ਬੀਤੇ ਦਿਨੀਂ ਵੱਖ-ਵੱਖ ਰੇਲਵੇ ਲਾਈਨਜ਼ ਤੋਂ ਰੇਲਵੇ ਲਾਈਨਰ ਤੇ ਰੇਲਵੇ ਕਲਿੱਪ ਚੋਰੀ ਕਰਨ ਵਾਲੇ ਗਿਰੋਹ ਦੇ ਤਿੰਨ ਕਥਿਤ ਦੋਸ਼ੀਆਂ ਨੂੰ ਪੁਲਿਸ ਵੱਲੋਂ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਅਤੇ ਕਾਬੂ ਕੀਤੇ ਕਥਿਤ ਦੋਸ਼ੀਆਂ ਪਾਸੋਂ ਚੋਰੀ ਕੀਤੇ 220 ਰੇਲਵੇ ਕਲਿੱਪ ਤੇ 230 ਰੇਲਵੇ ਲਾਈਨਰ ਬਰਾਮਦ ਕੀਤੇ ਗਏ ਹਨ। ਇਹ ਜਾਣਕਾਰੀ ਡੀ.ਐਸ.ਪੀ. ਬਸੀ ਪਠਾਣਾ ਸ਼੍ਰੀ ਜੰਗਜੀਤ ਸਿੰਘ ਨੇ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਦਿੱਤੀ।
ਉਨ੍ਹਾਂ ਦੱਸਿਆ ਕਿ ਬੀਤੇ ਦਿਨੀਂ ਰੇਲਵੇ ਲਾਈਨ ਤੋਂ ਰੇਲਵੇ ਲਾਈਨਰ ਤੇ ਰੇਲਵੇ ਕਲਿੱਪ ਚੋਰੀ ਹੋ ਗਏ ਸਨ ਜਿਸ ਸਬੰਧੀ ਸ਼ੋਸਲ ਮੀਡੀਆ ’ਤੇ ਵੀ ਗਲਤ ਪ੍ਰਚਾਰ ਸ਼ੁਰੂ ਹੋ ਗਿਆ ਸੀ।ਡੀ.ਐਸ.ਪੀ. ਜੰਗਜੀਤ ਸਿੰਘ ਨੇ ਕਿਹਾ ਕਿ ਥਾਣਾ ਸਰਹਿੰਦ ਦੀ ਪੁਲਿਸ ਵੱਲੋਂ 10 ਅਪ੍ਰੈਲ ਨੂੰ ਧਾਰਾ 457,380, 411 ਤਹਿਤ ਮੁਕੱਦਮਾ ਨੰ: 47 ਦਰਜ਼ ਕੀਤਾ ਗਿਆ ਸੀ ।
ਇਸ ਵਿੱਚ ਕਥਿਤ ਦੋਸ਼ੀ ਸੋਮਾ ਸਿੰਘ ਪੁੱਤਰ ਮਹਿੰਦਰ ਸਿੰਘ ਵਾਸੀ ਪਿੰਡ ਹੰਸਾਲੀ ਥਾਣਾ ਬਡਾਲੀ ਆਲਾ ਸਿੰਘ, ਫ਼ਤਹਿਗੜ੍ਹ ਸਾਹਿਬ, ਸੋਨੂੰ ਸੋਲੰਕੀ ਪੁੱਤਰ ਮੇਘ ਰਾਜ ਸੋਲੰਕੀ ਵਾਸੀ ਪਿੰਡ ਧਿਰਾਊਂ ਜਿਲ੍ਹਾ ਬੁਲੰਦ ਸ਼ਹਿਰ ਯੂ.ਪੀ. ਜੋ ਕਿ ਲੂਣ ਮਿਰਚ ਵਾਲੀ ਗਲੀ ਸਰਹਿੰਦ ਤੋਂ ਕਾਬੂ ਕੀਤੇ ਗਏ ਹਨ, ਨੇ ਪੁਲਿਸ ਤਫਤੀਸ਼ ਵਿੱਚ ਮੰਨੇ ਸਨ ਕਿ ਉਨ੍ਹਾਂ ਨੇ ਰੇਲਵੇ ਲਾਈਨ ਚੋਲਟੀ ਖੇੜੀ ਤੋਂ ਰੇਲਵੇ ਲਾਈਨਰ ਅਤੇ ਰੇਲਵੇ ਕਲਿੱਪ ਚੋਰੀ ਕੀਤੇ ਸਨ।
