ ਘੜੀ, ਗਲ ਵਿੱਚ ਪਾਈ ਸੋਨੇ ਦੀ ਚੈਨ, 1 ਲੱਖ 45 ਹਜ਼ਾਰ ਰੁਪਏ ਦੀ ਨਕਦ ਰਕਮ ਅਤੇ ਇੱਕ ਟਰੱਕ ਨੰਬਰੀ ਐਚ.ਪੀ.19 ਬੀ-1679 ਡਰਾ ਧਮਕਾ ਕੇ ਖੋਹ ਕੇ ਲੈ ਗਏ ਅਤੇ ਕੁੱਟਮਾਰ ਵੀ ਕੀਤੀ ਸੀ।
ਉਨ੍ਹਾਂ ਦੱਸਿਆ ਕਿ ਮੁਕੱਦਮਾ ਹਜਾ ਵਿੱਚ 1 ਫਰਵਰੀ ਨੂੰ 2 ਮੁਲਜ਼ਮਾਂ ਗੁਰਮੀਤ ਸਿੰਘ ਉਰਫ ਮੀਤ ਵਾਸੀ ਦਬੁਰਜੀ ਅਤੇ ਪਰਮਜੀਤ ਸਿੰਘ ਉਰਫ ਪੰਮੂ ਵਾਸੀ ਲੋਹਗੜ੍ਹ ਫਿੱਡੇ ਨੂੰ ਹਸਬ ਜਾਬਤਾ ਅਨੁਸਾਰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਅਤੇ ਬਾਕੀ ਮੁਲਜ਼ਮਾਂ ਨੂੰ ਜਲਦੀ ਹੀ ਗ੍ਰਿਫਤਾਰ ਕਰ ਲਿਆ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਸਾਰੀ ਵਾਰਦਾਤ ਘਟਨਾ ਸਥਾਨ ਤੇ ਲੱਗੇ ਸੀ.ਸੀ.ਟੀ.ਵੀ. ਕੈਮਰਿਆਂ ਵਿੱਚ ਕੈਦ ਹੈ। ਜਿਸ ਸਬੰਧੀ ਪੜਤਾਲ ਕੀਤੀ ਜਾ ਰਹੀ ਹੈ ਅਤੇ ਪੜਤਾਲ ਪੂਰੀ ਹੋਣ ਉਪਰੰਤ ਬਣਦੀ ਕਾਰਵਾਈ ਅੱਗੇ ਅਮਲ ਵਿੱਚ ਲਿਆਂਦੀ ਜਾਵੇਗੀ।