ਕਥਿਤ ਦੋਸ਼ੀਆਂ ਨੇ ਇਹ ਵੀ ਮੰਨਿਆ ਕਿ ਚੋਰੀ ਕੀਤਾ ਸਮਾਨ ਕਬਾੜੀਆ ਨੇਕ ਰਾਜ ਨੂੰ ਵੇਚ ਦਿੱਤਾ ਸੀ, ਜਿਸ ਨੂੰ ਕਿ ਪੁਲਿਸ ਵੱਲੋਂ ਕਾਬੂ ਕਰ ਲਿਆ ਗਿਆ ਹੈ।ਸ. ਜੰਗਜੀਤ ਸਿੰਘ ਨੇ ਦੱਸਿਆ ਕਿ ਥਾਣਾ ਬਡਾਲੀ ਆਲਾ ਸਿੰਘ ਵਿਖੇ ਮਿਤੀ 4-6-2022 ਨੂੰ ਆਈ.ਪੀ.ਸੀ. ਦੀ ਧਾਰਾ 379,427 ਮੁਕੱਦਮਾ ਨੰ: 51 ਦਰਜ਼ ਕੀਤਾ ਗਿਆ ਸੀ ਜਿਸ ਮੁਤਾਬਕ ਨਾ ਮਾਲੂਮ ਵਿਅਕਤੀਆਂ ਵੱਲੋਂ 3 ਤੇ 4 ਜੂਨ ਦੀ ਦਰਮਿਆਨੀ ਰਾਤ ਨੂੰ ਪਿੰਡ ਚੋਲਟੀ ਖੇੜੀ ਰੇਲਵੇ ਕਿਲੋਮੀਟਰ ਨੰ: 6/12 ਤੇ 8/20 ਤੱਕ ਕੁੱਲ 400 ਰੇਲਵੇ ਲਾਈਨਰ਼ ਅਤੇ ਕੁੱਲ 400 ਰੇਲਵੇ ਕਲਿੱਪ ਚੋਰੀ ਕੀਤੇ ਸਨ ਅਤੇ ਇਸ ਤੋਂ ਪਹਿਲਾਂ 8 ਤੇ 9 ਮਈ ਦੀ ਦਰਮਿਆਨੀ ਰਾਤ ਨੂੰ ਰੇਲਵੇ ਕਿਲੋਮੀਟਰ 6/6 ਤੋਂ 6/8 ਤੱਕ ਪਿੰਡ ਚੋਲਟੀ ਖੇੜੀ ਤੋਂ ਕੁੱਲ 60 ਰੇਲਵੇ ਲਾਈਨਰ ਤੇ 60 ਰੇਲਵੇ ਕਲਿੱਪ ਚੋਰੀ ਕੀਤੇ ਗਏ ਸਨ।
ਡੀ.ਐਸ.ਪੀ. ਜੰਗਜੀਤ ਸਿੰਘ ਨੇ ਦੱਸਿਆ ਕਿ ਪੁਲਿਸ ਨੇ ਮੁਕੱਦਮਾ ਦਰਜ਼ ਕਰਕੇ ਸਬ ਇੰਸਪੈਕਟਰ ਅਰਸ਼ਦੀਪ ਸ਼ਰਮਾ ਮੁੱਖ ਅਫਸਰ ਥਾਣਾ ਬਡਾਲੀ ਆਲਾ ਸਿੰਘ ਤੇ ਏ.ਐਸ.ਆਈ. ਜਗਰੂਪ ਸਿੰਘ ਦੀ ਟੀਮ ਬਣਾ ਕੇ ਦੋਸ਼ੀਆਂ ਨੂੰ ਨਾਭਾ ਦੀ ਨਵੀਂ ਜੇਲ੍ਹ ਤੋਂ ਪ੍ਰੋਡੈਕਸ਼ਨ ਵਰੰਟ ’ਤੇ ਲਿਆ ਕੇ ਮਾਨਯੋਗ ਅਦਾਲਤ ਪਾਸੋਂ ਪੁਲਿਸ ਰਿਮਾਂਡ ਹਾਸਲ ਕਰਕੇ ਕਥਿਤ ਦੋਸ਼ੀਆਂ ਸੋਮਾ ਸਿੰਘ ਤੋਂ 60 ਰੇਲਵੇ ਕਲਿੱਪ ਅਤੇ 65 ਰੇਲਵੇ ਲਾਈਨਰ ਅਤੇ ਸੋਨੂੰ ਸੋਲੰਕੀ ਤੋਂ 65ਰੇਲਵੇ ਕਲਿੱਪ ਅਤੇ 65 ਰੇਲਵੇ ਲਾਈਨਰ ਅਤੇ ਕਬਾੜੀ ਨੇਕ ਰਾਮ ਤੋਂ 85 ਰੇਲਵੇ ਕਲਿੱਪ ਤੇ 100 ਰੇਲਵੇ ਲਾਈਨਰ ਬਰਾਮਦ ਕੀਤੇ ਗਏ। ਇਸ ਤਰ੍ਹਾ ਕੁੱਲ 220 ਰੇਲਵੇ ਕਲਿੱਪ ਅਤੇ 230 ਰੇਲਵੇ ਲਾਈਨਰ ਬਰਾਮਦ ਕੀਤੇ ਗਏ। ਉਨ੍ਹਾਂ ਦੱਸਿਆ ਕਿ ਕਥਿਤ ਦੋਸ਼ੀ ਪੁਲਿਸ ਰੀਮਾਂਡ ਤੇ ਹਨ ਅਤੇ ਉਨ੍ਹਾਂ ਤੋਂ ਹੋਰ ਡੁੰਘਾਈ ਨਾਲ ਪੁਛਗਿਛ ਕੀਤੀ ਜਾ ਰਹੀ ਹੈ।